Read fon Ezekiyɛ́li 46 Bible Online

Ezekiyɛ́li 46 - fon bible

Ezekiyɛ́li 46

¹Xó e Aklúnɔ Mavɔmavɔ ɖɔ ɔ́ ɖíe: “Aklúnɔzángbla ɖokpó mɛ ɔ́, hɔntogbó zǎnzǎnhwe jí tɔn e ɖo kɔ́xota e ɖo xwé ɔ́ ta ɔ́ ɖó ná nɔ́ nɔ súsú nú azǎn ayizɛ́n é nyí azɔ̌wazán gbe lɛ́ɛ; amɔ̌, gbɔjɛzán gbe ɔ́, é ná nɔ́ nɔ nuvo. È nǎ nɔ́ lɛ́ hun sunwájǐxwe ɔ́ gbe.

²Gǎn e ɖo Izlayɛ́li to ɔ́ nu ɔ́ ná gosín Mawu xwé ɔ́ kɔ́xota, bó ná gbɔn xwéta sín hɔnnúwa zǎnzǎnhwe jí tɔn ɔ́ sá, bó ná nɔ te ɖo Mawu xwéta sín hɔntogbó ɔ́ nu, ɖo hɔnkpo ɔ́ kpá; hwenɛ́nu ɔ́, vɔ̌sánú-xwlémawutɔ́ lɛ́ɛ ná ɖo vɔ̌ e è dó zo ɔ́ kpó kɔnɖókpɔ́vɔ́ kpó sá dó ta tɔn mɛ wɛ. Énɛ́ ɔ́ gúdo ɔ́, é ná jɛ kpo bo ɖe kɔ́, bó lɛ́ kɔ. È nǎ sú hɔntogbó ɔ́ có nú gbadanu ná su ǎ.

³Gbɔjɛzán gbe lɛ́ɛ kpó sunwájǐzán gbe lɛ́ɛ kpó ɔ́, togun ɔ́ ná nɔ́ wá jɛ kpo bo ɖe kɔ́ nú nyɛ Mawu Mavɔmavɔ ɖo hɔntogbó énɛ́ ɔ́ kɔn.

⁴“Gbɔjɛzán gbe ɔ́, gǎn ɔ́ ná nɔ́ hɛn lɛ̌ngbɔ́ví e máɖóblɔ̌ ɖo wǔ ǎ é ayizɛ́n, kpó agbo e má ɖó blɔ̌ ɖo wǔ ǎ é ɖokpó kpó, bɔ è nǎ dó sá vɔ̌ e è nɔ dó zo ɔ́ nú mì.

⁵É ná hɛn blěelinfín kilóo gban (30) dó agbo ɔ́ jí, bó ná kpɔ́n blěelinfín e é ɖésú mɔ ɖɔ é ná kpé é, bó ná hɛn dó lɛ̌ngbɔ́ví lɛ́ɛ jí; linfín kilóo gban (30) ɔ́, é ná sɔ́ ami lǐtli ayizɛ́n d'é jí.

⁶Sunwájǐzán gbe lɛ́ɛ ɔ́, é ná nɔ́ hu nyibúsú e máɖóblɔ̌ ɖo wǔ ǎ é ɖokpó, lɛ̌ngbɔ́ví e máɖóblɔ̌ ɖo wǔ ǎ é ayizɛ́n kpó agbo e ma ɖó blɔ̌ ɖo wǔ ǎ é ɖokpó kpó.

⁷É ná ná blěelinfín kilóo gban (30) dó nyibúsú ɔ́ jí, bó ná sɔ́ kilóo gban (30) dó agbo ɔ́ jí, bɔ lɛ̌ngbɔ́ví lɛ́ɛ ɔ́, é ná kpɔ́n blěelinfín e é ɖésú mɔ ɖɔ é ná kpé ɔ́, bó ná hɛn d'é jí; é ná hɛn ami lǐtli ayizɛ́n dó linfín kilóo gban (30) lɛ́ɛ jí.

⁸Ali e gǎn ɔ́ gbɔn bó byɔ́ xwé ɔ́ gbe é wɛ é ná lɛ́ gbɔn bó tɔ́n; hɔnnúwa ɔ́ sá wɛ é ná gbɔn.

⁹Amɔ̌, ényí to ɔ́ bǐ wá bó ná sɛn nyɛ Mawu Mavɔmavɔ ɔ́ ɖo nǔwiwa ɖaxó ɖé hwenu ɔ́, mɛ e ná gbɔn hɔnnúwa taligbé tɔn ɔ́ nu, bó ná byɔ́ xwé ɔ́ gbe lɛ́ɛ ɔ́, hɔnnúwa afɔligbé tɔn ɔ́ nu wɛ yě ná gbɔn bó tɔ́n, bɔ mɛ e ka ná gbɔn afɔligbé tɔn ɔ́ nu bó ná byɔ́ mɛ lɛ́ɛ ɔ́ ná gbɔn taligbé tɔn ɔ́ nu bó tɔ́n. Mɛ ɖě ná gbɔn fí e é gbɔn bó byɔ́ xwé ɔ́ gbe é bó tɔ́n ǎ. Fí e kpan nukɔn fí e mɛ ɔ́ gbɔn bó byɔ́ mɛ é wɛ mɛ ɔ́ ná gbɔn bó tɔ́n.

¹⁰Hwe ɖokpó ɔ́ nu wɛ gǎn ɔ́ kpó togun ɔ́ kpó ná byɔ́ xwé ɔ́ gbe bó ná lɛ́ tɔ́n hwe ɖokpó ɔ́ nu.”

¹¹“Xwe gbe lɛ́ɛ kpódó azǎn nukúnɖéjí lɛ́ɛ kpó gbe ɔ́, è nǎ nɔ́ ná blěelinfín kilóo gban (30) dó nyibúsú ɖokpó abǐ agbo ɖokpó jí. É ká nyí lɛ̌ngbɔ́ví wɛ è nǎ dǒ sá vɔ̌ ná ɔ́, mɛ ɖokpó ɖokpó ná kpɔ́n linfín e é ná sɔ́ d'é jí bɔ é ná kpé é. È ka sɔ́ blěelinfín kilóo gban (30) ɔ́, ami lǐtli ayizɛ́n wɛ ná jɛ jí.

¹²“Ényí ɖɔ gǎn ɔ́ jló ná sá vɔ̌ e mɛ ɖésú nɔ́ jló bó nɔ́ sá nú nyɛ Mawu Mavɔmavɔ ɔ́ ɖě ɔ́, é sixú nyí vɔ̌ e è nɔ dó zo ɔ́, é ká sixú nyí kɔnɖókpɔ́vɔ́; hɔnnúwa zǎnzǎnhwe jí tɔn ɔ́ wɛ è nǎ hun n'i. Lě e é kó nɔ́ bló gbɔn gbɔjɛzán gbe ɔ́, mɔ̌ wɛ é ná sá vɔ̌ tɔn gbɔn. É ká ɖidó tlóló ɔ́, è nǎ sú hɔnnúwa ɔ́.

¹³“Ayǐ hɔ́n tɛgbɛ ɔ́, è nǎ sɔ́ lɛ̌ngbɔ́ e kó ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ é ɖokpó dó sá vɔ̌ e è nɔ dó zo ɔ́ nú nyɛ Mawu Mavɔmavɔ. Zǎnzǎn wɛ è nǎ sá vɔ̌ énɛ́ ɔ́.

¹⁴Mɔ̌ ɖokpó ɔ́, zǎnzǎn tɛgbɛ ɔ́, è nǎ nɔ́ sɔ́ linfín kilóo atɔ́ɔ́n, bó ná zé ami lǐtli we dó nya ná dó sá vɔ̌ nú nyɛ Mawu Mavɔmavɔ; vɔ̌ énɛ́ e è ɖɔ è nǎ nɔ́ sá ayǐhɔ́ngbe ayǐhɔ́ngbe ɔ́, è nǎ gbɔ sísá gbeɖé ǎ.

¹⁵Hǔn è ma gbɔ lɛ̌ngbɔ́ví ɔ́ kpó linfín ɔ́ kpódó ami ɔ́ kpó xwlé nyɛ Mawu Mavɔmavɔ zǎnzǎn tɛgbɛ gbeɖé ó.”

¹⁶Xó e Aklúnɔ Mavɔmavɔ ɖɔ ɔ́ ɖíe: “Ényí gǎn ɔ́ kán ayǐkúngban e nyí étɔn é ɖě nú vǐ tɔn lɛ́ɛ ɖě ɔ́, é ná nyí vǐ ɔ́ tɔn bɔ vǐ énɛ́ sín vǐ lɛ́ɛ ná ɖu gǔ tɔn.

¹⁷ É ká nyí mɛsɛntɔ́ lɛ́ɛ ɖě wɛ gǎn ɔ́ ká kán ayǐkúngban ɔ́ ná ɔ́, ayǐkúngban ɔ́ ná nyí mɛsɛntɔ́ énɛ́ ɔ́ tɔn káká jɛ xwe e xwe è nɔ ɖu Mɛɖée sí jijɛ xwe ɔ́ é; énɛ́ gúdo ɔ́, ayǐkúngban ɔ́ ná lɛ́ húzú gǎn ɔ́ tɔn, ɖó nǔ e nyí gǎn ɔ́ tɔn lɛ́ɛ ɔ́, vǐ tɔn lɛ́ɛ wɛ ná ɖu gǔ tɔn.

¹⁸Amɔ̌, gǎn ɔ́ ná yí toví ɖé sín nǔ sín así tɔn ǎ. Nǔ e ná nyí vǐ tɔn lɛ́ɛ tɔn ɔ́, nǔ é ɖésú tɔn lɛ́ɛ mɛ wɛ é ná kpɔ́n bó ná ná yě. Énɛ́ ɔ́, è nǎ nya mɛ ɖé sín nǔ e nyí étɔn é kɔn ɖo togun ce mɛ ǎ.”

¹⁹Énɛ́ gúdo ɔ́, nya ɔ́ kplá mì gbɔn ali ɖé nu yi xɔ mímɛ́ e kpan nukɔn taligbé é mɛ, ali ɔ́ ɖo hɔnnúwa ɖé kpá, vɔ̌sánú-xwlémawutɔ́ lɛ́ɛ wɛ è sɔ́ xɔ énɛ́ ɖó te ná; é xlɛ́ fí ɖé mì ɖo tó dɔ̌n, ɖo gbadahwe jí,

²⁰bó ɖɔ nú mì ɖɔ: “Fí wɛ vɔ̌sánú-xwlémawutɔ́ lɛ́ɛ ná nɔ́ ɖa kanlin e è dǒ sá hwɛsɔ́kɛmɛvɔ́ lɛ́ɛ sín lan ɖe. Fí wɛ yě ná nɔ ɖa nǔníná jinukún tɔn lɛ́ɛ lɔ ɖe. Énɛ́ ɔ́, yě ná sɔ́ nǔ ɖěbǔ wá xwé ɔ́ sín kɔ́xota, bónú togun ɔ́ ná ɖó alɔ nǔ e è sɔ́ ɖó vo nú Mawu ɔ́ wú ǎ.”

²¹Énɛ́ ɔ́ gúdo ɔ́, é kplá mì yi xwé ɔ́ sín kɔ́xota, bó kplá mì gbɔn zwe ɛnɛ lɛ́ɛ mɛ; kɔ́xota ɖo zwe ɖokpó ɖokpó jí.

²²Kɔ́xota ɛnɛ énɛ́ lɛ́ɛ hwe bó ɖó jlɛ̌ ɖokpó ɔ́; kɔ́xota ɖokpó ɖokpó sín ga nyí nǔjlɛ́kpo yětɔn kanɖé (40), gblǒ kɔ́xota ɖokpó ɖokpó tɔn nyí nǔjlɛ́kpo yětɔn gban (30).

²³Awǐnnyadó wɛ è mɛ dó xá kɔ́xota ɛnɛ énɛ́ lɛ́ɛ ɖokpó ɖokpó, bɔ myɔkpó gbɔn dǒ lɛ́ɛ wú lɛ́ lɛ̌ dó.

²⁴Nya ɔ́ ɖɔ nú mì ɖɔ: “Ado e jí mɛ e nɔ wa azɔ̌ ɖo xwé ɔ́ gbe lɛ́ɛ ná nɔ́ ɖa kanlin e togun ɔ́ dó sá vɔ̌ lɛ́ɛ sín lan ɖe lɛ́ɛ wɛ.”