Read fon Amɔ́si 1 Bible Online

Amɔ́si 1 - fon bible

Amɔ́si 1

¹ Xó e Amɔ́si ɖɔ lɛ́ɛ wɛ ɖo wěma élɔ́ mɛ; Amɔ́si ɔ́, lɛ̌ngbɔ́nyitɔ́ e ɖo Tekowa toxo ɔ́ mɛ lɛ́ɛ ɖě wɛ. Mawu ɖe nǔ xlɛ́ ɛ dó togun Izlayɛ́li tɔn ɔ́ wú ɖo axɔ́sú Judáa tɔn Oziyási kpó axɔ́sú Izlayɛ́li tɔn Jelobowámu, Yexoázi ví ɔ́ kpó hwenu. Mawu ɖe nǔ énɛ́ ɔ́ xlɛ́ ɛ ɔ́, é bló xwe we cóbɔ ayǐkúngban dán wǔ.

² Amɔ́si ɖɔ: “Mawu Mavɔmavɔ ɖo adǎn jǐ ɖo Jeluzalɛ́mu, è ɖo gbe tɔn se wɛ sín Sinyɔ́ɔ. Gběhan e kanlin lɛ́ɛ nɔ ɖu ɔ́ bǐ wɛ fyɔ́; akú ɖó ɖo Kaamɛ́li só ta.”

³ Mawu Mavɔmavɔ ɖɔ: “Damásinu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě zé gankpo dó li Galadinu lɛ́ɛ ná. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ ɔ́ nɛ́.

⁴Un ná zé myɔ dó fyɔ́ axɔ́sú Hazayɛ́li sín xwé ná, bɔ myɔ ná vɔ nǔ e ɖo axɔ́sú Bɛni-Hadadi sín hɔnmɛ lɛ́ɛ bǐ.

⁵Un ná fó Damási sín hɔntogbó lɛ́ɛ. Un ná sú mɛ e ɖo nǔ nyanya wiwa sín tɔdo énɛ́ ɔ́ mɛ lɛ́ɛ, kpó axɔ́sú gbɛɖuto énɛ́ ɔ́ tɔn ɔ́ kpó sín kún dó. Ahwan ná wlí togun Silíi tɔn ɔ́ sín kannumɔ yi Kíi.” Xó e Mawu Mavɔmavɔ ɖɔ ɔ́ nɛ́.

⁶ Mawu Mavɔmavɔ ɖɔ: “Gazanu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě wlí kannumɔ wɔ̌buwɔ́bú ɖé lɛ́ɛ yi jó nú Edɔ́munu lɛ́ɛ. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ɔ́ ǎ ɔ́ nɛ́.

⁷Un ná dó Gaza toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ.

⁸Un ná sú Acidɔ́dinu lɛ́ɛ kpó axɔ́sú e ɖo zinkpo jí ɖo Acikelɔ́ni ɔ́ kpó sín kún dó. Un ná húzú alɔ dó Eklɔ́ninu lɛ́ɛ wú. Filisitɛ́ɛn lɛ́ɛ ɖě ná nɔ gbɛ ǎ.” Xó e Aklúnɔ Mavɔmavɔ ɖɔ ɔ́ nɛ́.

⁹ Mawu Mavɔmavɔ ɖɔ: “Tíinu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ; amɔ̌, élɔ́ e yě wa ɔ́ vɛ́ nú mì tawun. Yě wlí kannumɔ wɔ̌buwɔ́bú ɖé lɛ́ɛ jó nú Edɔ́munu lɛ́ɛ; yě sɔ́ flín nɔví nɔví nyínyí sín akɔ e yě jɛ ɔ́ ǎ. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ɔ́ ǎ é nɛ́.

¹⁰Un ná dó Tíi toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ.”

¹¹ Mawu Mavɔmavɔ ɖɔ: “Edɔ́munu lɛ́ɛ ɔ́, nǔ e yě wa nyi do bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě nɔ́ nya nɔví yětɔn lɛ́ɛ kpó hwǐ kpó; yě sɔ́ ɖó nǔbláwǔkúnúmɛ ǎ, ɖó xomɛsin yětɔn nɔ ɖo nǔ hɛn gblé wɛ hwebǐnu; adǎn jí jɛ́n yě nɔ́ ɖe hwebǐnu. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

¹²Un na dó Temani toxo ɔ́ zo, bɔ zo ná ji hɔnmɛ e ɖo Bosla lɛ́ɛ é.”

¹³ Mawu Mavɔmavɔ ɖɔ: “Amumɔ́ɔ ví lɛ́ɛ ɔ́, nǔ e yě wa nyi do bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Đó yě jló ná gbló ada nú to yětɔn, bɔ é sín énɛ́ wú, bɔ yě zɛ nyɔ̌nu Galadinu e ɖo xo lɛ́ɛ sín adɔgo. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

¹⁴Un ná dó Hlaba toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ, ɖo azǎn e gbe è na ɖo ahwan fun wɛ, bó ná ɖo xó sú wɛ, bɔ jɔhɔn ɖaxó ɖé ná ɖo nyinyi wɛ, bɔ jǐ ɖaxó ná ɖo jija wɛ é.

¹⁵È nǎ wlí axɔ́sú yětɔn kpó azaglɔ́gán toxo ɔ́ tɔn lɛ́ɛ kpó yi kannumɔgbénu.” Xó e Mawu Mavɔmavɔ ɖɔ ɔ́ nɛ́.