Read fon Ezekiyɛ́li 39 Bible Online

Ezekiyɛ́li 39 - fon bible

Ezekiyɛ́li 39

¹Mawu ɖɔ nú mì ɖɔ: “Hwɛ gbɛtɔ́ e, ɖɔ nǔ e un ɖɔ nú we ɖɔ é ná jɛ dó Gɔgu jí ɔ́ n'i. A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Un ná tɔ́n ahwan we Gɔgu, hwi mɛ e ɖu gǎn bɔ gǎn vɔ ɖo togun Mɛcɛ́ki tɔn kpó Tubalu tɔn kpó nu é.

²Un ná ɖe we tɔ́n sín to towe mɛ, totaligbé aga dɔ̌n; un ná ɖe we tɔ́n gǎnnugǎnnu, bɔ a nǎ yi fun ahwan ɖo Izlayɛ́li só lɛ́ɛ jí.

³A ka yi jɛ dɔ̌n ɔ́, un ná hɛn da towe wɛ́n bɔ é ná jɛ ayǐ sín alɔ towe amyɔ ɔ́ mɛ; un ná yí gǎ e ɖo alɔ towe aɖisí ɔ́ mɛ lɛ́ɛ kɔn nyi ayǐ.

⁴A nǎ kú ɖo Izlayɛ́li só lɛ́ɛ jí, hwi kpó ahwangɔnu towe bǐ kpó, kpó togun tobutóbú e ɖo jǐ towe lɛ́ɛ kpó. Un ná ná lan towe xɛ alɔkpa alɔkpa e nɔ ɖu lan lɛ́ɛ, un ná ná lan towe nǔ e kó wú awa lɛ́ɛ kpó gběkanlin lɛ́ɛ kpó bɔ yě ná ɖu.

⁵A nǎ kú jɛ kɔ́ mɛ yǎyánɔ. Xó e nyɛ Aklúnɔ Mavɔmavɔ ɖɔ é nɛ́.

⁶Un ná sɛ́ myɔ dó Magɔ́gi to ɔ́ mɛ, bó ná sɛ́ myɔ dó mɛ e ɖo vivo mɛ ɖo tɔtɛ́ntinto lɛ́ɛ mɛ lɛ́ɛ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.

⁷Un ná ɖe xlɛ́ togun ce Izlayɛ́li ɖɔ Mawu mímɛ́ wɛ un nyí; un sɔ́ ná jó e dó bɔ é ná sɔ́ nyǐkɔ ce mímɛ́ ɔ́ xo kɔ́ ɖě ǎ; énɛ́ ɔ́, akɔta ɖě lɛ́ɛ ná tunwun ɖɔ nyi wɛ nyí Mawu Mavɔmavɔ, Mawu mímɛ́ Izlayɛ́li tɔn.

⁸Nǔgbó wɛ, nǔ énɛ́ lɛ́ɛ ná jɛ; yě kó ɖo jijɛ wɛ; azǎn e xó un ɖɔ ɔ́ wɛ. Xó e nyɛ Aklúnɔ Mavɔmavɔ ɖɔ ɔ́ nɛ́.

⁹Énɛ́ ɔ́, Izlayɛ́li ví lɛ́ɛ ná tɔ́n sín toxo yětɔn lɛ́ɛ mɛ; yě ná bɛ́ kɛntɔ́ yětɔn lɛ́ɛ sín ahwanfunnú bó ná ɖo zo dó wɛ káká nú xwe tɛ́nwe; yě ná dó gǎglónú kpɛví kpó ɖaxó kpó zo; yě ná dó da kpó gǎ kpó zo; yě ná dó hwǎn kpó kpo nuxwíɖíxwíɖí kpó zo.

¹⁰É sɔ́ ná byɔ́ ɖɔ è nǎ yi gle mɛ, bó yi ba nakí abǐ è nǎ hu atín cóbó mɔ nakí ǎ, ahwanfunnú énɛ́ lɛ́ɛ wɛ yě ná nɔ́ dó flɔ́ myɔ ɔ́ ná. Din ɔ́, yě wɛ ná fɔ mɛ e nɔ fɔ nǔ yětɔn ɖ'ayǐ lɛ́ɛ sín nǔ; yě wɛ ná vɔ mɛ e nɔ vɔ to yětɔn ɖ'ayǐ lɛ́ɛ. Xó e nyɛ Aklúnɔ Mavɔmavɔ ɖɔ ɔ́ nɛ́.

¹¹“Hwenu e nǔ énɛ́ lɛ́ɛ bǐ ná jɛ ɔ́, un ná ná fí e è nǎ kun yɔdo nú Gɔgu kpó ahwangɔnu tɔn kpó ɖó ɖo Izlayɛ́li é; yɔdo ɔ́ ná nɔ Aliwáyitɔ́ lɛ́ɛ tɔdo mɛ, ɖo zǎnzǎnhwe jí nú xu Kúkú ɔ́; fí ɔ́ ná sú ali dó aliwáyitɔ́ lɛ́ɛ. È nǎ ɖi Gɔgu kpó ahwan tɔn lɛ́ɛ kpó d'é mɛ, bó ná nɔ́ ylɔ́ fí ɔ́ ɖɔ: ‘Ahwangɔnu Gɔgu tɔn tɔdo’.

¹²Sun tɛ́nwe wɛ Izlayɛ́li ví lɛ́ɛ ná sɔ́ ɖó te, bó dó ɖi cyɔ énɛ́ lɛ́ɛ bǐ, bó ná kplɔ́ to ɔ́.

¹³Mɛ e ɖo to ɔ́ mɛ lɛ́ɛ bǐ wɛ ná wa azɔ̌ énɛ́ ɔ́, bó ná xɔ susu ɖ'é mɛ gbe e gbe un ná ɖe susu ce xlɛ́ é; xó e nyɛ Aklúnɔ Mavɔmavɔ ɖɔ ɔ́ nɛ́.

¹⁴Sun tɛ́nwe énɛ́ lɛ́ɛ wá yi ɔ́, è nǎ ɖe mɛ ɖé lɛ́ɛ, bɔ yě ná gbɔn to ɔ́ bǐ mɛ, bó ná slá wǔ nú to ɔ́ bǐ; aliwáyitɔ́ lɛ́ɛ ná dó alɔ yě, bɔ yě ná ɖi cyɔ e kpo ɖo kɔ́ mɛ lɛ́ɛ.

¹⁵Mɛ e è nǎ ɖe lɛ́ɛ ná gbɔn to ɔ́ bǐ mɛ; ényí mɛ ɖé ɖo yiyi wɛ, bó mɔ gbɛtɔ́ xú ɖo fí ɖé ɔ́, é ná kplé awǐnnya ɖó kpɔ́ ɖó fínɛ́ dó ɖó wuntun, bɔ yɔkuntɔ́ lɛ́ɛ ná wá sɔ́ yi ɖi ɖó tɔdo Ahwangɔnu Gɔgu tɔn ɔ́ tɔn mɛ.

¹⁶Toxo ɖokpó ná tlɛ tíin lɔ, bɔ è nǎ nɔ́ ylɔ́ ɖɔ Hamɔ́na; tínmɛ tɔn wɛ nyí Ahwan wɔ̌buwɔ́bú. È blǒ énɛ́ lɛ́ɛ gúdo ɔ́, to ɔ́ bǐ ná nyí to mímɛ́.”

¹⁷ Aklúnɔ Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, ylɔ̌ xɛ tɛnmɛ tɛnmɛ lɛ́ɛ, bó ylɔ́ gběkanlin lɛ́ɛ, bó dó wɛn élɔ́ yě nú mì; ɖɔ nú yě ɖɔ: Mi kplé miɖée sín fí bǐ. Mi kplé miɖée bó wá vɔ̌ e ná sá wɛ un ɖe ɔ́ sín tɛn mɛ. Vɔ̌ ɖaxó ɖé wɛ é ná nyí, bɔ un ná sá gbɔn Izlayɛ́li só lɛ́ɛ jí. Mi na ɖu lan ɖo fínɛ́ bó ná nu hun.

¹⁸Mi ná ɖu ahwanfuntɔ́ syɛ́nsyɛ́n lɛ́ɛ sín lan, bó ná nu gǎn gbɛmɛ fí tɔn lɛ́ɛ sín hun; yě wɛ ná nyí agbo kpó lɛ̌ngbɔ́ví kpó, gbǎgbá kpó nyibúví kloklo kpó bɔ un ná dó sá vɔ̌ ɔ́.

¹⁹Mi wá vɔ̌sísá ɔ́ tɛnmɛ ɔ́, mi ná ɖu lan e dó jǒ é káká bɔ é ná kpé mi kpo; mi ná nu hun káká bɔ hun ná mú mi.

²⁰Ényí mi wá agɔ̌ e un ylɔ́ ɔ́ tɛnmɛ ɔ́, mi ná ɖu sɔ́ kpó sɔ́xátɔ́ kpó sín lan, bó ná ɖu ahwanfuntɔ́ tɛnmɛ tɛnmɛ sín lan. Xó e nyɛ Aklúnɔ Mavɔmavɔ ɖɔ ɔ́ nɛ́.

²¹“Un ná ɖe susu ce xlɛ́ gbɔn akɔta akɔta lɛ́ɛ mɛ; akɔta lɛ́ɛ bǐ ná mɔ lě e un nɔ ɖó hwɛ nú mɛ gbɔn é; yě ná mɔ hlɔ̌nhlɔ́n e un ná sɔ́ dó wa nǔ xá yě ɔ́.

²²Bɛ́ sín gbe énɛ́ ɔ́ gbe ɔ́, Izlayɛ́li ví lɛ́ɛ ná tunwun ɖɔ nyi wɛ nyí Mawu Mavɔmavɔ, Mawu yětɔn káká sɔ́yi.”

²³Mawu ɖɔ: “Akɔta ɖě lɛ́ɛ ná tunwun ɖɔ hwɛ e togun ce Izlayɛ́li ɔ́ hu dó mì lɛ́ɛ wú wɛ ahwan wlí yě yi to ɖěvo mɛ. Nǔgbó ɔ́, un ɖe kɔ sín yě wú, bó jó yě nú kɛntɔ́ yětɔn lɛ́ɛ, bónú è nǐ hu yě ɖo ahwangbénu.

²⁴Ée un jó yě dó mɔ̌ ɔ́, un dɔn tó nú yě bɔ é sɔgbe xá nǔ baɖabaɖa e yě dó sin lɛ́ɛ kpó nǔ blíblí e yě wa lɛ́ɛ kpó.

²⁵“Amɔ̌, nǔ e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Bɛ́ sín din ɔ́, un ná nɔ́ kú nǔbláwǔ nú Izlayɛ́li ví lɛ́ɛ. Un ná húzú ninɔmɛ yě Jakɔ́bu ví lɛ́ɛ tɔn, bó ná ɖɔ bó dó sɛ́n d'é jí, bɔ sísí e è ɖǒ ná ɖó nú nyǐkɔ mímɛ́ ce ɔ́, mɛ bǐ ná ɖó.

²⁶Énɛ́ ɔ́, yě ná wɔn winnyá e mɛ hwɛ e yě hu dó mì ɔ́ dɔn yě dó é; yě ná lɛ́ wá nɔ to yětɔn mɛ, bó ná vo, yě sɔ́ ná ɖi xɛsi nú mɛɖé ǎ.

²⁷Un ná kplá yě sín to e mɛ yě gbadó gbɔn lɛ́ɛ mɛ, bó ná kplá yě wá to yětɔn mɛ, bɔ yě ná gosín kɛntɔ́ to mɛ. Un ná sɔ́ yě dó ɖe xlɛ́ to wɔ̌buwɔ́bú ɖɔ nyi wɛ nyí Mawu mímɛ́ ɔ́.

²⁸Un ná kplá Izlayɛ́li ví lɛ́ɛ wá ayǐkúngban yě ɖésúnɔ tɔn jí; un ná jó yě ɖokpó dó nyi mɛ ɖěvo tomɛ fí e un nya yě sɛ́ dó lɛ́ɛ ǎ. Énɛ́ ɔ́, yě ɖésú ná tunwun ɖɔ nyɛ wɛ nyí Mawu Mavɔmavɔ, Mawu yětɔn.

²⁹Un ná gba yɛ ce kɔn nyi Izlayɛ́li ví lɛ́ɛ jí; énɛ́ ɔ́, un sɔ́ ná jó yě dó gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”