Read fon Daniyɛ́li 2 Bible Online

Daniyɛ́li 2 - fon bible

Daniyɛ́li 2

¹Hwenu e axɔ́sú Nabukodonɔzɔ́ɔ ɖo xwe we bló wɛ ɖo zinkpo jí ɔ́, é kú dlɔ̌ ɖokpó, bɔ ayi tɔn bǐ gbadó, bɔ adɔ̌ vɛ́ ɛ.

² Énɛ́ ɔ́, é ɖɔ è nǐ ylɔ́ nǔkantɔ́ lɛ́ɛ, majíkiblótɔ́ lɛ́ɛ, azětɔ́ lɛ́ɛ, kpó azɔnɖatɔ́ lɛ́ɛ kpó wá, bónú yě ná ɖɔ nǔ e émí mɔ ɖo dlɔ̌ mɛ ɔ́ nú émí. Ée yě wá ɔ́, yě nɔ te ɖo nukɔn tɔn,

³bɔ é ɖɔ nú yě ɖɔ: “Un kú dlɔ̌ ɖé, bɔ é hu ado nú mì taala. Un jló ɖɔ mi ní ɖɔ nǔ e un mɔ ɖo dlɔ̌ mɛ ɔ́ nú mì.”

⁴Azɔnɖatɔ́ lɛ́ɛ yí gbe nú axɔ́sú ɔ́ dó alamugbe mɛ ɖɔ: “Sɛ́mɛɖó, jidɔ́ mɛtɔn ní nyí káká. Mɛ ní ɖɔ dlɔ̌ e mɛ kú ɔ́ nú mǐ, nú mǐ ná tínmɛ nú mɛ.”

⁵Axɔ́sú ɔ́ yí gbe nú yě ɖɔ: “Un ko ɖɔ bó tɛ afɔ jí ɖɔ nú mi ma ɖɔ nǔ e un mɔ ɖo dlɔ̌ e un kú ɔ́ mɛ ɔ́ nú mì, bó ná tínmɛ tɔn mì ǎ ɔ́, un ná já mi lan ɖɔhun, bó ná gba xwé mitɔn bǐ hánnyá.

⁶Ényí mi ka ɖɔ dlɔ̌ e un kú ɔ́ nú mì ɔ́, un ná dó dɔkun nú mi, bó ná wlí yɛ̌yi nú mi ɖaxó. Din ɔ́, mi bó ɖɔ nǔ e un mɔ ɖo dlɔ̌ mɛ ɔ́ nú mì, bó tínmɛ nú mì.”

⁷Azɔnɖatɔ́ lɛ́ɛ lɛ́ ɖɔ nú axɔ́sú ɔ́ azɔn wegɔ́ ɔ́ ɖɔ: “Sɛ́mɛɖó, mɛ vɛ́ ɖɔ dlɔ̌ e mɛ kú ɔ́ nú mǐ, bónú mǐ ná sixú tínmɛ nú mɛ.”

⁸Axɔ́sú ɔ́ lɛ́ yí xó bó ɖɔ: “Un mɔ din ɖɔ tɛn ba wɛ mi ɖe, bó ná yí agbɔ̌n kpɛɖé, ɖó gbeta e un ɖe tɔ́n ɔ́, un ɖɔ bó tɛ afɔ jí.

⁹Ényí mi ma ɖɔ dlɔ̌ ɔ́ nú mì ǎ ɔ́, hwɛ e un ná ɖó nú mi ɔ́, mɛɖé ná hwe ɖ'é mɛ ǎ. Mi ɖo tagbesɔ yi wɛ, bó ná jɛ adingban ɖó nú mì jí, bó ná jɛ awo ɖó nú mì jí, káká bɔ nǔ lɛ́ɛ bǐ ná húzú. Mi bó yá wǔ ɖɔ dlɔ̌ e un kú ɔ́ nú mì, cóbónú má tunwun ɖɔ mi hɛn ɔ́, mi ná ná tínmɛ tɔn mì.”

¹⁰Azɔnɖatɔ́ lɛ́ɛ yí gbe nú axɔ́sú ɔ́ ɖɔ: “Mɛ ɖěbǔ ɖo gbɛ ɔ́ mɛ bó ná sixú ɖɔ nǔ e ba wɛ axɔ́sú ɔ́ ɖe ɔ́ ǎ. Axɔ́sú ɖěbǔ ná bó syɛ́n bó ɖó acɛ gbɔn ɖěbǔ ɔ́, é ná byɔ́ nǔ mɔ̌hunkɔtɔn majíkiblótɔ́, abǐ azětɔ́, abǐ azɔnɖatɔ́ ɖěbǔ kpɔ́n ǎ.

¹¹Nǔ e ba wɛ axɔ́sú ɔ́ ɖe ɔ́ dín gbě, bɔ mɛ ɖěbǔ sixú ná ɛ tínmɛ tɔn ǎ; vodún jɛ́n é ná nyí; vodún lɛ́ɛ sín nɔtɛn ɖíe ma ka ɖo gbɛtɔ́ lɛ́ɛ mɛ ǎ e.”

¹²Ée yě ɖɔ mɔ̌ ɔ́, axɔ́sú ɔ́ sin xomɛ bó bɛ́ adǎn, bó ná gbe ɖɔ è nǐ hu nǔnywɛ́tɔ́[1] e ɖo Babilɔ́nu lɛ́ɛ bǐ,

¹³bɔ è jlǎ gbɔn fí bǐ ɖɔ è nǎ hu nǔnywɛ́tɔ́ lɛ́ɛ. Hǔn Daniyɛ́li kpó hǎgbɛ́ tɔn lɛ́ɛ kpó ɔ́, è nǎ hu yě lɔ.

¹⁴Alyɔki sɔ́ja e nɔ cɔ́ axɔ́sú ɔ́ lɛ́ɛ sín gǎn ɔ́ xwe nǔnywɛ́tɔ́ e ɖo Babilɔ́nu lɛ́ɛ hu gbé, bɔ Daniyɛ́li sɔ́ ayi dó ɖɔ xó n'i kpó sísí kpó.

¹⁵É kanbyɔ́ ɛ ɖɔ étɛ́wú gbeta e axɔ́sú ɔ́ ɖe tɔ́n ɔ́ ka syɛ́n sɔ mɔ̌ a jí, bɔ Alyɔki tín nǔ e wú wɛ ɔ́ mɛ n'i.

¹⁶Ée Daniyɛ́li se xó ɔ́ é ɔ́, é sɔ́ nǔ tlóló, bó yi mɔ axɔ́sú ɔ́, bó sa vo n'i ɖɔ é ní nɔ te kpɔ́n émí kpɛɖé nú émí ná wá tín nǔ e sín dlɔ̌ e é kú ɔ́ mɛ n'i.

¹⁷Énɛ́ ɔ́ gúdo ɔ́, Daniyɛ́li lɛ́ kɔ wá yi xwé gbe, bó wlí xó ɔ́ ɖɔ nú hǎgbɛ́ tɔn Hananiya, Micaɛ́li kpó Azalya kpó,

¹⁸lobo ɖɔ nú yě ɖɔ yě ní byɔ́ nǔbláwǔkúnúmɛ Mawu tɔn sín sɛ́xwé, nú Mawu ní ɖe dlɔ̌ mamɔdoná énɛ́ ɔ́ xlɛ́ émí, bónú è ma wá hu émí kpó nǔnywɛ́tɔ́ Babilɔ́nu tɔn lɛ́ɛ kpó ó.

¹⁹Énɛ́ ɔ́, Mawu ɖe nǔbúdo énɛ́ ɔ́ xlɛ́ Daniyɛ́li ɖo dlɔ̌ mɛ, bɔ Daniyɛ́li jɛ Mawu sɛ́xwé tɔn ɔ́ mlá jí,

²⁰bó nɔ́ ɖɔ: “Mi nú mǐ ná dó kú nú Mawu káká sɔ́yi É wɛ ɖó nǔnywɛ́, bó ɖó acɛ.

²¹É wɛ nɔ́ húzú hwenu lɛ́ɛ. É wɛ nɔ́ húzú nǔ e ɖo jijɛ wɛ lɛ́ɛ. É wɛ nɔ́ ɖe axɔ́sú sín gǎnzinkpo jí. É wɛ nɔ́ zé mɛ axɔ́sú. É wɛ nɔ́ ná nǔnywɛ́ nǔnywɛ́tɔ́ lɛ́ɛ. É wɛ nɔ́ ná nukúnnú-mɔjɛnǔmɛ nukúnnú-mɔjɛnǔmɛtɔ́ lɛ́ɛ.

²²É wɛ nɔ́ ɖe nǔbúdo e ɖo hwlǎhwlá lɛ́ɛ xlɛ́. É tunwun nǔ e ɖo zǐnflú mɛ lɛ́ɛ, wěziza ɔ́, gɔ̌n tɔn wɛ é ɖe.

²³Mawu tɔ́gbó ce lɛ́ɛ tɔn, un ɖo susu kpa nú we wɛ. Un ɖo mlǎmlá we wɛ, ɖó nǔnywɛ́ kpó hlɔ̌nhlɔ́n kpó e a nǎ mì ɔ́ wú, ɖó nǔ e mǐ byɔ́ we ɔ́, a ɖe xlɛ́ mǐ.”

²⁴Ée Daniyɛ́li kpa susu nú Mawu fó ɔ́, é ɖidó Alyɔki gɔ́n. Alyɔki ɔ́ wɛ axɔ́sú ɔ́ ná gbe ɖɔ é ní hu nǔnywɛ́tɔ́ e ɖo Babilɔ́nu lɛ́ɛ. Ée Daniyɛ́li wá Alyɔki gɔ́n tlóló ɔ́, é ɖɔ n'i ɖɔ: “Ma hu nǔnywɛ́tɔ́ e ɖo Babilɔ́nu lɛ́ɛ ó! Wǎ kplá mì yi axɔ́sú ɔ́ gɔ́n, bónú má tín dlɔ̌ e é kú ɔ́ mɛ n'i.”

²⁵Ée Alyɔki se mɔ̌ ɔ́, é kplá Daniyɛ́li yi axɔ́sú ɔ́ gɔ́n tlóló bó ɖɔ: “Sɛ́mɛɖó, un mɔ mɛ ɖokpó ɖo mɛ e è wlǐ sín Judáa lɛ́ɛ mɛ, bɔ é ná tín dlɔ̌ e mɛ kú ɔ́ mɛ nú mɛ.”

²⁶Axɔ́sú ɔ́ yí xó, bó kanbyɔ́ Daniyɛ́li e è sun nyǐ ɖɔ Bɛluticasáa ɔ́ ɖɔ: “A sixú ɖɔ dlɔ̌ e un kú ɔ́, bó tínmɛ nú mì a?”

²⁷Daniyɛ́li yí gbe nú axɔ́sú ɔ́ ɖɔ: “Sɛ́mɛɖó, nǔ e búdo dó mɛ ɔ́, mɛ ɖěbǔ sixú tínmɛ nú mɛ ǎ. Nǔnywɛ́tɔ́ lɛ́ɛ, majíkiblótɔ́ lɛ́ɛ, nǔkantɔ́ lɛ́ɛ, azɔnɖatɔ́ lɛ́ɛ ɖěbǔ sixú tínmɛ nú mɛ ǎ.

²⁸Amɔ̌, Mawu ɖokpó ɖo sɛ́xwé, bó nɔ́ ɖe nǔbúdo lɛ́ɛ xlɛ́ mɛ. Axɔ́sú Nabukodonɔzɔ́ɔ, Mawu énɛ́ ɔ́ wɛ ná ɖɔ nǔ e ná jɛ sɔ ɔ́ nú mɛ. Din ɔ́, nǔ e è mɔ ɖo dlɔ̌ mɛtɔn mɛ ɔ́ ɖíe:

²⁹Sɛ́mɛɖó, hwenu e mɛ ɖo adɔ̌zan mɛtɔn jí ɔ́, mɛ ɖo nǔ lin sɛ́ dó nukɔn mɛ wɛ, bɔ mɛ e nɔ ɖe nǔbúdo lɛ́ɛ xlɛ́ mɛ ɔ́ xlɛ́ mɛ nǔ e ná wá jɛ sɔ gúdo é.

³⁰É nyí nǔnywɛ́ ce hú gǎn gbɛtɔ́ e ɖo gbɛ lɛ́ɛ bǐ tɔn wú wɛ Mawu ɖe nǔbúdo élɔ́ xlɛ́ mì ǎ; lo ɔ́, mɛɖé ná tín dlɔ̌ ɔ́ mɛ nú mɛ bó ná ɖɔ nǔ e ɖo ayi mɛtɔn mɛ ɔ́ nú mɛ wú wɛ.

³¹Sɛ́mɛɖó, mɛ ɖo nǔ kpɔ́n wɛ bó mɔ bǒcyɔ ɖaxó ɖokpó; bǒcyɔ ɔ́ sɔ́ avɔ ɖésú; ɖɛkpɛ tɔn vɛ́ jlɛ́. Bǒcyɔ ɔ́ ɖo te nukɔn mɛtɔn, bɔ ninɔmɛ tɔn jí wǔ.

³²Ta tɔn nyí siká akú; akɔ́nnu tɔn kpó awa tɔn lɛ́ɛ kpó nyí kpatágan; adɔgo tɔn kpó asá tɔn lɛ́ɛ kpó nyí ganvɔ.

³³Zǎkɛ́tɛ́ tɔn lɛ́ɛ nyí gan. Afɔkpákpá tɔn lɛ́ɛ fí ɖě nyí gan bɔ fí ɖě nyí ko.

³⁴Bǒcyɔ ɔ́ kpɔ́n wɛ mɛ ɖe, bɔ awǐnnya ɖé nɔ yǎyá, bó blí sín dɔ̌n bó wá xo bǒcyɔ ɔ́ dó afɔkpákpá e fí ɖě nyí gan, bɔ fí ɖě nyí ko é, bɔ yě gba hánnyá.

³⁵Đo nukúnxwixwe ɖokpó mɛ ɔ́, gan e ɖ'é mɛ é, ko e ɖ'é mɛ é, ganvɔ e ɖ'é mɛ é, kpatágan e ɖ'é mɛ é, kpó siká e ɖ'é mɛ é kpó bǐ gúdú, bó húzú afúntúntún, bɔ jɔhɔn d'alɔ mɛ bó dɔn yi lě e è ɖo jinukún fún wɛ ɔ́, jɔhɔn nɔ d'alɔ wɔn tɔn mɛ é ɖɔhun. Bǒcyɔ ɔ́, è sɔ́ mɔ wǔjɔnú tɔn ɖěbǔ ǎ. Awǐnnya e ká wá xo bǒcyɔ ɔ́ húzú só ɖaxó bó cyɔ́n ayǐkúngban ɔ́ bǐ.

³⁶“Sɛ́mɛɖó, dlɔ̌ e mɛ kú ɔ́ nɛ́. Din ɔ́, tínmɛ tɔn ká ɖíe:

³⁷Mɛ wɛ kpa acɛ nú axɔ́sú lɛ́ɛ bǐ. Mawu sɛ́xwé tɔn ná axɔ́súɖuɖu mɛ, bó ná acɛ mɛ, bó ná hlɔ̌nhlɔ́n mɛ, bó ná susu mɛ.

³⁸É sɔ́ gbɛtɔ́ kpó kanlin kpó, kpódó xɛ kpó ɖó acɛ mɛtɔn mɛ. Yě ɖo fí ɖěbǔ ɔ́, mɛ wɛ ɖo gǎn yětɔn nyí wɛ. Hǔn Sɛ́mɛɖó, mɛ wɛ nyí ta e è sɔ́ siká dó bló é.

³⁹Nú axɔ́súɖuto mɛtɔn wá yi ɔ́, axɔ́súɖuto ɖěvo ná wá; é ká ná ɖó acɛ sɔ mɛtɔn ǎ. Axɔ́súɖuto atɔngɔ́ ɔ́ ná wá, bó ná gba kpé ayǐkúngban ɔ́ bǐ jǐ. Axɔ́súɖuto énɛ́ ɔ́ wɛ ɖo ganvɔ ɔ́ nyí wɛ.

⁴⁰Axɔ́súɖuto ɛnɛgɔ́ ɔ́ ná jɛ fínɛ́; éyɛ́ ná syɛ́n ɖi gan. Lě e è nɔ zé gan dó gba nǔ hánnyá, bó nɔ li bɔ é nɔ́ mɛ́ kpɔ́ɖɔ́kpɔ́ɖɔ́ ɔ́ ɖɔhun wɛ axɔ́súɖuto énɛ́ ɔ́ ná gba, bó ná li axɔ́súɖuto e jɛ nukɔn n'i lɛ́ɛ bǐ[2].

⁴¹Lě e mɛ ko mɔ gbɔn ɔ́, bǒcyɔ ɔ́ sín afɔkpákpá lɛ́ɛ, kpó afɔví tɔn lɛ́ɛ kpó ɔ́, ko ɖě gan ɖě wɛ. É ɖo ɖiɖe xlɛ́ wɛ ɖɔ axɔ́súɖuto ɔ́ sín gbe kún ná nɔ kpɔ́ ó. Axɔ́súɖuto énɛ́ ɔ́ ná ɖó nǔɖé, bɔ nǔ ɔ́ ná syɛ́n gan ɖɔhun, ɖó mɛ ɖésúnɔ mɔ ɖɔ gan kpó ko kpó wɛ ɖo bǔ.

⁴²Ée afɔví lɛ́ɛ ɖě nyí gan, bɔ ɖě nyí ko, bɔ yě bǐ ká ɖo bǔ ɔ́, énɛ́ ɖo ɖiɖe xlɛ́ wɛ ɖɔ axɔ́súɖuto ɔ́ akpá bǔ ná dó hlɔ̌nhlɔ́n, bó syɛ́n gan ɖɔhun, bɔ akpá bǔ ná vɔ́ da.

⁴³Xlɛ́ tɔn lɛ́ɛ ka ná syɛ́n ǎ. Lě e gan kpó ko kpó má nɔ́ nɔ bǔ ǎ é ɖɔhun jɛ́n ná cí.

⁴⁴Axɔ́sú énɛ́ lɛ́ɛ sín hwenu ɔ́, Mawu sɛ́xwé tɔn ná ɖe axɔ́súɖuto e mɛɖé má sixú gba ǎ é ɖokpó tɔ́n. Acɛkpikpa tɔn ná jɛ akɔta ɖěvo sí gbeɖé ǎ. Axɔ́súɖuto énɛ́ ɔ́ ná gba axɔ́súɖuto e ko ɖo ayǐ lɛ́ɛ bǐ, bó ná hu acɛ nú yě, bɔ yě sɔ́ ná tíin nyǐ ǎ. Lo ɔ́, éyɛ́ ná nɔ te káká sɔ́yi.

⁴⁵Nǔ e nyí wɛ awǐnnya e mɛɖé ma sɛ́ dó ǎ, bɔ é nɔ́ yǎyá, bó gosín só jí, bó wá gba gan kpó ganvɔ kpó, ko kpó kpatágan kpó, kpódó siká kpó e è dǒ bló bǒcyɔ ɔ́ ná lɛ́ɛ é nɛ́. Sɛ́mɛɖó ce, Nǔ e ɖo ná jɛ wɛ é wɛ Mawu ɖaxó bǐ ɔ́ ɖe xlɛ́ mɛ. Dlɔ̌ titewungbe wɛ mɛ kú, bɔ tínmɛ e é ɖó tawun ɔ́ jɛ́n un ɖɔ nú mɛ nɛ́.”

⁴⁶Bɔ axɔ́sú Nabukodonɔzɔ́ɔ xwe agbɔ̌nnusú do ɖo Daniyɛ́li sá mɛ, bó ɖe kɔ́, bó sɔ́ ɛ su, bó zɔ́n ɖɔ è nǐ sá vɔ̌ n'i, bó ná ɛ nǔsáwǔ.

⁴⁷Bó ká ɖɔ nú Daniyɛ́li ɖɔ: “Mawu mitɔn hú gǎn vodún lɛ́ɛ bǐ nǔgbó; é wɛ nyí Aklúnɔ axɔ́sú lɛ́ɛ tɔn. É ɖokpó jɛ́n nɔ ɖe nǔbúdo lɛ́ɛ xlɛ́ mɛ; ɖó é bló din bɔ dlɔ̌ élɔ́ e mɛ un má mɔ nǔ jɛ ǎ ɔ́, a kpé wú bó tínmɛ nú mì.”

⁴⁸Énɛ́ ɔ́ gúdo ɔ́, axɔ́sú ɔ́ sɔ́ Daniyɛ́li su, bó ná ɛ nǔ ɖagbe ɖagbe gěgé. É sɔ́ Daniyɛ́li tokpɔngán ɖo tokpɔn Babilɔ́nu tɔn nu. É lɛ́ sɔ́ gǎn Daniyɛ́li bɔ é kpa acɛ dó nǔnywɛ́tɔ́ e ɖo Babilɔ́nu lɛ́ɛ bǐ nu.

⁴⁹Daniyɛ́li byɔ́ axɔ́sú ɔ́ ɖɔ é ní zé Cadlaki kpó Mɛcáki kpó, kpódó Abɛ́di-Nɛgó kpó ɖó nǔjíkpɔ́ntɔ́ sín tɛnmɛ ɖo tokpɔn Babilɔ́nu tɔn mɛ. É ká zé Daniyɛ́li bɔ é húzú nǔnywɛ́námɛtɔ́ ɖo axɔ́sú ɔ́ sín agba jí.