Read fon Amɔ́si 7 Bible Online

Amɔ́si 7 - fon bible

Amɔ́si 7

¹Nǔ e Aklúnɔ Mavɔmavɔ ɖe xlɛ́ mì ɖo nǔmimɔ ɖé mɛ ɔ́ ɖíe: É ɖe wɛn tɔ́n kpɔ́ gégé hwenu e gběhan jɛ zǐnzɔ́n jí é. Gběhan nukɔntɔn e è xo bɔ é nyí axɔ́sú ɔ́ tɔn é.

²Ée wɛn ɖu gběhan e ɖo to ɔ́ mɛ lɛ́ɛ bǐ ɔ́, un ɖɔ: “Aklúnɔ Mavɔmavɔ, kɛnklɛ́n sɔ́ hwɛ e togun towe hu ɔ́ kɛ ɛ. É má nyí mɔ̌ ǎ ɔ́, éé mɛ e hwe sɔ mɔ̌ ɔ́, nɛ̌ wɛ é ka ná sixú lɛ́ nɔ gbɛ gbɔn?”

³Ée un ɖɔ mɔ̌ ɔ́, Mawu Mavɔmavɔ lɛ́ kɔ sín nǔ e é jló ná wa ɔ́ gúdo bó ɖɔ: “Nǔ énɛ́ ɔ́ sɔ́ ná jɛ ǎ.”

⁴Aklúnɔ Mavɔmavɔ ɖe nǔ ɖěvo xlɛ́ mì. É nɔ zé myɔ dó ɖó hwɛ nú togun ɔ́. Myɔ nɔ hɛn sin e ɖo ayǐkúngban glɔ́ lɛ́ɛ xú, bó nɔ́ fyɔ́ Izlayɛ́li to ɔ́.

⁵Énɛ́ ɔ́, un ɖɔ: “Aklúnɔ Mavɔmavɔ, kɛnklɛ́n gbɔ. É má nyí mɔ̌ ǎ ɔ́, togun towe e hwe sɔ mɔ̌ ɔ́, nɛ̌ wɛ é ná lɛ́ sixú nɔ gbɛ gbɔn?”

⁶Ée un ɖɔ mɔ̌ ɔ́, Mawu Mavɔmavɔ lɛ́ kɔ sín nǔ e é jló ná wa ɔ́ gúdo bó ɖɔ: “Nǔ énɛ́ ɔ́ lɔ sɔ́ ná jɛ ǎ.”

⁷Aklúnɔ lɛ́ ɖe nǔ élɔ́ xlɛ́ mì. É ɖésúnɔ ɖo te ɖo dǒ ɖé jí, bó hɛn kan e è nɔ dó kpɔ́n dǒ sín jlɔ̌jlɔ́ ná sín jǐ wá do ɔ́ alɔ mɛ.

⁸É kanbyɔ́ mì ɖɔ: “Amɔ́si, étɛ́ mɔ wɛ a ɖe?” Un yí gbe ɖɔ: “Nǔjlɛ́kan.” Aklúnɔ lɛ́ yí xó bó ɖɔ: “É nyɔ́! Nǔjlɛ́kan ɔ́, un sɔ́ dó ɖo kpínkpɔ́n wɛ ɖɔ togun ce jlɔ́ dǒ ɖɔhun a jí; ɖó un sɔ́ ná sɔ́ nǔwanyido tɔn ɖěbǔ kɛ ɛ ǎ.

⁹Un ná gba Izáki ví lɛ́ɛ sín vodún lɛ́ɛ. Un ná gba tɛn mímɛ́ Izlayɛ́li tɔn lɛ́ɛ hánnyá, bó ná tɔ́n ahwan mɛ e ná wá yí axɔ́sú Jelobowámu sín zinkpo jí lɛ́ɛ bǐ.”

¹⁰Amaciya vɔ̌sánú-xwlémawutɔ́ Betɛ́li tɔn ɔ́ dó wɛn sɛ́ dó Jelobowámu, axɔ́sú Izlayɛ́li tɔn ɔ́ bó ɖɔ: “Amɔ́si ɖo biba wɛ bó ná yí gǎn sín así towe ɖo axɔ́súɖuto Izlayɛ́li tɔn mɛ. Xó e ɖɔ wɛ é ɖe lɛ́ɛ kpé agbɔ̌n nú togun ɔ́.

¹¹Xó e ɖɔ wɛ Amɔ́si ɖe lɛ́ɛ ɖíe: ‘Jelobowámu na kú hwǐ kú, bɔ è ná bɛ́ Izlayɛ́li ví lɛ́ɛ yi kannumɔgbénu, bɔ yě ná lín dó to yětɔn.’ ”

¹²Énɛ́ ɔ́, Amaciya ɖɔ nú Amɔ́si ɖɔ: “Nǔmɔtɔ́, tún xwé sín fí bó yi Judáa. A jɛ dɔ̌n ɔ́, a nǎ wa gbeyíɖɔ Mawu tɔn sín azɔ̌, bó dó ɖu nǔ.

¹³Lo ɔ́, ma sɔ́ wa gbeyíɖɔ Mawu tɔn sín azɔ̌ ɔ́ ɖě ɖo Betɛ́li fí ó; ɖó fí ɔ́, tɛn mímɛ́ axɔ́sú ɔ́ tɔn wɛ; axɔ́sú xwé wɛ.”

¹⁴Amɔ́si ka yí gbe nú Amaciya ɖɔ: “Un nyí gbeyíɖɔ Mawu tɔn ǎ; un ka nyí gbeyíɖɔ Mawu tɔn sín vǐ ǎ; lo ɔ́, lɛ̌ngbɔ́nyitɔ́ wɛ un nyí, bó nɔ́ tun sikomɔ́ɔtín.

¹⁵Mawu Mavɔmavɔ wɛ ɖe mì sín lɛ̌ngbɔ́ ce lɛ́ɛ kɔn, bó ɖɔ nú mì ɖɔ ma yi dó wɛn émítɔn togun Izlayɛ́li tɔn nú émí.

¹⁶Bɔ hwɛ ka wá ɖo sɛ́n dó nú mì wɛ ɖɔ nyɛ ní ma yi dó wɛn e Mawu ɖɔ nyɛ ní dó Izlayɛ́li ɔ́ ó; nyɛ ní ma ka sɔ́ ɖɔ xó ɖě dó Izáki ví lɛ́ɛ[5] wú ó. É nyɔ́! Bo ɖótó xó e Mawu Mavɔmavɔ ɖɔ dó wǔtu towe é.

¹⁷É ɖɔ: ‘Asi towe ná kpo nú agalilɛ, ɖo toxo ɖaxó ɔ́ mɛ. È nǎ zé hwǐ dó hu vǐ towe súnnu kpó nyɔ̌nu kpó. È nǎ má ayǐkúngban towe nú mɛ ɖěvo lɛ́ɛ. Hwɛ ɔ́, a nǎ yi kú jɛ mɛ e má nyí akɔta towe ǎ lɛ́ɛ sín to mɛ. È nǎ bɛ́ Izlayɛ́li ví lɛ́ɛ yi kannumɔgbénu, bɔ yě ná lín dó toxo yětɔn.’ ”