Read fon Ezekiyɛ́li 45 Bible Online

Ezekiyɛ́li 45 - fon bible

Ezekiyɛ́li 45

¹“Hwenu e akɔta Izlayɛ́li ví lɛ́ɛ tɔn lɛ́ɛ ná má ayǐkúngban lɛ́ɛ yětɔn yětɔn ɔ́, tɛnmɛ ɖé ná tíin, bɔ è nǎ sɔ́ ɖó vo nú nyɛ Mawu Mavɔmavɔ. Ayǐkúngban ɔ́ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn adɔ̌kpo ɖokpó (20.000). Ayǐkúngban énɛ́ ɔ́ ná nyí ayǐkúngban mímɛ́.

²È nǎ sɔ́ tɛnmɛ ɖé ɖo ayǐkúngban énɛ́ ɔ́ jí nú xwé ce; tɛnmɛ énɛ́ ná ɖó gblǒ zɛ̌ɛ́n ga zɛ̌ɛ́n, bó ná nyí nǔjlɛ́kpo yětɔn afɔwe kanwe ko (500). Tɛn vɔ́tɔ́ ɖé ná lɛ́ lɛ̌ dó tɛnmɛ énɛ́ ɔ́, bɔ gblǒ tɔn ná nyí nǔjlɛ́kpo yětɔn kanɖé wǒ (50).

³Ayǐkúngban énɛ́ ɔ́, è nǎ lɛ́ kán tɛnmɛ ɖé ɖ'é jí, bɔ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba we afɔwó (10.000); fí énɛ́ wɛ è nǎ bló tɛn mímɛ́ ce ɖó, fínɛ́ wɛ ná nyí tɛnmɛ mímɛ́ bǐ ɔ́.

⁴È nǎ sɔ́ fí énɛ́ ɖó vo nú mì, bɔ é ná nyí vɔ̌sánú-xwlémawutɔ́ e ɖo azɔ̌ wa nú nyɛ Mawu Mavɔmavɔ wɛ lɛ́ɛ tɔn. Tɛn énɛ́ ɔ́ mɛ wɛ xwé yětɔn lɛ́ɛ ná nɔ, bɔ xwé ce lɔ ná nɔ fínɛ́.

⁵Tɛnmɛ e ná kpo ɖo ayǐkúngban e è sɔ́ ɖó vo nú mì ɔ́ jí ɔ́, è nǎ sɔ́ nú Levíi ví e nɔ́ kpé nukún dó xwé ce wú lɛ́ɛ; ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba we afɔwó (10.000), bɔ yě ná bló toxo yětɔn lɛ́ɛ ɖ'é jí, bó nɔ fínɛ́.

⁶Ɖo ayǐkúngban énɛ́ e è nǎ sɔ́ ɖó vo nú nyɛ Mawu Mavɔmavɔ ɔ́ kpá ɔ́, è nǎ jó tɛnmɛ ɖé dó bɔ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba ɖě afatɔ́n (5.000), bɔ è nǎ sɔ́ fí énɛ́ dó bló toxo ná, bɔ Izlayɛ́li ví lɛ́ɛ bǐ ná ɖó acɛ bó nɔ toxo énɛ́ ɔ́ mɛ.

⁷Gǎn e ɖo to ɔ́ nu ɔ́, tɛnmɛ e ɖo aɖisí kpó amyɔ kpó nú tɛnmɛ e è sɔ́ ɖ'ayǐ nú nyɛ Mawu Mavɔmavɔ é kpódó tɛnmɛ e è sɔ́ ɖ'ayǐ bó ná dó bló toxo nú Izlayɛ́li ví lɛ́ɛ kpó é wɛ è nǎ ná ɛ. Tɛnmɛ ɔ́ ná hun káká yi Mɛditɛlanɛ́ɛ xutó ɖo gbadahwe jí, bó ná hun káká yi fí e Izlayɛ́li dogbó ɔ́ ɖó te ɖó ɖo zǎnzǎnhwe jí é. Fí énɛ́ ɔ́ ná ɖó ga ɖokpó ɔ́ xá ayǐkúngban akɔta ɖokpó ɖokpó tɔn.

⁸Énɛ́ ɔ́, gǎn lɛ́ɛ ná ɖó tɛnmɛ yě ɖésú tɔn ɖo Izlayɛ́li; yě sɔ́ ná dó tagba ɖě nú togun ce ǎ. Yě ná jó ayǐkúngban e kpo é dó nú akɔta tɛnmɛ tɛnmɛ e ɖo Izlayɛ́li lɛ́ɛ.”

⁹Xó e Aklúnɔ Mavɔmavɔ ɖɔ ɔ́ ɖíe: “Gǎn Izlayɛ́li tɔn lɛ́ɛ mi, mitɔn wá hú gán! Din ɔ́, mi jó dǎkaxixo dó, bó jó ya dó nú mɛ dó, bó xwedó hwɛjijɔ, bó nɔ́ wa nǔ ɖó sɛ́nxwi jí, bó gɔn nǔ e nyí togun ɔ́ tɔn lɛ́ɛ nu klá jɛ. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁰ “Mɛ ɖokpó ɖokpó ní nɔ́ sɔ́ nǔdagan e sɔgbe é dó da nǔ ná, bó nɔ́ sɔ́ nǔjlɛ́ká abǐ nǔjlɛ́nú e sɔgbe é dó jlɛ́ nǔ ná.

¹¹Nǔ e è nɔ dó jlɛ́ nǔkún ná, bɔ è nɔ ylɔ́ ɖɔ efáa é kpó éé è nɔ dó jlɛ́ nǔ e è nɔ jɛ lɛ́ɛ ná, bɔ è nɔ ylɔ́ ɖɔ bati é kpó ɔ́, ɖě ná nɔ hɛn nǔ hú ɖě ǎ. Nǔ e yě ná nɔ́ hɛn ɔ́ ná nyí nǔ e homɛ́ɛ nɔ hɛn ɔ́ sín mǎɖówǒ. Homɛ́ɛ wú wɛ è nǎ jlɛ́ bati kpó efáa kpó dó bó kpɔ́n ɖɔ yě sɔgbe a jí.

¹²È sɔ́ gankwɛ́ e è nɔ ylɔ́ ɖɔ síklu ɔ́ ɖokpó ɔ́, è nǎ mɔ gela ko ɖ'é mɛ, bɔ síklu kanɖé ko (60) wɛ ka nyí mǐnu ɖokpó.

¹³“Lě e mi ná nɔ ná nǔjɔ mitɔn lɛ́ɛ gbɔn é ɖíe: Ényí blěe abǐ ɔ́ji wɛ ɔ́, jinukún e mi ya ɔ́, mi ná má ɖó do kanɖé ko (60) bó ná ná do ɖokpó.

¹⁴É ká nyí ami wɛ ɔ́, mi ná má ɖó do kanwe ko (100) bó ná ná do ɖokpó. Ami ɔ́, bati wɛ mi ná nɔ́ dó jlɛ́ ná. Mi ka tunwun ɖɔ bati wǒ wɛ nɔ́ nɔ homɛ́ɛ ɖokpó mɛ; mɔ̌ ɖokpó ɔ́, bati wǒ nɔ́ nɔ kɔ́ɔ ɖokpó mɛ.

¹⁵Ɖo Izlayɛ́li to ɔ́ mɛ ɔ́, nú gbɔ̌nyitɔ́ ɖé ɖó lɛ̌ngbɔ́ afɔɖé (200) abǐ gbɔ̌ afɔɖé (200) ɔ́, é ná ná ɖokpó. Nǔ énɛ́ lɛ́ɛ e mi ná jɔ ɔ́, mi ná nɔ́ dó sá jinukún vɔ́, vɔ̌ e è nɔ dó zo é kpó kɔnɖókpɔ́ vɔ́ kpó, bó ná dó mɔ hwɛsɔ́kɛ yí. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁶“Nǔjɔ énɛ́ ɔ́, mɛ e ɖo Izlayɛ́li to ɔ́ mɛ lɛ́ɛ bǐ wɛ ná nɔ́ ná, bɔ yě ná nɔ́ bɛ́ nú gǎn e ɖo Izlayɛ́li to ɔ́ nu é.

¹⁷Ɖó gǎn ɔ́ wɛ ná nɔ́ ná nǔ e è nǎ nɔ́ dó sá vɔ̌ e è nɔ dó zo lɛ́ɛ, bó ná nɔ́ ná nǔníná jinukún tɔn kpó vɛ̌ɛn e è nǎ nɔ ba xwe hwenu lɛ́ɛ kpó; ɖo tají ɔ́, sunwájǐxwe lɛ́ɛ, gbɔjɛzán gbe lɛ́ɛ, kpó nǔwiwa ɖěvo e ná dɔn Izlayɛ́li ví lɛ́ɛ kplé lɛ́ɛ kpó sín hwenu é. Gǎn ɔ́ wɛ ná nɔ́ sá hwɛsɔ́kɛmɛvɔ́, é wɛ ná nɔ́ xwlé nǔníná jinukún tɔn lɛ́ɛ Mawu, bó ná nɔ́ sá vɔ̌ e è nɔ dó zo lɛ́ɛ kpó kɔnɖókpɔ́ sín vɔ̌ lɛ́ɛ kpó, bónú nyɛ Mawu Mavɔmavɔ ná sɔ́ hwɛ kɛ togun Izlayɛ́li tɔn ɔ́.”

¹⁸Xó e Aklúnɔ Mavɔmavɔ ɖɔ ɔ́ ɖíe: “Azǎn nukɔntɔn e ɖo sun nukɔntɔn ɔ́ mɛ ɔ́ gbe ɔ́, è nǎ nɔ́ hu nyibúsú maɖóblɔ̌ ɖo wǔ ɖokpó dó slá wǔ nú xwé ce.

¹⁹Vɔ̌sánú-xwlémawutɔ́ ɔ́ ná nɔ́ sá kanlin e è dǒ sá vɔ̌ ɔ́ sín hun dó xɔ ce sín hɔnkpo lɛ́ɛ wú, bó ná nɔ́ sá dó dodo ɔ́ sín zwe ɛnɛ lɛ́ɛ, bó ná nɔ́ sá dó hɔntogbó e ɖo xwé ɔ́ ta lɛ́ɛ sín hɔnkpo lɛ́ɛ wú.

²⁰Mɔ̌ ɖokpó ɔ́ wɛ è nǎ nɔ́ bló azǎn tɛ́nwegɔ́ ɔ́ e ɖo sun ɔ́ mɛ ɔ́ gbe, ɖó mɛ e ma jló ǎ abǐ mɛ e ma tunwun ǎ, bó hu hwɛ lɛ́ɛ ta mɛ. È blǒ mɔ̌ ɔ́, è nǎ slá wǔ nú xwé ce.

²¹ “Sun nukɔntɔn ɔ́ sín azǎn wǒ-ɛnɛgɔ́ ɔ́ gbe ɔ́, mi ná jɛ Dǐndínwáyixwe ɔ́ ɖu jí. Xwe énɛ́ ɔ́, azǎn tɛ́nwe wɛ mi ná ɖu xɔ, bɔ mɛ ɖé ná ɖu wɔ̌xúxú e mɛ è dǒ tɔ́n é hwe énɛ́ ɔ́ nu ǎ.

²²Xwe ɔ́ sín azǎn nukɔntɔn ɔ́ gbe ɔ́, gǎn e ɖo Izlayɛ́li to ɔ́ nu ɔ́ ná nɔ hu nyibúsú ɖokpó dó sá vɔ̌ ná, bónú nyɛ Mawu Mavɔmavɔ ná sɔ́ hwɛ kɛ é kpódó togun ɔ́ bǐ kpó.

²³Mɔ̌ ɖokpó ɔ́, ayǐhɔ́ngbe ayǐhɔ́ngbe ɔ́, è nǎ nɔ́ hu nyibúsú e máɖóblɔ̌ ɖo wǔ ǎ é tɛ́nwe, agbo e maɖóblɔ̌ ɖo wǔ ǎ é tɛ́nwe dó sá vɔ̌ e è nɔ dó zo é nú mì nú azǎn tɛ́nwe e è nǎ ɖu xwe ɔ́ xɔ é; ayǐhɔ́ngbe tɛgbɛ ɔ́, è ka na nɔ́ lɛ́ hu gbǎgbá ɖokpó dó sá hwɛsɔ́kɛmɛvɔ́ ná.

²⁴È nǎ wá sɔ́ linfín kilóo gban (30), kpó ami lǐtli ayizɛ́n kpó dó nyibúsú ɔ́ jí, bó ná sɔ́ linfín kilóo gban (30) kpó ami lǐtli ayizɛ́n kpó dó agbo ɔ́ jí.

²⁵ “Xwe e è nǎ bɛ̌ ɖuɖu sín azǎn afɔtɔngɔ́ e ɖo sun tɛ́nwegɔ́ ɔ́ mɛ é gbe ɔ́, nǔ e gǎn ɔ́ bló ɖo Dǐndínwáyixwe ɔ́ hwenu ɔ́ ɖokpó ɔ́ wɛ é ná lɛ́ bló: Xwe ɔ́ sín azǎn lɛ́ɛ ɖokpó ɖokpó gbe ɔ́, hwɛsɔ́kɛmɛvɔ́ ɖokpó ɔ́ wɛ é ná sá, vɔ̌ e è nɔ dó zo ɔ́ ɖokpó ɔ́ wɛ é ná sá, bó ná ná nǔníná jinukún tɔn jlɛ̌ ɖokpó ɔ́, ami jlɛ̌ ɖokpó ɔ́.”