Read fon Daniyɛ́li 7 Bible Online

Daniyɛ́li 7 - fon bible

Daniyɛ́li 7

¹Xwe e xwe axɔ́sú Babilɔ́nu tɔn Bɛlucasáa yi zinkpo jí ɔ́, Daniyɛ́li mlɔ ayǐ ɖo zan jí, bó kú dlɔ̌, bó mɔ nǔ tɛnmɛ tɛnmɛ ɖo amlɔ mɛ. Ée é yá ɔ́, é wlán dlɔ̌ e é kú ɔ́, bó xa nǔ tají tají e é mɔ ɖo amlɔ mɛ lɛ́ɛ.

²Nǔ e Daniyɛ́li wlán lɛ́ɛ ɖíe: “Zǎn mɛ ɔ́, un ɖo amlɔ mɛ, bó mɔ jɔhɔn jɛ nyinyi jí sín wɛ̌kɛ́zo ɛnɛ lɛ́ɛ mɛ, bó nɔ́ nyi dó xu ɖaxó ɔ́ jí.

³ Kanlin ɖaxó ɛnɛ tɔ́n sín xu ɔ́ mɛ; kanlin lɛ́ɛ ɖě gbɔn vo nú ɖě.

⁴ Kanlin nukɔntɔn ɔ́ cí kinnikínní ɖɔhun, bó ka ɖó gangan sín awa. Hwenu e un ɖo kpínkpɔ́n ɛ wɛ ɔ́, è sun awa tɔn lɛ́ɛ síin bó sɔ́ ɛ sí te ɖo afɔ tɔn gǔdo tɔn we lɛ́ɛ jí, bɔ é ɖo te gbɛtɔ́ ɖɔhun, bó ɖó gbɛtɔ́ sín ayi.

⁵Kanlin wegɔ́ ɔ́ cí lɔnmɔ ɖɔhun. É ɖo tɔ́tɔ́, bɔ ajajaxú atɔn ɖo nu tɔn mɛ, bɔ é tɛ aɖǔ jí. È ná ɛ gbe ɖɔ é ní jlɔ́ bǐ bó yi ɖu lan gěgé.

⁶Ée un lɛ́ ɖo kpínkpɔ́n wɛ ɔ́, un mɔ kanlin ɖěvo bɔ é cí kpɔ ɖɔhun. É ɖó xɛ sín awa ɛnɛ ɖo nɛgbé, bó lɛ́ ɖó ta ɛnɛ. È ná ɛ acɛ bɔ é ná ɖu ɖo nǔ bǐ jí.

⁷ Un lɛ́ ɖo nǔ e mɔ wɛ un ɖe ɖo zǎn mɛ ɔ́ kpɔ́n wɛ. Kanlin ɛnɛgɔ́ e un mɔ ɔ́ dó xɛsi bó hu ado. Hlɔ̌nhlɔ́n e ɖo wǔtu tɔn ɔ́ vɛ́ jlɛ́. Ganɖú ɖaxó ɖaxó wɛ ɖo nu tɔn mɛ bɔ é nɔ dó ɖu nǔ ná, bó nɔ́ zé dó vúnvún nǔ e é nɔ́ wlí lɛ́ɛ ná. É nɔ́ gbídí nǔ e é ma nɔ ɖu ǎ lɛ́ɛ ɖó afɔ wú. Kanlin énɛ́ ɔ́ gbɔn vo nú atɔn ɖě lɛ́ɛ sésé, bó lɛ́ ɖó zo wǒ.

⁸ Hwenu e un ɖo zo tɔn lɛ́ɛ kpɔ́n wɛ ɔ́, zo yɔ̌yɔ́ kpɛví ɖěvo lɛ́ jɛ wǔwú jí ɖó ɖě lɛ́ɛ tɛ́ntin, lobo zin zo xóxó lɛ́ɛ atɔn dɛ́. Zo yɔ̌yɔ́ ɔ́ ɖó gbɛtɔ́ nukún. É ɖó nu ɖokpó bɔ goyíyíxó nɔ́ ɖo tíntɔ́n sín mɛ wɛ.”

⁹ Un kpó ɖo nǔ e mɔ wɛ un ɖe ɔ́ kpɔ́n wɛ, bó mɔ axɔ́súzinkpo ɖé lɛ́ɛ ɖo te, bɔ degénɔ kpikpoe ɖokpó wá jínjɔ́n ayǐ. Awu e é dó lɛ́ɛ wé lawé ɖɔhun. Đa e ɖo ta tɔn lɛ́ɛ cí fɛ́ɖɛ́fɛ́ɖɛ́ avɔkanfún ɖɔhun. Axɔ́súzinkpo tɔn nɔ́ kán zo bɔ afɔ tɔn lɛ́ɛ nɔ́ kɔ́n zo hɛhɛ ɖɔhun.

¹⁰ Myɔtɔ nɔ tɔ́n bó nɔ ɖo sisa wɛ ɖo nukɔn tɔn. Gbɛtɔ́ wɔ̌blíba ɖo te nukɔn tɔn bó ná sɛn ɛ. Hwɛɖɔtɔ́ lɛ́ɛ wá jínjɔ́n ayǐ, bɔ è hun wěma ɖé lɛ́ɛ nyi wɛn.

¹¹Goyíyíxó baɖabaɖa e ɖɔ wɛ zo ɔ́ ɖe ɔ́ wú wɛ un ɖo nǔ e mɔ wɛ un ɖe ɔ́ kpɔ́n wɛ. Hwenu e un ka ɖo kpínkpɔ́n ɛ wɛ ɔ́, è hu kanlin ɛnɛgɔ́ ɔ́, bó zé e nyi dó myɔ ɖaxó ɖé mɛ bó fyɔ́ ɛ.

¹²Kanlin ɖě lɛ́ɛ e kpo ɔ́ sɔ́ ɖó acɛ ɖěbǔ ǎ. Amɔ̌, è to jó yě dó nyi gbɛ káká jɛ hwe ɖé nu.

¹³ Un ɖo nǔ e mɔ wɛ un ɖe zǎn ɔ́ mɛ ɖo amlɔ mɛ ɔ́ kpɔ́n wɛ, bó mɔ nǔ gbɛtɔ́ ɖɔhun ɖé ɖo akpɔ́kpɔ́ mɛ jǎwe. É ɖidó degénɔ e nukɔn è kplá ɛ xwe ɔ́ gɔ́n.

¹⁴ È ná ɛ acɛkpikpa kpó susu kpó, kpódó axɔ́súɖuɖu kpó, bónú togun lɛ́ɛ, akɔta lɛ́ɛ kpódó gbɛtɔ́ e nɔ dó gbe alɔkpa alɔkpa lɛ́ɛ kpó bǐ ná sɛn ɛ. Acɛkpikpa tɔn nyí acɛkpikpa ɖé, bó ná nɔ ayǐ káká sɔ́yi; é ná ɖó vivɔnu ǎ, mɛɖé ká ná sixú gba axɔ́súɖuto tɔn gbeɖé ǎ.

¹⁵“Nyɛ Daniyɛ́li ɔ́, ayi ce bǐ gbadó, bɔ nǔ e mɔ wɛ un ɖe lɛ́ɛ dó xɛsi nú mì.

¹⁶Un sɛkpɔ́ mɛ e ɖo fínɛ́ lɛ́ɛ ɖokpó, lobo kan nǔ e ɖɔ wɛ nǔ e mɔ wɛ un ɖe lɛ́ɛ ɖe tawun ɔ́ byɔ́ ɛ. É ɖɔ nú mì bó lɛ́ tínmɛ nú mì.

¹⁷É ɖɔ nú mì ɖɔ: ‘Kanlin ɖaxó ɛnɛ lɛ́ɛ ɔ́, axɔ́sú ayǐkúngban jí tɔn ɛnɛ sín xlɛ́ wɛ.

¹⁸ Axɔ́sú ɛnɛ énɛ́ lɛ́ɛ wá yi ɔ́, togun mímɛ́ Mawu Ajalɔ̌nlɔn ɔ́ tɔn ná wá ɖu axɔ́sú, bó ná nɔ axɔ́súɖuto ɔ́ nu káká yi mavɔ mavɔ.’

¹⁹Énɛ́ ɔ́ gúdo ɔ́, un kan nǔ byɔ́ dó kanlin ɛnɛgɔ́ ɔ́ wú, bó ná mɔ nukúnnú jɛ wǔ tɔn tawun, ɖó éyɛ́ gbɔn vo nú atɔn ɖě lɛ́ɛ. É dó xɛsi bɔ é vɛ́ jlɛ́. Aɖǔ tɔn lɛ́ɛ nyí gan, fɛn tɔn lɛ́ɛ nyí ganvɔ. Kanlin e é nɔ́ wlí lɛ́ɛ ɔ́, é nɔ ɖu ɖě, bó nɔ́ vúnvún ɖě, bó nɔ́ gbídí ée kpo lɛ́ɛ ɖó afɔ wú.

²⁰Un lɛ́ kan nǔ byɔ́ dó zo wǒ e ɖo ta tɔn lɛ́ɛ wú, bó lɛ́ ba do nú zo e jɛ wǔwú jí, bó zin zo ɖěvo atɔn dɛ́ é. Zo énɛ́ ɔ́ e wú ɔ́ ɖó nukún, bó ɖó nu, bɔ goyíyíxó kɛ́ɖɛ́ jɛ́n nɔ́ tɔ́n sín mɛ. Zo énɛ́ kló hú zo ɖě lɛ́ɛ.

²¹ Ée un ɖo kpínkpɔ́n ɛ wɛ ɔ́, un mɔ ɛ bɔ é ɖo ahwan fun xá togun mímɛ́ Mawu Ajalɔ̌nlɔn ɔ́ tɔn wɛ, bó ɖo ɖuɖu ɖ'é jí wɛ.

²² Lo ɔ́, degénɔ kpikpoe ɔ́ wá, bó mɔ hwɛjijɔ nú togun mímɛ́ Mawu Ajalɔ̌nlɔn ɔ́ tɔn. Ée hwe ɔ́ nu wá su ɔ́, togun mímɛ́ ɔ́ wá yí axɔ́súɖuto ɔ́.

²³“Tínmɛ e é ná mì dó kanlin ɛnɛgɔ́ ɔ́ wú ɔ́ ɖíe: ‘Kanlin ɛnɛgɔ́ ɔ́ wɛ nyí axɔ́súɖuto ayǐkúngban jí tɔn ɛnɛgɔ́ ɔ́. Axɔ́súɖuto énɛ́ ɔ́ gbɔn vo nú ɖě lɛ́ɛ bǐ. É ná vúnvún nǔ e ɖo ayǐkúngban ɔ́ jí lɛ́ɛ bǐ. É ná gbídí yě, bó ná gba yě hánnyá.

²⁴ Zo tɔn wǒ lɛ́ɛ nyí axɔ́sú wǒ e ná kpa acɛ ɖo axɔ́súɖuto énɛ́ ɔ́ mɛ lɛ́ɛ sín xlɛ̌. Axɔ́sú wǒ-ɖokpógɔ́ ɔ́ ná wá, bó ka ná gbɔn vo nú ɖě lɛ́ɛ. Éyɛ́ ná zin axɔ́sú atɔn dɛ́, bó ná kpa acɛ.

²⁵ É ná nylá nu dó Mawu Ajalɔ̌nlɔn ɔ́ wú, bó ná nɔ dó ya nú togun mímɛ́ ɔ́. É ná lin ná húzú togun mímɛ́ ɔ́ sín tito lɛ́ɛ, kpódó sɛ́n tɔn lɛ́ɛ kpó; togun mímɛ́ ɔ́ ná nɔ acɛ tɔn mɛ nú xwe atɔn adaɖé.

²⁶Énɛ́ ɔ́ gúdo ɔ́, hwɛɖiɖɔ sɛ́xwé tɔn ɔ́ ná wá, bó ná yí acɛkpikpa tɔn, bó ná sú kún tɔn dó, bɔ é sɔ́ ná tíin nyǐ gbeɖé ǎ.

²⁷ Axɔ́súɖuto e ɖo ayǐkúngban ɔ́ jí lɛ́ɛ bǐ sín axɔ́súɖuɖu kpó acɛkpikpa kpó, kpódó susu yětɔn kpó ná húzú togun mímɛ́ Mawu Ajalɔ̌nlɔn tɔn ɔ́ tɔn. Togun mímɛ́ ɔ́ ná ɖu axɔ́sú káká yi mavɔ mavɔ, bɔ hlɔ̌nhlɔ́n e ɖo gbɛ ɔ́ mɛ lɛ́ɛ bǐ ná nɔ acɛ tɔn mɛ, bó ná nɔ́ se tónú n'i, bó ná nɔ́ sɛn ɛ.’

²⁸“Dlɔ̌ ɔ́ fó dó fí. Amɔ̌, nyɛ Daniyɛ́li ɔ́, ayi ce nɔ ɖo hun xo xá mì wɛ, bɔ un blá wǔ bǐ, bó nɔ́ ɖo nǔ lin dó xó énɛ́ lɛ́ɛ wú wɛ ɖo gbɛmɛ.”