Read fon Ezekiyɛ́li 29 Bible Online

Ezekiyɛ́li 29 - fon bible

Ezekiyɛ́li 29

¹ Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒgɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn wěwegɔ́ ɔ́ e ɖo sun wǒgɔ́ ɔ́ xwe énɛ́ xwe é mɛ; é ɖɔ nú mì ɖɔ:

²“Hwɛ gbɛtɔ́, lǐlɛ́ kpan nukɔn Ejípu xɔ́sú ɔ́, bó ɖɔ nǔ e ná wá gbo éé kpó Ejípu to ɔ́ bǐ kpó ɔ́ n'i.

³Xó e nyɛ Aklúnɔ Mavɔmavɔ ɖɔ sɛ́ dó e ɔ́ ɖíe: un ná wa nǔ xá we Ejípu xɔ́sú. Un ná wa nǔ xá we; lǒ ɖaxó ɖé wɛ a nyǐ, bó mlɔ́ tɔ e ɖo to towe mɛ lɛ́ɛ tɛ́ntin, bó nɔ́ ɖɔ: Nilu tɔ ɔ́ kpó ala tɔn lɛ́ɛ kpó ɔ́, nyi wɛ bló yě.

⁴Énɛ́ ɔ́ wú ɔ́, un ná dó gan nu nú we, bó ná blá hweví e ɖo tɔ towe mɛ lɛ́ɛ dó wǔtu towe, bó ná ɖe we sín tɔ ɔ́ mɛ, hwi kpó hweví e ɖo tɔ ɔ́ mɛ lɛ́ɛ bǐ kpó; hweví lɛ́ɛ ná ɖo wǔ towe mɔ̌,

⁵bɔ un ná bɛ́ mi yi kɔn nyi gbě ɖo gbětótló mɛ, hwi kpó hweví lɛ́ɛ bǐ kpó, bɔ a nǎ kú dó kɔ́ mɛ fínɛ́. Mɛ ɖé ná wá sɔ́ cyɔ towe bó ɖi ǎ. Kanlin lɛ́ɛ kpó xɛ lɛ́ɛ kpó wɛ un ná lan towe bɔ yě ná ɖu.

⁶ Énɛ́ ɔ́, mɛ e ɖo Ejípu tomɛ lɛ́ɛ bǐ ná tunwun ɖɔ nyi wɛ nyí Mawu Mavɔmavɔ. “Gǎnjɛwú e a nǎ Izlayɛ́li togun ɔ́ nyí gǎnjɛwú ɖé ǎ; é cí mɛ e gán jɛ fántín wú é ɖɔhun.

⁷Yě zun fán we bɔ a wɛ̌n dó alɔ mɛ nú yě, bó gblé wǔ yě dó abɔ̌ta; yě gán jɛ wǔtu towe bɔ a wɛ̌n, bɔ awakanmɛ kú yě.

⁸Énɛ́ ɔ́ wú wɛ nyɛ Aklúnɔ Mavɔmavɔ ɖɔ: un ná sɛ́ ahwan dó we, bó ná vívá gbɛtɔ́ kpó kanlin kpó e ɖo to towe mɛ lɛ́ɛ bǐ sín kún.

⁹Ejípu to ɔ́ ná jɛ vɔ̌ káká bó cí gbětótló ɖɔhun, bɔ è nǎ tunwun ɖɔ nyi wɛ nyí Mawu Mavɔmavɔ. “A ɖɔ Nilu tɔ ɔ́, émítɔn tɔn wɛ, émí ɖésú wɛ bló.

¹⁰Énɛ́ ɔ́ wú ɔ́, un ná wa nǔ xá hwi kpó tɔ towe kpó. Un ná gba Ejípu to ɔ́ bǐ; un ná sɔ́ to ɔ́ dó húzú gbětótló sín Migidɔ́lu toxo ɔ́ mɛ ɖo taligbé, gbɔn Siɛni toxo ɔ́ mɛ, káká yi Etiopíi sín dogbó ɔ́ kɔn ɖo afɔligbé.

¹¹Gbɛtɔ́ kpó kanlin kpó ɖěbǔ sɔ́ ná nɔ gbɔn fínɛ́ ǎ; nǔ e ɖó funfún xomɛ é ɖěbǔ sɔ́ ná gbɔn fínɛ́ ǎ, káká nú xwe kanɖé (40).

¹²Un ná sɔ́ Ejípu dó húzú gbětótló ɖé, bɔ è ko mɔ gbětótló mɔ̌hunkɔtɔn kpɔ́n ɖo ayǐkúngban ɔ́ jí ǎ. È nǎ gba toxo tɔn lɛ́ɛ bǐ hánnyá; lě e è nǎ gba toxo tɔn lɛ́ɛ gbɔn ɔ́, nǔ mɔ̌hunkɔtɔn kó jɛ kpɔ́n ɖo fí ɖé ǎ. É ná nɔ mɔ̌ káká nú xwe kanɖé (40); un ná gba Ejípunu lɛ́ɛ dó gbɔn to ɖěvo ɖěvo lɛ́ɛ mɛ.

¹³“Nǔ e nyɛ Aklúnɔ Mavɔmavɔ ɖɔ ɔ́ ɖíe: xwe kanɖé (40) gúdo ɔ́, un ná kplé Ejípunu lɛ́ɛ sín to e mɛ un gba yě dó gbɔn lɛ́ɛ mɛ.

¹⁴Un ná húzú ninɔmɛ Izlayɛ́li ví lɛ́ɛ tɔn; un ná kplá yě wá Patlɔ́si, Ejípu to fɔligbé, to e mɛ yě jɔ ɖe é mɛ, bɔ yě ná sɔ́ axɔ́súɖuto ɖokpó jínjɔ́n ayǐ. Amɔ̌, axɔ́súɖuto énɛ́ ná ɖó gǎn ɖé ǎ.

¹⁵Axɔ́súɖuto énɛ́ ná ɖó hlɔ̌nhlɔ́n sɔ axɔ́súɖuto ɖě ǎ; é sɔ́ ná hú gǎn togun ɖě ǎ. Un ná ɖe gbɛtɔ́ kpo sín yě mɛ, bɔ yě sɔ́ ná hú gǎn to ɖě ǎ.

¹⁶Ejípu sɔ́ ná nyí gǎnjɛwú ɖě nú Izlayɛ́li togun bónú yě ná ɖeji dó wǔ tɔn ǎ. Yě sɔ́ ná byɔ́ alɔgɔ́ ɖě Ejípu dó hu hwɛ ǎ. Énɛ́ ɔ́, yě ná tunwun ɖɔ nyɛ wɛ nyí Aklúnɔ Mavɔmavɔ.”

¹⁷Ahwan wlǐ Izlayɛ́li ví lɛ́ɛ yi Babilɔ́nu ɔ́, xwe tɔn koatɔ́n-nukún-wegɔ́ (27) ɔ́ mɛ ɔ́, Mawu Mavɔmavɔ ɖɔ xó nú mì azǎn nukɔn tɔn e ɖo sun nukɔn tɔn xwe énɛ́ ɔ́ xwe é mɛ. É ɖɔ nú mì ɖɔ:

¹⁸“Hwɛ gbɛtɔ́ e, axɔ́sú Nabukodonɔzɔ́ɔ zɔ́n azɔ̌ syɛ́nsyɛ́n ɖé ahwangɔnu tɔn hwenu e é xá Tíi toxo ɔ́ é. Sɔ́ja tɔn lɛ́ɛ hɛn agban káká bɔ ta yětɔn bǐ sún, bɔ abɔ̌ta yětɔn bǐ sún gló; yě jɛ tagba énɛ́ ɔ́ káká có axɔ́sú ɔ́ kpó mɛtɔn lɛ́ɛ kpó ká mɔ nǔɖé ɖ'é mɛ ǎ.

¹⁹Énɛ́ ɔ́ wú ɔ́, nǔ e nyɛ Aklúnɔ Mavɔmavɔ ɖɔ ɔ́ ɖíe: un ná jó Ejípu nú Nabukodonɔzɔ́ɔ Babilɔ́nu xɔ́sú ɔ́. É ná wá gba to ɔ́ bǐ, bó ná bɛ́ nǔ e ɖo to ɔ́ mɛ lɛ́ɛ bǐ, bó ná má nú sɔ́ja tɔn lɛ́ɛ dó sú axɔ́ yě.

²⁰Un ná sɔ́ Ejípu dó sú axɔ́ ɛ, ɖó nyi wa azɔ̌ ná wɛ ahwangɔnu tɔn ɖe. Nyɛ Aklúnɔ Mavɔmavɔ wɛ ɖɔ mɔ̌.”

²¹“Hwenu e nǔ énɛ́ lɛ́ɛ ná jɛ ɔ́, un ná ná hlɔ̌nhlɔ́n Izlayɛ́li togun ɔ́, bó ká ná ná acɛ hwɛ Ezekiyɛ́li ɔ́, bɔ a nǎ ɖɔ xó nú yě, bónú yě ná tunwun ɖɔ nyɛ wɛ nyí Mawu Mavɔmavɔ.”