Read fon Daniyɛ́li 5 Bible Online

Daniyɛ́li 5 - fon bible

Daniyɛ́li 5

¹É wá su gbe ɖokpó, bɔ axɔ́sú Bɛlucasáa ylɔ́ agɔ̌ ɖaxó ɖokpó dó tozɔ́watɔ́ tɔn ɖaxó ɖaxó lɛ́ɛ tamɛ. Yě bǐ kplékplé yi afatɔ́n (1.000), bɔ axɔ́sú ɔ́ nu vɛ̌ɛn xá yě.

²Hwenu e é ɖo ahan nu wɛ ɔ́, é ná gbe ɖɔ è nǐ yi bɛ́ sikákɔ́fu kpó kpatágankɔ́fu kpó e tɔ́ émítɔn bɛ́ sín sinsɛnxɔ Jeluzalɛ́mu tɔn mɛ lɛ́ɛ é wá, ɖó é jló ɖɔ tozɔ́watɔ́ émítɔn lɛ́ɛ kpó asi émítɔn lɛ́ɛ kpó xɔ́ntɔn émítɔn lɛ́ɛ kpó ní nu ahan ɖo kɔ́fu énɛ́ lɛ́ɛ mɛ.

³È yi bɛ́ sikákɔ́fu e è bɛ̌ sín sinsɛnxɔ Mawu tɔn mɛ ɖo Jeluzalɛ́mu lɛ́ɛ wá, bɔ axɔ́sú ɔ́ má nú mɛ e é ylɔ́ lɛ́ɛ, bɔ yě bǐ nu ahan ɖ'é mɛ.

⁴Ée yě bǐ nu ahan ganjí ɔ́, yě jɛ han e yě nɔ́ dó kpa susu nú vodún yětɔn lɛ́ɛ é ji jí. Vodún yětɔn lɛ́ɛ ɔ́, è zě siká dó bló ɖě, bó zé kpatágan dó bló ɖě, bó zé ganvɔ dó bló ɖě, bó zé gan dó bló ɖě. È zě atín dó bló ɖě, bó zé awǐnnya dó bló ɖě.

⁵Hwenu e yě ɖo han ji wɛ ɔ́, è mɔ gbɛtɔ́ sín alɔ ɖokpó ɖo nǔ wlán dó ahohó e è sá nǔ wěwé dó ɔ́ wú wɛ, ɖo zogbɛ́nhɛnnú ɔ́ kpá. Axɔ́sú ɔ́ mɔ alɔ e ɖo nǔ wlán wɛ é.

⁶Ée é mɔ mɔ̌ ɔ́, é dɔn nukún mɛ nyɔ, bɔ ayi tɔn bǐ gbadó, bɔ alin tɔn kɛwun, bɔ koligó tɔn lɛ́ɛ ɖě nɔ́ xo dó ɖě wú.

⁷Énɛ́ ɔ́, é sú xó ɖɔ è nǐ yi ylɔ́ nǔkantɔ́ lɛ́ɛ, majíkiblótɔ́ lɛ́ɛ, azětɔ́ lɛ́ɛ kpó azɔnɖatɔ́ e ɖo Babilɔ́nu lɛ́ɛ bǐ kpó wá nú émí. Ée è yi ylɔ́ yě wá ɔ́, é ɖɔ nú nǔnywɛ́tɔ́ énɛ́ lɛ́ɛ ɖɔ: “Mɛ e ná xa nǔ e è wlǎn ɖó fínɛ́ ɔ́, bó ná tínmɛ nú mì ɔ́, un ná zé axɔ́súwu dó n'i, bó ná dó sikáwlɔ ɖokpó kɔ n'i, bó ná zé e ɖó tɛn atɔngɔ́ ɔ́ mɛ ɖo axɔ́súɖuto ce mɛ.”

⁸Nǔnywɛ́tɔ́ axɔ́sú ɔ́ tɔn lɛ́ɛ bǐ wá, mɛ ɖěbǔ ká ɖo yě mɛ bó sixú xa nǔ e è wlǎn ɔ́, bó ná tínmɛ nú axɔ́sú ɔ́ ǎ.

⁹Énɛ́ ɔ́, ado lɛ́ hu axɔ́sú Bɛlucasáa, bɔ é blá wǔ bǐ. Bɔ tozɔ́watɔ́ tɔn lɛ́ɛ lɔ sín ayi bǐ gbadó.

¹⁰Nyɔ̌nu axɔ́si ɔ́ se xó e sú wɛ axɔ́sú ɔ́ kpó tozɔ́watɔ́ tɔn lɛ́ɛ kpó ɖe ɔ́, lobo wá. É byɔ́ xɔ e sá ɖu agɔ̌ ɖe wɛ yě ɖe ɔ́, bó ɖɔ: “Sɛ́mɛɖó, jidɔ́ mɛtɔn ní nyí káká. È ma nú nǔ e lin wɛ mɛ ɖe lɛ́ɛ gba ayi dó nú mɛ ó. É byɔ́ ɖɔ mɛ ná dɔn nukún mɛ nyɔ sɔ mɔ̌ ǎ.

¹¹Nǔmɛsɛn mímɛ́ lɛ́ɛ sín yɛ ɖo nya ɖokpó jí ɖo axɔ́súɖuto mɛtɔn mɛ. Tɔ́ mɛtɔn hwenu ɔ́, nya ɖé wɛ, bó nɔ́ mɔ nukúnnú jɛ nǔ wú céɖécéɖé. É bí, bó ɖó nǔnywɛ́ nǔmɛsɛn ɖɔhun. Énɛ́ ɔ́ wú wɛ tɔ́ mɛtɔn sɔ́ ɛ gǎn, bɔ é kpa acɛ dó nǔkantɔ́ lɛ́ɛ, majíkiblótɔ́, azětɔ́ lɛ́ɛ, kpódó azɔnɖatɔ́ lɛ́ɛ kpó nu.

¹²Aziza e ɖo jǐ tɔn ɔ́ ko ɖo mɛɖé jí ǎ. É nɔ́ tunwun nǔ nyanya kpó nǔ ɖagbe kpó. É ɖó nǔnywɛ́, é nɔ́ tín dlɔ̌ mɛ nú mɛ; è so nǔ dó e ɔ́, é nɔ́ flɔ́n. É nɔ́ mɔ nǔbúdo bǐ bó nɔ́ ɖɔ. É nyɔ́ ɖɔ è nǐ yi ylɔ́ nya Daniyɛ́li énɛ́ e tɔ́ mɛtɔn sun nyǐ ɖɔ Bɛluticasáa ɔ́ wá fí din. É ná xa nǔ e è wlǎn ɖó fínɛ́ ɔ́ bó ná tínmɛ nú mɛ.”

¹³Nǔgbó ɔ́, è kplá Daniyɛ́li wá axɔ́sú ɔ́ gɔ́n, bɔ axɔ́sú ɔ́ kanbyɔ́ ɛ ɖɔ: “Hwi wɛ nyí Daniyɛ́li kannumɔ Jwifu e tɔ́ ce axɔ́sú ɔ́ kplá sín Judáa wá é a?

¹⁴Un se ɖɔ nǔmɛsɛn lɛ́ɛ sín yɛ ɖo jǐ we, bɔ a nɔ mɔ nukúnnú jɛ nǔ wú céɖécéɖé bó bí, bɔ nǔnywɛ́ e a ɖǒ ɔ́, gbɛtɔ́ ɖěbǔ ɖó ǎ.

¹⁵È ko kplá nǔnywɛ́tɔ́ lɛ́ɛ kpó majíkiblótɔ́ lɛ́ɛ kpó wá nú mì din, bónú yě ná xa nǔwlánwlán e mɔ wɛ a ɖe ɔ́, bó ná tínmɛ nú mì, yě mɛ ɖěbǔ ká kpé wú ǎ.

¹⁶Lo ɔ́, un se ɖɔ hwɛ ɔ́, a nɔ ɖɔ nǔsodómɛ lɛ́ɛ, bó nɔ́ mɔ nǔ jɛ nǔbúdo lɛ́ɛ wú. Ényí a sixú xa nǔwlánwlán élɔ́, bó tínmɛ nú mì ɔ́, un ná zé axɔ́súwu dó nú we, bó ná dó sikáwlɔ kɔ nú we.”

¹⁷Daniyɛ́li ka ɖɔ nú axɔ́sú ɔ́ ɖɔ: “Sɛ́mɛɖó, mɛ ní hɛn nǔ e ná ná mì wɛ mɛ ɖe lɛ́ɛ wú, é gló hǔn, mɛ ní ná mɛ ɖěvo. Amɔ̌, un ka ná xa nǔ e è wlǎn ɔ́, bó ná tínmɛ nú mɛ.

¹⁸Mawu Ajalɔ̌nlɔn ɔ́ sɔ́ tɔ́ mɛtɔn Nabukodonɔzɔ́ɔ ɔ́ axɔ́sú ɖaxó, bɔ susu kpó yɛ̌yi kpó kpé e.

¹⁹Susu énɛ́ e Mawu ná ɛ ɔ́ zɔ́n bɔ togun lɛ́ɛ bǐ, akɔta lɛ́ɛ bǐ, kpó mɛ e nɔ dó gbe tɛnmɛ tɛnmɛ lɛ́ɛ é kpó bǐ nɔ́ ɖi xɛsi n'i, bó nɔ́ sísɔ́ ɖo nukɔn tɔn. É nɔ́ ɖó kúhwɛ nú mɛ e jló e é, bó nɔ́ jó mɛ e jló e ɔ́ dó nyi gbɛ. Mɛ ɖé jló e ɔ́, é nɔ́ sɔ́ mɛ ɔ́ su, mɛɖé ká jló e ɔ́, é nɔ́ sɔ́ mɛ ɔ́ hwe.

²⁰Lo ɔ́, ée goyíyí kpó mɛmasí kpó byɔ́ ayi tɔn mɛ ɔ́, è ɖe e sín axɔ́súzinkpo ɔ́ jí, bó yí acɛ bǐ sín así tɔn.

²¹È nya ɛ sín gbɛtɔ́ lɛ́ɛ mɛ, bɔ é yi nɔ gběkanlin lɛ́ɛ tɛ́ntin, bó nɔ́ ɖu gběhan nyibú ɖɔhun; ahǔn nɔ́ ɖo jija dó jǐ tɔn wɛ. É nɔ mɔ̌ káká jɛ hwenu e é wá tunwun ɖɔ Mawu Ajalɔ̌nlɔn ɔ́ wɛ kpa acɛ dó axɔ́súɖuɖu gbɛtɔ́ tɔn lɛ́ɛ bǐ jí, bó nɔ́ sɔ́ axɔ́sú mɛ e jló e é.

²²Amɔ̌ hwɛ Bɛlucasáa ɔ́, vǐ tɔn wɛ a nyǐ, bó tunwun nǔ énɛ́ lɛ́ɛ bǐ, cóbó ká zé hwiɖée hwe ǎ.

²³A zě Aklúnɔ sɛ́xwé tɔn ɔ́ hwe, bó yi bɛ́ kɔ́fu e ɖo sinsɛnxɔ tɔn mɛ lɛ́ɛ, bɔ hwi kpó gbɛ̌ towe lɛ́ɛ kpó asi towe lɛ́ɛ kpó, kpó agalɛtɔ́ towe lɛ́ɛ kpó dó nu ahan ná, bɔ a nɔ ji han dó kpa susu nú vodún e è zě kpatágan dó bló ná lɛ́ɛ, ée è zě siká dó bló ná lɛ́ɛ, ée è zě ganvɔ dó bló ná lɛ́ɛ, ée è zě gan dó bló ná lɛ́ɛ, ée è zě atín dó bló ná lɛ́ɛ, kpó ée è zě awǐnnya dó bló ná lɛ́ɛ kpó. Vodún énɛ́ lɛ́ɛ ká nɔ mɔ nǔ ǎ, yě ká nɔ́ se xó ǎ, yě ká lɛ́ tunwun nǔ ɖěbǔ ǎ. A nɔ ɖo vodún énɛ́ lɛ́ɛ sɛn wɛ, bó nɔ́ gɔn susu kpa nú Mawu e sín alɔ mɛ funfún towe kpó nǔ e gbɛ towe ná nyí ɔ́ kpó ɖe é.

²⁴Nǔ e wú Mawu sɛ́ alɔ ɔ́ dó bɔ é wá wlán nǔ élɔ́ lɛ́ɛ ɔ́ nɛ́.

²⁵Nǔ e alɔ ɔ́ wlán lɛ́ɛ ɖíe, ɖǒ tó: ‘Mɛnɛ́ɛ, Mɛnɛ́ɛ, Tekɛli, Palusíin.’

²⁶Tínmɛ yětɔn lɛ́ɛ ɖíe, ɖǒ tó: ‘Mɛnɛ́ɛ’ ɔ́ sín tínmɛ nyí nǔlínlɛ́n. É ɖo ɖiɖɔ ɖo fínɛ́ wɛ ɖɔ Mawu lɛ̌n lě e a ɖu axɔ́sú gbɔn ɔ́ lobo ɖó axɔ́súɖuɖu towe te.

²⁷‘Tekɛli’ ɔ́ sín tínmɛ nyí gandida. É ɖo ɖiɖɔ ɖo fínɛ́ wɛ ɖɔ è sɔ́ we ɖó nǔdagan jí lobo da, bó mɔ ɖɔ a kún da gan ó.

²⁸‘Palusíin’ ɔ́ sín tínmɛ nyí nǔmímá. É ɖo ɖiɖɔ ɖo fínɛ́ wɛ ɖɔ è mǎ axɔ́súɖuto ɔ́ nú Mɛdinu lɛ́ɛ kpó Pɛ́sinu lɛ́ɛ kpó.”

²⁹ Bɛlucasáa nɔ tɛn e mɛ é se nǔwlánwlán ɔ́ sín tínmɛ ɖe é, bó ná gbe mɛsɛntɔ́ tɔn lɛ́ɛ ɖɔ è nǐ zé axɔ́súwu dó nú Daniyɛ́li, bó zé sikáwlɔ dó kɔ n'i, lobo jlá ɖɔ Daniyɛ́li wɛ nyí mɛ e ɖo zinkpo atɔngɔ́ ɔ́ jí ɖo axɔ́súɖuto ɔ́ mɛ é.

³⁰Gbe énɛ́ gbe zǎn mɛ ɔ́, è hu axɔ́sú Babilɔ́nu tɔn Bɛlucasáa.