Read fon Ozée 11 Bible Online

Ozée 11 - fon bible

Ozée 11

¹ Mawu Mavɔmavɔ ɖɔ: “Hwenu e Izlayɛ́li ɖo vǔ ɔ́, un yí wǎn n'i. Un ylɔ́ vǐ súnnu ce sín Ejípu.”

²Lo ɔ́, yě nɔ́ hɔn yi zɔ nú mɛ e ɖo yě ylɔ́ wɛ lɛ́ɛ. Yě sá vɔ̌ nú vodún Baalu, bó dó zǎlínkpɔ́n zo nú bǒcyɔ lɛ́ɛ.

³Nyɛ wɛ ka hɛn Eflayímunu lɛ́ɛ sín alɔ, bó kplɔ́n yě zɔnlin ɖiɖi. Lo ɔ́, yě tunwun ɖɔ nyɛ wɛ ɖo nukún kpé dó émí wú wɛ ǎ.

⁴Un kplá yě kpó yɛ̌yi kpó; wǎn yíyí dɔn nyɛ kpó yě kpó ɖó kpɔ́ gɛdɛ ɖɔhun. Vǐtɔ́ e nɔ dɔn vǐ tɔn dó wǔ é ɖɔhun wɛ un cí nú yě. Un ná nǔɖuɖu yě.

⁵Togun Izlayɛ́li tɔn ɔ́ ná lɛ́ kɔ yi Ejípu ǎ; lo ɔ́, Asilíi wɛ ná kpa acɛ n'i. Đó é gbɛ́ ɖɔ émí kún ná lɛ́ kɔ wá gɔ̌n ce ó.

⁶Énɛ́ ɔ́ wú wɛ ahwanfunfun ná syɛ́n ɖo toxo yětɔn ɖaxó ɖaxó lɛ́ɛ mɛ, bó ná sú kún dó nú nǔ e wú yě gǎn jɛ lɛ́ɛ, bó ná vɔ nǔ lɛ́ɛ bǐ, ɖó tito yětɔn lɛ́ɛ wú.

⁷Togun ce jɛ kú ɖɔ émí ná nɔ zɔ nú mì. È ylɔ̌ ɛ ɖɔ ní lɛ́ kɔ wá nyɛ Ajalɔ̌nlɔn ɔ́ gɔ́n, yě mɛ ɖěbǔ ká se ǎ.

⁸ “Eflayímu e, nɛ̌ un ná wa nǔ towe gbɔn? Izlayɛ́li e, un ná jó we dó wɛ a? Nǔ e un wa xá Adima toxo ɔ́ wɛ un ná wa xá we a? Lě e un ɖó Sevoyímu toxo ɔ́ nyi ɔ́ wɛ un ná ɖó we nyi a? Ayi ce ɖo hun xo xá mì wɛ. Nǔ towe ɖo wǔ blá nú mì wɛ.

⁹Un ná zé xomɛ ɖaxó e un sin ɔ́ dó wa nǔ xá we ǎ. Eflayímu, un sɔ́ ná sú kún towe dó ǎ. Đó Mawu wɛ un nyí, un nyí gbɛtɔ́ ǎ. Mawu mímɛ́ wɛ un nyí ɖo tɛ́ntin towe. Un ná wá kpó xomɛsin kpó ǎ.

¹⁰Vǐ ce lɛ́ɛ ná xwedó nyɛ Mawu Mavɔmavɔ ɔ́; un ná dó gbe kinnikínní ɖɔhun dó ylɔ́ yě bɔ yě ná kán wezun sín xu mɛ wá.

¹¹Yě ná kán wezun sín Ejípu wá xɛ ɖɔhun. Yě ná kán wezun sín Asilíi wá ahwannɛ́ ɖɔhun. Un ná kplá yě ɖó xwé yětɔn lɛ́ɛ gbe.” Mawu Mavɔmavɔ wɛ ɖɔ mɔ̌.