Read fon Ezekiyɛ́li 38 Bible Online

Ezekiyɛ́li 38 - fon bible

Ezekiyɛ́li 38

¹Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ e, kpan nukɔn Gɔgu, togun Tubalu kpó Mɛcɛ́ki tɔn kpó sín gǎn ɖaxó ɔ́ ɖo Magɔ́gi tomɛ, bó ɖɔ nǔ e un ɖɔ dó wǔ tɔn ɔ́ n'i.

³A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Un ná tɔ́n ahwan we Gɔgu, hwi mɛ e ɖu gǎn bɔ gǎn vɔ ɖo togun Mɛcɛ́ki tɔn kpó Tubalu tɔn kpó nu é.

⁴Un ná dó gan aglan nú we, bó dɔn we tɔ́n kpó hlɔ̌nhlɔ́n kpó, bó dɔn we yi ahwangbénu. Un ná dɔn we tɔ́n sín to towe mɛ, hwi kpó ahwangɔnu towe bǐ kpó, kpó sɔ́ towe lɛ́ɛ kpó, kpó sɔ́xátɔ́ towe e nɔ dó awu ɖagbe ɖagbe lɛ́ɛ kpó, kpódó ahwanfuntɔ́ towe wɔ̌buwɔ́bú e nɔ́ hɛn gǎglónú kpɛví kpó ɖaxó kpó lɛ́ɛ kpó; yě bǐ wɛ nyɔ́ hwǐ zán mɔ̌hunkɔtɔn.

⁵Sɔ́ja Pɛ́si tɔn lɛ́ɛ, Etiopíi tɔn lɛ́ɛ, kpó Pútinu tɔn lɛ́ɛ kpó ná xwe gangbákún bó hɛn gǎglónú bó ná gɔ́ nú we.

⁶Gomɛ́ɛ togun ɔ́ kpó ahwangɔnu tɔn bǐ kpó, Bɛti-Togáama togun e ɖo totaligbé aga dɔ̌n bǐ é kpó ahwangɔnu tɔn lɛ́ɛ bǐ kpó ná gɔ́ nú ahwangɔnu towe lɛ́ɛ; mɔ̌ ɖokpó ɔ́, to ɖěvo mɛ nu wɔ̌buwɔ́bú ɖé lɛ́ɛ ná gɔ́ nú we.

⁷Din ɔ́, sɔ́ nǔ bó ɖo acéjí, hwi kpó mɛ tobutóbú e ɖo acɛ towe mɛ lɛ́ɛ kpó.

⁸É wá yá ɔ́, un ná zɔ́n nǔ we. Xwe wá ɖo xwe jí jɛ wɛ ɔ́, un ná sɛ́ we dó, bɔ a nǎ yi tɔ́n ahwan Izlayɛ́li to ɔ́. Izlayɛ́li ví e xo ahwan zlɛ́ lɛ́ɛ ɔ́, yě ná gosín to e mɛ yě gbadó gbɔn lɛ́ɛ mɛ, bó ná wá kplé kpɔ́ gěgé ɖo Izlayɛ́li, só e è ko jó dó bɔ é kó lín bɔ mɛ ɖě ma sɔ́ ɖ'é jí ǎ lɛ́ɛ jí. Yě mɛ énɛ́ lɛ́ɛ e è nǎ kplá sín akɔta ɖě lɛ́ɛ mɛ lɛ́ɛ ɔ́, yě ná wá vo bǐ ɖo to yě ɖésúnɔ tɔn ɔ́ mɛ.

⁹Hwɛ ka ná sí te jɔhɔn ɖɔhun, bó ná byɔ́ yě mɛ; a nǎ cyɔ́n yě akpɔ́kpɔ́ ɖɔhun, hwi kpó ahwangɔnu towe bǐ kpó, kpódó togun wɔ̌buwɔ́bú e xwedó we lɛ́ɛ kpó.

¹⁰“Hwe énɛ́ ɔ́ nu su ɔ́, ayixa gěgé ná wá xomɛ nú we, bɔ a nǎ lɛ̌n nǔ nyanya gěgé bó ná wa. Xó e nyɛ Aklúnɔ Mavɔmavɔ ɖɔ ɔ́ nɛ́.

¹¹A nǎ sɔ́ nǔ bó ná ɖɔ émí ná yi tɔ́n ahwan to e ɖo vivo mɛ é, to e è ma mɛ ahohó lɛ́ lɛ̌ dó toxo tɔn lɛ́ɛ bó dó hɔn nu, bó nɔ́ dó gan mɛ ǎ lɛ́ɛ.

¹²A nǎ ɖɔ émí ná yi gba to ɔ́ bǐ, bó bɛ́ nǔ e ɖo to ɔ́ mɛ lɛ́ɛ bǐ gǎnnugǎnnu. A nǎ yi tɔ́n ahwan mɛ e lɛ́ kɔ wá toxo e ko gba bǐ, bɔ mɛɖé má sɔ́ ɖ'é mɛ ǎ lɛ́ɛ; mɛ énɛ́ lɛ́ɛ e è kplá sín akɔta akɔta lɛ́ɛ mɛ lɛ́ɛ; mɛ énɛ́ lɛ́ɛ e ɖó kanlin kpó dɔkun kpó kpɔ́ lɛ́ɛ. Ayǐkúngban ɔ́ sín tɛ́ntin wɛ toxo yětɔn ɖe.

¹³Sabanu lɛ́ɛ, Dedáninu lɛ́ɛ, ajɔ̌tɔ́ Taasísi tɔn lɛ́ɛ kpó gǎn yětɔn lɛ́ɛ kpó ná kanbyɔ́ we ɖɔ: ‘Nǔ ná gba bó bɛ́ nǔ gǎnnugǎnnu wú wɛ a kplé ahwan towe lɛ́ɛ a? Kpatágan kpó siká kpó, kanlin kpó dɔkun kpó gbé wɛ a tɔ́n a?’

¹⁴“Hwɛ gbɛtɔ́ e, ɖɔ xó e nyɛ Aklúnɔ Mavɔmavɔ ɖɔ nú we dó Gɔgu wú é. Xó e un ɖɔ ɔ́ ɖíe: hwenu e togun ce Izlayɛ́li ɔ́ ná ɖo vivo mɛ é ɔ́, hwɛ ná sɔ́ ahwan nú.

¹⁵A nǎ sɔ́ nǔ, bó gosín to towe mɛ ɖo totaligbé aga dɔ̌n, bó ná zɔn sɔ́jahwangbɛ́ wɔ̌buwɔ́bú ɖé nu. To lɛ́ɛ gěgé mɛ wɛ sɔ́ja énɛ́ lɛ́ɛ ná gosín, bó ná xá sɔ́.

¹⁶A nǎ tɔ́n ahwan togun ce Izlayɛ́li ɔ́, bó ná cyɔ́n to ɔ́ ahǔn ɖɔhun. É ká ná lín káká có nǔ énɛ́ lɛ́ɛ ná jɛ. Un ná sɛ́ we dó bɔ a nǎ wǎ tɔ́n ahwan to ce, énɛ́ ɔ́, to ɖě lɛ́ɛ ná tunwun ɖɔ nyɛ wɛ nyí Mawu mímɛ́ ɔ́. Hwi Gɔgu ɔ́ wɛ un ka ná zán dó bló nǔ énɛ́ ɔ́.

¹⁷“Xó e nyɛ Aklúnɔ Mavɔmavɔ ɖɔ ɔ́ ɖíe: Hwi xó wɛ un ɖɔ ɖ'ayǐ xóxó gbɔn mɛsɛntɔ́ ce gbeyíɖɔ Izlayɛ́li tɔn lɛ́ɛ jí. Hwe énɛ́ nu ɔ́, mɛsɛntɔ́ gbeyíɖɔ lɛ́ɛ ɖɔ xó e un ɖɔ nú yě ɔ́ nú xwe mɔ̌kpán ɖɔ un ná kplá mɛɖé bɔ é ná tɔ́n ahwan togun ce.

¹⁸Amɔ̌, Gɔgu, gbe e gbe a ka ná yi tɔ́n ahwan Izlayɛ́li to ɔ́ nǔgbó é ɔ́, xomɛsin ce ná jɛ te dó jǐ towe. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁹Hwenu e un ná ɖo wǔ hwan wɛ, bó ná ɖo xomɛsin ɖaxó ɖé jí ɔ́, un xwlé nyiɖée nú we ɖɔ gbe énɛ́ gbe ɔ́, ayǐkúngban ná dán wǔ ɖaxó ɖé ɖo Izlayɛ́li.

²⁰Hweví e ɖo xu mɛ lɛ́ɛ, xɛ e nɔ zɔn gbɔn jɔ mɛ lɛ́ɛ, gběkanlin lɛ́ɛ, dan e nɔ ɖíɖí gbɔn kɔ́ mɛ lɛ́ɛ kpó gbɛtɔ́ lɛ́ɛ bǐ kpó ná sísɔ́ ɖo nukɔn ce. Só lɛ́ɛ ná mu, awǐnnya e ɖo xutó lɛ́ɛ ná jɛ ayǐ, dǒ lɛ́ɛ bǐ ná mu kɔn nyi ayǐ.

²¹Gɔgu, un ná sɛ́ ahwan dó mɛ towe lɛ́ɛ tɛ́ntin gbɔn só lɛ́ɛ bǐ jí; sɔ́ja towe lɛ́ɛ ná tɔ́n ahwan yěɖée, bó hu yěɖée. Xó e nyɛ Aklúnɔ Mavɔmavɔ ɖɔ ɔ́ nɛ́.

²²Un ná sɛ́ jǐ ɖaxó ɖé dó, un ná sɔ́ jɛmɛjí kpó kú kpó dó ɖó hwɛ nú we. Un ná sɛ́ myɔ kpó kɛ́njí kpó hwemí kpó dó, bɔ yě ná ja jǐ ɖɔhun kɔn dó hwi kpó ahwangɔnu towe kpó, kpódó mɛ tobutóbú e ɖo jǐ towe lɛ́ɛ kpó jí.

²³Énɛ́ ɔ́, un ná ɖe xlɛ́ akɔta lɛ́ɛ bǐ ɖɔ nyɛ wɛ nyí Mawu e kló bó nyí Mawu mímɛ́ é, bɔ yě ná tunwun ɖɔ nyi wɛ nyí Mawu Mavɔmavɔ.”