Read fon Ezekiyɛ́li 32 Bible Online

Ezekiyɛ́li 32 - fon bible

Ezekiyɛ́li 32

¹Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wěwegɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn nukɔn tɔn e ɖo sun wěwegɔ́ ɔ́ xwe énɛ́ ɔ́ xwe é gbe. Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, ji nǔwamɛhan élɔ́ nú Ejípu xɔ́sú ɔ́: A cí kinnikínní wínnyáwínnyá ɖɔhun ɖo akɔta lɛ́ɛ tɛ́ntin. A ka nɔ lɛ́ wa nǔ lǒ ɖɔhun. A nɔ yi xo babá ɖo tɔ towe mɛ; a nɔ́ sɔ́ afɔ towe dó hɛn tɔ ɔ́ blú, a nɔ́ xo tɔ ɔ́ bɔ tɔ ɔ́ nɔ́ wɔ́.

³Ɖǒ tó xó e Aklúnɔ Mavɔmavɔ ɖɔ é: Togun gěgé wɛ ná kplé bɔ un ná nyi ɖɔ dó wlí we, bɔ yě ná dɔn we wá agě jí.

⁴Un ná sɔ́ we zin dó kɔ́ mɛ, un ná sɔ́ we nyi dó nǔkan mɛ, un ná ɖɔ bɔ xɛ lɛ́ɛ bǐ ná ɖó jɛ jǐ towe, gběkanlin e ɖo ayǐkúngban ɔ́ jí lɛ́ɛ ná ɖu lan towe bó gɔ́ xo.

⁵Un ná fúnfún lan towe gbɔn só jí só jí, un ná fúnfún lan towe e ná kpo, bó ná nyɔ lɛ́ɛ gbɔn tɔdo mɛ tɔdo mɛ.

⁶Un ná ná hun e ná sa sín lan towe mɛ ɔ́ ayǐkúngban bɔ é ná nu; hun towe ná sa gbɔn só lɛ́ɛ jí, hun towe ná gɔ́ tɔdo lɛ́ɛ.

⁷ Hwenu e gbɔjɛ towe ná xwɛ ɔ́, un ná bú nǔ dó jǐnukúnsin ɔ́, sunví lɛ́ɛ ná dó ablu; un ná bú akpɔ́kpɔ́ dó hwe, sun sɔ́ ná za wě ǎ;

⁸hwi wú wɛ un ná bú nǔ dó nǔ e nɔ ná wěziza ɖo jǐxwé lɛ́ɛ, bɔ to towe ná byɔ́ ablu mɛ. Xó e nyɛ Aklúnɔ Mavɔmavɔ ɖɔ ɔ́ nɛ́.

⁹Ahwi ná xo gbɛ ɔ́ bǐ hwenu e un ná ɖɔ lě e xó towe fó gbɔn ɔ́ nú yě ɔ́; un ná ɖɔ xó énɛ́ káká yi to e a ma tunwun ǎ é mɛ.

¹⁰Ahwi ná xo yě, ɖó nǔ e un ná dó sin xá we é wú. Gbe e gbe a nǎ kú ɔ́, yě ná nɔ́ ɖo xɛsi jí magbokɔ; hwenu e un ná ɖe hwǐ ce xlɛ́ axɔ́sú yětɔn lɛ́ɛ ɔ́, hǔn yětɔn ná zɛ; mɛ ɖokpó ɖokpó ná ɖo ta tɔn hwlɛ́n wɛ.

¹¹“Xó e Aklúnɔ Mavɔmavɔ ɖɔ é ɖíe: Ahwangɔnu axɔ́sú Babilɔ́nu tɔn ná wá tɔ́n ahwan we.

¹²Un ná sɛ́ ahwanfuntɔ́ e nɔ́ xo dǎka hú mɛ lɛ́ɛ bǐ ɖo ayǐkúngban jí lɛ́ɛ dó, bɔ yě ná wá hu mɛ wɔ̌buwɔ́bú e ɖo to towe mɛ lɛ́ɛ. Yě ná gba nǔ e wú Ejípu to ɔ́ nɔ́ yí go lɛ́ɛ bǐ hánnyá, bó ná hu mɛ e ɖo to ɔ́ mɛ lɛ́ɛ bǐ.

¹³Un ná hu kanlin e a ɖǒ lɛ́ɛ bǐ ɖo Nilu tɔ ɔ́ tó. Nilu tɔ sɔ́ ná blú ɖě ǎ; gbɛtɔ́ kpó kanlin kpó ɖě sɔ́ ná ɖe, bó ná dó afɔ tɔ ɔ́ mɛ, bó hɛn blú ǎ.

¹⁴Un ná jó tɔ ɔ́ dó, bɔ é ná lílɛ́ bó zin; é ná nɔ́ sa tiin ami ɖɔhun. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁵Un ná sɔ́ Ejípu to ɔ́ dó húzú gbětótló; un ná bɛ́ dɔkun e ɖo to ɔ́ mɛ lɛ́ɛ bǐ; un ná hu mɛ e ɖo to ɔ́ mɛ lɛ́ɛ bǐ. Hwenu e un ná bló mɔ̌ ɔ́, è nǎ tunwun ɖɔ nyi wɛ nyí Mawu Mavɔmavɔ.

¹⁶“Nǔwamɛhan e nyɔ̌nu e gbɔn akɔta akɔta lɛ́ɛ bǐ mɛ lɛ́ɛ ná ji nú Ejípu kpó toví tɔn wɔ̌buwɔ́bú lɛ́ɛ kpó é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.”

¹⁷Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wěwegɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn afɔtɔngɔ́ ɔ́ e ɖo sun wěwegɔ́ ɔ́ xwe énɛ́ xwe é gbe. Mawu Mavɔmavɔ ɖɔ nú mì ɖɔ:

¹⁸“Hwɛ gbɛtɔ́ e, ji nǔwamɛhan nú Ejípu togun ɔ́ bǐ. Nǔwamɛhan e a nǎ ji ɔ́ ní kpíkpé Ejípu kpó togun syɛ́nsyɛ́n ɖě lɛ́ɛ kpó dó do gɔngɔn mɛ fí e mɛ kúkú lɛ́ɛ nɔ́ nɔ é.

¹⁹Kanbyɔ́ Ejípu to ɔ́ ɖɔ: A nyɔ̌ hú togun ɖě lɛ́ɛ wɛ a? Hwi lɔ bo byɔ́ yɔdo mɛ, bónú è sɔ́ we mlɔ́ akɔta e ma nɔ gbo ada ǎ lɛ́ɛ kpá.

²⁰Nǔgbó ɔ́, Ejípunu lɛ́ɛ ná jɛ ayǐ ɖo ahwangbénu. È ko sún hwǐ lɛ́ɛ sín akún mɛ; ahwan ní hu mɛ e ɖo Ejípu to ɔ́ mɛ lɛ́ɛ bǐ.

²¹Ɖo kútomɛ dɔ̌n ɔ́, mɛ e kpó Ejípu kpó jɛ akɔ ɔ́ kpó ahwanfuntɔ́ syɛ́nsyɛ́n lɛ́ɛ kpó ɖɔ: ‘Ejípunu lɛ́ɛ wá mlɔ́ mǐ mɛ, yě mɛ e ma gbo ada ǎ mǐ ɖɔhun, bó kú ɖo ahwangbénu lɛ́ɛ wá mlɔ́ mǐ mɛ.’

²²“Asilíi xɔ́sú ɔ́ sín yɔdo ɖo fínɛ́, bó ɖo ahwanfuntɔ́ tɔn e kú ɖo ahwangbénu lɛ́ɛ sín yɔdo tɛ́ntin.

²³Fí e gɔ́ngɔ́n hú fí lɛ́ɛ bǐ ɖo kú tomɛ é wɛ yɔdo yětɔn lɛ́ɛ ɖe, bó lɛ́ lɛ̌ dó yɔdo axɔ́sú ɔ́ tɔn. Yě bǐ wɛ kú ɖo ahwangbénu; yě mɛ e xóxó ɖ'ayǐ ɔ́, yě nɔ́ dó adohu nú mɛ bǐ ɖo gbɛ ɔ́ mɛ, bɔ xɛsi jɛ́n nɔ́ ɖo mɛ bǐ jí lɛ́ɛ.

²⁴“Elámu xɔ́sú ɔ́ sín yɔdo ɖo fínɛ́, bɔ sɔ́ja tɔn e è hu ɖo ahwangbénu lɛ́ɛ bǐ sín yɔdo lɛ́ lɛ̌ dó e. Yě mɛ énɛ́ lɛ́ɛ e ma nɔ́ gbo ada ǎ lɛ́ɛ, bó nɔ́ dó adohu nú mɛ bǐ ɖo gbɛ ɔ́ mɛ lɛ́ɛ lɔ yi kɔ́ glɔ́. Yě ɖu winnyá, bɔ yě kpó mɛ kúkú ɖě lɛ́ɛ kpó bǐ nyí nǔ ɖokpó ɔ́.

²⁵Nǔgbó wɛ, axɔ́sú Elámu tɔn ɔ́ kpó sɔ́ja tɔn lɛ́ɛ kpó bǐ wɛ è hu ɖo ahwangbénu; yɔdo tɔn ɖo sɔ́ja tɔn lɛ́ɛ sín yɔdo tɛ́ntin. Yě mɛ énɛ́ lɛ́ɛ e ma nɔ gbo ada ǎ lɛ́ɛ bǐ wɛ kú ɖo ahwangbénu; yě wɛ nɔ dó adohu nú mɛ bǐ ɖo gbɛ ɔ́ mɛ; yě nɛ́ winnyá ká blá ta ná din nɛ́, yě kpó mɛ ɖě lɛ́ɛ e kú ɖo ahwangbénu lɛ́ɛ kpó.

²⁶“Axɔ́sú Mɛcɛ́ki tɔn kpó Tubalu tɔn kpó ɖo fínɛ́; yě kpó ahwangɔnu yětɔn lɛ́ɛ kpó; yɔdo yětɔn lɛ́ɛ ɖo yɔdo sɔ́ja yětɔn lɛ́ɛ tɔn lɛ́ɛ tɛ́ntin; yě mɛ énɛ́ lɛ́ɛ e ma nɔ́ gbo ada ǎ lɛ́ɛ bǐ wɛ kú ɖo ahwangbénu; yě wɛ nɔ dó adohu nú mɛ bǐ ɖo gbɛ ɔ́ mɛ.

²⁷È ɖi yě ɖó ahwanfuntɔ́ syɛ́nsyɛ́n xóxó tɔn lɛ́ɛ kpá ǎ; ahwanfuntɔ́ syɛ́nsyɛ́n xóxó e nɔ dó adohu nú mɛ bǐ ɖo gbɛ ɔ́ mɛ lɛ́ɛ ɔ́, è ja yě ɖi gbé ɔ́, è nɔ sɔ́ hwǐ yětɔn lɛ́ɛ ɖó kɔ nú yě, bó nɔ́ sɔ́ gǎglónú yětɔn lɛ́ɛ ɖó jǐ yětɔn.

²⁸Din ɔ́, ahwan jɛ mi Ejípunu lɛ́ɛ jí; mi ná kú bɔ è nǎ ɖi mi ɖó mɛ e ma gbo ada ǎ bɔ è hu ɖo ahwangbénu lɛ́ɛ tɛ́ntin.

²⁹“Edɔ́munu lɛ́ɛ kpó axɔ́sú yětɔn lɛ́ɛ kpó gǎn hɔn-yitɔ́ yětɔn lɛ́ɛ kpó lɔmɔ̌ sín yɔdo ɖo fínɛ́. Lě e yě syɛ́n sɔ é nɛ́, có è ka hu yě, mɛ e kú ɖo ahwangbénu lɛ́ɛ ɖɔhun, bó ɖi yě ɖó mɛ e ma nɔ gbo ada ǎ bó kú ɖo ahwangbénu lɛ́ɛ kpó mɛ e kú lɛ́ɛ bǐ kpó kpá.

³⁰“Gǎn e ɖo togun e ɖo totaligbé lɛ́ɛ nu lɛ́ɛ lɔmɔ̌ sín yɔdo ɖo fínɛ́; yě bǐ ɖo fínɛ́, yě kpó Sidɔ́ɔnnu lɛ́ɛ kpó. Mɛ syɛ́nsyɛ́n wɛ yě nyǐ, bó nɔ́ dó adohu nú mɛ bǐ. Amɔ̌, din ɔ́, yě lɔ ko yi mlɔ́ ayǐ ɖo yɔdo mɛ kpó winnyá kpó; yě kpó mɛ e kú ɖo ahwangbénu lɛ́ɛ kpó. Yě ɖu winnyá mɛ e ko yi kɔ́ glɔ́ lɛ́ɛ bǐ ɖɔhun.

³¹“Nú Ejípu xɔ́sú ɔ́ mɔ nǔ énɛ́ lɛ́ɛ bǐ ɔ́, nǔ e ɖo nǎ jɛ dó ahwangɔnu tɔn jí wɛ ɔ́ sɔ́ ná hu ado n'i sɔ mɔ̌ ǎ, ɖó è nǎ hu é kpó sɔ́ja tɔn lɛ́ɛ kpó ɖo ahwangbénu. Xó e nyɛ Aklúnɔ Mavɔmavɔ ɖɔ ɔ́ nɛ́.

³²Un jó Ejípu xɔ́sú ɔ́ dó, bɔ é dó nǔ baɖabaɖa lɛ́ɛ sin bó dó adohu nú mɛ e ɖo gbɛ ɔ́ mɛ lɛ́ɛ bǐ. Amɔ̌, éé kpó sɔ́ja tɔn lɛ́ɛ kpó ɔ́, è nǎ ɖi yě ɖó mɛ e ma gbo ada ǎ lɛ́ɛ tɛ́ntin, yě lɔmɔ̌ ná kú ɖo ahwangbénu. Xó e nyɛ Aklúnɔ Mavɔmavɔ ɖɔ ɔ́ nɛ́.”