Read fon Ezekiyɛ́li 3 Bible Online

Ezekiyɛ́li 3 - fon bible

Ezekiyɛ́li 3

¹ Mɛ ɔ́ ɖɔ nú mì ɖɔ: “Hwɛ gbɛtɔ́ ɔ́, ɖu wěma élɔ́ bó mi, lobo yi ɖɔ xó nú Izlayɛ́li ví lɛ́ɛ.”

²Ée é ɖɔ mɔ̌ ɔ́, un kɛ nu, bɔ é zé wěma ɔ́ dó nu ce mɛ ɖɔ má ɖu;

³Énɛ́ ɔ́ gúdo ɔ́, é ɖɔ nú mì ɖɔ: “Hwɛ gbɛtɔ́ ɔ́, ɖu wěma e un sɔ́ nú we ɔ́, bónú adɔgo towe ní gɔ́, bó dó ná nǔɖuɖu agbaza towe.” Énɛ́ ɔ́, un ɖu wěma ɔ́, bɔ é víví ɖo nu ce mɛ wǐin ɖɔhun.

⁴Énɛ́ ɔ́ gúdo ɔ́, é lɛ́ ɖɔ: “Din ɔ́, hwɛ gbɛtɔ́ ɔ́, wlǐ ali bó ɖidó Izlayɛ́li ví lɛ́ɛ gɔ́n, bó ɖɔ xó e ɖɔ nú we wɛ un ɖe lɛ́ɛ nú yě.

⁵Un sɛ́ we dó togun e nɔ dó gbe ɖěvo é gɔ́n ǎ, togun e nɔ dó gbe e mɛ a ma sixú mɔ nǔ jɛ ǎ é gɔ́n ǎ; lo ɔ́, Izlayɛ́li togun ɔ́ gɔ́n wɛ un sɛ́ we dó.

⁶É na bó nyí togun e nɔ dó gbe ɖěvo ɖěvo e mɛ a ma mɔ nǔ jɛ ǎ lɛ́ɛ, togun e nɔ dó gbe gɛ́dɛ́gɛ́dɛ́ lɛ́ɛ gɔ́n wɛ un sɛ́ we dó ɔ́, yědɛɛ lɛ́ɛ ná ɖótó we.

⁷Izlayɛ́li ví lɛ́ɛ ká ná ba ná ɖótó we ǎ, ɖó yě jló ná se xó ce ǎ; yě bǐ wɛ gbɛ́ hɛn, ali yi tó yětɔn mɛ ǎ.

⁸Din ɔ́, un ná sɔ́ hwi lɔ dó húzú nǔ gbɛ́hɛn, ali ná yi tó hwi lɔ tɔn mɛ ǎ yě ɖɔhun.

⁹Un ná sɔ́ we dó húzú mɛɖé bɔ a na syɛ́n awǐnnya xɔ akwɛ́ diamáá ɖɔhun; a nǎ syɛ́n hú só. Énɛ́ ɔ́ wú ɔ́, ma ɖi xɛsi nú yě ó; ma sísɔ́ ɖo togun gǔfɔ́ntɔ́ énɛ́ ɔ́ nukɔn ó.”

¹⁰Mɛ ɔ́ lɛ́ ɖɔ nú mì ɖɔ: “Hwɛ gbɛtɔ́ ɔ́, ɖǒtó xó e ɖɔ nú we gbé un ja é céɖécéɖé bó hɛn ayi mɛ.

¹¹Yi mɛ towe e ahwan wlí wá fí lɛ́ɛ gɔ́n, bó ɖɔ nú yě ɖɔ: ‘Xó e Aklúnɔ Mavɔmavɔ ɖɔ é ɖíe’ Yě ɖótó we kpó yě má ɖótó we kpó ɔ́, vɛ̌ ɖɔ nú yě.”

¹²Ée é ɖɔ mɔ̌ ɔ́, yɛ Mawu tɔn zé mì sín kɔ́ mɛ, bɔ un se zǐngídi ɖaxó ɖé ɖo gǔdo ce; un nɔ se: “È nǐ kpa susu nú Mawu Mavɔmavɔ ɖo fí e é nɔ́ nɔ é.”

¹³Nǔɖogbɛ lɛ́ɛ sín awa ɖě nɔ́ xo dó ɖě wú; kɛkɛ́fɔ e ɖo akpá yětɔn lɛ́ɛ lɔ ɖo nǔ ɖɔ wɛ. Zǐngídi e se wɛ un ɖe ɔ́ syɛ́n ɖésú.

¹⁴Yɛ Mawu tɔn zé mì sín kɔ́ mɛ, bó sɔ́ mì ɖidó. Ayi ce j'ayǐ ǎ, wǔ kú mì, bɔ un ɖo yiyi wɛ. Hlɔ̌nhlɔ́n Mawu Mavɔmavɔ tɔn wá jǐ ce bɔ é syɛ́n ɖésú.

¹⁵Un wá jɛ te ɖo Tɛ́li-Avívu ɖo Kebáa tɔ ɔ́ tó fí e mɛ e ahwan wlí lɛ́ɛ ɖe é. Azǎn tɛ́nwe wɛ un xɔ ɖo fínɛ́, ado ka ɖo huhu mì wɛ ɖésú.

¹⁶Ée un bló azǎn tɛ́nwe lɛ́ɛ é ɔ́, Mawu Mavɔmavɔ ɖɔ nú mì ɖɔ:

¹⁷“Hwɛ gbɛtɔ́ ɔ́, un ná sɔ́ we mɛcɔ́tɔ́ Izlayɛ́li ví lɛ́ɛ tɔn. A nǎ nɔ́ se xó ɖo nu ce, bó ná nɔ́ ɖɔ nú yě, bónú yě ná tunwun nǔ e ɖo nǎ jɛ wɛ ɔ́.

¹⁸Nú un ɖɔ nú mɛdídá ɖé ɖɔ é ná kú, bónú a ma ɖɔ nǔ e wa nyi do wɛ é ɖe lɛ́ɛ n'i ǎ ɔ́, a ma ɖɔ xó n'i bónú é húzú jijɔ bó nɔ gbɛ ǎ bó kú ɖó hwɛ tɔn lɛ́ɛ wú ɔ́, hwi wɛ un ná kan kanjɔ tɔn byɔ́.

¹⁹Nú hwɛ ka ɖɔ nǔ e wa nyi do wɛ é ɖe lɛ́ɛ n'i, bónú é má húzú jijɔ bó lɛ́ kɔ ǎ ɔ́, é ná kú ɖó hwɛ tɔn lɛ́ɛ wú; amɔ̌, hwɛ ɔ́, kú tɔn ná nɔ kɔ nú we ǎ.

²⁰Mɔ̌ ɖokpó ɔ́, nú hwɛjijɔnɔ ɖé dó vɛ̌ nú nǔ jlɔ́jlɔ́ e é nɔ wa ɔ́, lobo jɛ nǔ nyanya wa jí, bónú a ma ɖɔ nǔ e wa nyi do wɛ é ɖe é n'i ǎ ɔ́, un ná ɖó mɔ n'i bɔ é ná jɛ mɛ, bó ná kú dó hwɛ tɔn lɛ́ɛ mɛ. È sɔ́ ná kpɔ́n nǔ jlɔ́jlɔ́ e é nɔ́ wa ɖ'ayǐ é ǎ; amɔ̌, hwi wɛ un ná kan kanjɔ tɔn byɔ́.

²¹A ka ɖɔ nú hwɛjijɔnɔ énɛ́ ɔ́ ɖɔ é ní má sɔ́ nɔ́ hu hwɛ ɖě ó, bɔ é jó hwɛhuhu dó ɔ́, é ná nɔ gbɛ ɖó é se tónú nú nǔ e è ɖɔ n'i ɔ́, bɔ hwɛ ɔ́, a nǎ hwlɛ́n gbɛ towe gán.”

²²Hlɔ̌nhlɔ́n Mawu Mavɔmavɔ tɔn lɛ́ wá jǐ ce ɖo fínɛ́. Mawu ɖɔ nú mì ɖɔ: “Sí te bó yi tɔdo ɔ́ mɛ, bónú má ɖɔ xó nú we.”

²³Ée é ɖɔ mɔ̌ ɔ́, un wlí ali ɖidó tɔdo ɔ́ mɛ. Mawu Mavɔmavɔ ko ɖo susu tɔn ɖe xlɛ́ wɛ ɖo tɔdo ɔ́ mɛ lě e un mɔ gbɔn ɖo Kebáa tɔ ɔ́ tó é. Énɛ́ ɔ́, un xwe agbɔ̌nnusú do.

²⁴Yɛ Mawu tɔn ka wá jǐ ce, bó zé mì sí te, bɔ Mawu ɖɔ nú mì ɖɔ: “Yi xwé towe gbe bó sú hɔn dó ta.

²⁵A jɛ fínɛ́ ɔ́, è nǎ zé kan dó blá we, bɔ a sɔ́ ná sixú tɔ́n bó byɔ́ gbɛtɔ́ mɛ ǎ.

²⁶Ɖɛ̌ towe ná tɛ́ dó ɖɛxwɛ towe wú; nyi wɛ ná bló mɔ̌ nú we, bɔ nu kikɛ ná gló we, bɔ a nǎ sixú kɛ nu dó nǔ e wa wɛ tónúmasetɔ́ énɛ́ lɛ́ɛ ɖe ɔ́ wú nú yě ǎ.

²⁷Amɔ̌, hwenu e un ná ɖó xó ɖé bó ná ɖɔ gbɔn jǐ towe ɔ́, un ná tún kan nú ɖɛ̌ towe; énɛ́ ɔ́, a nǎ ɖɔ xó nú yě; a nǎ ɖɔ: ‘Xó e Aklúnɔ Mavɔmavɔ ɖɔ é ɖíe.’ Mɛ ɖé lɛ́ɛ ná ɖótó we, mɛ ɖé lɛ́ɛ ká ná gbɛ́ tó ɖó we, ɖó yě nɔ́ se tónú ǎ.”