Read fon Ezekiyɛ́li 28 Bible Online

Ezekiyɛ́li 28 - fon bible

Ezekiyɛ́li 28

¹Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, yi ɖɔ xó nú axɔ́sú Tíi tɔn; ɖɔ n'i ɖɔ xó e nyɛ Aklúnɔ Mavɔmavɔ ɖɔ sɛ́ dó e ɔ́ ɖíe: A yǐ go bo ɖɔ: ‘Nyɛ ɔ́, Mawu wɛ un nyí, bó jínjɔ́n axɔ́súzinkpo ce jí ɖo xu jí.’ Lo ɔ́, gbɛtɔ́ kpowun wɛ a nyǐ; a sixú sɔ́ hwiɖée jlɛ́ dó nyɛ wú ǎ. A nɔ sɔ́ linlin towe ɖó nyɛ Mawu sín linlin há jí.

³A mɔ ɖɔ nǔɖé kún tíin bónú émí dán do ná ó. A vɛdó ɖɔ émí ɖó nǔnywɛ́ hú Daniyɛ́li wɛ sín a?

⁴A sɔ́ nǔnywɛ́ towe kpó bǐbí towe kpó dó jɛ dɔkun. Dɔkun ɖo así towe bó dó nǔɖé wa ná ǎ; a ɖǒ sikágan kpó kpatágan kpó kɔn nyi kpɔ́.

⁵Bǐbí e a nɔ dó wa ajɔ̌ ná ɔ́ zɔ́n bɔ a kplé dɔkun dó dɔkun jí; dɔkun towe zɔ́n bɔ a jɛ afɔ tɛ ayǐ jí.

⁶“Énɛ́ wú wɛ nyɛ Aklúnɔ Mavɔmavɔ ɖɔ: A nɔ sɔ́ linlin towe ɖó nyɛ Mawu sín linlin há jí.

⁷Énɛ́ ɔ́ wú ɔ́, un ná ɖó toɖévomɛnu e nɔ xo dǎka hú mɛ bǐ lɛ́ɛ nú we, bɔ yě ná tɔ́n ahwan we; yě ná hɛn nǔ e a sɔ́ bǐbí towe dó wa lɛ́ɛ bǐ gblé. Yě ná hɛn ɖɛkpɛ towe gblé.

⁸È nǎ sɔ́ we dó do gɔngɔn mɛ, bɔ a nǎ kú adǎn kú ɖo xuzan mɛ.

⁹Hwenu e a nǎ ɖo mɛ e ɖo nǎ hu we wɛ ɔ́ nukɔn ɔ́, a nǎ sixú lɛ́ glá ɖɔ émí nyí Mawu a? A nǎ sixú lɛ́ nyí Mawu ɖo mɛ e ɖo nǎ hu we wɛ lɛ́ɛ lɔ mɛ a? Éeǒ! Gbɛtɔ́ kpowun wɛ a nyǐ.

¹⁰Kú e nɔ hu mɛ e ma nɔ gbo ada ǎ lɛ́ɛ wɛ ná hu we. Xó e nyɛ Aklúnɔ Mavɔmavɔ ɖɔ ɔ́ nɛ́.”

¹¹Mawu Mavɔmavɔ lɛ́ ɖɔ nú mì ɖɔ:

¹²“Hwɛ gbɛtɔ́ e, ji nǔwamɛhan ɖokpó nú Tíi xɔ́sú ɔ́. A nǎ ɖɔ n'i ɖɔ nyɛ Mawu Mavɔmavɔ wɛ ɖo han ɔ́ ji n'i wɛ; han ɔ́ ɖíe: ‘Tíi xɔ́sú e, a ɖǒ nǔnywɛ́ ɖaxó, a nyɔ̌ ɖɛkpɛ bɔ nǔ vɔ ɖ'é wú; énɛ́ ɔ́ zɔ́n bɔ a nyǐ nǔ e nyɔ́ yi fó é sín kpɔ́n d'é wú.

¹³Edɛ́ni wɛ a ɖe ɖ'ayǐ, ɖo jikpá Mawu tɔn mɛ, bɔ è sɔ́ awǐnnya ɖagbe ɖagbe tɛnmɛ tɛnmɛ dó ba acɔ́ nú we: saadwáni, tokpázi, dyamáa, klizolíti, onísi, jasípu, safíi, ɛsikabukli kpó emɛlodu kpó. Sikánú tɛnmɛ tɛnmɛ e a nɔ dó ɔ́, gbe e gbe è blǒ we ɔ́ wɛ è blǒ yě lɔ.

¹⁴Wɛnsagun susunɔ wɛ a nyǐ, bɔ awa towe lɛ́ɛ ɖo dlɛ̌ndlɛ́n; a nɔ nya xɛ ɖo mɛ jí; un sɔ́ we ɖó só mímɛ́ ce jí, bɔ a nɔ ɖo sa ɖi wɛ ɖo awǐnnya e nɔ́ da zo lɛ́ɛ tɛ́ntin.

¹⁵Sín gbe e gbe un ɖó we ɔ́, è mɔ nǔ jɛ do ɖé ɖo walɔ towe mɛ ǎ, káká jɛ gbe e gbe è wǎ mɔ nǔ nyanya ɖo walɔ towe mɛ é.

¹⁶Ajɔ̌ towe e zɔn nú we ganjí ɔ́ dɔn we dó dǎkaxixo mɛ, bɔ a jɛ nǔ nyanya wa jí. A hu hwɛ; énɛ́ wú ɔ́, un nya we sín só mímɛ́ ce jí; hwɛ wɛnsagun susunɔ ɔ́, un nya we sín awǐnnya énɛ́ lɛ́ɛ e nɔ́ da zo lɛ́ɛ tɛ́ntin.

¹⁷Ɖɛkpɛ towe wú wɛ a jɛ go yí jí; lě e nǔ nyɔ́ nú we sɔ ɔ́ zɔ́n bɔ a sɔ́ nɔ́ lin tamɛ kpɔ́n ǎ; énɛ́ ɔ́ wú wɛ un kpíkpé we nyi dó ayǐkúngban jí, bó dó winnyá we ɖo axɔ́sú lɛ́ɛ nukɔn.

¹⁸A nɔ xo ahizi ɖo ajɔ̌ towe mɛ; a hu hwɛ gěgé; a ɖu su nú tɛn mímɛ́ lɛ́ɛ; énɛ́ wú wɛ un bɔ myɔ ɖó toxo towe mɛ, bó vívá kún nú we. Un dó we zo bɔ a ji kɔn afín ɖo mɛ bǐ nukún mɛ.

¹⁹Nǔ e gbo we ɔ́ hu ado nú togun e ko tunwun we lɛ́ɛ bǐ; ahwi xo yě. Xó towe fó bǐ gbídí gbídí.’ ”

²⁰ Mawu Mavɔmavɔ ɖɔ nú mì ɖɔ:

²¹“Hwɛ gbɛtɔ́ e, lǐlɛ́ kpan nukɔn Sidɔ́ɔn toxo ɔ́, bó ɖɔ xó e un ɖɔ nú we dó wǔ tɔn é n'i.

²²A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: hwɛ Sidɔ́ɔn toxo, un ná wa nǔ xá we. Un ná ɖe susu ce xlɛ́ we ɖo mɛ towe lɛ́ɛ mɛ; un ná wa nǔ xá we bɔ é ná sɔgbe xá hwɛ e un ɖó nú we é; énɛ́ ɔ́, mɛ bǐ ná tunwun ɖɔ nyɛ wɛ nyí Mawu Mavɔmavɔ. Hwe énɛ́ nu ɔ́, un ná ɖe xlɛ́ ɖɔ nyɛ wɛ nyí Mawu mímɛ́ ɔ́.

²³Un ná sɛ́ jɛmɛjí dó we, kanjɔ ná sa gbɔn ali towe lɛ́ɛ jí. È nǎ tɔ́n ahwan we gbɔn aɖisí amyɔ, bó ná hu toví towe lɛ́ɛ gěgé ɖo toxo ɔ́ mɛ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.”

²⁴Mawu Mavɔmavɔ ɖɔ: “To e lɛ́ lɛ̌ dó Izlayɛ́li lɛ́ɛ ɖě sɔ́ ná hu tɛ́ n'i gbeɖé ǎ. To ɖě sɔ́ ná tɔ́n ɛ wunkan ɖɔhun ǎ, to ɖě ká sɔ́ ná tlɛ́n ɛ atín wunnɔ ɖɔhun ǎ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.

²⁵“Xó e nyɛ Aklúnɔ Mavɔmavɔ lɛ́ ɖɔ é ɖíe: un ná kplé Izlayɛ́li ví lɛ́ɛ sín togun e mɛ un gba yě dó kpé gbɔn lɛ́ɛ. Yě ná wá nɔ to yě ɖésú tɔn mɛ; to e un ná mɛsɛntɔ́ ce tɔ́gbó yětɔn Jakɔ́bu é. Énɛ́ ɔ́, un ná ɖe xlɛ́ togun ɖě lɛ́ɛ ɖɔ nyi wɛ nyí Mawu mímɛ́ ɔ́.

²⁶Yě ná sá xwé bó vo ɖo fínɛ́, bó ná tun vǐwuntín. Yě ná vo, ɖó un ná dɔn tó nú to e lɛ́ lɛ̌ dó yě bó nɔ́ hu tɛ́ nú yě lɛ́ɛ bǐ. Énɛ́ ɔ́, mɛ bǐ ná tunwun ɖɔ nyi wɛ nyí Aklúnɔ Mavɔmavɔ, Mawu yětɔn.”