Read fon Jonási 4 Bible Online

Jonási 4 - fon bible

Jonási 4

¹Ée Mawu Mavɔmavɔ má sɔ́ dɔn tó nú Ninívunu lɛ́ɛ ǎ ɔ́, é vɛ́ Jonási wú káká, bɔ é sin xomɛ.

² É xo ɖɛ sɛ́ dó Mawu Mavɔmavɔ bó ɖɔ: “Mawu Mavɔmavɔ, é má nyí nǔ e ɖɔ wɛ un ɖe hwenu e un kpo ɖo to ce mɛ ɔ́ nɛ́ a? Nǔ e gbɛ́ wɛ un ɖe bó hɔn ɖidó Taasísi ɔ́ nɛ́! Đó un tunwun ɖɔ Mawu xomɛnyɔ́tɔ́ wɛ a nyǐ, bó nɔ́ kú nǔbláwǔ nú mɛ; a nɔ yá wǔ sin xomɛ ǎ; ɖagbewiwa towe ɖó dogbó ǎ. A gblɔ̌n adǎn nú mɛ ɔ́, tlóló jɛ́n a nɔ lɛ́ lɛ́ kɔ sín gúdo.

³ Din ɔ́, Mawu Mavɔmavɔ, gbɔ bo hu mì; ɖó un kú din ɔ́, é nyɔ́ nú mì hú un nɔ gbɛ.”

⁴Mawu Mavɔmavɔ ká kanbyɔ́ Jonási ɖɔ: “Hǔn nǔ ɖagbe wa wɛ jɛ́n a ɖe din bo ɖo xomɛ sin wɛ a?”

⁵Jonási ka tɔ́n sín toxo ɔ́ mɛ, bó yi cí zǎnzǎnhwe jí nú toxo ɔ́, bó bló azava ɖokpó nyi fínɛ́, bó jínjɔ́n sá, bó ɖo te kpɔ́n nǔ e ná jɛ dó toxo ɔ́ jí é.

⁶Mawu Mavɔmavɔ ká bló bɔ atín ɖokpó wú ɖo fínɛ́, bɔ ala tɔn lɛ́ɛ vun dó Jonási sín ta nu, bó ná ná ɛ yɛtɛn, bónú hwesivɔ́ e hun dó jǐ tɔn ɔ́ ní ɖe kpo. Atín énɛ́ e wú ɔ́ víví nú Jonási ɖésú.

⁷Lo ɔ́, ayǐhɔ́ngbe tɔn ayǐtéhɔ̌nnu ɔ́, Mawu sɛ́ wǎnvú ɖé dó, bɔ é wá ɖu atín ɔ́, bɔ atín ɔ́ kú zogbe.

⁸Ée hwe wá tɔ́n ɔ́, Mawu sɛ́ jɔhɔn ɖé dó sín zǎnzǎnhwe jí, bɔ jɔhɔn ɔ́ nɔ́ mɛ mɛ. Hwesivɔ́ ɔ́ hun dó Jonási ta káká bɔ é ɖibla xɛ́ nǔ, bó gbɔ bó byɔ́ kú. É ɖɔ: “Un gbɔ bo kú din ɔ́, é nyɔ́ nú mì hú un nɔ gbɛ.”

⁹Mawu ká lɛ́ kanbyɔ́ ɛ ɖɔ: “Nǔ ɖagbe wa wɛ jɛ́n a ɖe din bó ɖo xomɛ sin wɛ ɖó atín yǎyá wú a?” Jonási yí gbe nú Mawu ɖɔ: “Xomɛ e un sin káká din bó byɔ́ kú ɔ́, nǔ ɖagbe wɛ un wa.”

¹⁰Ée é ɖɔ mɔ̌ ɔ́, Mawu Mavɔmavɔ lɛ́ yí xó bó ɖɔ: “Hwɛ ɔ́, atín énɛ́ ɔ́, a jɛ tagba ɖěbǔ dó wǔ tɔn ǎ; hwi wɛ ká bló bɔ é su ǎ. Zǎn ɖokpó mɛ wɛ é wú, bó ká lɛ́ kú zǎn ɖokpó mɛ, cóbɔ nǔ tɔn ká ɖo wǔ blá nú we wɛ,

¹¹bɔ a ka jló ɖɔ nyɛ ní kú nǔbláwǔ nú Ninívu to ɔ́ ǎ; toxo ɖaxó énɛ́ ɔ́ e mɛ gbɛtɔ́ adɔ̌kpo ayizɛ́n (120.000) ɖe, bɔ kanlin wɔ̌buwɔ́bú ɖe ɔ́, a jlǒ ɖɔ má kú nǔbláwǔ ná ǎ. Mɛ e ɖo to ɔ́ mɛ lɛ́ɛ ká tunwun nǔ e nyɔ́ ɔ́ kpó nǔ e nylá ɔ́ kpó ǎ.”