Read fon Ozée 8 Bible Online

Ozée 8 - fon bible

Ozée 8

¹Mawu Mavɔmavɔ ɖɔ: “Mi kún lanzo! Kɛntɔ́ kplɔ́ dó Mawu Mavɔmavɔ xwé ɔ́ gangan ɖɔhun, ɖó Izlayɛ́linu lɛ́ɛ gba akɔ e un jɛ xá yě ɔ́, yě gba sɛ́n e un dó nú yě lɛ́ɛ.

²Yě ná sú xó bó ɖɔ sɛ́ dó mì ɖɔ: ‘Mawu ce, mǐ mɛ Izlayɛ́linu lɛ́ɛ ɔ́, mǐ tunwun we!’

³Izlayɛ́linu lɛ́ɛ gbɛ́ wǎn nú nǔ ɖagbe; énɛ́ ɔ́ wú ɔ́, kɛntɔ́ ɔ́ ná jɛ gǔdo yětɔn.

⁴Yě nɔ́ sɔ́ axɔ́sú nyɛ mɛ vo. Yě nɔ́ sɔ́ gǎn ma kan nǔɖé byɔ́ mì. Yě zé kpatágan yětɔn kpó siká yětɔn kpó dó bló vodún ná. Énɛ́ ɔ́ wú wɛ kún yětɔn ná sú dó.

⁵Nyɛ Mawu Mavɔmavɔ gbɛ́ nyibúví Samalíinu lɛ́ɛ tɔn. Un sin xomɛ dó yě ɖésú. Ayǐ ɖé ká ná hɔ́n, bɔ yě ná gɔn hwɛ hu cé?

⁶Izlayɛ́li wɛ nyibúví ɔ́ ká gosín hǔn, alɔnuzɔ́watɔ́ ɖé wɛ tun. Nyibúví ɔ́ nyí Mawu ǎ. Nǔ énɛ́ ɔ́ wú wɛ è nǎ gba nyibúví ɔ́ hánnyá.

⁷Nǔ e è dǒ ɔ́ wɛ è nɔ ya. Yě ná ɖó jinukún kwín ɖokpó ǎ. Jinukún e ná wú lɛ́ɛ ɖě ná nyɔ́ nú è nǎ mɔ linfín ǎ. É ná bó tíin ɔ́, jǒnɔ lɛ́ɛ wɛ ná ɖu bǐ.

⁸È sú Izlayɛ́linu lɛ́ɛ sín kún dó. Zɛ̌n e má nyí nǔɖé wa nú ǎ é ɖɔhun wɛ yě ɖe din ɖo akɔta lɛ́ɛ tɛ́ntin.

⁹Đó yě yi Asilíi, tócí gbě tɔn e má nɔ́ nɔ mɛɖé mɛ ǎ é ɖɔhun. Eflayímunu lɛ́ɛ nɔ́ ná nǔ mɛ dó zun xɔ́ntɔn.

¹⁰Yě ná nǔ akɔta lɛ́ɛ bó ná dó nyɔ́ ɖo yě sí có, un ná kplé yě lo, bɔ zaanɖé din ɔ́, yě ná ji ya ɖo agban kpinkpɛn e axɔ́sú Asilíi tɔn ɔ́ ná ɖíɖá yě ɔ́ glɔ́.

¹¹Eflayímunu lɛ́ɛ mɛ vɔ̌sákpe kɔn nyi kpɔ́, bó ná dó súnsún hwɛ yětɔn lɛ́ɛ; lo ɔ́, vɔ̌sákpe énɛ́ lɛ́ɛ wɛ dɔn yě dó hwɛ mɛ.

¹²Un na bo wlán nǔ e sɛ́n ce zɔ́n lɛ́ɛ bǐ nú yě ɔ́, yě nɔ́ ké ya ɖěbǔ ná ǎ.

¹³Yě nɔ́ hu kanlin dó sá vɔ̌ ɖó lan ná ɖu wú, bɔ é nyí nyɛ sá vɔ̌ ná wɛ yě ɖe. Nǔ énɛ́ lɛ́ɛ wɛ nɔ́ hun xomɛ nú nyɛ Mawu Mavɔmavɔ ɔ́ ǎ. Nyɛ Mawu Mavɔmavɔ ɔ́, un flín hwɛ e yě hu lɛ́ɛ din, bó ná dɔn tó tɔn nú yě: yě ná lɛ́ kɔ yi Ejípu.

¹⁴Izlayɛ́linu lɛ́ɛ wɔn nyɛ mɛ e ɖó yě ɔ́, bó gbá xwé nú axɔ́sú yětɔn lɛ́ɛ, bɔ Judáanu lɛ́ɛ ɖó toxo e è mɛ ahohó lɛ́ lɛ̌ dó lɛ́ɛ kɔn nyi kpɔ́; lo ɔ́, un ná dó toxo yětɔn ɖaxó ɖaxó lɛ́ɛ zo, bɔ xwé yětɔn ɖagbe ɖagbe lɛ́ɛ ná ji zo.”