Read fon Ezekiyɛ́li 26 Bible Online

Ezekiyɛ́li 26 - fon bible

Ezekiyɛ́li 26

¹ Ée ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ, ɖo azǎn nukɔn tɔn e ɖo sun ɔ́ mɛ ɔ́ gbe ɔ́, Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, Tíinu lɛ́ɛ nɔ́ ko Jeluzalɛ́mu hahaha, bó nɔ́ ɖɔ: ‘Toxo e mɛ mɛ bǐ nɔ́ yi é ɔ́, è gba bǐ hánnyá. Mǐdɛɛ lɛ́ɛ gɔ́n wɛ mɛ bǐ ná wá. Din e è gba Jeluzalɛ́mu toxo ɔ́ bǐ é ɔ́, mǐdɛɛ lɛ́ɛ wɛ ná jɛ dɔkun.’

³Énɛ́ wú wɛ nyɛ Aklúnɔ Mavɔmavɔ ɖɔ: Tíi toxo, un ná wa nǔ xá we, un ná sɛ́ togun wɔ̌buwɔ́bú ɖé lɛ́ɛ dó, bɔ yě ná ɖo adǎn jí xu ɖɔhun bó wá gba we.

⁴Yě ná gba ahohó towe lɛ́ɛ, bó mu kpe gaga e jí mɛ e nɔ cɔ́ toxo ɔ́ lɛ́ɛ nɔ́ nɔ lɛ́ɛ; un ná za fínɛ́ bǐ, bɔ è sɔ́ ná mɔ nǔɖé ɖo fínɛ́ zɛ só ɔ́ kɛ́ɖɛ́ wú ǎ.

⁵Toxo ɔ́ ná húzú fí ɖé kpowun ɖo xu ɔ́ tɛ́ntin, bɔ ɖɔnyitɔ́ lɛ́ɛ ná nɔ́ xyá ɖɔ ɖ'é jí. Xó e nyɛ Aklúnɔ Mavɔmavɔ ɖɔ ɔ́ nɛ́. To ɖěvo mɛ nu lɛ́ɛ ná wá bó vɔ toxo ɔ́ bǐ,

⁶bó ná gba toxo e lɛ́ lɛ̌ dó e gbɔn tɔ ɔ́ tó lɛ́ɛ bǐ. Énɛ́ ɔ́, è nǎ tunwun ɖɔ nyɛ wɛ nyí Mawu Mavɔmavɔ.

⁷“Xó e nyɛ Mawu Mavɔmavɔ lɛ́ ɖɔ ɔ́ ɖíe: Hwi Tíi toxo, un ná kplá axɔ́sú e syɛ́n hú axɔ́sú lɛ́ɛ bǐ é, Babilɔ́nu xɔ́sú Nabukodonɔzɔ́ɔ sín totaligbé, bɔ é ná wá tɔ́n ahwan we. É ja ahwan tɔ́n we gbé ɔ́, é ná hɛn sɔ́, bó ná hɛn ahwankɛkɛ́ví kpó sɔ́xátɔ́ lɛ́ɛ kpó. Ahwangɔnu e é ná hɛn dó wá fun ahwan xá we ɔ́ ná sukpɔ́ ɖésú.

⁸É ná tɔ́n ahwan toxo e ɖo akpá towe, ɖo xutó xutó lɛ́ɛ, bó hu mɛ e gbɔn fí énɛ́ lɛ́ɛ bǐ. Énɛ́ ɔ́ gúdo ɔ́, sɔ́ja lɛ́ɛ ná kplé kɔ́ e gúdo yě ná nɔ bó fun ahwan xá we é; bó ná kun do e mɛ yě ná nɔ bó fun ahwan xá we é, yě ná hɛn gǎglónú yětɔn lɛ́ɛ ɖě bɔdó ɖě wú, bɔ é ná cí dǒ ɖɔhun bɔ yě nɔ gúdo bó fun ahwan xá we.

⁹Yě ná zé mɔ e è nɔ́ dó gba nǔ ɔ́ dó gba ahohó towe lɛ́ɛ, bó ná sɔ́ gankpo dó mu kpe gaga towe e jí mɛ e nɔ cɔ́ toxo towe lɛ́ɛ nɔ́ nɔ lɛ́ɛ.

¹⁰Sɔ́ yětɔn wɔ̌buwɔ́bú lɛ́ɛ ɖo wezun jí xweyǐgbe ɔ́, afúntúntún yětɔn ná vun blá we bǐ. Sɔ́ lɛ́ɛ kpó ahwankɛkɛ́ lɛ́ɛ kpó ɖo dǐndín wɛ ɔ́, toxo towe sín dǒ lɛ́ɛ ná húnhún. Yě ná gbɔn hɔntogbó towe, bó ná byɔ́ toxo towe mɛ kpó hlɔ̌nhlɔ́n kpó lě e è nɔ tɔ́n ali dó toxo ɖé wú, bó nɔ́ byɔ́ mɛ kpó hlɔ̌nhlɔ́n kpó é ɖɔhun.

¹¹Sɔ́ yětɔn lɛ́ɛ ná gbɔn toxo towe sín ali lɛ́ɛ jí, bó ná hɛn bǐ gba; yě ná tɔ́n ahwan we, bó ná hu toví tosi towe lɛ́ɛ, bó ná mu dotín ɖaxó ɖaxó e hɛn nǔmɛsɛn towe sín xɔ ɖó te é.

¹²Yě ná bɛ́ dɔkun towe lɛ́ɛ, yě ná fɔ nǔ towe lɛ́ɛ bǐ. Yě ná mu dǒ towe lɛ́ɛ, bó ná gba xwé towe ɖagbe ɖagbe lɛ́ɛ; yě ná bɛ́ awǐnnya e a dǒ mɛ xɔ lɛ́ɛ, kpó atín e a dǒ gbá xɔ lɛ́ɛ é kpó bǐ kɔn dó xu mɛ, bó za do tɔn nu kɔn dó xu mɛ.

¹³ Un ná ɖó han e ji wɛ a ɖe lɛ́ɛ te; è sɔ́ ná se kanhún towe lɛ́ɛ ɖě sín gbe ǎ.

¹⁴È nǎ sɔ́ toxo towe dó húzú só nǔ ɖ'é má ɖ'é jí, bɔ ɖɔnyitɔ́ lɛ́ɛ ná nɔ́ xyá ɖɔ ɖ'é jí. È ka sɔ́ ná vɔ́ toxo ɔ́ bló ɖó gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”

¹⁵“Xó e nyɛ Aklúnɔ Mavɔmavɔ lɛ́ ɖɔ nú Tíi toxo ɔ́ é ɖíe: Hwenu e è nǎ gba toxo towe, bó hu mɛ e ɖ'é mɛ lɛ́ɛ bǐ, bɔ mɛ e ɖo kúdonu lɛ́ɛ ná ɖo alě ná wɛ ɔ́, mɛ e ɖo tɔtɛ́ntinto mɛ lɛ́ɛ se nǔ e jɛ ɔ́, yě ná sísɔ́.

¹⁶ Axɔ́sú e to yětɔn lɛ́ɛ ɖo xutó lɛ́ɛ ná sí te sín zinkpo yětɔn lɛ́ɛ jí, bó ná ɖe gǎnwu e ɖo kɔ yětɔn é, bó ɖe awu kíkó e ɖo kɔ yětɔn lɛ́ɛ, bɔ xɛsi ná nyí awu bɔ yě ná dó, bó ná jínjɔ́n kɔ́ mɛ; yě ná nɔ́ sísɔ́ bɔ ahwi ná xo yě ɖó nǔ nyanya e jɛ dó wǔ towe ɔ́ wú.

¹⁷Yě ná ji nǔwamɛhan ɖokpó nú we ɖɔ: Yéége! È gba we. Hwi mɛ e nyí toxo nukúnɖéjí ɖokpó ɔ́, è sɔ́ nɔ́ mɔ tɔjíhún towe lɛ́ɛ ɖě ɖo xu jí ǎ. Toví towe lɛ́ɛ ɔ́, mɛ syɛ́nsyɛ́n wɛ yě nyí ɖo xu jí; mɛ bǐ wɛ nɔ́ ɖi xɛsi dó yě wú.

¹⁸Din ɔ́, togun e gbɔn tɔ tó tɔ tó lɛ́ɛ bǐ ɖo sísɔ́sísɔ́ wɛ ɖó a sɔ́ ɖe ǎ; mɛ e ɖo tɔtɛ́ntinto mɛ lɛ́ɛ bǐ ɖo xɛsi jí, ɖó a sɔ́ tíin ǎ.

¹⁹“Xó e nyɛ Aklúnɔ Mavɔmavɔ ɖɔ ɔ́ ɖíe: Hwenu e un ná sɔ́ we dó húzú toxo gbigba, toxo e mɛ mɛɖé má sɔ́ ɖe ǎ ɔ́, hwenu e un ná sɔ́ sin sí te, bɔ sin ná wá ɖi bú we ɔ́,

²⁰un ná ɖi we bɔ a nǎ yi mɔ mɛ e ko kú xóxó lɛ́ɛ. Un ná yi sá xwé nú we ɖó kútomɛ; a nǎ nɔ yɔdo mɛ xá mɛ e ko kú bó má sɔ́ ɖo nǎ fɔ́n wɛ ǎ lɛ́ɛ. Mɛ ɖé sɔ́ ná nɔ ayǐkúngban towe jí gbeɖé ǎ; énɛ́ ɔ́, a sɔ́ ná ɖó tɛnmɛ ɖě ɖo mɛ e ɖo gbɛ lɛ́ɛ sín to mɛ ǎ.

²¹ Xɛsi ná ɖo mɛ bǐ jí bɔ mɛ bǐ ná nɔ́ ɖo sísɔ́sísɔ́ wɛ, ɖó xó towe kó fó. Mɛ lɛ́ɛ ná ba we, yě ká sɔ́ ná mɔ we gbeɖé ǎ. Xó e nyɛ Aklúnɔ Mavɔmavɔ ɖɔ é nɛ́.”