Read fon Ezekiyɛ́li 8 Bible Online

Ezekiyɛ́li 8 - fon bible

Ezekiyɛ́li 8

¹Ahwan wlí mǐ Izlayɛ́li ví lɛ́ɛ yi Babilɔ́nu ɔ́, é ɖo xwe ayizɛ́n bló wɛ. Sun ayizɛ́ngɔ́ e ɖo xwe énɛ́ ɔ́ mɛ ɔ́ sín azǎn atɔ́ɔ́ngɔ́ ɔ́ gbe ɔ́, un ɖo ayǐjínjɔ́n ɖo xwé ce gbe, nyi kpó tomɛxó Judáa tɔn lɛ́ɛ kpó. Fínɛ́ wɛ mǐ ɖe bɔ Aklúnɔ Mavɔmavɔ sín hlɔ̌nhlɔ́n wá jǐ ce ajijimɛ.

² Kpowun ɔ́, un mɔ nǔ gbɛtɔ́ ɖɔhun ɖé. Nǔ ɔ́ cí myɔ ɖɔhun sín alin káká yi afɔ, bó ká cí gansinnɔ ɖɔhun sín alin káká yi ta.

³Nǔ dlɛ́n nǔ alɔ ɖɔhun ɖé, bó wlí ɖa ce. Énɛ́ ɔ́, ɖo nǔmimɔ énɛ́ e Mawu sɛ́ dó mì ɔ́ mɛ ɔ́, yɛ Mawu tɔn zé mì yi jɔmɛ, bó sɔ́ mì yi Jeluzalɛ́mu. Un wá mɔ nyɛɖée ɖo Mawu xwé gbe, ɖo hɔntogbó taligbé tɔn ɔ́ kɔn, fí e è tun bǒcyɔ nǔvɛ́mɔ Mawu tɔn ɔ́ ɖó é.

⁴ Fínɛ́ wɛ un ɖe, bɔ Mawu Izlayɛ́li tɔn ɔ́ ɖe susu tɔn xlɛ́ mì ɖo fínɛ́, lě e é kó ɖe xlɛ́ mì ɖokpó gbɔn ɖo tɔdomɛ é.

⁵Mawu ɖɔ nú mì ɖɔ: “Hwɛ gbɛtɔ́ ɔ́, kpɔ́n totaligbé dɔ̌n sɛ́ dó.” Nǔgbó ɔ́, un kpɔ́n totaligbé sɛ́ dó, bó mɔ bǒcyɔ nǔvɛ́mɔ Mawu tɔn ɔ́ ɖo vɔ̌sákpe ɔ́ sín taligbé, ɖo hɔntogbó ɔ́ nu.

⁶Mawu lɛ́ ɖɔ nú mì ɖɔ: “Hwɛ gbɛtɔ́ ɔ́, a ma ɖo nǔ e wa wɛ yě ɖe ɔ́ mɔ wɛ ganjí a? Izlayɛ́li ví lɛ́ɛ ɖo nǔ baɖabaɖa énɛ́ lɛ́ɛ dó sin wɛ, bó ná mɔ tɛn dó sɛ mì dó zɔ nú xwé ce; a ka ná lɛ́ mɔ nǔ ɖěvo bɔ é ná nylá hú mɔ̌.”

⁷Yɛ ɔ́ kplá mì sín fínɛ́ yi jɛ hɔntogbó e tɔ́n jɛ kɔ́xota ɔ́ jí; ée un jɛ fínɛ́ ɔ́, un mɔ ɖɔ è tɔ́n ali ɖokpó dó ahohó ɔ́ mɛ.

⁸Bɔ Mawu ɖɔ nú mì ɖɔ: “Hwɛ gbɛtɔ́ ɔ́, tɔ́n ahohó ɔ́.” Bɔ un tɔ́n ahohó ɔ́, bó ɖe ali ɖokpó d'é mɛ.

⁹Ée un ɖe ali dó ahohó ɔ́ mɛ é ɔ́, é ɖɔ nú mì ɖɔ: “Byɔ̌ xwé ɔ́ gbe bó kpɔ́n nǔ kwíji kwíji, nǔ baɖabaɖa e dó sin wɛ yě ɖe ɖo fínɛ́ lɛ́ɛ é.”

¹⁰Énɛ́ ɔ́, un byɔ́ xwé ɔ́ gbe nǔgbó, bó mɔ ɖɔ è ɖe nǔ dó ahohó ɔ́ wú ɖo ɖisí amyɔ: è ɖe kanlin e nɔ sá lɛ́ɛ kpó kanlin baɖabaɖa lɛ́ɛ kpó, bó ɖe vodún tɛnmɛ tɛnmɛ e Izlayɛ́li ví lɛ́ɛ nɔ́ sɛn lɛ́ɛ bǐ dó ahohó ɔ́ wú.

¹¹Un mɔ tomɛxó Izlayɛ́li tɔn kanɖé gban (70) ɖo ɖiɖe énɛ́ lɛ́ɛ nukɔn; Yaazaniyahu Cafáni ví ɔ́ ɖo yě mɛ. Tomɛxó lɛ́ɛ ɖokpó ɖokpó hɛn zǎlínkpɔ́nfyɔ́nú alɔ mɛ, bɔ zǎlínkpɔ́n ɖo azɔ si ɖ'é mɛ wɛ gɔgɔgɔ.

¹²Mawu kanbyɔ́ mì ɖɔ: “Hwɛ gbɛtɔ́ ɔ́, a mɔ nǔ e wa wɛ tomɛxó Izlayɛ́li tɔn énɛ́ lɛ́ɛ ɖe ɖo ablu mɛ, bɔ mɛ ɖokpó ɖokpó ɖo vodún tɔn nukɔn ɔ́ a? Yě ɖo nǔ wa wɛ gbɔn mɔ̌ bó ká nɔ́ ɖo hwɛjijɔ ba wɛ bó nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ; é kó jó to ɔ́ dó.’ ”

¹³Mawu lɛ́ ɖɔ nú mì ɖɔ: “A nǎ lɛ́ mɔ ɖěvo lɛ́ɛ bɔ yě ná nylá hú mɔ̌; bǐ kó nɛ́ ǎ.”

¹⁴Ée é ɖɔ mɔ̌ é ɔ́, é zé mì yi hɔntogbó e ɖo xwé tɔn sín taligbé ɔ́ jí; fínɛ́ ɔ́, un mɔ nyɔ̌nu ɖé lɛ́ɛ ɖo ayǐjínjɔ́n, bɔ yě ɖo vodún Tamumuzi ví wɛ ɖɔ é kú.

¹⁵Bɔ Mawu kanbyɔ́ mì ɖɔ: “Hwɛ gbɛtɔ́ ɔ́, a mɔ nǔ énɛ́ lɛ́ɛ ganjí a? É kó vɔ ǎ, a nǎ lɛ́ mɔ nǔ baɖabaɖa e hú énɛ́ lɛ́ɛ é.”

¹⁶Ée é ɖɔ mɔ̌ é ɔ́, é zé mì yi Mawu Mavɔmavɔ xwé ɔ́ sín kɔ́xota. Un mɔ súnnu koatɔ́n (25) mɔ̌ ɖo hɔnnúwa ɔ́ kpó vɔ̌sákpe ɔ́ kpó tɛ́ntin, ɖo sinsɛnxɔ ɔ́ lihɛ́nnu. Yě dó gǔdo xɔ ɔ́, bó kpan nukɔn zǎnzǎnhwe jí, bó jɛ kpo bó ná ɖe kɔ́ nú hwe.

¹⁷Mawu kanbyɔ́ mì ɖɔ: “Hwɛ gbɛtɔ́ ɔ́, a ma mɔ nǔ énɛ́ lɛ́ɛ ganjí a? Judáanu énɛ́ lɛ́ɛ ɖo nǔ baɖabaɖa énɛ́ lɛ́ɛ dó sin wɛ ɖo xwé ce gbe fí có é kpé yě ǎ. Yě lɛ́ ɖo adǎnú wa wɛ ɖo to ɔ́ mɛ, bó ná dó dó xomɛsin nú mì. Énɛ́ ɔ́, yě nɛ́ ɖo dězan zé ɖó awɔntínnu dó dó xomɛsin nú mì wɛ nɛ́.

¹⁸Énɛ́ ɔ́ wú wɛ nyi lɔmɔ̌ ná ɖe xomɛsin ce xlɛ́ yě, bɔ yě ná tunwun ɖɔ nǔ tíin; mɛ ɖé nú ná blá wǔ nú mì ǎ, un ka ná jó mɛɖé dó ǎ; yě ná bó dó hlɔ̌nhlɔ́n bó sú xó ylɔ́ mì ɖɔ nyɛ ní wá dó alɔ émí ɔ́, un ná ɖótó yě ǎ.”