Read fon Amɔ́si 4 Bible Online

Amɔ́si 4 - fon bible

Amɔ́si 4

¹Nyɔ̌nu Samalíi tɔn lɛ́ɛ mi! Mi mɛ e jɔ asú nyibú asi Basáni tɔn lɛ́ɛ ɖɔhun lɛ́ɛ e mi! Mi ɖótó xó e ɖɔ gbé un ja é: mi nɔ táfú mɛ e ma ɖó gǎn ǎ lɛ́ɛ, mi nɔ dó ya nú wamamɔnɔ lɛ́ɛ, bó nɔ́ ɖɔ nú asú mitɔn lɛ́ɛ ɖɔ: “Mi zé ahan wá nú mǐ nǎ nu.”

²Aklúnɔ Mavɔmavɔ xwlé nyǐkɔ tɔn mímɛ́ ɔ́ bó ɖɔ: “Mi ɖótó! Azǎn ɖé lɛ́ɛ gbe na su, bɔ è na zé klɔcée dó dɔn mi na, lobo ná zé mlɛ dó dɔn vǐ mitɔn lɛ́ɛ na.

³Mi ná gbɔn dǒlinu bó tɔ́n sín toxo ɔ́ mɛ, bɔ mɛ ɖokpó ɖokpó ná ɖidó fí e é xwe ɔ́ télélé. È na zé mi nyi dó ahohó ɔ́ mɛ.” Xó e Mawu Mavɔmavɔ ɖɔ ɔ́ nɛ́.

⁴“Mi yi Betɛ́li bó yi hu hwɛ bó! Mi yi Gilugalu bó hu hwɛ d'é jí! Mi nɔ sa vɔ̌ nú Mawu zǎnzǎn tɛgbɛ bó! Mi nɔ ná mǎɖówǒ nǔ e mi ɖó lɛ́ɛ tɔn, azǎn atɔn gbe azǎn atɔn gbe!

⁵Mi nɔ́ zé wɔ̌xúxú e mɛ è dǒ tɔ́n ɔ́ dó sá vɔ̌ nú Mawu dó nɔ́ dó kú n'i bó. Mi sú xó bó jlá nǔníná e mi zé jlǒ mi ɖésúnɔ tɔn dó ná lɛ́ɛ bó! Đó nǔ e mi mɛ Izlayɛ́linu lɛ́ɛ nɔ yí wǎn na é nɛ́.” Xó e Aklúnɔ Mavɔmavɔ ɖɔ ɔ́ nɛ́.

⁶“Nyɛ ɔ́, un sɛ́ adɔ dó mi gbɔn toxo ɖaxó mitɔn lɛ́ɛ bǐ mɛ. Nǔɖuɖu hán mi ɖo xwé mitɔn lɛ́ɛ gbe. Nǔ nyí mɔ̌ có, mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́.

⁷“Hwenu e é kpo sun atɔn bɔ jinukún mitɔn lɛ́ɛ na nyɔ́ ɔ́, un tɛ jǐ mi. Un bló bɔ jǐ ja ɖo toxo ɖě mɛ, bó gɔn ɖě mɛ; jǐ ja dó gle ɖě gbe bó gɔn ɖě gbe, bɔ nǔkún e ɖ'é jí lɛ́ɛ fyɔ́.

⁸Mɛ lɛ́ɛ nɔ gosín toxo we abǐ atɔn mɛ, bó nɔ́ yi sin nu gbé ɖo toxo ɖěvo mɛ; yě ká nɔ́ mɔ nu bónú é nɔ́ ɖi kɔ nú yě ǎ. Nǔ nyí mɔ̌ có, mi lɛ́ kɔ wá gɔn ce ǎ.” Xó e Mawu Mavɔmavɔ ɖɔ ɔ́ nɛ́.

⁹“Un dó azɔn jinukún mitɔn lɛ́ɛ, bɔ yě nɔ́ xú dó te abǐ yě nɔ́ nyɔ dó te. Un vívá jikpá mitɔn lɛ́ɛ kpó vǐwungle mitɔn lɛ́ɛ kpó sín kún; wɛn lɛ́ɛ ɖu fígitín mitɔn lɛ́ɛ kpó olívutín mitɔn lɛ́ɛ kpó sú dó. Nǔ nyí mɔ̌ có, mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́.

¹⁰“Un sɛ́ jɛmɛjí dó mi lě e un sɛ́ dó Ejípu gbɔn ɖ'ayǐ é. Un zé hwǐ dó hu mɛ wínnyáwínnyá mitɔn lɛ́ɛ, bó jó mɛ lɛ́ɛ dó bɔ yě bɛ̌ sɔ́ mitɔn lɛ́ɛ yi. Mi se mɛkúkú lɛ́ɛ sín wǎn ɖo fí e mi ɖe é. Nu nyí mɔ̌ có mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́.

¹¹ “Un gba nǔ bǐ hánnyá ɖo mi gɔ́n, lě e un gba Sodɔ́mu kpó Gomɔ́ɔ kpó gbɔn é. Midɛɛ lɛ́ɛ ka gán sín mɛ lě e è nɔ lun myɔtín sín myɔ mɛ é ɖɔhun. Nǔ ɖo mɔ̌ có mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́.

¹²“Vǐ ce Izlayɛ́linu lɛ́ɛ mi, mi na mɔ nǔ e un na wa xá mi é. Ée nǔ mɔ̌hunkɔtɔn ɖo te kpɔ́n mi ɔ́, mi bo sɔ́ nǔ, bó wá nyɛ Mawu mitɔn ɔ́ gɔ́n.”

¹³“Đó nyɛ wɛ bló só lɛ́ɛ; nyɛ wɛ bló jɔhɔn; nyɛ wɛ nɔ ɖe linlin ce lɛ́ɛ xlɛ́ gbɛtɔ́; nyɛ wɛ nɔ sɔ́ ayǐtéhɔ̌nnu dó húzú zǎn; nyɛ wɛ nɔ zun zɔnlin gbɔn fí e yi jǐ hú fí bǐ é. Mawu Mavɔmavɔ, Mawu Nǔbǐwúkpétɔ́ wɛ un nyí.”