Read fon Ezekiyɛ́li 5 Bible Online

Ezekiyɛ́li 5 - fon bible

Ezekiyɛ́li 5

¹Mawu ɖɔ nú mì ɖɔ: “Hwɛ gbɛtɔ́ ɔ́, zě hwǐ e ɖá ganjí ɔ́ dó xwlɛ́ ta towe kpó atán towe kpó[4] ná. A nǎ bɛ̌ ɖa kpó atán kpó e a xwlɛ́ ɔ́ dó gan jí bó ná da, lobo ná má ɖó do atɔn.

²Ée a ɖe xlɛ́ fó ɖɔ kɛntɔ́ lɛ́ɛ xá toxo ɔ́ é ɔ́, a nǎ bɔ myɔ ɖó toxo ɔ́ tɛ́ntin, bó ná dó ɖa ɔ́ kpó atán ɔ́ kpó atɔnvlɔ́ɖó zo. A nǎ zé hwǐ ɔ́ dó já atɔnvlɔ́ɖó lɛ́ lɛ̌ dó toxo ɔ́; a nǎ nyi atɔnvlɔ́ɖó e kpo ɔ́ dó jɔhɔn mɛ, bɔ nyɛ ɔ́, un ná zé hwǐ bó jɛ gǔdo tɔn.

³Amɔ̌, a nǎ kán ɖa ɔ́ kpó atán ɔ́ kpó kpɛɖé bó ná slɛ́ gǒ dó awu towe ɖaxó ɔ́ tó.

⁴Kpɛ énɛ́ e ná ɖo awu towe tó ɔ́, a nǎ sun kpɛɖé ɖ'é wú dó myɔ mɛ, bɔ é ná wlí zo; myɔ énɛ́ ɔ́ wɛ ná wa nǔ xá Izlayɛ́li togun ɔ́.

⁵“Nǔ e nyɛ Aklúnɔ Mavɔmavɔ ɖɔ ɔ́ ɖíe: Nǔ e ná jɛ dó Jeluzalɛ́mu toxo ɔ́ jí ɔ́ nɛ́; Jeluzalɛ́mu toxo e un zé ɖó akɔta lɛ́ɛ tɛ́ntin, bɔ to lɛ́ lɛ̌ dó e é.

⁶Lo ɔ́, Jeluzalɛ́munu lɛ́ɛ gba sɛ́n ce lɛ́ɛ, Jeluzalɛ́munu lɛ́ɛ xwedó nǔ e un zɔ́n lɛ́ɛ ǎ; yě wa nǔ nyanya hú togun e ɖo to e lɛ́ lɛ̌ dó yě lɛ́ɛ mɛ lɛ́ɛ, ɖó yě gbɛ̌ sɛ́n ce lɛ́ɛ kpó nǔ e un zɔ́n lɛ́ɛ kpó.

⁷Énɛ́ wú wɛ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Mi zán gbɛ hannyahannya hú mɛ e lɛ́ lɛ̌ dó mi lɛ́ɛ. Mi wa nǔ lě e sɛ́n ce lɛ́ɛ kpó nǔ e un zɔ́n lɛ́ɛ kpó byɔ́ gbɔn é ǎ, mi nyi sɛ́n ce lɛ́ɛ ǎ, mi ka nyi togun e kpá mi ɖe lɛ́ɛ sín sɛ́n ǎ.

⁸Énɛ́ wɛ zɔ́n bɔ nyɛ Aklúnɔ Mavɔmavɔ ɖɔ un ná jɛ gǔdo mitɔn ma lɛ́ ma lɛ́, bó ná dɔn tó nú mi ɖo togun mɛ agbawungba, bɔ togun ɖě lɛ́ɛ bǐ ná mɔ.

⁹Nǔ baɖabaɖa e mi dó sin lɛ́ɛ ná zɔ́n bɔ un ná dɔn tó e un ma dɔn nú mɛɖé gbeɖé kpɔ́n ǎ é nú mi; un ka sɔ́ ná dɔn tó mɔ̌hun nú mɛɖé gbeɖé ǎ.

¹⁰ Énɛ́ ɔ́ wútu ɔ́, tɔ́ ná wlí vǐ ɖu, bɔ vǐ ná wlí tɔ́ ɖu. Un ná ɖó hwɛ nú mi, bó ná nya mɛ e ná kpo ɖo gbɛ ɖo mi mɛ lɛ́ɛ dó gbě, bɔ yě ná gba kpé wɛ̌kɛ́zo ɛnɛ lɛ́ɛ mɛ.

¹¹“Nyɛ Aklúnɔ Mavɔmavɔ ɔ́, un xwlé gbɛ ce bó tɛ ɖɛ̌ jí ɖɔ mi zé bǒcyɔ mitɔn lɛ́ɛ kpó suɖunú mitɔn lɛ́ɛ kpó dó hɛn xwé ce blí. Din ɔ́, ahwan ná wlí mi bǐ; è nǎ xwlɛ́ ta nú mi bó xwlɛ́ atán nú mi; mɛ ɖěbǔ sín nǔ ná blá wǔ nú mì ǎ; un ná ɖe mɛɖé kpo ǎ, ɖó mi mɛ́ ǎ.

¹²Jɛmɛjí abǐ adɔ ná hu mi mɛ atɔnvlɔ́ɖó ɖo toxo ɔ́ mɛ; mi mɛ atɔnvlɔ́ɖó ná cí ahwan ɖo to e lɛ́ lɛ̌ dó Jeluzalɛ́mu toxo ɔ́ lɛ́ɛ é mɛ; un ná gba mɛ atɔnvlɔ́ɖó e kpo lɛ́ɛ dó wɛ̌kɛ́zo ɛnɛ lɛ́ɛ mɛ, bó ná sɔ́ ahwan dó jɛ yě gúdo.

¹³Nǔɖé ná hɛn xomɛsin ce ɖó te ǎ; fí e é vɛ́ nú mì yi jɛ ɔ́ jɛ́n un ná wa nǔ yi fó ɖó; un ná ɖe hlɔnbiba ce xlɛ́ mi. Hwenɛ́nu ɔ́, mi mɛ bǐ ná mɔ ɖɔ nyɛ Mawu Mavɔmavɔ wɛ ɖɔ xó nú mi, ɖó agɔ e jɛ wɛ mi ɖe lɛ́ɛ wá hú gǎn.

¹⁴Mɛ e ɖo to e lɛ́ lɛ̌ dó mi lɛ́ɛ mɛ lɛ́ɛ, kpó aligbɔntɔ́ lɛ́ɛ kpó ná mɔ ɖɔ un gba Jeluzalɛ́mu toxo ɔ́ hánnyá, bó kɔ́n wi tɔn.

¹⁵Hwɛ e un ɖó nú mi lɛ́ɛ ɔ́, un ná dɔn tó tɔn nú mi kpó xomɛsin ɖaxó ɖé kpó, bó ná gbɛ́ nǔ nú mi kpó adǎn kpó. Togun e lɛ́ lɛ̌ dó mi lɛ́ɛ ná nɔ́ ko mi bó ná nɔ́ zun mi. Un ná sɔ́ mi dó dó sɛ́n ná dó kplɔ́n nǔ togun énɛ́ lɛ́ɛ, bó ná dó adohu nú yě titewungbe. Nyɛ Mawu Mavɔmavɔ wɛ ɖɔ mɔ̌ nú mi.

¹⁶“Un ná sɛ́ adɔ dó mi bɔ adɔ ná dó ya nú mi káká, bɔ mi ná kú. Adɔ ná wa nǔ xá mi káká bɔ mi ná nɔ mɔ wǔvɛ́ aɖǐgá wɛ è sɔ́ mi ɖɔhun. Un ná hɛn nǔɖuɖu kpasin e mi ɖó ɖ'ayǐ lɛ́ɛ gblé, bɔ mi ná kú adɔ.

¹⁷ Un ná sɛ́ adɔ kpó adǎnkanlin kpó dó mi, bɔ yě ná hu vǐ mitɔn lɛ́ɛ. Jɛmɛjí kpó mɛhuhu kpó ahwan kpó ná vívá kún mitɔn. Nyɛ Mawu Mavɔmavɔ wɛ ɖɔ mɔ̌ nú mi.”