Read fon Ezekiyɛ́li 31 Bible Online

Ezekiyɛ́li 31 - fon bible

Ezekiyɛ́li 31

¹Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn nukɔn tɔn e ɖo sun atɔngɔ́ ɔ́ xwe énɛ́ xwe é gbe. Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, xó e a nǎ ɖɔ nú Ejípu xɔ́sú ɔ́ kpó mɛ tobutóbú e nu é kpa acɛ dó lɛ́ɛ kpó ɔ́ ɖíe: ‘Étɛ́wú un ka ná jlɛ́ we dó? Hwi mɛ syɛ́nsyɛ́n ɖokpó ɔ́, étɛ́ wú un ná jlɛ́ we dó?

³Asilíi wú wɛ un ná jlɛ́ we dó! Asilíi ɔ́, sɛ́dlutín wɛ, sɛ́dlutín Libáan tɔn wɛ. Ala tɔn lɛ́ɛ nyɔ́ ɖɛkpɛ káká, é dó ama ɖo gbɛ mɛ, yɛtɛn tɔn kpé fí bǐ, é yi jǐ káká bɔ ɖa tɔn byɔ́ akpɔ́kpɔ́ mɛ.

⁴É mɔ sin ganjí bó su, é mɔ sin e ɖo do glɔ́ é bó yi jǐ. Sin kplé lɛ́ lɛ̌ dó ɖɔ tɔn lɛ́ɛ, sin ɔ́ kplé káká bó nɔ́ sa gbɔn atín e ɖo gběhan mɛ lɛ́ɛ bǐ kɔ.

⁵É nɔ́ mɔ sin ganjí, énɛ́ wú wɛ é yi jǐ hú atín e ɖo gběhan mɛ lɛ́ɛ bǐ; é zɛ ala kɔn nyi kpɔ́; ala tɔn lɛ́ɛ ɖo ga ɖi wɛ kpowun.

⁶Xɛ lɛ́ɛ bǐ nɔ wá xo adɔ̌ nyi ala tɔn lɛ́ɛ mɛ. Asá tɔn mɛ wɛ lan lɛ́ɛ nɔ́ wá ji vǐ ɖe; akɔta lɛ́ɛ bǐ nɔ́ wá nɔ yɛtɛn tɔn.

⁷É yi jǐ ɖésú; ala tɔn lɛ́ɛ d'agba bɔ é nyɔ̌ ɖɛkpɛ hú atín lɛ́ɛ bǐ; ɖó sin kpé fí e é dó ɖɔ do ɖó é.

⁸ Sɛ́dlutín tɛ́ è ka sixú jlɛ́ dó wǔ tɔn ɖo jikpá Mawu tɔn mɛ? É ɖe ǎ. Siplɛtín ɖě ká ɖo fínɛ́ bɔ è nǎ jlɛ́ dó ala tɔn lɛ́ɛ wú ǎ. Platánitín ɖě dó ama sɔ ɛ ǎ; Atín e ɖo jikpá Mawu tɔn mɛ lɛ́ɛ ɖě nyɔ́ ɖɛkpɛ tɔn ǎ.

⁹Ala e un ná ɛ lɛ́ɛ nyɔ́ ɖɛkpɛ mɔ̌hunkɔtɔn. Atín e ɖo jikpá ce mɛ ɖo Edɛ́ni lɛ́ɛ bǐ ɖo wǔ hwan wɛ, yě ɖo wǔ hwan wɛ ɖó énɛ́ wú.’ ”

¹⁰“Xó e nyɛ Aklúnɔ Mavɔmavɔ ɖɔ é ɖíe: Sɛ́dlutín ɔ́ su bó yi jǐ káká bɔ ɖa tɔn byɔ́ akpɔ́kpɔ́ mɛ, bɔ goyíyí tɔn fɔ́n ɔ́, é nɔ́ ɖo jijɛ jí wɛ.

¹¹Énɛ́ ɔ́ wú wɛ un jó e dó, bɔ lě do e é dá sɔ ɔ́, axɔ́sú e syɛ́n hú axɔ́sú lɛ́ɛ bǐ ɖo ayǐkúngban ɔ́ jí ɔ́[16] wa nǔ xá ɛ káká yi tɛn tɔn mɛ.

¹²Toɖévomɛnu e nɔ xo dǎka hú mɛ bǐ lɛ́ɛ wá gbo e zindɛ́, bó jó e dó. Ala tɔn lɛ́ɛ kpó ama tɔn lɛ́ɛ kpó gbɔn só ta só ta, tɔdo mɛ tɔdo mɛ. Akɔta tɛnmɛ tɛnmɛ e nɔ wá bɛ yɛ ɖo asá tɔn mɛ lɛ́ɛ bǐ wɛ jó e dó bó hɔn yi.

¹³Xɛ lɛ́ɛ bǐ ná wá ɖó jɛ atín e è mu zindɛ́ bó já ala tɔn lɛ́ɛ é jí, bɔ gběkanlin lɛ́ɛ bǐ ná wa xwé nyi ala tɔn e è jǎ kɔn nyi ayǐ lɛ́ɛ tɛ́ntin.

¹⁴È blǒ mɔ̌, bónú atín e nɔ́ mɔ sin ganjí, bɔ sin kpé kpo lɛ́ɛ ɖě ma sɔ́ yi jǐ káká bónú ɖa tɔn byɔ́ akpɔ́kpɔ́ mɛ, bónú é sɔ́ énɛ́ bó dó jɛ go yí jí ó; ɖó atín bǐ wɛ ɖó ná kú bó ná yi kɔ́ glɔ́, bó yi mɔ mɛ e ko kú bó yi doxwé lɛ́ɛ.

¹⁵“Xó e nyɛ Aklúnɔ Mavɔmavɔ ɖɔ é ɖíe: Gbe e gbe un sɛ́ sɛ́dlutín ɔ́ dó doxwé ɔ́, un sɔ́ gbɛ ɔ́ bǐ dó aluwɛ mɛ; un ɖó tɔ e nɔ sa gbɔn ayǐkúngban glɔ́ é te, bó ɖó ala tɔn lɛ́ɛ bǐ te ɖó éyɛ́ wú. É sɔ́n éyɛ́ wú, bɔ un sɛ́ ablu dó Libáan sókan ɔ́ mɛ; atín e ɖo gběhan mɛ lɛ́ɛ bǐ xú ɖó éyɛ́ wú.

¹⁶Ée un zin atín énɛ́ ɔ́ dɛ́, bɔ é ná yi mɔ mɛ e ko kú lɛ́ɛ ɔ́, gbɛ ɔ́ bǐ se hwenu e é jɛ ayǐ é, bó nɔ́ sísɔ́. Ɖo doxwé ɔ́, atín Edɛ́ni tɔn lɛ́ɛ kpó atín ɖagbe ɖagbe Libáan tɔn e nɔ mɔ sin ganjí lɛ́ɛ kpó bǐ ká se bó nɔ́ j'awǎ.

¹⁷Yě kpó e kpó bǐ yi doxwé, bó yi mɔ mɛ e ahwan hu lɛ́ɛ bǐ; yě yi mɔ mɛ énɛ́ lɛ́ɛ e nyí sósyɛ́n tɔn gbɔn akɔta akɔta lɛ́ɛ mɛ, bɔ ahwan hu lɛ́ɛ bǐ.

¹⁸“Ejípu xɔ́sú, atín e ɖo Edɛ́ni lɛ́ɛ ɖě nyɔ́ ɖɛkpɛ towe ǎ, ɖě ká d'agba sɔ we ǎ. Nǔ ɖo mɔ̌ có, è nǎ kpíkpé we dó do gɔngɔn mɛ, mɛ ɖě lɛ́ɛ e ma nɔ́ gbo ada é ɖɔhun, bɔ hwi kpó mɛ e ma nɔ sɛn mì ǎ lɛ́ɛ kpó, kpódó mɛ e kú ɖo ahwangbénu lɛ́ɛ kpó bǐ ná yi do gɔngɔn mɛ. Lě e è nǎ wa hwi Ejípu xɔ́sú ɔ́ kpó mɛ e ɖo to towe mɛ lɛ́ɛ kpó nú gbɔn é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.”