Read fon Ezekiyɛ́li 25 Bible Online

Ezekiyɛ́li 25 - fon bible

Ezekiyɛ́li 25

¹ Mawu Mavɔmavɔ ɖɔ nú mì ɖɔ:

²“Din ɔ́, hwɛ gbɛtɔ́ e, Amumɔ́ɔ ví lɛ́ɛ gɔ́n wɛ a nǎ yi, bó ná ɖɔ xó e un ɖɔ nú we dó yě wú ɔ́ nú yě.

³Ɖɔ nú yě ɖɔ yě ní ɖótó xó e ɖɔ nú yě wɛ nyɛ Aklúnɔ Mavɔmavɔ ɖe é. Hwenu e è ɖu su nú xwé ce ɔ́, mi ko nǔ hahaha; hwenu e è gba Izlayɛ́li to ɔ́, mi ko nǔ; hwenu e è bɛ̌ Judáa ví lɛ́ɛ yi to ɖěvo mɛ ɔ́, mi ko nǔ.

⁴Énɛ́ ɔ́ wú ɔ́, un ná jó to mitɔn nú mɛ e nɔ gosín zǎnzǎnhwe jí lɛ́ɛ, bɔ yě ná yí; yě ná ɖó gɔnu ɖó ayǐkúngban mitɔn jí; yě ná sá xwé nyi to mitɔn mɛ. Yě wɛ ná ɖu atínsínsɛ́n mitɔn lɛ́ɛ, bó ná nu nyibúnɔ́sin mitɔn lɛ́ɛ.

⁵Un ná sɔ́ Hlaba, tota ɔ́ dó húzú amaɖutɛn nú lǎkúnmí lɛ́ɛ; Amumɔ́ɔ ví lɛ́ɛ sín to ɔ́ bǐ ná húzú gbɔ̌ kpó. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ.

⁶“Ɖó xó e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Ée awě xo Izlayɛ́li ɔ́, é víví nú mi bɔ mi lɔ́n yi jǐ, bó xo kpɛ́. Nǔ énɛ́ e mi bló ɔ́, ɖe lě do e mi gbɛ́ wǎn nú togun ce sɔ ɔ́ xlɛ́.

⁷Énɛ́ ɔ́ wú ɔ́, un ná ɖe hlɔ̌nhlɔ́n ce xlɛ́ mi, bó jó mi nú togun ɖěvo lɛ́ɛ, bɔ yě ná wá bɛ́ nǔ mitɔn lɛ́ɛ bǐ. Togun mitɔn sɔ́ ná tín nyǐ ǎ; mi sɔ́ ná ɖó to ɖě ǎ; un ná gba to mitɔn bǐ gbídígbídí. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ.”

⁸ “Xó e nyɛ Aklúnɔ Mavɔmavɔ ɖɔ ɔ́ ɖíe: Mi Mɔwabu ví lɛ́ɛ kpó Seyíinu lɛ́ɛ kpó ɖɔ: ‘Judáa togun ɔ́, togun ɖé kpowun wɛ élɔ́ nyí togun ɖě lɛ́ɛ bǐ ɖɔhun.’

⁹Énɛ́ wú ɔ́, toxo e nɔ́ zɔ́n, bɔ è ma nɔ sixú byɔ́ Mɔwabu ví lɛ́ɛ sín to ɔ́ mɛ ǎ lɛ́ɛ ɔ́, un ná ɖɔ bɔ è nǎ tɔ́n ahwan bǐ. Un ná gba toxo énɛ́ lɛ́ɛ bǐ ɖě jɛ ɖě gúdo, káká jɛ toxo e nyɔ́ ɖɛkpɛ dóó ɖ'é mɛ lɛ́ɛ jí; è nǎ gba Bɛti-Yesimɔ́ti, è nǎ gba Baalu-Mɛyɔ́ni, bó gba Kiliyatayimu.

¹⁰Un ná jó mɛ e nɔ gosín zǎnzǎnhwe jí lɛ́ɛ dó, bɔ yě ná yí Amumɔ́ɔ ví lɛ́ɛ sín to ɔ́; un ná to ɔ́ yě bɔ é ná nyí yětɔn. Énɛ́ ɔ́, mɛ ɖé sɔ́ ná flín Amumɔ́ɔ ví lɛ́ɛ ɖo akɔta lɛ́ɛ mɛ ǎ.

¹¹Un ná ɖó hwɛ nú Mɔwabu ví lɛ́ɛ, bɔ yě ná tunwun ɖɔ nyɛ wɛ nyí Mawu Mavɔmavɔ.”

¹² “Xó e nyɛ Aklúnɔ Mavɔmavɔ ɖɔ ɔ́ ɖíe: Edɔ́munu lɛ́ɛ[15] ɔ́, hwenu e yě ɖo hlɔn ba togun Judáa tɔn ɔ́ wú wɛ ɔ́, yě wa nǔ zɛ jlɛ̌ wú; énɛ́ wɛ nyí hwɛ bɔ yě hu dó mì.

¹³Énɛ́ wú wɛ nyɛ Aklúnɔ Mavɔmavɔ ɖɔ: Un ná ɖe hlɔ̌nhlɔ́n ce xlɛ́ Edɔ́mu to ɔ́. Un ná hu gbɛtɔ́ kpó kanlin kpó e ɖo to ɔ́ mɛ é bǐ, bó ná sɔ́ to ɔ́ dó húzú gbětótló sín Temani toxo ɔ́ mɛ káká wá Dedáni toxo ɔ́ mɛ. È nǎ hu Edɔ́munu lɛ́ɛ ɖo ahwangbénu.

¹⁴Un ná zɔ́n togun ce Izlayɛ́li, bɔ é ná ba hlɔn Edɔ́munu lɛ́ɛ wú nú mì. Izlayɛ́li ví lɛ́ɛ ná wa nǔ xá yě lě e xomɛ ɖaxó e un sin ɔ́ byɔ́ gbɔn é, bó ná xlɛ́ yě ɖɔ nú è ba xó mì ɔ́, é kún nɔ́ fá ó. Xó e nyɛ Aklúnɔ Mavɔmavɔ ɖɔ é nɛ́.”

¹⁵ “Xó e nyɛ Aklúnɔ Mavɔmavɔ ɖɔ ɔ́ ɖíe: Nǔ e Filisitɛ́ɛn lɛ́ɛ wa ɔ́, hlɔn wɛ yě ba. Yě ba hlɔn kɛntɔ́ yětɔn tɛgbɛ tɔn e yě gbɛ́ wǎn ná lɛ́ɛ wú, bó hu yě bǐ.

¹⁶Énɛ́ wú ɔ́, xó e nyɛ Aklúnɔ Mavɔmavɔ ɖɔ ɔ́ ɖíe: Un ná ɖe hlɔ̌nhlɔ́n ce xlɛ́; un ná hu Keletyɛn e wá ɖo xutó lɛ́ɛ, un ná zɔ́n bɔ è nǎ hu mɛ e kpo bó cí xutó lɛ́ɛ bǐ.

¹⁷Hlɔn e un ná ba yě wú é kpó tó e un ná dɔn nú yě ɔ́ kpó ná dó xɛsi ɖésú. Ényí énɛ́ gbo yě ɔ́, yě ná tunwun ɖɔ nyi wɛ nyí Mawu Mavɔmavɔ.”