Read fon Ozée 2 Bible Online

Ozée 2 - fon bible

Ozée 2

¹ É ɖo mɔ̌ có Izlayɛ́li ví lɛ́ɛ ná sukpɔ́ káká bó ná cí xuta nyɛ́kɛ́n ɖɔhun; è nɔ sixú jlɛ́ xuta nyɛ́kɛ́n ǎ, è ka nɔ sixú xa ǎ. Énɛ́ ɔ́, Mawu sɔ́ ná ɖɔ nú yě ɖɔ yě kún sɔ́ nyí togun émítɔn ó ǎ, é nyɔ́ wa ɔ́, é ná ɖɔ nú yě ɖɔ yě nyǐ Mawu gbɛɖe ɔ́ sín vǐ.

²Judáanu lɛ́ɛ kpódó Izlayɛ́linu lɛ́ɛ kpó ná kplé bó ná sɔ́ gǎn ɖokpó, bó ná kpa acɛ nú to ɔ́. Đó azǎn ɖaxó ɖé wɛ Izleyɛ́li sín azǎn ɔ́ ná nyí.

³Mi ɖɔ nú nɔví mitɔn súnnu lɛ́ɛ ɖɔ Ami, togun ce, bó ɖɔ nú nɔví mitɔn nyɔ̌nu lɛ́ɛ ɖɔ Hluxáma, wǎnyínámɔ!

⁴Mawu Mavɔmavɔ ɖɔ: “Mi dó hwɛ Izlayɛ́li nɔ mitɔn ɔ́, mi dó hwɛ ɛ, ɖó é sɔ́ nyí asi ce ǎ, nyɛ lɔ ka sɔ́ nyí asú tɔn ǎ. É ní ɖe aga wuntun e ɖo nukún tɔn mɛ ɔ́ síin, bó ɖe aga wuntun e ɖo anɔ̌ tɔn jí ɔ́ síin.

⁵É má nyí mɔ̌ ǎ ɔ́, un ná ɖe e nyi mɛ̌, un ná ɖe e nyi mɛ̌ jɔgbe. Un ná sɔ́ ɛ dó húzú gbětótló, un ná sɔ́ ɛ dó húzú axéko, un ná ɖó sinnugblá n'i káká, bɔ é ná wɛ́n vɛ̌.

⁶Un ná kú nǔbláwǔ nú vǐ tɔn lɛ́ɛ ǎ, ɖó agaví wɛ yě nyǐ.

⁷Nɔ yětɔn lɛ aga, mɛ e hɛn xo yětɔn ɔ́ kɔ́n wi éɖée tɔn, ɖó é ɖɔ: ‘Un ná yi ba xɔnnɔ ce lɛ́ɛ mɔ. Đó yě wɛ nɔ́ ná mì nǔɖuɖu kpó sin kpó, gbɔ̌fúnvɔ kpó akwɛ́núvɔ kpó, ami kpó ahan kpó.’ ”

⁸Énɛ́ ɔ́ wú wɛ nyɛ Mawu Mavɔmavɔ ɔ́, un ná bɛ́ wunkan dó gbo ali n'i, un ná mɛ dǒ lɛ́ lɛ̌ dó e, bɔ é sɔ́ ná mɔ ali bó tɔ́n ǎ.

⁹É ná kán wezun jɛ xɔnnɔ tɔn lɛ́ɛ gúdo, é ká ná xwedó yě wú ǎ. É ná ba yě, é ká ná mɔ yě ǎ. Énɛ́ ɔ́ gúdo ɔ́, é ná ɖɔ: “Un ná lɛ́ kɔ yi asú ce xóxó ɔ́ gɔ́n, ɖó hwenu e un ɖo gɔ̌n tɔn ɔ́, nǔ nyɔ́ nú mì hú lě e un ɖe gbɔn égbé din é.”

¹⁰É tunwun ɖɔ nyɛ wɛ nɔ ná émí jinukún, kpó vɛ̌ɛn yɔ̌yɔ́ kpó, kpódó ami kpó ɖ'ayǐ ǎ. Bɔ kpatágan kpó siká kpó e un nɔ ná ɛ ɔ́, é nɔ́ fɔ ná vodún Baalu.

¹¹Énɛ́ ɔ́ wú wɛ un ná yí jinukún ce sín así tɔn ɖo nǔkún-yiya hwenu, bó ná yí vɛ̌ɛn ce sín así tɔn vǐwun gbigbɛ hwenu. Un ná ɖe gbɔ̌fúnvɔ ce kpó akwɛ́núvɔ ce kpó sín wǔ tɔn; gbɔ̌fúnvɔ kpó akwɛ́núvɔ kpó e é dó hwlá mɛ̌ é.

¹²Din ɔ́, un ná ɖe nǔ e hwlá wɛ é ɖe ɔ́ xlɛ́ to, ɖo xɔnnɔ tɔn lɛ́ɛ nukún mɛ, bɔ mɛ ɖěbǔ ná yí i sín alɔ ce mɛ ǎ.

¹³Un ná ɖó awǎ e jɛ wɛ é ɖe ɔ́ bǐ te. Xwe e ɖu wɛ é ɖe lɛ́ɛ, sunwájǐxwe e ɖu wɛ é ɖe lɛ́ɛ, gbɔjɛzán e ɖu wɛ é ɖe lɛ́ɛ, kpódó agɔ̌ e ɖu wɛ é ɖe lɛ́ɛ bǐ kpó ɔ́, un ná ɖó bǐ te.

¹⁴Un ná sú vǐwungbo tɔn lɛ́ɛ kpó fígitín tɔn lɛ́ɛ kpó kún dó; énɛ́ lɛ́ɛ wɛ nyí nǔ e xɔnnɔ tɔn lɛ́ɛ ná ɛ é, bɔ é nɔ́ ɖɔ: “Nǔ e xɔnnɔ ce lɛ́ɛ ná mì lɛ́ɛ nɛ́. Un ná sɔ́ nǔ énɛ́ lɛ́ɛ dó húzú zunkan, bɔ gběkanlin lɛ́ɛ ná nɔ́ wá ɖu nǔ ɖo fínɛ́.

¹⁵Un ná dɔn tó n'i nú azǎn nabí e é dó zǎlínkpɔ́n zo nú vodún Baalu lɛ́ɛ xɔ é; un ná dɔn tó n'i nú azǎn nabí e é dó alɔkɛ́ kpó kɔjɛ́ kpó dó ba acɔ́ ná xɔ é, azǎn nabí e é ba acɔ́ ná bó yi ba xɔnnɔ tɔn lɛ́ɛ mɔ, bó wɔn mì xɔ é.

¹⁶Énɛ́ ɔ́ wú wɛ un ná dó yɛ ɛ, bó ná kplá ɛ yi gbětótló mɛ, bó ná sɔ́ gbe fífá dó ɖɔ xó n'i.

¹⁷ Un ná sɔ́ vǐwungbo tɔn lɛ́ɛ kpó adǎngbomɛ tɔdo ɔ́ kpó jó n'i ɖo fínɛ́, bɔ é ná nyí nukúnɖíɖó sín hɔn ɖé bó hun n'i. É ná jɛ han ji jí sín fínɛ́, lě e é kó nɔ́ ji gbɔn ɖo ɖyɔ̌vǐ mɛ é, lě e é kó nɔ́ ji gbɔn hwenu e é gosín Ejípu é.”

¹⁸Mawu Mavɔmavɔ ɖɔ: “Gbe énɛ́ ɔ́ gbe ɔ́, a nǎ ylɔ́ mì ɖɔ: ‘Asú ce!’ A sɔ́ ná nɔ ylɔ́ mì ɖɔ: ‘Gǎn ce’ ǎ.

¹⁹Un ná yí vodún Baalu kpó vodún ɖě lɛ́ɛ kpó nyǐkɔ sín nu towe, bɔ è sɔ́ ná nɔ́ ylɔ́ nyǐkɔ yětɔn ɖě ǎ.

²⁰Gbe énɛ́ ɔ́ gbe ɔ́, un ná bló bɔ yě ná jɛ akɔ xá gběkanlin lɛ́ɛ, kpó xɛ lɛ́ɛ kpó, kpódó kanlin e nɔ sá gbɔn kɔ́ mɛ lɛ́ɛ kpó. Un ná bɛ́ gǎ kpó hwǐ kpó, kpódó ahwanfunnú bǐ kpó sín to ɔ́ mɛ, bó ná bló bɔ togun ce ná dɔ́ amlɔ bo vo.

²¹Un ná da we bɔ a nǎ nyí asi ce káká sɔ́yi. Agban e un ná ná nú we ɔ́ ɖíe: un ná wa nǔ ɖó sɛ́nxwi jí nú we, un ná wa nǔ ɖó hwɛjijɔ jí nú we, un ná yí wǎn nú we, un ná ɖó xomɛfífá dó wǔtu towe.

²²Un ná da we lě e un dó akpá tɔn nú we gbɔn é. Énɛ́ ɔ́, a nǎ tunwun ɖɔ nyɛ wɛ nyí Mawu Mavɔmavɔ.

²³Gbe énɛ́ ɔ́ gbe ɔ́, mi ná mɔ ɖɔ nyɛ Mawu Mavɔmavɔ nɔ́ yí ɖɛ. Un ná ná nǔ e ba wɛ jǐxwé ɖe lɛ́ɛ jǐxwé, bɔ jǐxwé ná ná nǔ e ba wɛ ayǐkúngban ɖe lɛ́ɛ ayǐkúngban[2].

²⁴Ayǐkúngban ná ná jinukún, bó ná ná vɛ̌ɛn yɔ̌yɔ́, bó ná ná ami, bɔ Izleyɛ́li ná mɔ nǔ e ba wɛ é ɖe lɛ́ɛ.

²⁵ Un ná ɖó tɛnmɛ nú Izleyɛ́li ɖo to ɔ́ mɛ, bó ná yí wǎn nú WǍNGBƐ́. Un ná ɖɔ nú MI SƆ́ NYÍ CE Ǎ ɖɔ: ‘Togun ce wɛ a nyǐ’, bɔ é ná ɖɔ nú mì ɖɔ: ‘Mawu ce wɛ a nyǐ.’ ”