Read fon Daniyɛ́li 10 Bible Online

Daniyɛ́li 10 - fon bible

Daniyɛ́li 10

¹Hwenu e axɔ́sú Pɛ́si tɔn Silúsi ɖo xwe atɔn bló wɛ ɖo zinkpo jí ɔ́, Mawu dó wɛn ɖé Daniyɛ́li e è nɔ ylɔ́ ɖɔ Bɛluticasáa é. Xó énɛ́ ɔ́, xójɔxó wɛ, bó ɖɔ wǔvɛ́ ɖaxó ɖaxó e jǎwe lɛ́ɛ. Daniyɛ́li ɖo tamɛ lin dó xó énɛ́ wú wɛ, bɔ Mawu wá ná ɛ tínmɛ tɔn ɖo dlɔ̌ mɛ.

²“Hwenɛ́nu ɔ́, nyɛ Daniyɛ́li nɔ aluwɛ mɛ nú aklúnɔzángbla atɔn kpíkpé.

³Un nɔ ɖu nǔɖuɖu jɔ nǔɖuɖu ɖěbǔ ǎ. Un nɔ ɖu lan ǎ, un nɔ nu vɛ̌ɛn ǎ, un lɛ́ gɔn ɖa vún káká bɔ aklúnɔzángbla atɔn lɛ́ɛ wá yi.

⁴Azǎn ko-nukún-ɛnɛgɔ́ ɔ́ e ɖo sun énɛ́ ɔ́ mɛ ɔ́, un yi cí tɔsisa ɖaxó ɖé tó; è nɔ ylɔ́ tɔ ɔ́ ɖɔ Tígli.

⁵ Ée un ɖo fínɛ́, bó ɖo nǔ kpɔ́n wɛ ɔ́, un mɔ mɛɖé dó lɛ̌ɛnkanvɔ ɖé, lobo sin siká akú sín gǒjíblánú ɖokpó.

⁶Wǔtu tɔn cí awǐnnya xɔ akwɛ́ e è nɔ ylɔ́ ɖɔ klizolíti é ɖɔhun, nukún mɛ tɔn nɔ́ kɛn jǐkɛwun ɖɔhun, nukún tɔn cí zohwín ɖɔhun. Awa tɔn kpó asá tɔn kpó nɔ́ kɔ́n ganvɔ e è ɖǐɖí wǔ ná é ɖɔhun. É ɖo xó ɖɔ wɛ ɔ́, é nɔ cí gbɛtɔ́ gěgé wɛ ɖo xó ɖɔ wɛ ɖɔhun.

⁷Nyi ɖokpó wɛ mɔ nǔ énɛ́ ɔ́. Mɛ e lɛ́ lɛ̌ dó mì lɛ́ɛ mɔ nǔ ɖěbǔ ǎ, có xɛsi ka jɛ yě bǐ jí, bɔ yě hɔn yi bɛ.

⁸Nyɛ ɖokpó géé wɛ kpo ɖo nǔdábaɖa énɛ́ ɔ́ mɔ wɛ. Un ba hlɔ̌nhlɔ́n kpo. Nukún ce mɛ húzú bó tá myɔ, bɔ kanmɛ ce bǐ túntún.

⁹Nya ɔ́ ɖɔ xó bɔ gbe tɔn sín zǐngídi zɔ́n bɔ un ba nyɛɖée kpó, lobo j'ayǐ, bo xwe agbɔ̌nnusú do.

¹⁰Lo ɔ́, mɛɖé ɖ'alɔ wǔ ce, bó fɔ́n mì sí te, bɔ koli ce kpó alɔ ce kpó bǐ nɔ́ sísɔ́.

¹¹Nya e mɔ wɛ un ɖe ɔ́ ɖɔ nú mì ɖɔ: ‘Daniyɛ́li, hwi mɛ e Mawu yí wǎn ná ɔ́, tɛ́nkpɔ́n bó mɔ nǔ jɛ xó e ɖɔ nú we gbé un ja é mɛ. Nɔ te ɖo fí e a ɖe ɔ́, ɖó hwi gɔ́n wɛ è sɛ́ mì dó din.’ Ée un se mɔ̌ ɔ́, un ɖo te bó ɖo sísɔ́sísɔ́ wɛ.

¹²É ɖɔ nú mì ɖɔ: ‘Daniyɛ́li, ma ɖi xɛsi ó. Sín gbe e gbe ayi towe jɛ nǔ mɔ jí, bɔ a zě hwiɖée hwe ɖo Mawu nukɔn ɔ́, Mawu ɖo ɖɛ towe lɛ́ɛ se wɛ, bɔ un hɛn sin tɔn ja nú we.

¹³ Lo ɔ́, Pɛ́sigán ɔ́ fɔ́n gǔ dó jǐ ce káká nú azǎn ko-nukún-ɖokpó hwɛ̌ có Micɛ́li wɛnsagun Mawu tɔn ɖaxó lɛ́ɛ ɖokpó wá, bó wá dó alɔ mì, bɔ un nɔ axɔ́sú Pɛ́si tɔn lɛ́ɛ gɔ́n.

¹⁴Din ɔ́, un wá bó ná ɖɔ nǔ e ná wá jɛ dó togun towe jí sɔ gúdo ɔ́ nú we. Nǔ ɔ́ wɛ Mawu ɖe xlɛ́ we bɔ a mɔ.’

¹⁵“Hwenu e é ɖo xó ɖɔ nú mì wɛ ɔ́, un ɖo kɔ́ mɛ kpɔ́n wɛ, bó sixú ɖɔ xó ɖěbǔ ǎ.

¹⁶Mɛ ɖěvo wá ɖó alɔ nu ce wú, bɔ nu ce hun, bɔ un lɛ́ jɛ xó ɖɔ jí. Un ɖɔ nú mɛ ɖěvo énɛ́ e ɖo nukɔn ce ɔ́ ɖɔ: ‘Sɛ́mɛɖó ce, nǔ e un mɔ ɔ́ dó adohu nú mì, bo tlú kanmɛ nú mì.

¹⁷Nyɛ mɛ e ma nyí nǔɖéwanú ǎ, bɔ funfún ma ɖo wǔ ce ǎ, bɔ un ma ɖó gǎn ǎ ɔ́, nɛ̌ un ná sixú ɖɔ xó xá Aklúnɔ ce gbɔn?’

¹⁸Mɛ ɖěvo énɛ́ e ɖo nukɔn ce ɔ́ lɛ́ ɖó alɔ wu ce, bɔ un lɛ́ mɔ hlɔ̌nhlɔ́n,

¹⁹bɔ é ɖɔ nú mì ɖɔ: ‘Wǎnyínámɔ Mawu tɔn, ma ɖi xɛsi ó. Nǔ wɛ nyɔ́ nú we! Lɛ̌ kpan akɔ́n! Dǒ gǎn!’ Hwenu e é ɖo xó ɖɔ nú mì wɛ ɔ́, hlɔ̌nhlɔ́n ɖo wǔ ce wá wɛ, bɔ un ɖɔ n'i lo ɖɔ: ‘Sɛ́mɛɖó ce, a hɛn ɔ́, a nǎ ɖɔ xó nú mì din, ɖó a nǎ hlɔ̌nhlɔ́n mì.’

²⁰É lɛ́ ɖɔ nú mì ɖɔ: ‘A tunwun nǔ e wú un wá gɔ̌n towe ɔ́ a? Din ɔ́, un ná yi fun ahwan xá Pɛ́sigán ɔ́; un ka yi ɔ́, Glɛ̌sigán ɔ́ ná wá.

²¹Lo ɔ́, un jló ná xlɛ́ nǔ e è wlǎn dó nǔgbówéma ɔ́ mɛ é we. Mɛ ɖé ka ná dó alɔ mì ɖo ahwan e fun gbé un ja ɔ́ mɛ zɛ gǎn mitɔn Micɛ́li wú ǎ.’ ”