Read fon Ezekiyɛ́li 22 Bible Online

Ezekiyɛ́li 22 - fon bible

Ezekiyɛ́li 22

¹Mawu Mavɔmavɔ ɖɔ nú mì ɖɔ:

²“Hwɛ gbɛtɔ́, hwɛ ɔ́, blǒ hwiɖée ɖó bó ná ɖɔ hwɛ xá Jeluzalɛ́mu mɛhutɔ́ toxo ɔ́; ma xo nǔ kpɔ́n ó. Ɖɔ nǔ baɖabaɖa e é dó sin lɛ́ɛ bǐ.

³Ɖɔ nǔ e nyɛ Aklúnɔ Mavɔmavɔ ɖɔ é n'i. Ɖɔ n'i ɖɔ: Toxo ɖé wɛ a nyǐ bɔ mɛ towe lɛ́ɛ nɔ́ ɖo mɛ hu wɛ; nǔ énɛ́ e wa wɛ yě ɖe ɔ́, hwi wú wa nǔ dó wɛ yě ɖe, ɖó hwenu e è nǎ gba we ɔ́ sín nǔ sɔ́ wɛ yě ɖe mɔ̌. Yě lǐ vodún tɛnmɛ tɛnmɛ lɛ́ɛ bó ɖu su nú ayǐkúngban towe.

⁴Mɛ e a hu lɛ́ɛ ɔ́, hwɛ tɔn ɖo kɔ nú we. Vodún e a lǐ lɛ́ɛ hɛn we blí. Nǔ énɛ́ lɛ́ɛ e a blǒ lɛ́ɛ zɔ́n bɔ è sɛ azǎn e è nǎ dó ɖó hwɛ nú we ɔ́ wá do, bɔ xwe e xwe è nǎ fó xó towe ɔ́ kó ja. Énɛ́ ɔ́ wú wɛ un ná jó we nú togun ɖě lɛ́ɛ, bɔ yě ná nɔ zun we; akɔta ɖě lɛ́ɛ bǐ ná nɔ́ ɖɔ nyɔmɛ wǔ we.

⁵Nǔ hannyahannya e wa wɛ a ɖe ɔ́ wɛ zɔ́n bɔ wi towe kɔ́n, bɔ to e ɖo zɔ nú we lɛ́ɛ kpó to e sɛkpɔ́ we lɛ́ɛ kpó ná nɔ́ ko we.

⁶“Izlayɛ́li, mɛ e nyí gǎn ɖo ayǐkúngban towe jí lɛ́ɛ ɔ́, yě nɔ́ mɔ ɖɔ émí wɛ ɖó acɛ bó nɔ́ hu mɛ.

⁷ È nɔ kpɔ́n nukún mɛ nú tɔ́ mɛtɔn kpó nɔ mɛtɔn kpó ɖo ayǐkúngban towe jí; è nɔ xo jǒnɔ lɛ́ɛ ɖu, è nɔ táfú tɔ́cyɔvǐ lɛ́ɛ kpó asúkúsi lɛ́ɛ kpó.

⁸ È nɔ ɖó sísí ɖěbǔ nú tɛn e nyí ce lɛ́ɛ é ǎ; è nɔ nyi gbɔjɛzánsɛ́n ɔ́ ǎ.

⁹Mɛ ɖé lɛ́ɛ ɖo ayǐkúngban towe jí, bó nɔ́ ɖɔ xó nyanya dó nɔzo yětɔn lɛ́ɛ wú, bó ná hu yě. Mɛ towe lɛ́ɛ nɔ́ ɖu nǔ e è xwlé vodún é, gbɔn só jí só jí; nǔ baɖabaɖa wɛ mɛ lɛ́ɛ nɔ́ dó sin ɖo ayǐkúngban towe jí.

¹⁰ Yě mɛ ɖé lɛ́ɛ nɔ́ ba tɔ́ yětɔn sín asi, abǐ yě nɔ́ hwlɛ́n kan xá nyɔ̌nu e jɛ glegbe é bó nɔ́ ɖó xó xá.

¹¹Nǔ baɖabaɖa e yě nɔ́ dó sin lɛ́ɛ ɖě lɛ́ɛ ɖíe: mɛ ɖě nɔ́ ba nɔzo tɔn sín asi; mɛ ɖě nɔ́ ɖó xó xá vǐ tɔn sín asi; mɛ ɖě nɔ́ hwlɛ́n kan xá nɔví tɔn, tɔ́ tɔn ví, bó nɔ́ ɖó xo xá.

¹² Yě nɔ́ ɖu nǔ ɖo nǔ mɛ, bó nɔ́ kɔn kanjɔ kɔn nyi ayǐ; yě nɔ́ sa akwɛ́ nú mɛ; yě nɔ́ táfú to yětɔn mɛ nu lɛ́ɛ, bó nɔ́ jɛ dɔkun. Yě nɔ́ wɔn mì. Xó e nyɛ Aklúnɔ Mavɔmavɔ ɖɔ ɔ́ nɛ́.

¹³“Jeluzalɛ́munu e mi, din ɔ́, un myɔ́ akpotokwín dó mi jí, ɖó nukúnkɛndídó mitɔn kpó mɛhuhu mitɔn kpó wú.

¹⁴Hwenu e un ná húzú kpan nukɔn mi ɔ́, mi ná sixú kpan akɔ́n a? Awakanmɛ mitɔn ná sixú syɛ́n bɔ mi ná nɔ te nukɔn ce a? Nyɛ Mawu Mavɔmavɔ wɛ ɖɔ bó ká ná bló.

¹⁵Un ná gba mi dó kpé akɔta ɖě lɛ́ɛ mɛ, bɔ mi ná gbɔn to lɛ́ɛ bǐ mɛ. Un ná ɖó nǔ kwíji kwíji e wa wɛ mi ɖe lɛ́ɛ bǐ te.

¹⁶Mi ná ɖu winnyá ɖo akɔta ɖě lɛ́ɛ nukɔn ɖó nǔ e mi nɔ dó sin lɛ́ɛ wú; hwenɛ́nu lo ɔ́, mi ná tunwun ɖɔ nyɛ wɛ nyí Mawu Mavɔmavɔ.”

¹⁷Mawu Mavɔmavɔ ɖɔ nú mì ɖɔ:

¹⁸“Hwɛ gbɛtɔ́ e, Izlayɛ́li ví lɛ́ɛ bǐ wɛ cí nǔ e má sɔ́ xɔ akwɛ́ ɖé ǎ é ɖɔhun ɖo nukún ce mɛ. Yě cí nǔ kwíji e è nɔ xo zo dó kpatágan, ganvɔ, aflélé abǐ gan, bɔ é nɔ́ gosín mɛ é ɖɔhun.

¹⁹Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Mi bǐ wɛ cí nǔ kwíji énɛ́ e má sɔ́ xɔ akwɛ́ ɖé ǎ é ɖɔhun, bɔ un ná kplé mi bǐ ɖó Jeluzalɛ́mu toxo ɔ́ tɛ́ntin.

²⁰Lě e è nɔ kplé kpatágan, ganvɔ, gan, sunmí abǐ aflélé dó myɔ mɛ bó nɔ́ xo zo dó, bó nɔ́ sínsín gbɔn é wɛ un ná nɔ adǎn jí, bó ná kplé mi bǐ kpó xomɛsin kpó, bó sínsín ɖo myɔ nu.

²¹Un ná kplé mi, bó ná sɔ́ xomɛsin ce dó xo zo dó mi, bɔ mi ná sínsín, ɖo Jeluzalɛ́mu toxo ɔ́ tɛ́ntin.

²²Mi ná cí kpatágan e ɖo sínsín sínsín wɛ ɖo myɔ mɛ é ɖɔhun, ɖo Jeluzalɛ́mu toxo ɔ́ mɛ. Énɛ́ ɔ́, mi ná tunwun ɖɔ nyɛ Mawu Mavɔmavɔ wɛ ɖo xomɛsin ce ɖe xlɛ́ mi wɛ.”

²³Mawu Mavɔmavɔ lɛ́ ɖɔ nú mì ɖɔ:

²⁴“Hwɛ gbɛtɔ́ e, ɖɔ nú Izlayɛ́li ví lɛ́ɛ ɖɔ ayǐkúngban yětɔn cí ayǐkúngban e è ma slá wǔ ná ǎ é ɖɔhun; azǎn e gbe un ɖo xomɛsin jí ɔ́, Izlayɛ́li to ɔ́ cí to e mɛ jǐ ma ja dó, bó ɖe nǔ kwíji kwíji sín mɛ ǎ é ɖɔhun.

²⁵Gbeyíɖɔ yětɔn lɛ́ɛ nɔ́ ɖó gbe kpɔ́ bó nɔ́ dó nǔ sin; yě cí kinnikínní e wlí lan bó ɖo vǔnvún ɖu wɛ, bó ɖo gbe dó ɖ'é kɔn wɛ é ɖɔhun; yě nɔ́ hu mɛ lɛ́ɛ, yě nɔ́ yí dɔkun mɛ lɛ́ɛ tɔn kpó nǔ xɔ akwɛ́ mɛ lɛ́ɛ tɔn kpó; yě nɔ́ ɖo mɛ lɛ́ɛ hu wɛ bɔ asúkúsi ɖo kpɔ́.

²⁶ Vɔ̌sánú-xwlémawutɔ́ yětɔn lɛ́ɛ nɔ gba sɛ́n ce lɛ́ɛ; yě nɔ́ ɖu su nú tɛn e è sɔ́ ɖó vo nú mì lɛ́ɛ. Yě tunwun nǔ e è sɔ́ ɖó vo nú mì é ɖo nǔ e nyí nǔ yǎyánɔ é mɛ ǎ. Yě kplɔ́n mɛ lɛ́ɛ nú yě ná tunwun nǔ e nyí nǔ mímɛ́ ɔ́ ɖó vo nú nǔ e nyí nǔ blíblí é ǎ; yě ɖésúnɔ jló bó gɔn gbɔjɛzánsɛ́n ɔ́ nyi; énɛ́ ɔ́, un sɔ́ nyí nǔɖé ɖo yě nukún mɛ ǎ.

²⁷Togun ɔ́ sín gǎn lɛ́ɛ cí hla e wlí lan bó ɖo vǔnvún ɖu wɛ é ɖɔhun. Yě nɔ́ kɔn kanjɔ kɔn nyi ayǐ; yě nɔ́ hu mɛ lɛ́ɛ bó nɔ́ bɛ́ nǔ yětɔn.

²⁸Gbeyíɖɔ yětɔn lɛ́ɛ nɔ́ bú nǔ dó nǔ nyanya énɛ́ lɛ́ɛ e dó sin wɛ yě ɖe lɛ́ɛ bǐ. Nǔ e yě má mɔ ǎ é wɛ yě nɔ́ ɖɔ, bó nɔ́ ɖo adingban ɖó kpé wɛ. Yě nɔ́ ɖɔ émí ɖo wɛn ce dó wɛ, nyɛ Mawu Mavɔmavɔ ka ɖɔ xó ɖěbǔ nú yě ǎ.

²⁹Mɛ e ɖo to ɔ́ mɛ lɛ́ɛ nɔ́ ɖo adǎka xo wɛ; yě nɔ́ ja ajo, yě nɔ́ táfú wamamɔnɔ lɛ́ɛ kpó gbɛ̌dónánɔ lɛ́ɛ kpó; yě nɔ́ gba acɛ jǒnɔ lɛ́ɛ wú.

³⁰Un ba mɛ e ná sixú yí gbe ɖo yě mɛ bó mɛ ahohó lɛ́ lɛ̌ dó to é, mɛ e ná nɔ te ɖo fí e ahohó ɔ́ mu ɖe é ɖo nukɔn ce é, bó ná jɛ ahwan to ɔ́ jí, bónú un ma gba to ɔ́ ó é. Un ba mɛ mɔ̌hun ɖo yě mɛ, un ka mɔ mɛɖé ǎ.

³¹Énɛ́ ɔ́ wú ɔ́, un ná ɖe adǎn e jí un ɖe ɔ́ xlɛ́ yě; un ná sɔ́ xomɛsin ce sín zo dó fyɔ́ yě bǐ, bó sú gbɛ nyanya e yě zán ɔ́ sín axɔ́ yě. Xó e nyɛ Aklúnɔ Mavɔmavɔ ɖɔ ɔ́ nɛ́.”