Read fon Ezekiyɛ́li 41 Bible Online

Ezekiyɛ́li 41 - fon bible

Ezekiyɛ́li 41

¹Énɛ́ ɔ́ gúdo ɔ́, nya ɔ́ kplá mì yi Mawu sín xɔgba ɔ́ sá; é jlɛ́ dǒ e mɛ è ɖe xɔgbasáli ɔ́ dó ɔ́ sín gblǒ, bɔ é nyí nǔjlɛ́kpo yětɔn ayizɛ́n.

²Xɔli ɔ́ sín gblǒ nyí nǔjlɛ́kpo yětɔn wǒ; é jlɛ́ xɔgbasádó ɔ́ sín gblǒ ɖo aɖisí amyɔ, bɔ é nyí nǔjlɛ́kpo yětɔn atɔ́ɔ́n. Xɔgbasá ɔ́, ga tɔn nyí nǔjlɛ́kpo yětɔn kanɖé, bɔ gblǒ ɔ́ nyí nǔjlɛ́kpo yětɔn ko.

³Énɛ́ ɔ́ gǔdo ɔ́, é byɔ́ xɔnɔnɔ ɔ́ mɛ, bó jlɛ́ xɔnɔmɛli ɔ́ kpɔ́n: dǒ e mɛ è ɖe xɔnɔmɛli ɔ́ dó ɔ́, gblǒ tɔn nyí nǔjlɛ́kpo yětɔn we, bɔ xɔnɔmɛli ɔ́ sín gblǒ nyí nǔjlɛ́kpo yětɔn ayizɛ́n; é jlɛ́ xɔnɔnɔmɛdó e ɖo aɖisí amyɔ ɔ́ kpɔ́n, bɔ gblǒ yětɔn nyí nǔjlɛ́kpo yětɔn tɛ́nwe.

⁴É jlɛ́ xɔnɔnɔ ɔ́ mɛ ɖésú kpɔ́n, bɔ é nyí gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ko, bɔ é ɖɔ nú mì ɖɔ: “tɛn mímɛ́ bǐ ɔ́ ɖíe.”

⁵Nya ɔ́ jlɛ́ Mawuxɔ ɔ́ sín dǒ ɔ́ sín gblǒ kpɔ́n, bɔ é nyí nǔjlɛ́kpo yětɔn ayizɛ́n; è mɛ xɔ ɖé lɛ́ɛ bɔdó Mawuxɔ ɔ́ wú lɛ́ lɛ̌ dó; é jlɛ̌ xɔ énɛ́ lɛ́ɛ lɔ kpɔ́n; bɔ dǒ yětɔn sín gblǒ nyí nǔjlɛ́kpo yětɔn ɛnɛ.

⁶Xɔ énɛ́ lɛ́ɛ ɔ́, síngbó atɔnnɔ wɛ nú yě. Bɔ xɔ gban (30) ɖo síngbó ɔ́ ɖokpó ɖokpó mɛ; xɔ e ɖo síngbó lɛ́ɛ ɖokpó ɖokpó mɛ lɛ́ɛ bǐ ɖo hǎ jí. È mɛ xɔ énɛ́ lɛ́ɛ bɔ yě byɔ́ dǒ e è mɛ bɔdó Mawuxɔ ɔ́ wú lɛ́ lɛ̌ dó lɛ́ɛ mɛ kpɛɖé kpɛɖé; yě byɔ́ Mawuxɔ ɔ́ sín dǒ ɔ́ ɖésú mɛ ǎ.

⁷Xɔ e ɖo síngbó e ɖo aga ɔ́ mɛ lɛ́ɛ gbló hú xɔ e ɖo síngbó e ɖo tɛ́ntin ɔ́ mɛ lɛ́ɛ, bɔ xɔ e ɖo síngbó tɛ́ntin tɔn ɔ́ mɛ lɛ́ɛ gbló hú ée ɖo síngbó do tɔn ɔ́ mɛ lɛ́ɛ; ɖó síngbó e ɖo tɛ́ntin ɔ́ byɔ́ dǒ e è mɛ bɔdó Mawuxɔ ɔ́ wú lɛ́ lɛ̌ dó ɔ́ mɛ hú síngbó e ɖo do ɔ́, bɔ síngbó e ɖo aga ɔ́ byɔ́ mɛ hú síngbó e ɖo tɛ́ntin é. È gosín síngbó do tɔn ɔ́ jí ɔ́, è nɔ yi wegɔ́ ɔ́ jí bó gosín wegɔ́ ɔ́ jí ɔ́, è nɔ yi atɔngɔ́ ɔ́ jí.

⁸Dodó e jí è mɛ xɔ e bɔdó Mawuxɔ ɔ́ wú lɛ́ lɛ̌ dó ɔ́ yi jǐ bó ɖó nǔjlɛ́kpo yětɔn ayizɛ́n.

⁹Xɔ e è mɛ bɔdó Mawuxɔ ɔ́ wú é sín dǒdɔn e tɔ́n jɛ kɔ́xo jí ɔ́, gblǒ tɔn nyí nǔjlɛ́kpo yětɔn atɔ́ɔ́n. È mɛ xɔ ɖěvo ɖěvo kpan nukɔn xɔ énɛ́ lɛ́ɛ lɛ́ dó. Kɔ́xota e ɖo xɔ énɛ́ lɛ́ɛ tɛ́ntin ɔ́,

¹⁰gblǒ tɔn nyí nǔjlɛ́kpo yětɔn ko.

¹¹Xɔ e bɔdó Mawuxɔ ɔ́ wú ɔ́, ali we wɛ è ɖe d'é mɛ, bɔ yě hun dó kɔ́xota énɛ́ ɔ́. Ali ɔ́ ɖokpó ɖo taligbé, bɔ ɖokpó ɖo afɔligbé. Dǒ e è mɛ lɛ́ dó kɔ́xota énɛ́ ɔ́, gblǒ tɔn nyí nǔjlɛ́kpo yětɔn atɔ́ɔ́n.

¹²Xɔ ɖokpó kpan nukɔn tɛnmɛ énɛ́ ɔ́, bó ɖo gbadahwe jí nú Mawuxɔ ɔ́. Ga tɔn nyí nǔjlɛ́kpo yětɔn kanwe wǒ (90), bɔ gblǒ tɔn nyí nǔjlɛ́kpo yětɔn kanɖé gban (70), bɔ dǒ ɔ́ sín gblǒ nyí nǔjlɛ́kpo yětɔn atɔ́ɔ́n.

¹³Nya ɔ́ jlɛ́ Mawuxɔ ɔ́, bɔ ga tɔn nyí nǔjlɛ́kpo yětɔn kanwe ko (100), é jlɛ́ kɔ́xota e ɖo xɔ ɔ́ gúdo é, bó jlɛ́ xɔ e ɖo xɔ ɔ́ gúdo é, bó jlɛ́ xɔ ɔ́ sín dǒ lɛ́ɛ, bɔ bǐ kplékplé sín ga nyí nǔjlɛ́kpo yětɔn kanwe ko (100).

¹⁴Mawuxɔ ɔ́ sín gblǒ e ɖo zǎnzǎnhwe jí é kpó tɛnmɛ vɔ̌tɔ́ e ɖo ɖisí amyɔ nú xɔ ɔ́ kpó ɔ́, bǐ kplékplé sín ga nyí nǔjlɛ́kpo yětɔn kanwe ko (100).

¹⁵Nya ɔ́ lɛ́ jlɛ́ xɔ e ɖo Mawuxɔ ɔ́ gúdo é sín ga, kpó tɛnmɛ vɔ̌tɔ́ e ɖo aɖisí amyɔ nú xɔ ɔ́ é kpó, bɔ bǐ kplékplé sín ga nyí nǔjlɛ́kpo yětɔn kanwe ko. Agba e ɖo Mawuxɔ ɔ́ nukɔn é kpó Mawuxɔgba ɔ́ kpó Mawuxɔnɔnɔ ɔ́ kpó, kpó dǒ tɔn lɛ́ɛ kpó ɔ́, xwlɛ wɛ è tɛ́ dó bǐ wǔ.

¹⁶Flɛtɛ́li kpó ali e lɛ́ dó xɔ ɔ́ gbɔn síngbó atɔn lɛ́ɛ bǐ jí é kpó ɔ́, bǐ wú wɛ è tɛ́ xwlɛ dó. Xwlɛ wɛ è tɛ́ dó xɔ ɔ́ wú bǐ, sín kpekánta káká yi flɛtɛ́li lɛ́ɛ nu; flɛtɛ́li lɛ́ɛ ɖésú ɔ́, xwlɛ wɛ è tɛ́ dó bǐ wú.

¹⁷È ba acɔ́ nú Mawuxɔ ɔ́ ɖo kɔ́xo, bó ba acɔ́ ná ɖo xɔ ɔ́ mɛ; è ba acɔ́ nú xɔ ɔ́ sín alihɛ́nnu káká yi xɔnɔnɔ ɔ́ mɛ;

¹⁸è ɖe wɛnsagun susunɔ kpó dětín kpó gbɔn dǒ lɛ́ɛ wú; è ɖe wɛnsagun ɖokpó ɔ́, è nɔ ɖe dětín ɖokpó bɔd'é wú. Wɛnsagun ɖokpó nɔ ɖó nukún mɛ we.

¹⁹Nukún mɛ ɔ́ ɖokpó nyí gbɛtɔ́ nukún mɛ, bó nɔ́ kpan nukɔn dětín e è ɖe dó akpá énɛ́ xwé é. Nukún mɛ wegɔ́ ɔ́ nyí kinnikínní nukún mɛ, bó nɔ́ kpan nukɔn dětín e è ɖe dó akpá ɖě ɔ́ xwé é. È ɖe nǔ we énɛ́ lɛ́ɛ gbɔn dǒ lɛ́ɛ bǐ wú lɛ́ dó.

²⁰Wɛnsagun lɛ́ɛ kpó dětín lɛ́ɛ kpó ɔ́, è ɖe yě dó ba acɔ́ ná gbɔn dǒ lɛ́ɛ wú sín do káká yi hɔn lɛ́ɛ ta nu; kun wɛ è kun yě dó dǒ lɛ́ɛ mɛ.

²¹Hɔn e è dǒ xɔgbasá ɔ́ nu ɔ́, hɔnkpo tɔn lɛ́ɛ ɖó gblǒ zɛ̌ɛ́n ga zɛ̌ɛ́n. Ɖo Tɛn mímɛ́ bǐ ɔ́ nukɔn ɔ́, nǔɖé ɖo fínɛ́,

²²bó cí vɔ̌sákpe ɖɔhun; atín wɛ è sɔ́ dó bló nǔ ɔ́, bɔ jǐ yiyi tɔn nyí nǔjlɛ́kpo yětɔn atɔn, bɔ ga tɔn nyí nǔjlɛ́kpo yětɔn we. Zwe tɔn lɛ́ɛ kpó nǔ e jí é jínjɔ́n ɔ́ kpó, kpódó wǔtu tɔn kpó bǐ wɛ nyí xwlɛ. Nya ɔ́ ɖɔ nú mì ɖɔ: “Távo e ɖo Mawu nukɔn é nɛ́.”

²³Mawuxɔ ɔ́, hɔn we wɛ é ɖó: ɖokpó ɖo xɔgba ɔ́ nu, bɔ ɖokpó ɖo Tɛn mímɛ́ bǐ ɔ́ nu.

²⁴Hɔn we lɛ́ɛ bǐ wɛ nyí hɔn vǐwenɔ.

²⁵Hɔn e è dó xɔgba ɔ́ nu lɛ́ɛ ɔ́, è ɖe dětín kpó wɛnsagun kpó dó yě wú, bɔ é nyí nǔ ɖokpó ɔ́ xá ée è ɖe dó xɔ ɔ́ sín dǒ lɛ́ɛ wú lɛ́ɛ. Ɖo fí e è nɔ gbɔn byɔ́ Mawuxɔ ɔ́ mɛ ɔ́, è sɔ́ xwlɛ dó bló jɔhɔnsinglɔ́nnú ɖó hɔn ɔ́ ta nu.

²⁶È ɖe flɛtɛ́li gbɔn xɔ ɔ́ nukɔn bó dó ganja yě nu, bó ɖe dětín gbɔn flɛtɛ́li lɛ́ɛ wú dó ba acɔ́ ná.