Read fon Ezekiyɛ́li 34 Bible Online

Ezekiyɛ́li 34 - fon bible

Ezekiyɛ́li 34

¹Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, gǎn e ɖo Izlayɛ́li ví lɛ́ɛ nu lɛ́ɛ ɔ́, xó e ɖɔ dó yě wú wɛ un ɖe lɛ́ɛ ɔ́, ɖɔ nú yě. Ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: heelú mi mɛ e nyí lɛ̌ngbɔ́nyitɔ́ Izlayɛ́li tɔn lɛ́ɛ. Miɖée kɛ́ɖɛ́ wú wɛ mi nɔ kpé nukún dó. É má ká nyí lɛ̌ngbɔ́ lɛ́ɛ wú wɛ lɛ̌ngbɔ́nyitɔ́ lɛ́ɛ ɖó ná kpé nukún dó ǎ cé?

³Mi nɔ fyɔ́n anɔ̌sin lɛ̌ngbɔ́ lɛ́ɛ tɔn bó nɔ́ nu; mi nɔ kpa fún yětɔn, bó nɔ́ dó bló awu, bó nɔ́ dó; mi nɔ kpɔ́n lɛ̌ngbɔ́ e kló ganjí ɖ'é mɛ lɛ́ɛ, bó nɔ́ hu. Mi ka nɔ kpé nukún dó lɛ̌ngbɔ́ lɛ́ɛ wú ǎ.

⁴Lɛ̌ngbɔ́ e nǔ gbɛ́ dó lɛ́ɛ ɔ́, mi ná hlɔ̌nhlɔ́n yě ǎ. Mi kpé nukún dó éé ɖo azɔn jɛ wɛ lɛ́ɛ wú ǎ, mi blá akpa nú éé gblé wǔ lɛ́ɛ ǎ. Mi lɛ́ kɔ nú éé sɔ́ ali ɖěvo, bó xweyǐgbe lɛ́ɛ ǎ. Mi ka lɛ́ ba éé bú lɛ́ɛ ǎ. Lo ɔ́, acɛ e mi nɔ kpa nú yě ɔ́ syɛ́n dín, mi nɔ se gbɔ ǎ.

⁵ Énɛ́ ɔ́, lɛ̌ngbɔ́ ce lɛ́ɛ gbadó, ɖó lɛ̌ngbɔ́nyitɔ́ jɔ lɛ̌ngbɔ́nyitɔ́ ɖé ɖo yě nu ǎ, bɔ yě húzú nǔɖuɖu nú gběkanlin lɛ́ɛ bó gbadó.

⁶Nǔgbó wɛ, gbɔ̌ e ɖo kpó ce mɛ lɛ́ɛ ɖo flúflú wɛ gbɔn só ɖaxó ɖaxó jí, bó ɖo flúflú wɛ gbɔn só kpɛví kpɛví jí; yě gbadó gbɔn ayǐkúngban ɔ́ bǐ jí, bɔ mɛɖé ká ɖo yě flín wɛ ǎ; mɛɖé yi yě ba gbé ǎ.

⁷Énɛ́ ɔ́ wú ɔ́, mi lɛ̌ngbɔ́nyitɔ́ Izlayɛ́li tɔn lɛ́ɛ mi, mi ɖótó mì.

⁸Nyɛ Aklúnɔ Mavɔmavɔ ɔ́, un xwlé nyiɖée nú mi: lɛ̌ngbɔ́ ce lɛ́ɛ ɖo ajotɔ́ lɛ́ɛ lɔ mɛ, lɛ̌ngbɔ́ ce lɛ́ɛ nyí nǔɖuɖu nú gběkanlin lɛ́ɛ, ɖó yě ɖǒ lɛ̌ngbɔ́nyitɔ́ ǎ. Lɛ̌ngbɔ́nyitɔ́ ce lɛ́ɛ nɔ́ kpé nukún dó lɛ̌ngbɔ́ ce lɛ́ɛ wú ǎ; yěɖée wú wɛ yě nɔ́ kpé nukún dó.

⁹Énɛ́ ɔ́ wú ɔ́, mi lɛ̌ngbɔ́nyitɔ́ Izlayɛ́li tɔn lɛ́ɛ mi, mi ɖótó mì.

¹⁰Nyɛ Aklúnɔ Mavɔmavɔ ɔ́, un ná wa nǔ xá mi; un ná byɔ́ lɛ̌ngbɔ́ ce lɛ́ɛ mi; un sɔ́ ná jó yě dó ɖě nú mi ɖɔ mi ní nɔ yě nu bónú mi ná jó yě dó bó jɛ nukún kpé dó miɖée wú jí ǎ. Un ná yí lɛ̌ngbɔ́ ce lɛ́ɛ sín gbla mitɔn mɛ, bɔ yě sɔ́ ná nyí nǔɖuɖu ɖě nú mi ǎ.

¹¹“Xó e nyɛ Aklúnɔ Mavɔmavɔ ɖɔ ɔ́ ɖíe: Bɛ́ sín din ɔ́, nyɛ Aklúnɔ Mavɔmavɔ ɔ́, nyi ɖésú wɛ ná yi ba lɛ̌ngbɔ́ ce lɛ́ɛ mɔ, bó kpé nukún dó yě wú.

¹²Lɛ̌ngbɔ́nyitɔ́ ɖo lɛ̌ngbɔ́ tɔn lɛ́ɛ nu, bónú lɛ̌ngbɔ́ lɛ́ɛ gbadó ɔ́, é nɔ́ dɔn yě kplé; mɔ̌ ɖokpó ɔ́, nyi lɔ ná dɔn lɛ̌ngbɔ́ ce lɛ́ɛ kplé. Jɔhɔn nyanya ɖé wɛ nyi, bó gba lɛ̌ngbɔ́ ce lɛ́ɛ dó gbɔn tánmɛ tánmɛ, un ka ná gbɔn fí énɛ́ lɛ́ɛ bǐ, bó ná dɔn yě kplé.

¹³Un ná yi kplá yě sín togun e mɛ yě ɖe lɛ́ɛ, un ná kplé yě sín to tɛnmɛ tɛnmɛ e mɛ yě ɖe lɛ́ɛ mɛ, bó kplá yě wá to yětɔn mɛ. Un ná kplá yě wá, bɔ yě ná nɔ ɖu ama gbɔn Izlayɛ́li só lɛ́ɛ jí, yě ná nɔ́ ɖu ama gbɔn tɔkpá tɔkpá, yě ná nɔ́ ɖu gbɔn fí e gbɛtɔ́ nɔ́ nɔ ɖo to ɔ́ mɛ lɛ́ɛ bǐ.

¹⁴Un ná kplá yě yi fí e ama zɔ́n ɖe ganjí é. Amagbo yětɔn ná gbɔn Izlayɛ́li só lɛ́ɛ jí. Nǔgbó wɛ, yě ná mɔ amagbo ɖagbe, bó ná nɔ́ gbɔjɛ́ ɖo fínɛ́, yě ná mɔ amagbo ɖagbe bó ná mɔ ama e zɔ́n ganjí lɛ́ɛ ɖu gbɔn só lɛ́ɛ jí.

¹⁵Nyi ɖésúnɔ ná nyí lɛ̌ngbɔ́nyitɔ́ nú lɛ̌ngbɔ́ ce lɛ́ɛ, bó ná ná gbɔjɛ́ yě. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁶Lɛ̌ngbɔ́ ɖé bú ɔ́, un ná yi ba; un ná kplá éé zɛ ali é wá; un ná blá akpa nú lɛ̌ngbɔ́ e gblé wǔ é, bó ná ná hlɔ̌nhlɔ́n éé ɖo azɔn jɛ wɛ é. Amɔ̌, lɛ̌ngbɔ́ e kló dín, abǐ éé dó jǒ dín lɛ́ɛ ɔ́, un ná hu yě. Un ná kpé nukún dó lɛ̌ngbɔ́ ce lɛ́ɛ wú lě e sɛ́n zɔ́n gbɔn é.”

¹⁷“Mi lɛ̌ngbɔ́ ce lɛ́ɛ ɔ́, xó e ɖɔ nú mi wɛ nyɛ Aklúnɔ Mavɔmavɔ ɖe é ɖíe: Un ná nɔ́ gbo hwɛ nú gbɔ̌ ce lɛ́ɛ, un ná nɔ́ gbo nú agbo kpó gbǎgbá kpó.

¹⁸Ée mi mɔ ama ɖagbe ɖo amagbo mɛ bó ɖo ɖuɖu wɛ ɔ́, é kpé ǎ cé? Bɔ étɛ́wú mi ká nɔ gbídí ama e kpo ɔ́ ɖó afɔ wú? Ée mi mɔ sin ɖiɖi bó ɖo nunu wɛ ɔ́, é kpé ǎ cé? Bɔ étɛ́wú mi ka nɔ dó afɔ sin e kpo ɔ́ mɛ, bó nɔ́ hɛn blú?

¹⁹Énɛ́ ɔ́, lɛ̌ngbɔ́ ce ɖě lɛ́ɛ ɔ́, é má nyí gběhan e mi gbídí ɖó afɔ wú é wɛ yě ná ɖu, bó nu sin e mi hɛn blú ɖó afɔ wú é a?

²⁰Énɛ́ wú wɛ nyɛ Aklúnɔ Mavɔmavɔ ɖo ɖiɖɔ nú mi wɛ ɖɔ nyɛ ɖésúnɔ ná wá gbo hwɛ nú lɛ̌ngbɔ́ gǒxúxú kpó lɛ̌ngbɔ́ kloklo kpó.

²¹Lɛ̌ngbɔ́ e má ɖó gǎn ɖé ǎ lɛ́ɛ ɔ́, mi ɖó abɔ̌go nú yě bó ɖó aja nú yě; mi sɔ́ zo dó xo yě káká bó nya yě bǐ sín lɛ̌ngbɔ́ ce lɛ́ɛ mɛ.

²²Din ɔ́, un ná wá gɔ́ alɔ nú lɛ̌ngbɔ́ ce lɛ́ɛ, bɔ yě ná gosín ajotɔ́ lɛ́ɛ lɔ mɛ; énɛ́ ɔ́, un ná nɔ́ gbo hwɛ nú gbɔ̌ ce lɛ́ɛ.

²³ Un ná sɔ́ lɛ̌ngbɔ́nyitɔ́ ɖokpó ɖó lɛ̌ngbɔ́ ce lɛ́ɛ nu, bɔ é ɖokpó géé ná nɔ́ nyi yě. É wɛ nyí mɛsɛntɔ́ ce Davídi[17]. Éyɛ́ ná nɔ́ kpé nukún dó gbɔ̌ ce lɛ́ɛ wú, bó ná nyí lɛ̌ngbɔ́nyitɔ́ yětɔn.

²⁴ Nyɛ Mawu Mavɔmavɔ ɔ́, un ná nyí Mawu yětɔn, bɔ mɛsɛntɔ́ ce Davídi ka ná nyí axɔ́sú nú yě. Xó e nyɛ Mawu Mavɔmavɔ ɖɔ ɔ́ nɛ́.

²⁵“Un ná jɛ akɔ e ná ná fífá lɛ̌ngbɔ́ ce lɛ́ɛ ɔ́ xá lɛ̌ngbɔ́ ce lɛ́ɛ: un ná nya gběkanlin lɛ́ɛ bǐ sín to ɔ́ mɛ; énɛ́ ɔ́, kanlin ce lɛ́ɛ ná nɔ vivo mɛ, ɖo amagbo mɛ, bó ná dɔ́ amlɔ ɖo zunkan mɛ.

²⁶Un ná xo ɖɛ dó to ɔ́ jí, bó xo dó fí e lɛ́ lɛ̌ dó só e è sɔ́ ɖó vo nú mì é jí; jǐ hwenu su ɔ́, un ná nɔ́ sɛ́ jǐ dó, un ná nɔ́ sɛ́ jǐ e ná nɔ́ wa ɖagbe nú yě ɔ́ dó.

²⁷Atín lɛ́ɛ ná sɛ́n, ayǐkúngban ná ná nǔɖuɖu. Yě ná vo ɖo to ɔ́ mɛ. Un ná hɛn wlɔ e è dǒ yě, bɔ yě nyí kannumɔ é bǐ wɛ́n. Un ná hwlɛ́n yě ɖo mɛ e hɛn yě ɖó kannumɔ lɔ jí lɛ́ɛ sí. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ.

²⁸Ajotɔ́ e nɔ gosín to ɖěvo mɛ, bó nɔ́ wá fɔ yě lɛ́ɛ ɖě sɔ́ ná wá fɔ yě ǎ. Gběkanlin lɛ́ɛ ɖě sɔ́ ná vún yě ɖu ǎ. Yě ná nɔ vivo mɛ, mɛɖé sɔ́ ná dó tagba nú yě ǎ.

²⁹Un ná ná atíngbo ɖé yě bɔ to ná nɔ́ ké. Adɔ sɔ́ ná hu mɛɖé ɖo to ɔ́ mɛ ǎ. To ɖě sɔ́ ná ko yě ǎ.

³⁰Énɛ́ ɔ́, mɛ bǐ ná tunwun ɖɔ nyɛ Mawu Mavɔmavɔ, Mawu yětɔn ɔ́, un ɖo kpɔ́ xá yě, bɔ Izlayɛ́li togun ɔ́ nyí togun ce. Xó e nyɛ Aklúnɔ Mavɔmavɔ ɖɔ ɔ́ nɛ́.

³¹“Nǔgbó wɛ, mi lɛ̌ngbɔ́ ce lɛ́ɛ ɔ́, mi gbɔ̌hwan e ɖo amagbo ce mɛ lɛ́ɛ ɔ́, gbɛtɔ́ wɛ mi nyí bɔ nyɛ ka nyí Mawu mitɔn. Xó e nyɛ Aklúnɔ Mavɔmavɔ ɖɔ ɔ́ nɛ́.”