Read fon Ezekiyɛ́li 42 Bible Online

Ezekiyɛ́li 42 - fon bible

Ezekiyɛ́li 42

¹Énɛ́ ɔ́ gúdo ɔ́, nya ɔ́ kplá mì tɔ́n jɛ Mawu xwé ɔ́ sín kɔ́xota ɖo taligbé, bó kplá mì yi xɔ ɖěvo mɛ; xɔ énɛ́ ɔ́ ɖo xɔ e ɖo Mawuxɔ ɔ́ gúdo ɔ́ kpá.

²Ga tɔn nyí nǔjlɛ́kpo yětɔn kanwe ko (100), bɔ gblǒ tɔn nyí nǔjlɛ́kpo yětɔn kanɖé wǒ (50).

³É kpan nukɔn kɔ́xota e lɛ́ lɛ̌ dó Mawuxɔ ɔ́ é ɖo akpá ɖokpó xwé, bɔ gblǒ tɔn nyí nǔjlɛ́kpo yětɔn ko ɖo akpá énɛ́ ɔ́ xwé. Akpá wegɔ́ ɔ́ xwé kpan nukɔn fí e è tɛ́ awǐnnya kpikpa gbɔn ɖo xwé ɔ́ sín kɔ́xota é. Xɔ ɔ́, síngbó atɔnnɔ wɛ, bɔ è ɖe xɔvlamɛli gbɔn bǐ mɛ.

⁴È ɖe xɔvlamɛli ɖokpó dó xɔ ɔ́ mɛ, ɖo fí e xɔ ɔ́ fó dó ɖo taligbé é, bɔ gblǒ tɔn nyi nǔjlɛ́kpo yětɔn wǒ, ga tɔn nyí nǔjlɛ́kpo yětɔn kanwe ko (100). Fínɛ́ wɛ è nɔ gbɔn bo nɔ byɔ́ xɔ ɔ́ mɛ.

⁵Xɔnu e ɖo síngbó atɔngɔ́ ɔ́ jí lɛ́ɛ hwe hú xɔnu e ɖo síngbó wegɔ́ ɔ́ jí lɛ́ɛ kpó xɔnu e ɖo síngbó nukɔntɔn ɔ́ jí lɛ́ɛ kpó; ɖó xɔvlamɛli e ɖo síngbó atɔngɔ́ ɔ́ jí lɛ́ɛ gbló hú xɔvlamɛli e ɖo síngbó ɖě lɛ́ɛ jí lɛ́ɛ.

⁶È xo kpe gbɔn síngbó atɔn lɛ́ɛ ɖokpó ɖokpó nukɔn; è ka sɔ́ dotín dó hɛn kpe énɛ́ lɛ́ɛ ná lě e è sɔ́ dotín dó hɛn xɔ ɖě lɛ́ɛ e ɖo xwé ɔ́ sín kɔ́xota lɛ́ɛ é ɖɔhun ǎ. Énɛ́ ɔ́ wú wɛ è ɖo jǐ yi wɛ bó gosín síngbó ɖě jí yi ɖěvo jí ɔ́, xɔnu e ɖo síngbó lɛ́ɛ jí lɛ́ɛ nɔ ɖo hwihwe d'é jí wɛ.

⁷Dǒdɔn xɔ ɔ́ tɔn e ɖo Mawu xwé ɔ́ sín kɔ́xota, bó ɖo fí e xɔ lɛ́ɛ ɖe é ɔ́, ga tɔn nyí nǔjlɛ́kpo yětɔn kanɖé wǒ (50).

⁸Xɔ lɛ́ɛ ɖésú ɖó nǔjlɛ́kpo yětɔn kanɖé wǒ (50). Lo ɔ́, xɔnu e ali yětɔn hun dó Mawuxɔ ɔ́ jí lɛ́ɛ ɔ́, ga yětɔn ɖó nǔjlɛ́kpo yětɔn kanwe ko (100).

⁹Ali ɖokpó ɖo do nú kpe e è xo gbɔn síngbó nukɔntɔn ɔ́ nukɔn ɔ́ ɖo zǎnzǎnhwe jí, bɔ mɛ e gosín Mawu xwé ɔ́ sín kɔ́xota lɛ́ɛ nɔ gbɔn fínɛ́ yi xɔ ɔ́ mɛ.

¹⁰Ali énɛ́ ɔ́, fí e dǒdɔn e gbɔn kɔ́xo ɔ́ jí ɔ́ gbɔn é wɛ é ɖe. Xɔ e ɖo taligbé ɔ́ ɖɔhun ɖokpó ɖo afɔligbé, bɔ élɔ́ ɖo xɔ e ɖo Mawu gúdo ɔ́ kpá.

¹¹Ali ɖokpó gbɔn xɔ énɛ́ ɔ́ nukɔn; xɔnu e ɖo xɔ énɛ́ ɔ́ mɛ lɛ́ɛ ɔ́, nǔ ɖokpó ɔ́ wɛ yě nyí xá xɔnu e ɖo xɔ e ɖo taligbé é mɛ lɛ́ɛ; jlɛ̌ ɖokpó ɔ́ wɛ yě ɖó, alɔkpa ɖokpó ɔ́ wɛ è bló yě gbɔn; mɔ̌ ɖokpó ɔ́, ali e nu è nɔ gbɔn byɔ́ yě mɛ lɛ́ɛ kpó ée nu è nɔ gbɔn tɔ́n lɛ́ɛ kpó nyí nǔ ɖokpó ɔ́;

¹²hɔn yětɔn lɛ́ɛ lɔ nyí nǔ ɖokpó ɔ́; fí e ali e gbɔn xɔ ɔ́ nukɔn é bɛ́ sín ɔ́, hɔnli ɖokpó ɖo fínɛ́ bó kpan nukɔn Mawu xwéta dó ɔ́; zǎnzǎnhwe jí wɛ è nɔ gbɔn yi fínɛ́.

¹³Nya ɔ́ ɖɔ nú mì ɖɔ: “Xɔ we énɛ́ lɛ́ɛ bǐ wɛ è fɔ ɖó vo nú Mawu Mavɔmavɔ. Vɔ̌sánú-xwlémawutɔ́ e hɛn ɔ́, yě ná nɔ́ yi Mawu nukɔn lɛ́ɛ ɔ́, yě ná nɔ́ ɖu vɔ̌sánú mímɛ́ lɛ́ɛ ɖo xɔ énɛ́ lɛ́ɛ mɛ. Nǔgbó ɔ́, xɔ énɛ́ lɛ́ɛ ɔ́, vo wɛ è fɔ yě ɖó nú Mawu, bó nɔ́ bɛ́ vɔ̌sánú e mɛ́ hú vɔ̌sánú lɛ́ɛ bǐ lɛ́ɛ ɖó fínɛ́; vɔ̌sánú énɛ́ lɛ́ɛ wɛ nyí nǔníná lɛ́ɛ kpó kanlin e è hu dó sá vɔ̌ tɛnmɛ tɛnmɛ, dó byɔ́ hwɛsɔ́kɛ lɛ́ɛ sín lan kpó.

¹⁴Vɔ̌sánú-xwlémawutɔ́ e yi wa azɔ̌ ɖo tɛn mímɛ́ ɔ́ mɛ lɛ́ɛ ɔ́, yě sixú gosín tɛn mímɛ́ ɔ́ mɛ fínɛ́, bó yi kɔ́xo tlɔlɔ ǎ. Vɔ̌sánú-xwlémawutɔ́ sín awu e yě dó dó wa azɔ̌ nú Mawu lɛ́ɛ ɔ́, yě ɖó ná ɖe ɖó xɔ énɛ́ lɛ́ɛ mɛ hwɛ̌, bó sɔ́ awu ɖěvo dó cóbó wá yi fí e togun ɔ́ bǐ nɔ́ kplé ɖe é.”

¹⁵Ée nya ɔ́ jlɛ́ xɔ e ɖo Mawu xwé ɔ́ gbe lɛ́ɛ kpé ɔ́, é kplá mì gbɔn hɔnnúwa e ɖo zǎnzǎnhwe jí é nu, bɔ mǐ tɔ́n sín xwé ɔ́ gbe; énɛ́ ɔ́, é jɛ dǒ e è dǒ xá Mawu xwé ɔ́ jlɛ́ jí.

¹⁶Kpo e ɖo alɔ tɔn mɛ, bɔ é ɖo nǔ dó jlɛ́ wɛ ɔ́, é sɔ́ dó jlɛ́ dǒ e ɖo zǎnzǎnhwe jí é ná, bɔ ga tɔn nyí nǔjlɛ́kpo yětɔn afɔwe kanwe ko (500).

¹⁷É jlɛ́ dǒ e ɖo taligbé ɔ́, bɔ ga tɔn nyí nǔjlɛ́kpo yětɔn afɔwe kanwe ko (500).

¹⁸É jlɛ́ dǒ e ɖo afɔligbé ɔ́, bɔ ga tɔn nyí nǔjlɛ́kpo yětɔn afɔwe kanwe ko (500).

¹⁹É yi dǒ e ɖo gbadahwe jí ɔ́ kɔn, bó jlɛ́ bɔ ga tɔn nyí nǔjlɛ́kpo yětɔn afɔwe kanwe ko (500).

²⁰Lě e é jlɛ́ dǒ e è mɛ lɛ́ lɛ̌ dó Mawu xwé ɔ́ gbɔn é nɛ́. Xwé ɔ́ nyí gblǒ zɛ̌ɛ́n ga zɛ̌ɛ́n, bɔ akpáxwé ɖokpó ɖokpó nyí nǔjlɛ́kpo yětɔn afɔwe kanwe ko (500). Dǒ e è dó xá Mawu xwé ɔ́ wɛ gbo tɛnmɛ e è sɔ́ ɖó vo nú Mawu é kpó fí e nyí fí yǎyánɔ é kpó.