Read fon Ozée 7 Bible Online

Ozée 7 - fon bible

Ozée 7

¹Mawu Mavɔmavɔ ɖɔ: “Hwenu e un jló ná gbɔ azɔn nú togun Izlayɛ́li tɔn ɔ́, hwɛ e akɔta Eflayímu tɔn ɔ́ hu lɛ́ɛ kpódó dǎka e Samalíinu lɛ́ɛ xo ɔ́ kpó wɛ un mɔ. Ajotɔ́ lɛ́ɛ byɔ́ xwé lɛ́ɛ gbe, ajotɔ́ axánsúnxó lɛ́ɛ ɖo ajo gbo mɛ wɛ gbɔn alixo alixo.

²Yě lɛ̌n gbeɖé ɖɔ un ɖo dǎka e émí xo lɛ́ɛ bǐ flín wɛ ǎ. Din ɔ́, nǔ nyanya e yě wa lɛ́ɛ lɛ́ lɛ̌ dó yě. Un mɔ bǐ.

³Yě nɔ́ ɖɔ xó víví dó dó xomɛhunhun nú axɔ́sú yětɔn. Yě nɔ́ ɖó adingban dó dó xomɛhunhun nú gǎn yětɔn lɛ́ɛ.

⁴Yě bǐ wɛ dó afɔ gbě. Yě cí myɔkpó e wɔ̌xúxúɖatɔ́ xo zo dó, bɔ é sɛ́ káká bó má sɔ́ byɔ́ ɖɔ é ní xo zo dó sín hwenu e é nya linfín ɔ́ dó káká bɔ é wá fɔ́n ǎ é ɖɔhun.

⁵Axɔ́sú yětɔn ɖo xwe ɖu wɛ ɔ́, ahan nɔ mú yě, bɔ yě nɔ́ dó nu xó mɛ.

⁶Yě mɛ e nɔ fɔ́n bó nɔ ɖo mɛ gbé blá wɛ lɛ́ɛ ɔ́, yě sɛ́ myɔkpó ɖɔhun. Adǎn yětɔn bǐ nɔ yi xɔ zǎn mɛ. É ká jɛ zǎnzǎn ɔ́, adǎn yětɔn nɔ xɔ hiwun, xwé wlí zo ɖɔhun.

⁷Yě bǐ wɛ hun zo myɔkpó ɖɔhun. Yě nɔ́ vívá gǎn yětɔn lɛ́ɛ sín kún. Axɔ́sú yětɔn lɛ́ɛ bǐ jɛ ayǐ, yě mɛ ɖěbǔ ylɔ̌ mì ǎ.

⁸Akɔta Eflayímu tɔn ɔ́ cáká dó togun lɛ́ɛ mɛ. Akɔta Eflayímu tɔn ɔ́ cí atá e è ma húzú ǎ é ɖɔhun.

⁹Jǒnɔ lɛ́ɛ ɖo da vɔ́ n'i wɛ, é ká tunwun ǎ. É ɖo kpikpo wɛ, bó ká tunwun ǎ.

¹⁰Go e yí wɛ togun Izlayɛ́li tɔn ɔ́ ɖe ɔ́ kó ɖe nǔ e é nyí ɔ́ xlɛ́. Yě lɛ́ kɔ wá Mawu Mavɔmavɔ, Mawu yětɔn ɔ́ gɔ́n ǎ. Nǔ énɛ́ lɛ́ɛ bǐ jɛ có, yě ɖo biba ɛ wɛ ǎ.

¹¹Eflayímunu lɛ́ɛ cí ahwannɛ́ xlonɔ ɖé ɖɔhun, ayixa ɖěbǔ ɖo xo yětɔn mɛ ǎ. Ejípu wɛ yě ylɔ́, Asilíi wɛ yě yi.

¹²Nú yě ɖidó ɔ́, un nɔ nyi ɖɔ ce cyɔ́n yě. Un nɔ ɖe gbe bɔ yě nɔ́ kɔn nyi kɔ́ mɛ xɛ ɖɔhun. Un nɔ dɔn tó nú yě bɔ é nɔ́ sɔgbe xá nǔ nyanya e yě wa bɔ è ɖo ɖiɖɔ wɛ é.

¹³Yě ɖo hinhɔn nú mì wɛ, heelú yě! Kún yětɔn ná sú dó ɖó yě fɔ́n gǔ dó jǐ ce. Un ko jló ná hwlɛ́n yě gán, lo ɔ́, adingban wɛ yě nɔ́ ɖó dó nu ce.

¹⁴Yě nɔ́ sú xó ylɔ́ mì kpó ayi yětɔn kpó ǎ, bó ká nɔ́ ɖo vo sa wɛ ɖo adɔ̌zan yětɔn lɛ́ɛ jí. Yě nɔ́ já wǔtu bó ná dó mɔ jinukún kpó vɛ̌ɛn yɔ̌yɔ́ kpó. Gǔ fɔ́n dó jǐ ce wɛ yě ká ɖe mɔ̌.

¹⁵Nyɛ wɛ kplɔ́n yě; nyɛ wɛ ná hlɔ̌nhlɔ́n yě. Lo ɔ́, nǔ nyanya kɛ́ɖɛ́ wɛ yě nɔ́ lin dó wǔtu ce.

¹⁶Nyɛ Mawu Ajalɔ̌nlɔn ɔ́ gɔ́n wɛ yě lɛ́ kɔ wá ǎ. Yě cí da e má ɖo ganjí ǎ ɖɔhun. Gǎn yětɔn lɛ́ɛ ná cí ahwan, ɖó mɛ ma sí xó e nɔ́ tɔ́n sín nu yětɔn mɛ lɛ́ɛ wú. Nǔ e ná zɔ́n bɔ yě ná nyí nǔkiko ɖo Ejípu é nɛ́.”