Read fon Ezekiyɛ́li 35 Bible Online

Ezekiyɛ́li 35 - fon bible

Ezekiyɛ́li 35

¹ Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, kpan nukɔn Seyíi sókan lɛ́ɛ, bó ɖɔ nǔ e un ɖɔ nú we dó Seyíi toví lɛ́ɛ wú é nú yě.

³Ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: Un ná wa nǔ xá we. Un ná ɖe hlɔ̌nhlɔ́n ce xlɛ́ we Seyíi to, to e ɖo sókan mɛ é; un ná gba we bǐ hánnyá, bó ná sɔ́ we dó húzú gbětótló.

⁴Un ná sɔ́ toxo towe lɛ́ɛ bǐ dó húzú aglingbigba; nǔɖé sɔ́ ná kpo ɖo toxo towe lɛ́ɛ mɛ ǎ; énɛ́ ɔ́, a nǎ tunwun ɖɔ nyɛ wɛ nyí Mawu Mavɔmavɔ.

⁵A fɔ́n tɛgbɛ ɔ́, wǎn gbɛ́ nú Izlayɛ́li ví lɛ́ɛ wɛ jɛ́n a nɔ ɖe. Hwenu e adǎn ɖo yě gbo wɛ, bɔ è ɖo tó dɔn nú yě wɛ ɖó nǔ nyanya e yě dó sin lɛ́ɛ wú ɔ́, a tɔ́n ahwan yě.

⁶Énɛ́ ɔ́ wú wɛ nyɛ Aklúnɔ Mavɔmavɔ ɔ́, un xwlé nyiɖée nú we; un ná tɔ́n ahwan we, bó ná kɔn kanjɔ towe kɔn nyi ayǐ. Ɖó kanjɔ e a kɔn nyi ayǐ ɔ́ ɖo hlɔn ba wɛ. Ée a ja kanjɔ kɔn nyi ayǐ gbé, bó ma sí tamɛ ǎ é ɔ́, è nǎ kɔn kanjɔ hwi lɔ tɔn kɔn nyi ayǐ.

⁷Seyíi to, un ná gba we bǐ, bó ná sɔ́ we dó húzú gbětótló; un ná hu mɛ e nɔ ɖo yiyi wɛ bó nɔ́ ɖo wǐwá wɛ lɛ́ɛ bǐ.

⁸Un ná hu gbɛtɔ́ tɛ́ gbɔn só towe lɛ́ɛ jí. Mɛ e ahwan ná hu lɛ́ɛ sín cyɔ ná kpé só kpɛví kpɛví lɛ́ɛ jí, bó ná kpé tɔdo lɛ́ɛ mɛ, bó ná kpé do lɛ́ɛ mɛ.

⁹Un ná sɔ́ we dó húzú gbětótló, bɔ é ná nɔ mɔ̌ káká sɔ́yi. È sɔ́ ná mɔ mɛɖé ɖo toxo towe lɛ́ɛ ɖě mɛ gbeɖé ǎ. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ.

¹⁰“A nɔ́ ɖɔ: ‘Un ná yí axɔ́súɖuto Izlayɛ́li tɔn, bó ná yí axɔ́súɖuto Judáa tɔn. Axɔ́súɖuto we énɛ́ lɛ́ɛ mɛ wɛ nyɛ Mawu Mavɔmavɔ ka nɔ.’

¹¹Énɛ́ ɔ́ wú ɔ́, nyɛ Aklúnɔ Mavɔmavɔ ɔ́, un xwlé nyiɖée nú we ɖɔ lě e a wa nǔ xá Izlayɛ́li kpó xomɛsin kpó wǔhwan kpó gbɔn ɔ́, mɔ̌ wɛ nyi lɔ ná wa nǔ xá we gbɔn. Hwenu e un ná ɖó hwɛ nú we ɔ́, un ná ɖe mɛ e un nyí ɔ́ xlɛ́ Izlayɛ́li ví lɛ́ɛ.

¹²Énɛ́ ɔ́, a nǎ tunwun ɖɔ nyɛ Mawu Mavɔmavɔ ɔ́, un se lě e a zun Izlayɛ́li só lɛ́ɛ gbɔn é; ɖó a ɖɔ: ‘È ko gba Izlayɛ́li só lɛ́ɛ bǐ; din ɔ́, è jǒ yě nú mǐ bɔ mǐ nǎ yí yě bǐ.’

¹³A hu tɛ́ nú mì; a yǐ go wǔtu ce; un se bǐ.

¹⁴“Xó e nyɛ Aklúnɔ Mavɔmavɔ ɖɔ ɔ́ ɖíe: un ná gba we hánnyá, bónú to lɛ́ɛ bǐ ná j'awǎ.

¹⁵Izlayɛ́li to gba bɔ é víví nú we; togun Izlayɛ́li tɔn ɔ́, ce ka wɛ. Énɛ́ ɔ́ wú ɔ́, nǔ ɖokpó ɔ́ wɛ un ná bló xá hwi ɖésú. Hwi Seyíi to ɔ́ kpó só towe lɛ́ɛ bǐ kpó wɛ è nǎ gba. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.”