Read fon Ozée 14 Bible Online

Ozée 14 - fon bible

Ozée 14

¹È nǎ dɔn tó nú Samalíinu lɛ́ɛ ɖó yě fɔ́n gǔ dó Mawu yětɔn jí. Ahwan ná gba yě; è nǎ hu vǐ yětɔn lɛ́ɛ bó ná zɛ nyɔ̌nu yětɔn e ɖo xo lɛ́ɛ.

²Izlayɛ́linu lɛ́ɛ mi, mi lɛ́ kɔ wá Mawu Mavɔmavɔ, Mawu mitɔn gɔ́n, ɖó hwɛ e mi hu lɛ́ɛ zɔ́n bɔ mi jɛ ayǐ.

³Mi lɛ́ kɔ wá Mawu Mavɔmavɔ gɔ́n, bó ɖɔ n'i ɖɔ: “Sɔ́ hwɛ mǐtɔn lɛ́ɛ bǐ kɛ mǐ, bó yí mǐ ganjí. É sɔ́ ná nyí nyibúsú wɛ mǐ ná nɔ́ dó sá vɔ̌ nú we ǎ, nu mǐtɔn wɛ mǐ ná nɔ́ dó kpa susu nú we.

⁴Asilíinu lɛ́ɛ wɛ ná sixú hwlɛ́n mǐ gán ǎ. Mǐ sɔ́ ná nɔ́ xá ahwansɔ́ jí ɖě ǎ. Mǐ sɔ́ ná nɔ́ ylɔ́ nǔ e mǐ sɔ́ alɔ mǐ ɖésúnɔ tɔn dó bló lɛ́ɛ ɖě ɖɔ Mawu mǐtɔn ǎ, ɖó hwi wɛ nɔ kú nǔbláwǔ nú tɔ́cyɔvǐ lɛ́ɛ.”

⁵Mawu Mavɔmavɔ ɖɔ: “Un ná sɔ́ afɔ e Izlayɛ́linu lɛ́ɛ dó gbě ɔ́ kɛ yě. Un ná yí wǎn nú yě titewungbe. Đó un sɔ́ ná sin xomɛ dó yě ǎ.

⁶Un ná cí ahǔn ɖɔhun nú Izlayɛ́linu lɛ́ɛ, yě ná gba sɛ́ folówa e è nɔ ylɔ́ ɖɔ lǐi ɔ́ ɖɔhun. Yě ná dó ɖɔ do Libáan sín atín lɛ́ɛ ɖɔhun.

⁷Ala yětɔn lɛ́ɛ ná vun. Yě ná nyɔ́ ɖɛkpɛ olívutín ɖɔhun, bó ná ɖe wǎn ɖagbe atín e ɖo Libáan lɛ́ɛ ɖɔhun.

⁸Mɛ ce lɛ́ɛ ná lɛ́ kɔ wá nɔ awa ce glɔ́. Yě ná lɛ jinukún gle, yě ná gba kún vǐwuntín ɖɔhun. Vɛ̌ɛn yětɔn ná nyɔ́ Libáan sín vɛ̌ɛn ɖɔhun.

⁹Ani wɛ Eflayímunu lɛ́ɛ kpó vodún lɛ́ɛ kpó kpé dó? Nyɛ wɛ nɔ yí gbe nú ɖɛ e xo wɛ yě ɖe ɔ́, bó ná cyɔ́n alɔ yě jí. Nyɛ ɔ́, siplɛ́tín ɖɔhun wɛ un cí, bó nɔ ɖo mǔ hwebǐnu[7]. Nyɛ wɛ nɔ zɔ́n bɔ yě nɔ́ mɔ jinukún.”

¹⁰Mɛ e ɖó nǔnywɛ́ ɔ́ ní ɖó ayi xó énɛ́ lɛ́ɛ jí. Mɛ e nɔ yá wǔ mɔ nukúnnú jɛ nǔ mɛ ɔ́ ní mɔ nukúnnú jɛ wú, ɖó Mawu Mavɔmavɔ sín ali lɛ́ɛ jlɔ́. Mɛ e nɔ wa nǔ jlɔ́jlɔ́ lɛ́ɛ ná nɔ́ gbɔn jí, mɛ e nɔ fɔ́n gǔ lɛ́ɛ ká ná jɛ ayǐ.