Read fon Ezekiyɛ́li 24 Bible Online

Ezekiyɛ́li 24 - fon bible

Ezekiyɛ́li 24

¹Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn tɛ́nnɛgɔ́ ɔ́ mɛ, ɖo azǎn wǒgɔ́ ɔ́ e ɖo sun wǒgɔ́ ɔ́ xwe énɛ́ xwe é tɔn gbe ɔ́, Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ e, wlǎn azǎn e gbe mǐ ɖe égbé é, sun e mɛ mǐ ɖe é, xwe e mɛ mǐ ɖe ɔ́, ɖó égbé wɛ axɔ́sú Babilɔ́nu tɔn ná xá Jeluzalɛ́mu toxo ɔ́.

³A nǎ dó lǒ ɖokpó nú togun ce tónúmasetɔ́ ɔ́, bó ná ɖɔ n'i ɖɔ nyɛ Aklúnɔ Mavɔmavɔ wɛ dó lǒ ɔ́ sɛ́ dó e. Lǒ ɔ́ ɖíe: ‘Sɔ́ ganzɛ́n ɖokpó ɖó ado jí, bó kɔn sin d'é mɛ;

⁴a nǎ fɔ langó, lan kloklo e nɔ nyɔ́ ɖu lɛ́ɛ d'é mɛ, a nǎ fɔ asá kpódó abɔ̌ kpó, kpódó lanxú e nɔ́ nyɔ́ ɖu ganjí lɛ́ɛ kpó d'é mɛ káká bɔ é ná gɔ́.

⁵Gbɔ̌ ɖagbe e ɖo gbɔ̌ lɛ́ɛ mɛ é wɛ a nǎ hu; a nǎ to nakí dó ganzɛ́n ɔ́ glɔ́ ganjí, bó ná ɖa lan ɔ́ káká bɔ xú lɛ́ɛ lɔ ná bí.

⁶Xó e nyɛ Aklúnɔ Mavɔmavɔ ɖo ɖiɖɔ nú Jeluzalɛ́mu wɛ ɔ́ ɖíe: Heelú toxo e mɛ gbɛtɔ́ kanjɔ gɔ́ é. Ganzɛ́n e jɛ ko bɔ è ma sixú ɖe ko sín wú ǎ é ɖɔhun wɛ é cí. Fɔ lan lɛ́ɛ ɖokpó ɖokpó sín zɛ̌n ɔ́ mɛ; ma sɔ́ ɖě bó jó ɖě dó ó.

⁷Kanjɔ e Jeluzalɛ́mu kɔn nyi ayǐ é kpo ɖo toxo ɔ́ mɛ, ɖó awǐnnya jí wɛ é kɔn kanjɔ ɔ́ kɔn nyi; é kɔn nyi kɔ́ mɛ bónú ayǐkúngban ná nu ǎ, mɛɖé ká dɔn kɔ́ d'é mɛ ǎ.

⁸Nyɛ ka jó kanjɔ ɔ́ dó nyi awǐnnya ɔ́ jí, fí e é ná nɔ bó ma ná bú wǎn ǎ é, fí e é ná nɔ bó ná dó xomɛ sin nú mì, bónú má ba hlɔn tɔn é.

⁹Énɛ́ ɔ́ wú wɛ nyɛ Aklúnɔ Mavɔmavɔ ɖɔ: Heelú toxo e mɛ gbɛtɔ́ kanjɔ gɔ́ é, ɖó un ná bló agba ɖaxó ɖokpó.

¹⁰To nakí d'agba ɔ́ glɔ́ ganjí bó flɔ́ myɔ ɔ́. Ɖa lan ɔ́ ní bí ganjí, bó kɔn nǔhwɛ́nkún d'é jí; jǒ xú lɛ́ɛ dó nú bǐ ní fyɔ́ bó ji akán.

¹¹Énɛ́ ɔ́ gúdo ɔ́, a nǎ sɔ́ ganzɛ́n vɔ̌tɔ́ ɔ́ ɖó myɔkán ɔ́ jí, bɔ é ná hun myɔ káká bó ná myá hɛɛ, bónú nǔ kwíji e ɖ'é mɛ lɛ́ɛ bǐ ná fyɔ́, bónú ko e é jɛ ɔ́ ná fyɔ́.’

¹²Lo ɔ́, tagba énɛ́ lɛ́ɛ bǐ ɔ́, nǔ yǎyá wɛ. Nǔ e kó jɛ ko sɔ mɔ̌ ɔ́, myɔ sixú ɖe síin ǎ.

¹³Jeluzalɛ́mu, nǔ gblégblé e a dǒ sin lɛ́ɛ wɛ hɛn we blí; un jló ná lɛ we bɔ a nǎ mɛ́, a ka lɔn ǎ. Énɛ́ wú ɔ́, a sɔ́ ná mɛ́ gbeɖé káká có nú xomɛsin ce ná jɛ te dó jǐ we ǎ.

¹⁴Nyɛ Mawu Mavɔmavɔ wɛ ɖɔ xó, bɔ nǔ e un ɖɔ ɔ́ un ná bló. Un ná dó nǔ sin, ma kpɔ́n gǔdo; é ká ná vɛ́ nú mì ǎ; mɛ nú ká ná blá wǔ nú mì ǎ. Un ná ɖó hwɛ nú we, ɖó nǔ e a dó sin lɛ́ɛ kpó walɔ towe kpó wú. Xó e nyɛ Aklúnɔ Mavɔmavɔ ɖɔ ɔ́ nɛ́.”

¹⁵Mawu Mavɔmavɔ ɖɔ nú mì ɖɔ:

¹⁶“Hwɛ gbɛtɔ́ e, nyɔ̌nu e a yǐ wǎn ná ganjí ɔ́, un ná sɔ́ ɛ sín akpá towe vawun. A ka ná nɔ aluwɛ mɛ ǎ, a ka ná ya avǐ ǎ, ɖasin kwín ɖokpó ka ná kun sín nukún towe jí ǎ.

¹⁷Ya avǐ dó xo mɛ; cyɔ kú mɛ ɔ́, yɛsu e è nɔ fɔ ɔ́, ma fɔ ɖě ó. Lo ɔ́, sɔ́ tablá towe ɖó ta, bó dó afɔkpa towe. Ma sɔ́ nǔ cyɔ́n nukún mɛ ó, ma ka ɖu aluwɛ mɛ nǔɖuɖu ó.”

¹⁸Un ɖɔ xó ɔ́ nú togun ɔ́ zǎnzǎn, bɔ gbadanu ɔ́, asi ce ka kú. Ayǐhɔ́ngbe ɔ́, un wa nǔ lě e Mawu zɔ́n mì gbɔn é.

¹⁹Mɛ lɛ́ɛ ɖɔ nú mì ɖɔ nyi ní tín nǔ e wú nyi ɖo mɔ̌ wa wɛ é mɛ nú émí;

²⁰énɛ́ ɔ́, un ɖɔ nú yě ɖɔ: “Wɛn e Mawu Mavɔmavɔ dó mì ɖɔ má dó mi

²¹Izlayɛ́li ví lɛ́ɛ é ɖíe: ‘Nyɛ Aklúnɔ Mavɔmavɔ ɔ́, xwé ce e mi yí wǎn ná ganjí ɔ́, un ná jó dó bɔ è nǎ ɖu su ná; xwé énɛ́ wú wɛ mi ka nɔ ɖo gǔgó wɛ; mi mɔ xwé énɛ́ ɔ́, é nɔ́ víví nú mi; é wɛ nyí nǔ e mi ɖó nukún é. Vǐ mitɔn súnnu kpó nyɔ̌nu kpó e mi jó dó nyi Jeluzalɛ́mu lɛ́ɛ ɔ́, è nǎ hu bǐ.

²²Nǔ cí mɔ̌ ɔ́, mi ná wa nǔ nyɛ ɖɔhun. Mi ná sɔ́ nǔ cyɔ́n nukún mɛ ǎ, mi ka ná ɖu aluwɛ mɛ nǔɖuɖu ǎ.

²³Tablá mitɔn ná ɖo ta nú mi bɔ afɔkpa mitɔn ná ɖo afɔ nú mi. Mi ná nɔ aluwɛ mɛ ǎ, mi ka ná ya avǐ ǎ. Amɔ̌, mi ná jɛ gǒ xú jí, ɖó hwɛ e mi hu lɛ́ɛ wú, bɔ mi ná nɔ́ sa vo ɖo miɖée gɔ́n.

²⁴Nǔ e Ezekiyɛ́li bló ɔ́ ná nyí xlɛ́ ɖokpó nú mi. Hwenu e nǔ e un ɖɔ lɛ́ɛ ná jɛ ɔ́, mi ná wa nǔ é ɖɔhun pɛ́pɛ́pɛ́, énɛ́ ɔ́, mi ná tunwun ɖɔ nyɛ wɛ nyí Aklúnɔ Mavɔmavɔ.’ ”

²⁵Mawu lɛ́ ɖɔ nú mì ɖɔ: “Hwɛ gbɛtɔ́ e, hwɛ ɔ́, ɖǒtó mì: é ná wá su gbe ɖokpó, bɔ un ná yí sinsɛnxɔ e nyí bibɛtɛn yětɔn ɔ́ sín yě sí; un ná yí nǔ e ɖo xomɛhunhun dó nú yě wɛ ɔ́ sín yě sí; un ná yí fí e wú yě ɖo afɔ tɛ ayǐ wɛ, bó ɖo nukún ɖó nǔ wɛ ɔ́ sín yě sí. Un ná lɛ́ yí vǐ yětɔn súnnu kpó nyɔ̌nu kpó sín yě sí.

²⁶Gbe énɛ́ gbe ɔ́, mɛ e ná gán ɖ'é mɛ é ɖokpó ná wá ɖɔ nǔ e jɛ ɔ́ nú we.

²⁷Amɔ̌, hwɛ ɔ́, bɛ́ sín gbe énɛ́ gbe ɔ́, ɖɛ̌ towe ná tún kan. A nǎ jɛ xó ɖɔ jí, bó ná ɖɔ xó xá mɛ e gán ɖo nǔ e jɛ ɔ́ mɛ é. Nǔ e jɛ dó jǐ towe ɔ́ ná nyí xlɛ̌ ɖokpó nú togun ce. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ.”