Read fon Ezekiyɛ́li 36 Bible Online

Ezekiyɛ́li 36 - fon bible

Ezekiyɛ́li 36

¹“Hwɛ gbɛtɔ́ e, din ɔ́, yi ɖɔ xó e un ɖɔ nú we dó Izlayɛ́li só lɛ́ɛ wú é. Ɖɔ nú yě ɖɔ: ‘Izlayɛ́li só lɛ́ɛ mi, mi ɖótó xó e Mawu Mavɔmavɔ ɖɔ é.’

²Xó e Aklúnɔ Mavɔmavɔ ɖɔ ɔ́ ɖíe: Kɛntɔ́ mitɔn lɛ́ɛ ko nǔ hahaha bó ɖɔ: ‘Izlayɛ́li só jɔwámɔ lɛ́ɛ ɔ́, mǐtɔn wɛ yě húzú din.’

³É nyɔ́! Din ɔ́, bo ɖɔ xó e un ɖɔ dó yě wǔ ɔ́ nú yě; ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: Un mɔ ɖɔ kɛntɔ́ ján go dó só mitɔn lɛ́ɛ gbɔn fí bǐ; só énɛ́ lɛ́ɛ su yě nukún mɛ, bɔ yě to ɖěvo mɛ nu lɛ́ɛ yí, bɔ é húzú zungbe bó húzú acagbe.

⁴Énɛ́ ɔ́ wú ɔ́, Izlayɛ́li só lɛ́ɛ mi, mi ɖótó xó e nyɛ Aklúnɔ Mavɔmavɔ ɖɔ é. Mi ɖótó xó e un ɖɔ dó só kpɛví kpɛví lɛ́ɛ wú é, xó e un ɖɔ dó tɔsisa lɛ́ɛ kpó tɔdo lɛ́ɛ kpó wú é, xó e un ɖɔ dó toxo e è gba bǐ, bɔ mɛɖé ma sɔ́ ɖ'é mɛ ǎ lɛ́ɛ wú é. Togun e lɛ́ lɛ̌ dó toxo énɛ́ lɛ́ɛ é bɛ́ nǔ e ɖo toxo énɛ́ lɛ́ɛ mɛ lɛ́ɛ bǐ, bɔ toxo énɛ́ lɛ́ɛ húzú nǔkiko nú yě.

⁵Nyɛ Aklúnɔ Mavɔmavɔ wɛ ɖɔ un ná wa nǔ xá togun e lɛ́ lɛ̌ dó Izlayɛ́li to lɛ́ɛ, ɖo tají ɔ́, Edɔ́mu togun ɔ́. Yě hu tɛ́ nú mì kpó awǎjijɛ kpó bó yí to ce, bó bɛ́ kanlin e ɖo Izlayɛ́li to ɔ́ mɛ lɛ́ɛ bǐ.

⁶Énɛ́ ɔ́ wú ɔ́, hwɛ gbɛtɔ́ e, a nǎ ɖɔ xó e un ɖɔ nú we dó Izlayɛ́li to ɔ́ wú é n'i. A nǎ ɖɔ nú só lɛ́ɛ, só kpɛví kpɛví lɛ́ɛ, tɔsisa lɛ́ɛ kpó tɔdo lɛ́ɛ kpó ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Akɔta akɔta lɛ́ɛ dó hɛ̌n mi; énɛ́ wú wɛ un ɖo wǔ hwǎn wɛ, énɛ́ wú wɛ un ɖo adǎn jí,

⁷bó ɖɔ: Un zin alɔ dó akɔ́n ɖɔ to e lɛ́ lɛ̌ dó Izlayɛ́li lɛ́ɛ lɔ ná ɖu hɛ̌n.

⁸Hwe énɛ́ nu ɔ́, atín e ɖo Izlayɛ́li só jí lɛ́ɛ ná zɔ́n ama, bó ná sɛ́n nú mi Izlayɛ́li ví togun ce ɔ́. Ɖó zaanɖé din ɔ́, mi ná lɛ́ kɔ yi to mitɔn mɛ.

⁹Un ná sɔ́ nukún ɖagbe dó kpɔ́n mi Izlayɛ́li só lɛ́ɛ; è nǎ nɔ lɛ gle gbɔn mi Izlayɛ́li só lɛ́ɛ jí, bó ná nɔ́ dó nǔ.

¹⁰Un ná bló bɔ gbɛtɔ́ ná lɛ́ ji kpɔ́ gěgé gbɔn mi Izlayɛ́li só lɛ́ɛ jí: Izlayɛ́li to ɔ́ ná ji gba; toxo e è ko gba hánnyá bǐ lɛ́ɛ ɔ́, è nǎ lɛ́ vɔ́ yě ɖó ayǐ ɖó fí e è ko gba lɛ́ɛ jí.

¹¹Gbɛtɔ́ kpó kanlin kpó ná ji gba gbɔn mi Izlayɛ́li só lɛ́ɛ jí. Yě ná ji káká bɔ gbɛtɔ́ kpó kanlin kpó ná lɛ́ sukpɔ́ gbɔn mi Izlayɛ́li só lɛ́ɛ jí lě e é kó ɖe gbɔn ɖ'ayǐ é; un ná wa ɖagbe nú mi hú ɖagbe e un ko wa nú mi ɖ'ayǐ é. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ.

¹²Un ná kplá gbɛtɔ́ bɔ yě ná ɖi zɔnlin gbɔn mi Izlayɛ́li só lɛ́ɛ jí, togun ce Izlayɛ́li ná ɖi zɔnlin gbɔn mi jí. Mi ná nyí yětɔn; mi sɔ́ ná yí vǐ yětɔn sín yě sí ɖě ǎ.

¹³Xó e nyɛ Aklúnɔ Mavɔmavɔ ɖɔ ɔ́ ɖíe: Mɛ ɖé lɛ́ɛ nɔ́ ɖɔ hwi Izlayɛ́li to ɔ́, a nɔ vún gbɛtɔ́ ɖu, a nɔ yí vǐ sín togun towe sí.

¹⁴Din ɔ́, a sɔ́ ná vún gbɛtɔ́ ɖu ɖě ǎ, a sɔ́ ná yí vǐ ɖě sín togun towe sí ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁵Un sɔ́ ná jó we dó bɔ togun ɖě lɛ́ɛ ná zun we abǐ yě ná cá we ko bɔ a nǎ se ǎ. A sɔ́ ná hu toví towe lɛ́ɛ ɖě ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”

¹⁶Mawu Mavɔmavɔ ɖɔ nú mì ɖɔ:

¹⁷“Hwɛ gbɛtɔ́ e, hwenu e Izlayɛ́li ví lɛ́ɛ ɖo to yětɔn mɛ ɔ́, yě zé walɔ yětɔn kpó nǔ dó sin yětɔn kpó dó hɛn to ɔ́ blí. Nǔ e yě wa nyi do lɛ́ɛ kwíji nukún ce mɛ glegbe e nyɔ̌nu nɔ́ jɛ é ɖɔhun.

¹⁸Énɛ́ ɔ́, un ɖe xomɛsin ce xlɛ́ yě ɖó mɛ e yě hu ɖo to ɔ́ mɛ lɛ́ɛ kpó vodún e yě lí, bó dó hɛn to ɔ́ blí é kpó wú.

¹⁹Un gba yě dó kpé gbɔn akɔta ɖěvo lɛ́ɛ mɛ. Un dɔn tó nú yě lě e nǔ e yě dó sin lɛ́ɛ byɔ́ gbɔn é.

²⁰To e mɛ yě gbɔn lɛ́ɛ bǐ ɔ́, hwɛ e yě nɔ́ hu lɛ́ɛ hɛn nyɛ mɛ e nyí Mawu mímɛ́ ɔ́ sín nyǐkɔ blí. Ɖó è nɔ ɖɔ dó yě wú ɖɔ: ‘Mawu Mavɔmavɔ sín togun wɛ yě nyí; è ka ɖe yě sín Mawu Mavɔmavɔ sín to ɔ́ mɛ gǎnnugǎnnu.’

²¹Nyǐkɔ ce e hɛn blí wɛ akɔta ɖěvo lɛ́ɛ ɖe ɖó Izlayɛ́li ví lɛ́ɛ e yi to yětɔn mɛ lɛ́ɛ wú ɔ́ vɛ́ nú mì.

²²Énɛ́ ɔ́ wú ɔ́, ɖɔ nú Izlayɛ́li togun ɔ́ ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Izlayɛ́li ví lɛ́ɛ mi, nǔ e bló gbé un ja ɔ́, mi wútu wɛ un ɖo nǎ bló wɛ ǎ; lo ɔ́, è nǎ sí nyǐkɔ ce e mi hɛn blí gbɔn to ɖěɖě mɛ mi gbɔn lɛ́ɛ wǔtu wɛ.

²³Mi wú wɛ akɔta ɖě lɛ́ɛ hu tɛ́ nú nyǐkɔ ce. Din ɔ́, un ná ɖe xlɛ́ yě ɖɔ nyɛ wɛ nyí Mawu aditi, Mawu mímɛ́ ɔ́. Mi wɛ un ka ná sɔ́ dó ɖe nǔ énɛ́ xlɛ́ yě. Énɛ́ ɔ́, akɔta lɛ́ɛ ná tunwun ɖɔ nyɛ wɛ nyí Mawu Mavɔmavɔ. Xó e nyɛ Aklúnɔ Mavɔmavɔ ɖɔ ɔ́ nɛ́.

²⁴“Un ná ɖe mi sín akɔta ɖě lɛ́ɛ mɛ, un ná ɖe mi sín to ɖěvo ɖěvo e mɛ mi gba kpé gbɔn lɛ́ɛ mɛ, bó ná kplá mi wá to mitɔn mɛ.

²⁵Un ná kɔn sin mímɛ́ dó mi jí, bɔ mi ná húzú mɛ mímɛ́. Un ná lɛ mi sín nǔ blíblí e mi wa lɛ́ɛ kpó vodún e mi sɛn lɛ́ɛ kpó mɛ.

²⁶ Un ná ná ayixa yɔ̌yɔ́ mi, un ná ná linlin yɔ̌yɔ́ mi. Un ná ɖe ayixa mitɔn e syɛ́n awǐnnya ɖɔhun ɔ́ síin, bó ná zé ayixa e nɔ se tónú ɔ́ ɖó tɛn tɔn mɛ.

²⁷Un sɔ́ yɛ ce dó mi mɛ; un ná sɔ́ mi dó ɖó mɛ e nɔ xwedó sɛ́n dó wa nǔ lɛ́ɛ; un ná sɔ́ mi dó ɖó mɛ e nɔ se tónú nú nǔ e un zɔn lɛ́ɛ, bó nɔ́ bló ɖ'é jí lɛ́ɛ.

²⁸Mi ná nɔ to e un ná tɔ́gbó mitɔn lɛ́ɛ é mɛ; mi ná nyí togun ce, bɔ un ná nyí Mawu mitɔn.

²⁹Un ná hwlɛ́n mi gán sín nǔ blíblí e mi wa lɛ́ɛ mɛ. Un sɔ́ ná sɛ́ adɔ ɖě dó mi ǎ; un ná ná gbe jinukún bɔ ji ná jɛ.

³⁰Atín mitɔn lɛ́ɛ ná sɛ́n káká, ji ná jɛ nú mi ɖo gle mitɔn lɛ́ɛ mɛ, bɔ mi sɔ́ ná sa adɔ lele ɖě ɖo akɔta ɖěvo lɛ́ɛ nukɔn bɔ é ná nyí winnyá nú mi ǎ.

³¹Énɛ́ ɔ́, mi ná flín jijɔ nyanya e mi zán lɛ́ɛ, bó ná flín winnyánú e mi dó sin lɛ́ɛ. Mi ɖésúnɔ sín nǔ ná vɛ́ miɖée wú káká bɔ mi ná sixú kpɔ́n miɖée nukún mɛ ǎ, ɖó nǔ e mi wa nyi do lɛ́ɛ, kpó hɛ̌nnú e mi wa lɛ́ɛ kpó wú.

³²Mi ka ná tunwun ganjí ɖɔ é kún nyí midɛɛ lɛ́ɛ wú wɛ un ɖo nǔ wa gbɔn mɔ̌ wɛ ó. Xó e nyɛ Aklúnɔ Mavɔmavɔ ɖɔ ɔ́ nɛ́. Winnyá wɛ ló hu mi Izlayɛ́li ví lɛ́ɛ bónú mi dó kɔ do ɖó nǔ e mi wa lɛ́ɛ wú.

³³“Xó e nyɛ Aklúnɔ Mavɔmavɔ ɖɔ é ɖíe: Hwenu e un ná slá wǔ nú mi sín hwɛ e mi hu lɛ́ɛ mɛ ɔ́, un ná bló bɔ gbɛtɔ́ ná lɛ́ vɔ́ ji gbɔn toxo lɛ́ɛ mɛ toxo lɛ́ɛ mɛ, bɔ nǔ e è ko hɛn gblé lɛ́ɛ ɔ́, è nǎ bló yě ɖó.

³⁴Gle e è ma sɔ́ lɛ kpɔ́n gbeɖé ǎ lɛ́ɛ ɔ́, è nǎ vɔ́ bǐ lɛ bɔ aliwáyitɔ́ sɔ́ ná mɔ ayǐkúngban malɛ́málɛ́ ɖě ǎ.

³⁵È nǎ nɔ́ ɖɔ: ‘To élɔ́ e è ko gba bǐ é lɛ́ wá cí jikpá Edɛ́ni tɔn ɖɔhun, bɔ toxo e ko gba bǐ, bɔ è ko mɔ ɖɔ mɛɖé kún sɔ́ ná nɔ fínɛ́ gbeɖé ó lɛ́ɛ ɔ́, è lɛ̌ wá vɔ́ bǐ gbá, bɔ gbɛtɔ́ ɖo fínɛ́ din.’

³⁶Énɛ́ ɔ́, to e lɛ́ lɛ̌ dó mi bo kpo ɖo te lɛ́ɛ ná mɔ ɖɔ nyɛ Mawu Mavɔmavɔ wɛ vɔ́ to e ko gba é bló ɖó, bó lɛ gle e è ko jó dó lɛ́ɛ. Nyɛ Mawu Mavɔmavɔ wɛ ɖɔ bó ká ná bló.

³⁷“Xó e nyɛ Aklúnɔ Mavɔmavɔ ɖɔ ɔ́ ɖíe: un ná lɛ́ yí gbe bɔ Izlayɛ́li ví lɛ́ɛ ná nɔ́ ylɔ́ mì bónú má wa ɖagbe nú yě; un ná ná vǐ yě bɔ yě ná ji wɔɖɔɖɔ kanlin ɖɔhun.

³⁸Toxo e mɛ mɛɖé má sɔ́ ɖe égbé din ǎ ɔ́, gbɛtɔ́ ná lɛ́ gɔ́, lě e è ja xwe ɖaxó ɖaxó lɛ́ɛ ɖu gbé ɖo Jeluzalɛ́mu ɔ́, kanlin e ná dó sá vɔ̌ ná wɛ è ɖe lɛ́ɛ nɔ́ gɔ́ Jeluzalɛ́mu toxo ɔ́ gbɔn é. Mɔ̌ wɛ gbɛtɔ́ lɛ́ɛ ná ji gba gbɔn, ɖo toxo mitɔn lɛ́ɛ mɛ; énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.”