Read fon Ezekiyɛ́li 43 Bible Online

Ezekiyɛ́li 43 - fon bible

Ezekiyɛ́li 43

¹Nya ɔ́ lɛ́ kplá mì yi hɔnnúwa zǎnzǎnhwe jí tɔn ɔ́ kɔn.

² Kpowun ɔ́, un mɔ susu Mawu Izlayɛ́li tɔn ɔ́ tɔn, bɔ é ja sín zǎnzǎnhwe jí. É jǎwe kpó zǐngídi ɖé kpó, bɔ é cí xu wɛ ɖo adǎn jí ɖɔhun; susu tɔn za wě gbɔn ayǐkúngban ɔ́ bǐ jí.

³Nǔ e un mɔ é cí ée un mɔ hwenu e Mawu wá gba Jeluzalɛ́mu toxo é ɖɔhun; é cí éé un mɔ hwenu e un ɖo Kebáa tɔ ɔ́ tó é ɖɔhun. Ée un mɔ mɔ̌ ɔ́, un xwe agbɔ̌nnusú do.

⁴Susu Mawu Mavɔmavɔ tɔn gbɔn hɔnnúwa zǎnzǎnhwe jí tɔn nu byɔ́ xwé ɔ́ gbe.

⁵Yɛ Mawu tɔn sɔ́ mì yi kɔ́xota e ɖo Mawu xwé ɔ́ ta é, bɔ un mɔ susu Mawu Mavɔmavɔ tɔn gɔ́ xɔ ɔ́ bǐ.

⁶Un se mɛɖé gbe, bɔ é ɖo xó ɖɔ nú mì wɛ sín Mawuxɔ ɔ́ mɛ. Hwenɛ́nu ɔ́, mɛ ɖokpó ɖo te akpá ce.

⁷Mɛ e ɖo xó ɖɔ nú mì wɛ ɔ́ ɖɔ: “Hwɛ gbɛtɔ́ e, kpɔ́n fí élɔ́. Fí wɛ axɔ́súzinkpo ce ɖe, fí wɛ un nɔ sɔ́ afɔ ɖó. Un ná nɔ Izlayɛ́li ví lɛ́ɛ mɛ káká sɔ́yi. Izlayɛ́li to ɔ́ kpó axɔ́sú tɔn lɛ́ɛ kpó ɖě sɔ́ ná dó afɔ gbě ǎ, yě ká sɔ́ ná ɖi axɔ́sú yětɔn lɛ́ɛ sín cyɔ ɖě ɖó fí, dó sɔ́ nyǐkɔ ce xo kɔ́ ǎ.

⁸Axɔ́sú lɛ́ɛ sɔ́ gbɛndekpekán yětɔn lɛ́ɛ kpó hɔnnúwa yětɔn lɛ́ɛ kpó bɔdó gbɛndekpekán ce kpó hɔnnúwa ce kpó wú. Dǒ jɛ́n gbo xwé ce kpó xwé yětɔn kpó. Yě dó nǔ baɖabaɖa lɛ́ɛ sin dó sɔ́ nyǐkɔ ce xo kɔ́, nyi mɛ e nyí mɛ mímɛ́ é. Énɛ́ ɔ́ wú wɛ un sin xomɛ bó sú kún yětɔn dó.

⁹Bɛ́ sín din ɔ́, Izlayɛ́li ví lɛ́ɛ sɔ́ ná dó afɔ gbě ɖě ǎ; yě ná sɛ axɔ́sú yětɔn lɛ́ɛ sín cyɔ lɛ́ɛ dó zɔ nú mì; énɛ́ ɔ́, un ná nɔ yě mɛ káká sɔ́yi.

¹⁰“Amɔ̌, hwɛ gbɛtɔ́ ɔ́, ɖǒ xwé ɔ́ sín jlɛ̌ nú Izlayɛ́li ví lɛ́ɛ. Hwɛ e yě hu lɛ́ɛ ní hu winnyá nú yě; yě ní kpɔ́n lě e è nǎ bló xɔ ɔ́ gbɔn é céɖécéɖé.

¹¹Nú hwɛ e yě hu lɛ́ɛ hu winnyá nú yě dóó hǔn, wlǎn lě e xwé ɔ́ ná cí é ɖó nǔ jí bó sɔ́ jó nú yě, bó xlɛ́ fí e xɔ lɛ́ɛ ná nɔ lɛ́ɛ yě; fí e è nǎ nɔ́ gbɔn byɔ́ xɔ lɛ́ɛ mɛ é, fí e è nǎ nɔ́ gbɔn tɔ́n é; xlɛ́ lě e xɔ ɔ́ ná nɔ gbɔn é bǐ yě. Wlǎn sɛ́n lɛ́ɛ kpó nǔ e un zɔ́n lɛ́ɛ kpó bǐ nú yě, nú yě ná xwedó.

¹²Sɛ́n dodó e kan xwé ɔ́ é ɖíe: Tɛnmɛ e lɛ́ lɛ̌ dó xwé ɔ́ ɖo só ɔ́ ta ɔ́, è nǎ tunwun ɖɔ tɛn ɖé wɛ bɔ è sɔ́ ɖó vo nú Mawu.”

¹³ È sɔ́ nǔjlɛ́kpo yětɔn dó jlɛ́ vɔ̌sákpe ɔ́; nǔjlɛ́kpo yětɔn ɔ́, mɛ̌tlu vlɔ́ wɛ bɔ kpɛví ɖé ɖ'é jí; vɔ̌sákpe ɔ́ sín jlɛ̌ lɛ́ɛ ɖíe: è kun do lɛ́ lɛ̌ dó vɔ̌sákpe ɔ́, bɔ do yiyi tɔn nyí nǔjlɛ́kpo yětɔn ɖokpó, gblǒ tɔn nyí nǔjlɛ́kpo yětɔn ɖokpó; nǔ e gbɔn do ɔ́ tó ɔ́, jǐ yiyi tɔn nyí nǔjlɛ́kpo yětɔn sín vlɔ̌. Vɔ̌sákpe ɔ́, jǐ yiyi tɔn

¹⁴bló nǔjlɛ́kpo yětɔn we, sín do ɔ́ mɛ yi agba nukɔntɔn ɔ́ jí. Bɛ́ sín fínɛ́ ɔ́, vɔ̌sákpe ɔ́ sín gblǒ ɖe kpo nǔjlɛ́kpo yětɔn ɖokpó ɖokpó gbɔn akpáxwé ɛnɛ lɛ́ɛ bǐ. Bɛ́ sín agba nukɔntɔn jí káká yi agba wegɔ́ ɔ́ jí ɔ́, jǐ yiyi tɔn bló nǔjlɛ́kpo yětɔn ɛnɛ. Bɛ́ sín agba wegɔ́ lɔ jí ɔ́, vɔ̌sákpe ɔ́ sín gblǒ ɖe kpó nǔjlɛ́kpo ɖokpó ɖokpó gbɔn akpáxwé ɛnɛ lɛ́ɛ bǐ.

¹⁵Vɔ̌sákpe ɔ́, akpáxwé tɔn e ɖo aga, bɔ adogwle ɖo fínɛ́ ɔ́, jǐ yiyi tɔn nyí nǔjlɛ́kpo yětɔn ɛnɛ bɔ zwe tɔn ɛnɛ lɛ́ɛ tɔ́n.

¹⁶Adogwle ɔ́ ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn wěwe.

¹⁷Agba wegɔ́ ɔ́ ɖésú ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn wǒ-ɛnɛ. Nǔɖé gbɔn tó tɔn, bɔ jǐ yiyi tɔn nyí nǔjlɛ́kpo yětɔn sín vlɔ̌. Do ɖé gbɔn tó tɔn, bɔ gblǒ tɔn nyí nǔjlɛ́kpo yětɔn ɖokpó. Kpekán e jí è nɔ gbɔn yi vɔ̌sákpe ɔ́ jí ɔ́ ɖo zǎnzǎnhwe jí.

¹⁸Mɛ e ɖo xó ɖɔ nú mì wɛ ɔ́ ɖɔ: “Hwɛ gbɛtɔ́ e, ɖǒtó xó e Aklúnɔ Mavɔmavɔ ɖo ɖiɖɔ nú we wɛ é. Hwenu e è nǎ bló vɔ̌sákpe ɔ́, è nǎ nɔ́ dó dó vɔ̌ zo ɖ'é jí, bó ná nɔ́ kɔn kanlin e è hu dó sá vɔ̌ lɛ́ɛ sín hun d'é jí; tito e è ka ná xwedó lɛ́ɛ ɖíe:

¹⁹A nǎ sɔ́ nyibúsú ɖokpó nú vɔ̌sánú-xwlémawutɔ́ Levíi ví Sadɔ́ku ví lɛ́ɛ, bɔ yě ná sɔ́ dó sá hwɛsɔ́kɛmɛvɔ́; yědɛɛ lɛ́ɛ kɛ́ɖɛ́ wɛ un ná gbe ɖɔ yě ná nɔ́ xwlé vɔ̌sánú mì. Xó e nyɛ Mawu Mavɔmavɔ ɖɔ ɔ́ nɛ́.

²⁰A nǎ sɔ́ kanlin ɔ́ sín hun bó ná sá dó vɔ̌sákpe ɔ́ sín zwe ɛnɛ lɛ́ɛ, bó ná sá dó dodó ɔ́ sín zwe ɛnɛ lɛ́ɛ, bó ná sá dó nǔ e è ɖǒ gbɔn vɔ̌sákpe ɔ́ tó lɛ́ lɛ̌ dó é bǐ. Lě e a nǎ slá wǔ nú vɔ̌sákpe ɔ́ gbɔn, bó ná sɔ́ ɖó vo nú mì é nɛ́.

²¹Énɛ́ ɔ́ gúdo ɔ́, a nǎ ɖɔ bɔ è nǎ ɖe nyibúsú e è dǒ sá vɔ̌ ná ɔ́ síin, bɔ è nǎ sɔ́ bó ná yi dó zo ɖo fí e è nɔ bló nǔ mɔ̌hunkɔ ɖe é. È ká ná dó zo ɖo fí e è sɔ́ ɖó vo nú mì é ǎ.

²²Ayǐhɔ́ngbe tɔn ɔ́, a nǎ sɔ́ gbǎgbá asú e má ɖó blɔ̌ ɖěbǔ ǎ é ɖokpó dó sá hwɛsɔ́kɛmɛvɔ́ ná. A nǎ slá wǔ nú vɔ̌sákpe ɔ́ lě e a slá wǔ ná gbɔn hwenu e a sɔ́ nyibúsú dó sá vɔ̌ ná é.

²³A sá hwɛsɔ́kɛmɛvɔ́ ɔ́ fó ɔ́, a nǎ sɔ́ nyibúsú ɖokpó, agbo ɖokpó; yě ɖě ná ɖó blɔ̌ wǔ ǎ.

²⁴A nǎ fɔ yě wá nú mì. Vɔ̌sánú-xwlémawutɔ́ lɛ́ɛ ná kɔn jɛ dó yě jí, bó fɔ yě dó sá vɔ̌ e nɔ dó zo ɔ́ nú mì.

²⁵Ayǐhɔ́ngbe ayǐhɔ́ngbe ɔ́, a ná nɔ́ hu gbǎgbá ɖokpó dó sá hwɛsɔ́kɛmɛvɔ́ ná, bó ná hu nyibúsú ɖokpó kpó agbo ɖokpó kpó dó sá vɔ̌ nú mì. Kanlin lɛ́ɛ ɖě ná ɖó blɔ̌ ɖo wǔ ǎ. A nǎ bló mɔ̌ nú azǎn tɛ́nwe.

²⁶Hǔn azǎn tɛ́nwe wɛ è nǎ sɔ́ ɖó te dó slá wǔ nú vɔ̌sákpe ɔ́, bó ɖe e ɖó vo nú mì.

²⁷ É nyí azǎn tɛ́nwe énɛ́ lɛ́ɛ wá yi ɔ́, bɛ́ sín azǎn tántɔn gɔ́ ɔ́ gbe ɔ́, vɔ̌sánú-xwlémawutɔ́ ɔ́ ná jɛ vɔ̌ tɛnmɛ tɛnmɛ sá nú mì jí ɖo vɔ̌sákpe ɔ́ jí: è ná nɔ́ sá vɔ̌ e è nɔ dó zo lɛ́ɛ, è nǎ nɔ́ sá kɔnɖókpɔ́ vɔ́ lɛ́ɛ. Énɛ́ ɔ́, nyɛ kpó mi kpó ná jɛ ganjí. Xó e nyɛ Aklúnɔ Mavɔmavɔ ɖɔ ɔ́ nɛ́.”