Read fon Daniyɛ́li 11 Bible Online

Daniyɛ́li 11 - fon bible

Daniyɛ́li 11

¹Nya ɔ́ ɖɔ nú mì ɖɔ: “Hwenu e Daliwúsi Mɛdinu ɔ́ ɖo xwe ɖokpó bló wɛ ɖo zinkpo jí ɔ́, un dó alɔ ɛ, bó jɛ ahwan jǐ tɔn.

²Amɔ̌, din ɔ́, wɛn jɔ wɛn e ná dó we wɛ un ɖe ɔ́ ɖíe: “Axɔ́sú atɔn ná ɖu axɔ́sú ɖo Pɛ́si. Axɔ́sú ɛnɛgɔ́ e ná bɔ dó yě wu ɔ́ ná jɛ dɔkun hú axɔ́sú ɖě lɛ́ɛ. Hwenu e dɔkun tɔn lɛ́ɛ ná ná ɛ hlɔ̌nhlɔ́n, bɔ é ná kpa acɛ ganjí ɔ́, é ná wa nǔ bǐ bó ná tɔ́n ahwan axɔ́súɖuto Glɛ̌si tɔn.

³Lo ɔ́, axɔ́sú akowunká ɖokpó ná yí to ɖo Glɛ̌si, bɔ acɛkpikpa tɔn ná syɛ́n ɖésú, bɔ é ná nɔ wa nǔ e jló e é[10].

⁴Hwenu e è nǎ ɖe e síin ɔ́, axɔ́súɖuto tɔn ná gba hánnyá, bó ná fúnfún gbɔn wɛ̌kɛ́zo ɛnɛ lɛ́ɛ bǐ mɛ. Vǐ tɔn ɖě ná jɛ tɛn tɔn mɛ ǎ. Mɛ ɖěvo ɖěvo lɛ́ɛ wɛ ná kpa acɛ dó axɔ́súɖuto ɔ́ nu, amɔ̌, acɛkpikpa yětɔn ná sɔ éyɛ́ tɔn ǎ.

⁵“Mɛ e ná kpa acɛ dó axɔ́súɖuto Tofɔligbé tɔn nu ɔ́[11] ná syɛ́n ɖésú, amɔ̌, azaglɔ́gán tɔn lɛ́ɛ ɖokpó ná syɛ́n hú i, bɔ fí e é ná kpa acɛ gbɔn ɔ́ ná syɛ́n hú éyɛ́ tɔn.

⁶Ée xwe ɖé ná wá yi é ɔ́, yě ná jɛ akɔ. Axɔ́sú Tofɔligbé tɔn ɔ́ sín vǐ nyɔ̌nu ná da axɔ́sú Totaligbé tɔn ɔ́[12], bó ná dó hwɛ gbo nú yě. Amɔ̌, asi tɔn ná hɛn acɛkpikpa ɔ́ ɖó te n'i ǎ. Axɔ́sú ɔ́ ɖésú ná nɔ gbɛ ǎ, vǐ yětɔn lɔmɔ̌ ná nɔ gbɛ ǎ, asi ɔ́ lɔ ná nɔ gbɛ ǎ, mɛ e kpó yě kpó ɖo kpɔ́ lɛ́ɛ ɖěbǔ ná nɔ gbɛ ǎ, nyɔ̌nu ɔ́ sín asú kpó tɔ́ tɔn kpó ɖě ná nɔ gbɛ ǎ.

⁷Hɛ̌nnumɔ tɔn lɛ́ɛ ɖokpó ná wá jɛ tɔ́ tɔn tɛnmɛ, bó ná yi axɔ́sú Totaligbé tɔn ɔ́ sín hɔnmɛ, bó ná dó ya nú ahwangɔnu tɔn. É ná tɔ́n ahwan ahwangɔnu énɛ́ ɔ́, bó ná ɖu ɖo jǐ tɔn.

⁸É ɖu ɖo jǐ tɔn fó ɔ́, é ná bɛ́ vodún yětɔn lɛ́ɛ sín bǒcyɔ, bó ná bɛ́ nǔ e yě zě kpatágan kpó siká kpó dó bló ná, bó ylɔ́ Mawu nyǐkɔ d'é jí, bó nɔ zán lɛ́ɛ. É ná bɛ́ nǔ énɛ́ lɛ́ɛ bǐ yi Ejípu. Yě ná gɔn ahwan fun nú xwe we jɛjí.

⁹Énɛ́ ɔ́ gúdo ɔ́, axɔ́sú Totaligbé tɔn ɔ́ ná yi tɔ́n ahwan axɔ́súɖuto Tofɔligbé tɔn ɔ́, bó ná lɛ́ lɛ́ kɔ wá yi to tɔn mɛ.

¹⁰“Axɔ́sú Totaligbé tɔn sín vǐ lɛ́ɛ ná kplé ahwan tɔn lɛ́ɛ kɔn nyi kpɔ́ gégé, bó ná sɔ́ ahwannú. Mɛ ɖokpó ka ná ɖo yě mɛ, bó ná yi ahwangbénu, bɔ é kpó sɔ́ja tɔn lɛ́ɛ kpó ná gba wu, bó dó asá to ɔ́ sín dogbó tɔ ɖi sin ɖɔhun. Ée é ná lɛ́ kɔ jǎwe to tɔn mɛ ɔ́, é ná tɔ́n ahwan toxo e è mɛ ahohó lɛ́ lɛ̌ dó é.

¹¹Xomɛ ná sin axɔ́sú Tofɔligbé tɔn ɔ́, bɔ é ná tɔ́n ahwan axɔ́sú Totaligbé tɔn ɔ́, bɔ axɔ́sú Totaligbé tɔn ɔ́ ná kplé ahwan tɔn lɛ́ɛ kɔn nyi kpɔ́, bɔ yě ná yi ahwangbénu. Lo ɔ́, ahwangɔnu tɔn lɛ́ɛ bǐ ná cí ahwan.

¹²Axɔ́sú Tofɔligbé tɔn ɔ́ ná yí go ɖó é ná hu mɛ gěgé ɖo ahwan énɛ́ ɔ́ mɛ. Lo ɔ́, é ná bó hu sɔ́ja tobutóbú énɛ́ lɛ́ɛ ɔ́, é ná ɖu ɖ'é jí ǎ.

¹³Axɔ́sú Totaligbé tɔn lɛ́ɛ ná kplé ahwangɔnu yɔ̌yɔ́ ɖěvo lɛ́ɛ. Ahwangɔnu énɛ́ lɛ́ɛ ná sukpɔ́ hú nukɔn tɔn lɛ́ɛ. Xwe nabí ɖé wá yi ɔ́, axɔ́sú ɔ́ kpódó ahwangɔnu gěgé kpó ná lɛ́ vɔ́ wá, bó ná hɛn ahwanfunnú gěgé.

¹⁴Hwenɛ́nu ɔ́, mɛ gěgé ná dó kɛn axɔ́sú Tofɔligbé tɔn. Daniyɛ́li, mɛ e ɖo togun towe mɛ lɛ́ɛ lɔmɔ̌ ɖ'é mɛ; yě kpódó mɛ e yí wǎn nú dǎkaxixo lɛ́ɛ kpó ná fɔ́n gǔ dó jǐ tɔn, bɔ nǔ e Mawu ɖe xlɛ́ we ɖo dlɔ̌ mɛ ɔ́ ná jɛ. Amɔ̌, yě mɛ ɖěbǔ ná ɖu ɖ'é jí ǎ.

¹⁵Axɔ́sú Totaligbé tɔn ɔ́ ná wá, bó ná mɛ kpe ɖokpó, bó ná klá jɛ toxo e è mɛ ahohó lɛ́ lɛ̌ dó é nú. Axɔ́sú Tofɔligbé tɔn ɔ́, lě do e ahwangɔnu tɔn lɛ́ɛ syɛ́n sɔ ɔ́ nɛ́, có é ka sixú nɔ te ɖo axɔ́sú Totaligbé tɔn ɔ́ nukɔn ǎ, ɖó yě ɖó gǎn mɔ̌hun ǎ.

¹⁶Mɛ e gba to ɔ́ é ɔ́, lě e é jló e gbɔn ɔ́ wɛ é ná wa nǔ gbɔn, ɖó mɛ ɖěbǔ sixú nɔ te nukɔn tɔn ǎ. Nú é ɖo nǔ hɛn gblé wɛ bó ɖo yiyi wɛ ɔ́, to e nyɔ́ ɖɛkpɛ hú to lɛ́ɛ bǐ é mɛ wɛ é ná wa xwé ɖó.

¹⁷Énɛ́ ɔ́ gúdo ɔ́, é ná ɖó jlǒ, bó ná wá kpó axɔ́súɖuto tɔn sín hlɔ̌nhlɔ́n bǐ kpó. É ná wa nǔ mɛ ɖo nǔ jlɔ́jlɔ́ wa wɛ ɖɔhun. É ná zé vǐ tɔn da nú axɔ́sú Tofɔligbé tɔn. Linlin e dó wa mɔ̌ ná wɛ é ɖe ɔ́ wɛ nyí ɖɔ é ná dɔn kɛntɔ́ tɔn sín to dó kɔ́blúmánya mɛ, amɔ̌, é ná kpé nǔ énɛ́ ɔ́ wú bó wa ǎ.

¹⁸Énɛ́ ɔ́ gúdo ɔ́, é ná húzú kpan nukɔn toxo e ɖo tɔ ɔ́ tó lɛ́ɛ, bó ná yí toxo gěgé. Amɔ̌, gǎn to ɖěvo mɛ tɔn ná ɖó glagla e ɖú wɛ é ɖe ɔ́ te, bó ná bló bɔ nǔ e é wa lɛ́ɛ ji nǔɖé ɔ́, é ná sɔ́ kpan.

¹⁹Din ɔ́, é ná húzú kpan nukɔn toxo e è mɛ ahohó lɛ́ lɛ̌ dó ɖo to é ɖésú tɔn mɛ lɛ́ɛ; amɔ̌, ɖagbe ɖé ná sixú tɔ́n sín mɛ n'i ǎ. É nyɔ́ wa ɔ́, é ná kú ma ɖó donu.

²⁰Mɛ e ná wá jɛ axɔ́sú énɛ́ ɔ́ tɛnmɛ ɔ́, ná sɛ́ mɛ ɖokpó dó, bɔ mɛ ɔ́ ná yi xɔ e nyɔ́ ɖɛkpɛ hú xɔ lɛ́ɛ bǐ ɖo axɔ́súɖuto ɔ́ mɛ é mɛ, bó ná bɛ́ nǔ e ɖ'é mɛ lɛ́ɛ bǐ. Azǎn ɖé ná jɛ ǎ, bɔ è nǎ gbídí axɔ́sú énɛ́, é ka ná nyí agbawungba abǐ ahwangbénu ǎ.

²¹“Mɛ e ná wá mɛ énɛ́ ɔ́ sín tɛnmɛ ɔ́[13] ná nyí mɛɖé, bɔ mɛ bǐ ná gbɛ́ wǎn n'i; è nǎ sɔ́ ɛ su axɔ́sú ɖɔhun ǎ. To ɔ́ bǐ ná ɖo vivo mɛ, bɔ nya énɛ́ ɔ́ ná dó ahizi, bó ná klá jɛ axɔ́súɖuto ɔ́ nu, bó ná ɖu gǎn.

²²Ahwangɔnu ɖěbǔ sixú kpé wǔ tɔn ǎ; é ná gbídí yě bǐ. É ná hu togun e yě jɛ akɔ xá ɔ́ sín gǎn ɖokpó.

²³É ná ɖó dó xó e yě ɖɔ nyi alɔ ɖokpó jí xá ɛ lɛ́ɛ wú, bó ná jɛ ayi we zán jí. Mɛ e ɖo jǐ tɔn lɛ́ɛ hwe có acɛ tɔn fɔ́n ɔ́, é nɔ́ ɖo jijɛ jí wɛ.

²⁴To ɔ́ bǐ ná ɖo vivo mɛ, bɔ é ná yi byɔ́ toxo e hun nukún ganjí ɖo tokpɔn ɔ́ mɛ lɛ́ɛ é mɛ, lobo ná wa nǔ e tɔ́gbó tɔn lɛ́ɛ ma glá bó wa gbeɖé ǎ é. É ná vɔ to ɔ́, bó ná má nǔ e é bɛ́ sín ahwangbénu lɛ́ɛ kpó dɔkun lɛ́ɛ kpó nú mɛ e ɖo jǐ tɔn lɛ́ɛ. É ná to lě e é ná tɔ́n ahwan ahwankpá lɛ́ɛ gbɔn ɔ́. Amɔ̌, nǔ nɛ́ lɛ́ɛ bǐ ná nɔ mɔ̌ káká sɔ́yi ǎ.

²⁵“É ná ɖeji dó hlɔ̌nhlɔ́n tɔn kpó akɔ́nkpinkpan tɔn kpó wú, bó ná kplá ahwangɔnu ɖaxó ɔ́. Amɔ̌, axɔ́sú énɛ́ ɔ́ ná ko sɔ́ ahwannú ɖ'ayǐ, bó ná fun ahwan xá ahwangɔnu ɖaxó e ná syɛ́n ɖésú é. É ná sɔ́ nǔ bǐ mɔ̌ cóbó ka ná sixú nɔ te nukɔn tɔn ǎ, ɖó ahizi sín wlɛnwín e é ɖe dó wǔ tɔn ɔ́ wú.

²⁶Nǔ ɖo mɔ̌ có mɛ e ɖo kpɔ́ xá ɛ lɛ́ɛ ɖésú wɛ ná flú i. Kɛntɔ́ tɔn ná ɖu ɖo ahwangɔnu tɔn jí, bɔ sɔ́ja tɔn lɛ́ɛ gěgé ná kú.

²⁷Axɔ́sú Totaligbé tɔn ɔ́ kpó axɔ́sú tofɔligbé tɔn ɔ́ kpó ná kplé ɖo nǔɖuká ɖokpó ɔ́ kɔn. Amɔ̌, ée dǎkaxixo kpo ɖo ayi mɛ nú yě ɔ́, nǔvú jɛ́n yě ná ɖó nú yěɖée ɖo fínɛ́. Kplé yětɔn énɛ́ ɔ́ ná ɖó bɛ̌nu ɖé ǎ, ɖó hwenu e nǔ bǐ ná fó dó ɔ́ kó su ǎ.

²⁸Axɔ́sú Totaligbé tɔn ɔ́ ná lɛ́ kɔ yi to tɔn mɛ kpó dɔkun gěgé kpó. Ée é ná lɛ́ kɔ wá xwe xwé ɔ́, é ná tɔ́n ahwan togun e è jɛ akɔ mímɛ́ xá lɛ́ɛ ɖokpó, lě e é ko to gbɔn ɖ'ayǐ é, bó ná ɖidó to tɔn mɛ.

²⁹“Ée hwe ɔ́ nu wá su ɔ́, axɔ́sú Totaligbé tɔn ɔ́ lɛ́ vɔ́ wá axɔ́súɖuto Totaligbé tɔn ɔ́ tɔn mɛ, amɔ̌, lě e nǔ lɛ́ɛ ná yi gbɔn hwenɛ́nu ɔ́ ná gbɔn vo nú ɖ'ayǐ tɔn ɔ́.

³⁰Mɛ e ɖo gbadahwe jí lɛ́ɛ ná dó tɔjíhún e gosín Cíplu é, bó ná wá gbo ali nú axɔ́sú Totaligbé tɔn ɔ́. Awakanmɛ ná kú i, bɔ é ná lɛ́ kɔ. É ná ɖó gbe kpɔ́ xá mɛ e ma nɔ gbejí nú akɔjijɛ ɔ́ ǎ lɛ́ɛ, bó ná jɛ ma dó togun e ɖo akɔjijɛ mímɛ́ ɔ́ lɛ́ɛ glɔ́ é jí.

³¹ Sɔ́ja e é sɛ́ dó lɛ́ɛ ná sí ahwan te, ɖo ahohó mímɛ́ ɔ́ nukɔn, bó ná ɖu su ná. Vɔ̌ e sá nú Mawu wɛ è nɔ ɖe ayǐhɔ́ngbe ayǐhɔ́ngbe ɔ́, yě ná ɖó te; yě ná zé suɖunú baɖabaɖa ɖokpó ɖó vɔ̌sákpe ɔ́ jí.

³²Cɛ́ncɛ́n e xo dó mɛ wɛ axɔ́sú ɔ́ ɖésú nɔ ɖe lɛ́ɛ ɔ́ ná dɔn mɛ gěgé, bɔ yě ná dó vɛ̌ nú akɔjijɛ ɔ́. Amɔ̌, mɛ e nɔ gbejí nú Mawu lɛ́ɛ ná ɖó kan dó nǔ e wa wɛ yě ɖe ɔ́ wú syɛ́nsyɛ́n.

³³Mɛ e bí ganjí ɖo yě mɛ lɛ́ɛ ná ná kplɔ́n mɛ gěgé. È nǎ hu mɛɖé lɛ́ɛ ɖó hwǐ wú, è nǎ dó mɛ lɛ́ɛ zo, è nǎ bɛ́ mɛɖé lɛ́ɛ sín dɔkun, lobo ná zé yě yi sú dó gankpá mɛ. Nǔ énɛ́ lɛ́ɛ ná jɛ káká yi jɛ hwe ɖé nu.

³⁴Hwenu e yě ná ɖo ya énɛ́ lɛ́ɛ ji wɛ ɔ́, yě ná mɔ alɔdó kpɛɖé. Yɛmɛnúwatɔ́ gěgé ná ɖo mɛ e ná wá jɛ yě jí lɛ́ɛ é mɛ.

³⁵Mɛ gěgé ná kú ɖo nǔnywɛ́tɔ́ lɛ́ɛ mɛ, bɔ kú yětɔn ná slá wǔ nú togun ɔ́, bɔ é ná mɛ́ bó ná nɔ wǐwé jí nú gbe e gbe gbɛ ná vɔ é; lo ɔ́, hwe ɔ́ nu ko nɛ́ ǎ.

³⁶ “Axɔ́sú ɔ́ ná nɔ́ wa nǔ lě e é jló e gbɔn é. É ná nɔ́ tɛ afɔ ayǐ, bó ná nɔ́ mɔ ɖɔ émí hú gǎn vodún lɛ́ɛ bǐ. É ja xó ɖɔ nú Mawu mawu lɛ́ɛ tɔn gbé ɔ́, é ná nɔ́ lin tamɛ kpɔ́n ǎ. Nǔ nǎ ɖo nyǐnyɔ́ n'i wɛ káká jɛ hwenu e xomɛsin Mawu tɔn ná wá é. Lo ɔ́, nǔ e Mawu ɖɔ ɔ́ jɛ́n ná jɛ.

³⁷Axɔ́sú ɔ́ ná ɖó sísí ɖěbǔ nú vodún e tɔ́gbó tɔn lɛ́ɛ ko sɛn lɛ́ɛ é ǎ; é ka ná ɖó sísí nú vodún e nyɔ̌nu lɛ́ɛ nɔ́ wlíbo ná é ǎ. É ná mɔ éɖée dó mɔ mɛ e hú gǎn nǔmɛsɛn lɛ́ɛ bǐ é, bó ná nɔ́ sí ɖě ǎ.

³⁸Lo ɔ́, é ná sɛn vodún ahohó lɛ́ɛ tɔn, nǔmɛsɛn énɛ́ e tɔ́gbó tɔn lɛ́ɛ ma tunwun kpɔ́n ǎ é. É ná xwlé siká, kpatágan, awǐnnya ɖagbe ɖagbe lɛ́ɛ, kpódó nǔ xɔ akwɛ́ ɖěvo ɖěvo lɛ́ɛ kpó vodún énɛ́

³⁹Vodún to ɖěvo mɛ tɔn énɛ́ ɔ́ ná dó alɔ ɛ, bɔ é ná tɔ́n ahwan toxo lɛ́ɛ. É ná wlí yɛ̌yi nú mɛ e ná yí gbe nú vodún énɛ́ ɔ́ lɛ́ɛ é bǐ. É ná sɔ́ yě gǎn ɖó mɛ gěgé nu, bó ná má ayǐkúngban nú yě, bɔ é ná nyí ajɔ nú yě.

⁴⁰“Hwenu e nǔ lɛ́ɛ bǐ ná ɖo nǎ fó wɛ ɔ́, axɔ́sú Tofɔligbé tɔn ɔ́ ná lɛ́ jɛ kɛnfɔ ɖe xá axɔ́sú Totaligbé tɔn ɔ́ jí. Amɔ̌, axɔ́sú totaligbé tɔn ɔ́ ná sí te dó jǐ tɔn kpó zǐngídi kpó, bó ná fɔ ahwanhún kpó sɔ́ kpó tɔjíhún gěgé kpó, lobo ná tɔ́n ahwan ɛ. Lě e tɔsisa nɔ́ gɔ́, bó nɔ́ gba wǔ ɔ́ ɖɔhun wɛ é kpódó ahwangɔnu tɔn kpó ná xo to ɔ́ sín dogbó lɛ́ɛ zlɛ́, bó ná byɔ́ to ɔ́ mɛ gbɔn ɖisí amyɔ.

⁴¹É ná byɔ́ to e nyɔ́ ɖɛkpɛ hú to lɛ́ɛ bǐ é mɛ, bó ná hu mɛ gěgé. Amɔ̌, Edɔ́munu lɛ́ɛ, Mɔwabunu lɛ́ɛ, kpó gǎn ɖaxó Amumɔ́ɔ ví lɛ́ɛ tɔn lɛ́ɛ kpó ná gló e.

⁴²É ná kpa acɛ gbɔn to ɖěvo lɛ́ɛ mɛ; Ejípu ɖésú lɔ ná hán ɖ'é mɛ ǎ.

⁴³É ná klá jɛ Ejípu dɔkun lɛ́ɛ nu; siká kpó kpatágan kpó nǔ xɔ akwɛ́ e ɖo to ɔ́ mɛ lɛ́ɛ kpó bǐ ná húzú étɔn. Libíinu lɛ́ɛ kpó Etiopíinu lɛ́ɛ kpó ná hwíhwɛ́ yěɖée ɖó glɔ̌ tɔn.

⁴⁴Amɔ̌, xó e è se sín zǎnzǎnhwe jí kpó totaligbé kpó lɛ́ɛ gba ayi dó n'i, bɔ é sin xomɛ bó dó ahwan gbě, bó ná sú mɛ gěgé sín kún dó.

⁴⁵Xu ɔ́ kpó só mímɛ́ e ɖo to e nyɔ́ ɖɛkpɛ hú to lɛ́ɛ bǐ é kpó sín tɛ́ntin wɛ é ná bló axɔ́sú sín goxɔ tɔn lɛ́ɛ nyi. Fínɛ́ wɛ kú ná wá fyán ɛ ɖe, bɔ mɛ ɖěbǔ ná wá dó alɔ ɛ ǎ.”