Read fon Ezekiyɛ́li 9 Bible Online

Ezekiyɛ́li 9 - fon bible

Ezekiyɛ́li 9

¹Énɛ́ ɔ́ gúdo ɔ́, un se Mawu sú xó syɛ́nsyɛ́n, bó ɖɔ: “Mi mɛ e ɖo tó ná dɔn nú toxo ɔ́ wɛ lɛ́ɛ mi, mi wá! Mɛ ɖokpó ɖokpó ní hɛn alǐnnyánú tɔn e é ná dó sú gbɛtɔ́ lɛ́ɛ sín kún dó é.”

²Ée Mawu ɖɔ mɔ̌ é ɔ́, un mɔ súnnu ayizɛ́n gosín hɔntogbó aga tɔn e ɖo xɔ ɔ́ sín taligbé ɔ́ kɔn ja, bɔ mɛ ɖokpó ɖokpó hɛn alǐnnyánú tɔn. Nya ɖěvo ɖo tɛ́ntin yětɔn, bó dó kanvɔ wěwé ɖé, lobo sɔ́ nǔwlánnú ɖokpó slɔ́ gǒ mɛ. Yě bǐ zɔn bó wá nɔ te vɔ̌sákpe e è zě ganvɔ dó bló ɔ́ nukɔn.

³Susu Mawu Izlayɛ́li tɔn ɔ́ tɔn e ɖo wɛnsagun susunɔ lɛ́ɛ ta nu, ɖo sinsɛnxɔ ɔ́ mɛ ɔ́ sí te bó ɖidó sinsɛnxɔ ɔ́ sín alihɛ́nnu. Mawu Mavɔmavɔ ylɔ́ nya e dó kanvɔ wěwé, bó sɔ́ nǔwlánnú ɖokpó slɔ́ gǒ mɛ é,

⁴bó ɖɔ n'i ɖɔ: “Gbɔn Jeluzalɛ́mu toxo ɔ́ bǐ mɛ, bó ɖó wuntun nukɔn nú mɛ e ɖo alě ná wɛ, bó ɖo wǔvɛ́ mɔ wɛ, ɖó nǔ baɖabaɖa e dó sin wɛ è ɖe ɖo toxo ɔ́ mɛ lɛ́ɛ wú lɛ́ɛ.”

⁵Énɛ́ ɔ́ gúdo ɔ́, un se bɔ Mawu ɖo ɖiɖɔ nú mɛ ayizɛ́n e kpo lɛ́ɛ wɛ ɖɔ: “Mi xwedó nya élɔ́ gbɔn toxo ɔ́ bǐ mɛ, bó hu mɛ e mi ná mɔ lɛ́ɛ bǐ. Mɛ ɖé nú ní ma blá wǔ nú mi ó, mi ma jó mɛɖé dó ó.

⁶Mi hu degénɔ lɛ́ɛ, bó hu dɔ̌nkpɛvú lɛ́ɛ, bó hu ɖyɔ̌vǐ lɛ́ɛ, bó hu yɔkpɔ́vú lɛ́ɛ kpó nyɔ̌nu lɛ́ɛ kpó. Amɔ̌, mi ma ɖ'alɔ mɛ e wuntun ɖo nukɔn ná lɛ́ɛ ɖěbǔ wú ó. Mɛ e ɖo xwé ce gbe lɛ́ɛ jí wɛ mi ka ná bɛ́ sín.” Nǔgbó ɔ́, yě bɛ́ sín tomɛxó e ɖo Mawu xwé gbe ɖo sinsɛnxɔ ɔ́ nukɔn lɛ́ɛ jí.

⁷Mawu ɖɔ nú yě ɖɔ: “Mi yi ɖu su nú xwé ce; mi bɛ́ cyɔ lɛ́ɛ kɔn nyi kɔ́xo lɛ́ɛ ta.” Nǔgbó ɔ́, yě tɔ́n bó byɔ́ toxo ɔ́ mɛ bó hu mɛ lɛ́ɛ tɛ́.

⁸Ée un ɖo te bɔ yě ɖo mɛ hu wɛ é ɔ́, un jɛ ayǐ bó xwe agbɔ̌nnusú do, bó sú xó bó ɖɔ: “Áo, Aklúnɔ Mavɔmavɔ! Ée a sin xomɛ bo ɖo nǔ wa xá Jeluzalɛ́mu toxo ɔ́ wɛ gbɔn mɔ̌ din ɔ́, a jlǒ ná sú Izlayɛ́li ví e kpo lɛ́ɛ sín kún dó wɛ a?”

⁹Bɔ Mawu yí gbe nú mì ɖɔ: “Hwɛ e hu wɛ Izlayɛ́li ví lɛ́ɛ kpó Judáanu lɛ́ɛ kpó ɖe ɔ́ d'agba bó vɛ́ jlɛ́. Mɛhutɔ́ kɛ́ɖɛ́ wɛ gɔ́ to ɔ́; nǔ agɔ agɔ kɛ́ɖɛ́ wɛ yě nɔ́ wa ɖo toxo élɔ́ mɛ, ɖó mɛ lɛ́ɛ nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ, é kó jó to ɔ́ dó.’

¹⁰Ée é nyí mɔ̌ ɔ́, mɛ ɖé nú ɖo wǔ ná blá nú mì wɛ ǎ; un ná jó mɛɖé dó ǎ. Un ná sú nǔ e yě wa ɔ́ sín axɔ́ yě.”

¹¹Hwenu e Mawu ɖo mɔ̌ ɖɔ wɛ é ɔ́, nya e dó kanvɔ wěwé ɔ́ wá, lobo ɖó lě e é wa nǔ gbɔn ɔ́ sín gbe nú Mawu bó ɖɔ: “Un bló nǔ e a zɔ̌n mì é.”