Read fon Daniyɛ́li 3 Bible Online

Daniyɛ́li 3 - fon bible

Daniyɛ́li 3

¹Axɔ́sú Nabukodonɔzɔ́ɔ zɔ́n sikábócyɔ ɖokpó. Ga tɔn yi nǔjlɛ́kpo gban (30) mɔ̌, gbló tɔn yi nǔjlɛ́kpo atɔn mɔ̌. É sɔ́ bǒcyɔ ɔ́ yi ɖó Dula sín tɔdomɛ, ɖo tokpɔn Babilɔ́nu tɔn mɛ.

²Axɔ́sú ɔ́ sɛ́ wɛn dó tokpɔnjíkpɔ́ntɔ́ lɛ́ɛ, nǔjíkpɔ́ntɔ́ lɛ́ɛ, tokpɔngán lɛ́ɛ, hwɛɖɔtɔ́ ɖaxó ɖaxó lɛ́ɛ, akwɛ́hɛntɔ́ lɛ́ɛ, nǔkplɔ́nmɛtɔ́ lɛ́ɛ, hwɛɖɔtɔ́ kpɛví kpɛví lɛ́ɛ, kpódó axɔ́súzɔ́watɔ́ ɖaxó ɖaxó e ɖo tokpɔn ɔ́ mɛ lɛ́ɛ kpó. Axɔ́sú ɔ́ ylɔ́ yě bónú yě ná wá nɔ te, bɔ é ná hun bǒcyɔ e é tun te ɔ́ xlɛ́ mɛ bǐ.

³Azɔ̌watɔ́ ɖaxó ɖaxó énɛ́ lɛ́ɛ wá kplé ɖo bǒcyɔ ɔ́ nukɔn, bó ná nɔ nǔwiwa ɔ́ tɛnmɛ.

⁴Gǎn e ɖo nǔwiwa ɔ́ nu ɔ́ zé gbe yi jǐ, bó sú xó bó ɖɔ: “Atóógbe! Mɛ bǐ ní ɖó tó mì! O togun e wá fí é, akɔta e wá fí é, mɛ e nyí mɛ bó nɔ dó gbe alɔkpa ɖěbǔ é bǐ ní ɖó tó mì.

⁵Hwenu e mi ná se ahwankpɛn, kpete, kanhún kpó nǔxonú alɔkpa alɔkpa bǐ kpó ɖo gbe jɛ wɛ ɔ́, mɛ bǐ ná jɛ kpo ɖo sikábócyɔ e axɔ́sú Nabukodonɔzɔ́ɔ tun te ɔ́ sá mɛ, bó ɖe kɔ́.

⁶Mɛ e ma ná jɛ kpo bó ɖe kɔ́ nú sikábócyɔ ɔ́ ǎ ɔ́, è nǎ zé e nyi dó myɔkpó e mɛ myɔ hɛhɛ ɖo jiji ɖe wɛ é mɛ ɖo fí din tlóló.

⁷“Énɛ́ ɔ́ wú wɛ hwenu e togun e ɖo fínɛ́ lɛ́ɛ, akɔta e ɖo fínɛ́ lɛ́ɛ, mɛ e nɔ dó gbe tɛnmɛ tɛnmɛ ɖo fínɛ́ lɛ́ɛ se ahwankpɛn, kpete, kanhún kpó nǔxonú alɔkpa alɔkpa bǐ kpó sín gbe é ɔ́, gǎn kpó ahwan kpó bǐ jɛ kpo bó ɖe kɔ́ nú sikábócyɔ e axɔ́sú ɔ́ tun te é.”

⁸Nǔwiwa ɔ́ ɖo fífó wɛ kɛ́ɖɛ́, bɔ Babilɔ́nunu ɖé lɛ́ɛ wá slɛ́ Jwifu lɛ́ɛ nú axɔ́sú ɔ́.

⁹Yě yí xó bó ɖɔ nú axɔ́sú Nabukodonɔzɔ́ɔ ɖɔ: “Sɛ́mɛɖó, jidɔ́ mɛtɔn ní nyí káká.

¹⁰Mɛ ɖésú wɛ ɖe gbeta tɔ́n ɖɔ: ‘Mɛ ɖěbǔ se ahwankpɛn, kpete, kanhún, kpó nǔxonú alɔkpa alɔkpa kpó sín gbe ɔ́, é ná jɛ kpo bó ɖe kɔ́ nú bǒcyɔ e è sɔ́ sikánú dó bló é.

¹¹Nú mɛɖé ma ka jɛ kpo bó ɖe kɔ́ ná ǎ ɔ́, è nǎ zé mɛ ɔ́ nyi dó myɔkpó e mɛ zo hɛhɛ ɖe ɔ́ mɛ.’

¹²Lo ɔ́, Jwifu ɖé lɛ́ɛ tíin, bɔ mɛ zé yě nǔjíkpɔ́ntɔ́ ɖo Babilɔ́nu. Yě wɛ nyí Cadlaki kpó Mɛcáki kpó, kpódó Abɛ́di-Nɛgó kpó. Nya énɛ́ lɛ́ɛ nɔ́ sɛn vodún mɛtɔn lɛ́ɛ ǎ; yě ká nɔ ɖe kɔ́ nú bǒcyɔ e mɛ tun te ɔ́ ǎ.”

¹³Ée Nabukodonɔzɔ́ɔ se mɔ̌ ɔ́, xomɛ sin i ɖésú, bɔ é ɖo adǎn jí, lobo sɛ́ mɛ dó ɖɔ è nǐ kplá Cadlaki kpó Mɛcáki kpó, kpódó Abɛ́di-Nɛgó kpó wá nú émí. Ée è yi kplá yě wá ɔ́,

¹⁴axɔ́sú ɔ́ kanbyɔ́ yě ɖɔ: “Cadlaki, Mɛcáki, Abɛ́di-Nɛgó! Nǔgbó wɛ mi gbɛ́ ɖɔ émí kún ná sɛn vodún ce lɛ́ɛ ó a? Émí kún ka ná ɖe kɔ́ nú bǒcyɔ e un tun te é ó a?

¹⁵Din ɔ́, mi nɔ acéjí. Mi ná lɛ́ se ahwankpɛn, kpete, kanhún, kpó nǔxonú alɔkpa alɔkpa kpó sín gbe, lobo ná jɛ kpo bó ɖe kɔ́ nú bǒcyɔ ɔ́. Ényí mi ma ɖe kɔ́ ná ǎ ɔ́, è nǎ bɛ́ mi dó myɔkpó e mɛ myɔ ɖo jiji ɖe wɛ hɛhɛ é mɛ din tlóló, bɔ un ná kpɔ́n vodún e ná yí mi sín fɛn ce mɛ é.”

¹⁶Ée axɔ́sú ɔ́ ɖɔ mɔ̌ ɔ́, Cadlaki kpó Mɛcáki kpó, kpódó Abɛ́di-Nɛgó kpó yí gbe n'i ɖɔ: “Sɛ́mɛɖó, é byɔ́ ɖɔ mǐ ná ba hwɛjijɔ nú mǐɖée ǎ.

¹⁷Nǔ e mɛ ka ná tunwun ɔ́ wɛ nyí ɖɔ Mawu e mǐ nɔ́ sɛn ɔ́ ɖó acɛ bó ná hwlɛ́n mǐ gán. É ná ɖe mǐ sín myɔ mɛ, bó ná lɛ́ ɖe mǐ sín acɛ mɛtɔn mɛ.

¹⁸É ná bó ma ka jló e nú é ná hwlɛ́n mǐ gán ǎ ɔ́, axɔ́sú Sɛ́mɛɖó, tunwun ɖɔ mǐ kún ɖo vodún mɛtɔn lɛ́ɛ ná sɛn wɛ ó, mǐ kún ka ná ɖe kɔ́ nú bǒcyɔ e mɛ tun te ɔ́ ó.”

¹⁹Xó énɛ́ e axɔ́sú ɔ́ se ɔ́ lɛ́ dó xomɛsin n'i ɖésú, bɔ é húzú nukún mɛ dó Cadlaki kpó Mɛcáki kpó Abɛ́di-Nɛgó kpó jí. Énɛ́ ɔ́, é ná gbe ɖɔ è nǐ flɔ́ myɔ dó myɔkpó ɔ́ mɛ bónú é syɛ́n hú lě e é nɔ́ nɔ gbɔn ɖ'ayǐ é azɔn tɛ́nwe.

²⁰É ka zɔ́n sɔ́ja tɔn e kpan akɔ́n ganjí lɛ́ɛ ɖɔ yě ní blá Cadlaki, Mɛcáki kpódó Abɛ́di-Nɛgó kpó, nú è nǎ bɛ́ yě dó myɔkpó ɔ́ mɛ.

²¹Yě mɛ atɔn lɛ́ɛ bǐ ɖo gbagwé kpó cokoto kpó, kpó awu ɖaxó kpó, kpódó gbǎkún kpán mɛ mɔ̌, bɔ è blǎ yě, bó bɛ́ yě nyi dó myɔkpó ɔ́ mɛ.

²²È ka bɔ myɔ ɔ́ bɔ é syɛ́n titewungbe lě e axɔ́sú ɔ́ zɔ́n gbɔn é. Hwenu e sɔ́ja lɛ́ɛ xwe Cadlaki kpó Mɛcáki kpó, kpó Abɛ́di-Nɛgó kpó bɛ́ dó myɔ ɔ́ mɛ gbé ɔ́, myɔ ɔ́ slɔ́ yě bɔ yě kú.

²³Yě mɛ atɔn lɛ́ɛ ka ɖo blǎblá mɔ̌ bɔ è bɛ̌ yě nyi dó myɔkpó ɔ́ mɛ.

²⁴Xɛsi jɛ axɔ́sú Nabukodonɔzɔ́ɔ jí, bɔ é si te vawun bó kanbyɔ́ azaglɔ́gán tɔn lɛ́ɛ ɖɔ: “É ma nyí mɛ atɔn wɛ mǐ blá bó bɛ́ nyi dó zo ɔ́ mɛ a?” Azaglɔ́gán tɔn lɛ́ɛ yí gbe n'i ɖɔ: “Sɛ́mɛɖó! É jɛ́n nɛ́! Mɛ atɔn wɛ.”

²⁵Axɔ́sú ɔ́ lɛ́ ɖɔ: “Anhɛɛn nɛ́! Din ɔ́, un ka ɖo mɛ ɛnɛ mɔ ɖo zɔnlin ɖi wɛ ɖo myɔ ɔ́ mɛ. Yě ɖo kanmɛ ǎ, bó ɖo sa ɖi wɛ; myɔkpa ɖěbǔ ka ɖo yě wú ǎ. Mɛ ɛnɛgɔ́ ɔ́ ɖi nǔmɛsɛn sɛ́xwé tɔn lɛ́ɛ ɖě.”

²⁶Axɔ́sú Nabukodonɔzɔ́ɔ ka sɛkpɔ́ myɔkpó ɔ́, bó sú xó bó ɖɔ: “Cadlaki! Mɛcáki! Abɛ́di-Nɛgó! Mɛsɛntɔ́ Mawu Ajalɔ̌nlɔn tɔn lɛ́ɛ e mi! Mi tɔ́n bó wá!” Tlóló tɛn tɔn mɛ ɔ́, Cadlaki kpó Mɛcáki kpó, kpódó Abɛ́di-Nɛgó kpó tɔ́n sín myɔkpó ɔ́ mɛ.

²⁷Tokpɔnjíkpɔ́ntɔ́ lɛ́ɛ, nǔjíkpɔ́ntɔ́ lɛ́ɛ, tokpɔngán lɛ́ɛ, kpó azaglɔ́gán lɛ́ɛ kpó wá kplé dó yě, bó mɔ ɖɔ wǔtu yětɔn kún xo myɔkpa ó, ɖa yětɔn kún ka fyɔ́ kpɛví ɖé vɔ́vɔ́ ó. Nǔɖé wa awu yětɔn ǎ, yě hwɛ̌n azizɔ lɔ ǎ.

²⁸Bɔ axɔ́sú ɔ́ sú xó bó ɖɔ: “Susu nú Mawu Cadlaki kpó Mɛcáki kpó Abɛ́di-Nɛgó kpó tɔn. Mawu yětɔn sɛ́ wɛnsagun tɔn dó, bɔ é wá hwlɛ́n mɛsɛntɔ́ tɔn lɛ́ɛ gán, ɖó é wú wɛ yě gán jɛ, bó má se tónú nú gbeta e un ɖe tɔ́n é ǎ. Yě yí gbe nú wǔvɛ́mimɔ hú yě ní sɛn vodún, bó ɖe kɔ́ ná, lobo ná jó Mawu yětɔn dó.

²⁹Énɛ́ ɔ́ wú wɛ un ɖo gbeta élɔ́ ɖe tɔ́n wɛ: ‘Ényí mɛ ɖěbǔ tíin, mɛ ɔ́ sixú nyí togun ɖěbǔ mɛ nu, é sixú tɔ́n sín akɔta ɖěbǔ mɛ, é sixú nɔ dó gbe alɔkpa alɔkpa ɖěbǔ, bó ɖɔ xó nyanya ɖé dó Mawu Cadlaki kpó Mɛcáki kpó Abɛ́di-Nɛgó kpó tɔn wú gbeɖé ɔ́, è nǎ já mɛ énɛ́ ɔ́, bó ná gúdú xwé tɔn, bɔ é ná húzú zunkɔ́ta. Ɖó vodún ɖěbǔ ɖe bó ná sixú hwlɛ́n mɛ gán Mawu yětɔn ɖɔhun ǎ.’ ”

³⁰Ée axɔ́sú ɔ́ ɖɔ mɔ̌ ɔ́, é ba azɔ̌ ɖagbe ɖagbe ɖěvo nú Cadlaki kpó Mɛcáki kpó Abɛ́di-Nɛgó kpó ɖo Babilɔ́nu sín tokpɔn ɔ́ mɛ. Tɛn e mɛ axɔ́sú ɔ́ zé yě ɖó ɔ́ lɛ́ nyɔ́ hú ée mɛ yě ɖe ɖ'ayǐ é.

³¹Axɔ́sú Nabukodonɔzɔ́ɔ dó wɛn élɔ́ sɛ́ dó togun lɛ́ɛ bǐ, akɔta lɛ́ɛ bǐ, bɔ è dǒ wɛn ɔ́ dó gbe bǐ mɛ nú mɛ e ɖo ayǐkúngban jí lɛ́ɛ bǐ ní se. É ɖɔ: “Mawu ní ná fífá mi nú nǔ bǐ vɔ ɖ'é wú.

³²“Un mɔ din ɖɔ é nyɔ́ nú ma jlá nǔ e Mawu Ajalɔ̌nlɔn wa nú mì lɛ́ɛ kpódó nǔjíwǔ e é bló nú mì lɛ́ɛ kpó mi.

³³Nǔjíwǔ tɔn lɛ́ɛ d'agba lóóo! Nǔjíjlɛ́ tɔn lɛ́ɛ syɛ́n mɛ nya! Mawu énɛ́ ná ɖu axɔ́sú káká sɔ́yi. Acɛkpikpa tɔn ná ɖó dogbó gbeɖé ǎ.”