Read fon Daniyɛ́li 6 Bible Online

Daniyɛ́li 6 - fon bible

Daniyɛ́li 6

¹Daliwúsi Mɛdinu ɔ́ ɖo xwe kanɖé ko-nukún-we (62) ɖó wɛ, bó yi gǎn jí.

²Daliwúsi mɔ ɖɔ é nyɔ́ ɖɔ émí ní má axɔ́súɖuto émítɔn ɖó do kantɔn (120), lobo ná sɔ́ tokpɔngán ɖó ɖokpó ɖokpó nu, bónú yě ná sɔ́ acɛkpikpa émítɔn sín afɔ ɖó te gbɔn tokpɔn lɛ́ɛ mɛ.

³É lɛ́ cyán gǎn nǔjíkpɔ́ntɔ́ atɔn ɖó tokpɔngán lɛ́ɛ nu. Yě wɛ tokpɔngán lɛ́ɛ ná nɔ ɖó azɔ̌ e yě wa ɔ́ sín gbe ná. É bló mɔ̌ bónú mɛɖé ma wá hɛn axɔ́sú ɔ́ sín nǔ ɖěbǔ gblé ó. Daniyɛ́li lɔ ɖo gǎn atɔn e axɔ́sú ɔ́ cyán lɛ́ɛ mɛ.

⁴Daniyɛ́li ka ɖo nukɔn nú mɛ we ɖě lɛ́ɛ ɖo nǔnywɛ́ lixo, ɖó yɛ e ɖo jǐ tɔn ɔ́ syɛ́n ɖésú, bɔ axɔ́sú ɔ́ ɖo linlin wɛ ná sɔ́ ɛ ɖó axɔ́súɖuto ɔ́ bǐ nu.

⁵Din ɔ́, gǎn we ɖě lɛ́ɛ kpó tokpɔngán lɛ́ɛ kpó jɛ nǔ e wú yě ná ɖó dó, bó ná dɔn toxó ɖé dó kɔ nú Daniyɛ́li ɔ́ ba jí, yě ká mɔ ali tɔn ǎ, é ká dó nǔɖé sin ǎ, ɖó é ɖo gbejí, bɔ è nɔ mɔ vɛ̌dónúnǔ sín walɔ ɖé ɖo así tɔn ǎ; é ká wa nǔɖé nyi do ǎ.

⁶Din ɔ́, yě ɖɔ: “Mǐ mɔ nǔ e wú mǐ ná ɖó dó bó dó hwɛ Daniyɛ́li ɔ́ ɖěbǔ ǎ. Ényí mǐ ná mɔ nǔɖé din ɔ́, Mawu e é nɔ́ sɛn ɔ́ sín sɛ́n lixo jɛ́n mǐ nǎ ba ɖe.”

⁷Ée yě ɖɔ mɔ̌ ɔ́, yě ɖidó kpódó zǐngídi kpó, bó yi mɔ axɔ́sú ɔ́, bó ɖɔ n'i ɖɔ: “Axɔ́sú Daliwúsi, jidɔ́ mɛtɔn ní nyí káká.

⁸Mǐ mɛ gǎn e ɖo axɔ́súɖuto ɔ́ mɛ lɛ́ɛ bǐ: Nǔjíkpɔ́ntɔ́ lɛ́ɛ, tokpɔnjíkpɔ́ntɔ́ lɛ́ɛ, nǔnywɛ́námɛtɔ́ lɛ́ɛ kpó tokpɔngán lɛ́ɛ kpó bǐ kplé, bó ɖó gbe kpɔ́ ɖɔ mɛ ní ɖe gbeta ɖokpó tɔ́n, bó jlá gbɔn to ɔ́ bǐ mɛ, bó ɖɔ syɛ́nsyɛ́n ɖɔ sín égbé káká yi azǎn gban (30) gbe ɔ́, mɛ ɖěbǔ xomlá nǔmɛsɛn ɖěbǔ, abǐ gbɛtɔ́ ɖěbǔ, bɔ é má nyí mɛ Sɛ́mɛɖó ɔ́ wɛ è xomlá ǎ ɔ́, è nǎ sɔ́ mɛ énɛ́ nyi dó kinnikínnído mɛ.

⁹Din ɔ́, Sɛ́mɛɖó, mɛ ní bó yí gbe nú gbeta ɔ́, bó dó alɔ mɛ bónú é ná cí Mɛdinu lɛ́ɛ kpó Pɛ́sinu lɛ́ɛ kpó sɛ́n e mɛɖé má nɔ́ húzú ǎ é ɖɔhun.”

¹⁰Énɛ́ ɔ́, axɔ́sú Daliwúsi ɖe gbeta ɔ́ tɔ́n, bó dó sɛ́n ɔ́.

¹¹Ée Daniyɛ́li se ɖɔ gbeta mɔ̌hun tɔ́n ɔ́, é yi xwé tɔn gbe, bó yi xɔ e ɖo aga é mɛ, bó hun flɛtɛ́li lɛ́ɛ dó Jeluzalɛ́mu sín awa jí. É jɛ kpo ɖo fínɛ́, bó xo ɖɛ, bó mlá Mawu tɔn. É bló mɔ̌ azɔn atɔn ɖo kéze ɔ́ mɛ, lě e é kó nɔ́ bló gbɔn ɖ'ayǐ é.

¹²Đɛ xo wɛ é ɖe, bó ɖo Mawu tɔn xomlá wɛ, bɔ kɛntɔ́ lɛ́ɛ wá byɔ́ xɔ ɔ́ mɛ kpó zǐngídi kpó, bó gbo e dó.

¹³Yě yi mɔ axɔ́sú ɔ́, bó ɖɔ n'i ɖɔ: “Sɛ́mɛɖó, mɛ ma dó sɛ́n ɖɔ mɛ ɖěbǔ xomlá nǔmɛsɛn ɖěbǔ, abǐ gbɛtɔ́ ɖěbǔ bɔ é ma nyí mɛ ɖésúnɔ ɔ́ wɛ è xomlá ǎ ɔ́, è ɖǒ ná sɔ́ mɛ ɔ́ nyi dó kinnikínnído mɛ ǎ cé?” Axɔ́sú ɔ́ yí gbe nú yě ɖɔ: “Gbeta e tɔ́n e nɛ́ mi ɖɔ pɛ́pɛ́pɛ́ nɛ́. É ná cí Mɛdinu lɛ́ɛ kpó Pɛ́sinu lɛ́ɛ kpó sɛ́n e mɛɖé ma nɔ́ húzú ǎ é ɖɔhun.”

¹⁴Ée yě se mɔ̌ ɔ́, yě ɖɔ: “Éénɛ́! Sɛ́mɛɖó, mɛ e nyí Daniyɛ́li ɖo mɛ e ahwan wlí sín Judáa tomɛ lɛ́ɛ mɛ ɔ́ ké ya ɖěbǔ nú mɛ ǎ, é ka sí gbeta e mɛ ɖe tɔ́n é ǎ, ɖó azɔn atɔn wɛ é nɔ́ xomlá Mawu tɔn ɖo kéze ɖokpó mɛ.”

¹⁵Ée axɔ́sú ɔ́ se mɔ̌ ɔ́, wǔ kú i ɖésú, bɔ é ɖɔ dó ayi mɛ ɖɔ émí ná hwlɛ́n Daniyɛ́li gán, bó ɖo lě e é ná wa gbɔn ɔ́ lin wɛ káká bɔ hwe yi xɔ.

¹⁶Daniyɛ́li kɛntɔ́ lɛ́ɛ zɔn adǎn jí, bó wá mɔ axɔ́sú ɔ́ bó ɖɔ: “Sɛ́mɛɖó, mɛ tunwun ganjí ɖɔ Mɛdinu lɛ́ɛ kpó Pɛ́sinu lɛ́ɛ kpó sín sɛ́n ɖɔhun wɛ sɛ́n e mɛ dó ɔ́ kpó gbeta e mɛ ɖe tɔ́n ɔ́ kpó cí, bɔ mɛɖé nɔ́ húzú ǎ.”

¹⁷Énɛ́ ɔ́, axɔ́sú ɔ́ ná gbe bɔ è yi kplá Daniyɛ́li, bó sɔ́ ɛ nyi dó kinnikínnído mɛ. Axɔ́sú ɔ́ ɖɔ nú Daniyɛ́li ɖɔ: “Mawu e wú a nɔ ɖó kan dó, bó nɔ́ sɛn ɔ́ ní hwlɛ́n we gán.”

¹⁸È zě awǐnnya ɖokpó wá ɖó do ɔ́ nu, bɔ axɔ́sú ɔ́ ɖó wuntun tɔn jí. Tozɔ́watɔ́ lɛ́ɛ lɔ ɖó wuntun yě lɔ tɔn jí, bónú mɛɖé ma húzú nǔ e ná jɛ dó Daniyɛ́li jí é ó.

¹⁹Énɛ́ ɔ́ gúdo ɔ́, axɔ́sú ɔ́ yi hɔnmɛ bó gbɛ́ nǔ ɖu, bó dɔ́ xovɛ́. Adɔ̌ vɛ́ ɛ, bɔ é lɛ́ gbɛ́ ayiɖeɖayǐ nú mɛ sín nǔ bǐ.

²⁰Axɔ́sú ɔ́ fɔ́n zǎn fuu, bó ɖidó kinnikínnído ɔ́ kɔn.

²¹Hwenu e axɔ́sú ɔ́ ɖo do ɔ́ sɛkpɔ́ wɛ ɔ́, é ylɔ́ Daniyɛ́li wǔbláwúblá, bó ɖɔ: “Daniyɛ́li mɛsɛntɔ́ Mawu gbɛɖe ɔ́ tɔn! Mawu towe e wú a ɖǒ kan dó bó nɔ́ sɛn ɔ́ ká kpé wú bó hwlɛ́n we gán sín kinnikínní lɛ́ɛ sín fɛn mɛ din a?”

²²Daniyɛ́li yí gbe nú axɔ́sú ɔ́ bó ɖɔ: “Sɛ́mɛɖó, jidɔ́ mɛtɔn ní nyí káká.

²³Mawu ce sɛ́ wɛnsagun tɔn dó, bɔ é wá sú kinnikínní lɛ́ɛ sín nu, bɔ yě wa nǔɖé nú mì ǎ, ɖó un jɛ agɔ ɖé dó Mawu ce ǎ, un ka jɛ do dó mɛ lɔmɔ̌ ǎ.”

²⁴Ée axɔ́sú ɔ́ se mɔ̌ ɔ́, xomɛ hun i ɖésú, bɔ é ɖɔ è nǐ ɖe Daniyɛ́li tɔ́n sín do ɔ́ mɛ. È ɖe Daniyɛ́li tɔ́n; è ka mɔ akpa ɖěbǔ ɖo wǔ tɔn ǎ, ɖó é ɖó nǔɖiɖi nú Mawu tɔn, bó ɖeji dó wǔ tɔn.

²⁵Axɔ́sú ɔ́ ná gbe ɖɔ è nǐ yi wlí mɛ e wá slɛ́ Daniyɛ́li lɛ́ɛ wá; ée è wlǐ yě ɔ́, è bɛ̌ yě kpó asi yětɔn lɛ́ɛ kpó, kpó vǐ yětɔn lɛ́ɛ kpó nyi dó kinnikínnído ɔ́ mɛ. Yě ná jɛ do ɔ́ mɛ kpó nǎ gbɔ kpó ɔ́, kinnikínní lɛ́ɛ zɔn yě jí, bó gba xú yětɔn lɛ́ɛ bǐ.

²⁶Ée axɔ́sú Daliwúsi bló mɔ̌ ɔ́, é wlán sɛ́ dó togun lɛ́ɛ bǐ, akɔta lɛ́ɛ bǐ kpó mɛ e nɔ dó gbe alɔkpa alɔkpa ɖo gbɛ ɔ́ mɛ lɛ́ɛ kpó ɖɔ: “Fífá ní nɔ kpɔ́ xá mi bó túnflá!

²⁷“Un ná gbe ɖɔ mɛ e ɖo axɔ́súɖuto ce sín ayǐkúngban jí lɛ́ɛ bǐ ní ɖó sísí nú Mawu Daniyɛ́li tɔn, bó ɖi xɛsi n'i. É wɛ nyí Mawu gbɛɖe ɔ́. É wɛ ná nɔ ayǐ tɛgbɛ sɔ́yi. Axɔ́súɖuɖu tɔn ná vɔ gbeɖé ǎ. Acɛkpikpa tɔn ná nɔ ayǐ káká sɔ́yi.

²⁸É wɛ nɔ hwlɛ́n mɛ gán, bó nɔ ɖe mɛ sín mɛ kannu. É wɛ nɔ jlɛ́ nǔ tɛnmɛ tɛnmɛ lɛ́ɛ, bó nɔ́ bló nǔdábaɖa lɛ́ɛ ɖo jǐxwé kpódó dodomɛ kpó. Mawu énɛ́ ɔ́ wɛ yí Daniyɛ́li sín kinnikínní lɛ́ɛ sín fɛn mɛ.”

²⁹Daniyɛ́li ɖésú wá mɔ tɛnmɛ ɖaxó ɖokpó ɖo axɔ́súɖuɖu Daliwúsi tɔn mɛ, bó lɛ́ mɔ ɖo Silúsi tokpɔngán Pɛ́si tɔn sín axɔ́súɖuɖu mɛ.