Read fon Kɛ́nsísɔ́ 10 Bible Online

Kɛ́nsísɔ́ 10 - fon bible

Kɛ́nsísɔ́ 10

¹Mawu Mavɔmavɔ ɖɔ nú Mɔyízi ɖɔ:

²“Hwi ɖésú ní zé kpatágan dó tun kpɛn we. È nǎ nɔ́ kwín dó ylɔ́ togun ɔ́ kplé, abǐ è nǎ nɔ́ kwín bɔ akɔta tɛnmɛ tɛnmɛ lɛ́ɛ ná nɔ jɛ ali.

³Nú è kwín kpɛn we lɛ́ɛ ɔ́, agun ɔ́ bǐ ná kplé ɖo gɔ̌n towe ɖo Goxɔ ɔ́ sín nukɔn.

⁴Nú kpɛn ɔ́ ɖokpó wɛ è kwín ɔ́, gǎn lɛ́ɛ kpó Izlayɛ́li ví lɛ́ɛ sín hɛ̌nnugán lɛ́ɛ kpó kɛ́ɖɛ́ wɛ ná nɔ́ kplé ɖo gɔ̌n towe.

⁵Nú è kwín kpɛn ɔ́ kpódó awǒbóbó kpó ɔ́, mɛ e ɖó gɔnu ɖó zǎnzǎnhwe jí lɛ́ɛ ná nɔ́ jɛ ali.

⁶Nú è kwín kpɛn ɔ́ kpódó awǒbóbó kpó azɔn wegɔ́ ɔ́, mɛ e ɖó gɔnu ɖó afɔligbé lɛ́ɛ ná nɔ́ jɛ ali. È nǎ nɔ́ kwín kpɛn ɔ́ kpódó awǒbóbó kpó, bɔ yě ná nɔ́ jɛ ali.

⁷Mi ná nɔ́ lɛ́ kwín kpɛn ɔ́ dó ylɔ́ Izlayɛ́li ví lɛ́ɛ kplé; mi ka ná kwín kpódó awǒbóbó kpó ǎ.

⁸“Aalɔ́ɔn sín vǐ súnnu lɛ́ɛ kpódó vɔ̌sánú-xwlémawutɔ́ lɛ́ɛ kpó kɛ́ɖɛ́ wɛ ná nɔ́ kwín kpɛn lɛ́ɛ. Sɛ́n énɛ́ ɔ́, sɛ́n ɖé wɛ é nyí, bó ná nɔ ayǐ káká sɔ́yi, nú mi kpódó kúnkan mitɔn lɛ́ɛ kpó.

⁹“Hwenu e kɛntɔ́ wá tɔ́n ahwan mi ɖo to mitɔn mɛ, bɔ mi xwe ahwan fun xá yě gbé ɔ́, mi ná nɔ́ kwín kpɛn lɛ́ɛ kpódó awǒbóbó kpó; énɛ́ ɔ́, nyɛ Mawu Mavɔmavɔ, Mawu mitɔn ná flín mi, bó ná hwlɛ́n mi ɖo kɛntɔ́ sí.

¹⁰Đo awǎjijɛ sín azǎn mitɔn lɛ́ɛ gbe ɔ́, ɖo xwezán mitɔn lɛ́ɛ gbe ɔ́, ɖo sunwájǐxwe mitɔn lɛ́ɛ hwenu ɔ́, mi ná nɔ́ ɖo vɔ̌ e è nɔ dó zo ɔ́ sá wɛ, bó ná nɔ́ ɖo kɔnɖókpɔ́ vɔ́ sá wɛ, bó ná nɔ́ kwín kpɛn lɛ́ɛ. Énɛ́ ɔ́, un ná nɔ́ flín mi. Mawu Mavɔmavɔ, Mawu mitɔn wɛ un nyí.”

¹¹Izlayɛ́li ví lɛ́ɛ gosín Ejípu ɔ́, é bló xwe we. Sun wegɔ́ ɔ́ e ɖo xwe énɛ́ ɔ́ mɛ ɔ́ sín azǎn kogɔ́ ɔ́ gbe ɔ́, akpɔ́kpɔ́ ɔ́ sí te ɖo Goxɔ ɔ́ jí,

¹²bɔ Izlayɛ́li ví lɛ́ɛ gosín gbětótló Sinayíi tɔn mɛ. Akpɔ́kpɔ́ ɔ́ yi nɔ te ɖo gbětótló Paláni tɔn mɛ.

¹³Azɔn nukɔn tɔn ɔ́ nɛ́ Izlayɛ́li ví lɛ́ɛ jɛ ali lě e Mawu Mavɔmavɔ ɖɔ gbɔn nú yě gbɔn Mɔyízi jí ɔ́ nɛ́.

¹⁴Ahwangɔnu Judáa tɔn ɔ́ zé ahwansyá tɔn bó jɛ ali jɛ nukɔn. Naxicɔ́ni, Aminadabu sín vǐ súnnu ɔ́ wɛ nɔ ahwangɔnu ɔ́ nu.

¹⁵Nɛtanɛli, Suwáa ví súnnu ɔ́ wɛ nɔ akɔta Isakáa tɔn sín ahwangɔnu ɔ́ nu.

¹⁶Eliavu, Helɔ́ni sín vǐ súnnu ɔ́ wɛ nɔ akɔta Zabulɔ́ɔn tɔn sín ahwangɔnu ɔ́ nu.

¹⁷Levíi ví lɛ́ɛ tún Goxɔ ɔ́, bɔ Gɛɛcɔ́ni kpódó Mɛlali kpó sín kúnkan lɛ́ɛ ɖíɖá, bó jɛ ali.

¹⁸Ahwangɔnu Hwlibɛ́ni tɔn ɔ́ zé ahwansyá tɔn bó jɛ gǔdo yětɔn. Elisúu, Cedewúu sín vǐ súnnu ɔ́ wɛ nɔ ahwangɔnu ɔ́ nu.

¹⁹Celumiyɛ́li, Sulicadáyi sín vǐ súnnu ɔ́ nɔ akɔta Sinmɛnyɔ́ɔ tɔn sín ahwangɔnu ɔ́ nu.

²⁰Eliyasáfu, Dewúɛli sín vǐ súnnu ɔ́ nɔ akɔta Gadi tɔn sín ahwangɔnu ɔ́ nu.

²¹Levíi ví e jɔ ɖo Kexáti kún mɛ lɛ́ɛ bɛ́ nǔ mímɛ́ bǐ lɛ́ɛ, bó jɛ ali ɖidó bɔdó yě wú. Levíi ví ɖě lɛ́ɛ ɖó ná kó kɛ́ Goxɔ ɔ́ ɖ'ayǐ, cóbɔ yě ná wá.

²²Ahwangɔnu Eflayímu tɔn ɔ́ zé ahwansyá tɔn bó jɛ ali. Elicama, Amumihudi sín vǐ súnnu ɔ́ wɛ nɔ ahwangɔnu ɔ́ nu.

²³Gamɛliyɛ́li, Pedasúu sín vǐ súnnu ɔ́ nɔ akɔta Manasée tɔn sín ahwangɔnu ɔ́ nu.

²⁴Avidáni, Gideóni sín vǐ súnnu ɔ́ nɔ akɔta Bɛnjamɛ́ɛ tɔn sín ahwangɔnu ɔ́ nu.

²⁵Ahwangɔnu Dan tɔn ɔ́ zé ahwansyá tɔn bó jɛ ali. Ahwangɔnu Dan tɔn ɔ́ wɛ ɖo ahwangɔnu ɖě lɛ́ɛ bǐ gúdo. Axiezɛ́ɛ, Amumicadayi sín vǐ súnnu ɔ́ wɛ nɔ ahwangɔnu ɔ́ nu.

²⁶Pagiyɛ́li, Ɔkláni sín vǐ súnnu ɔ́ nɔ akɔta Acɛ́ɛ tɔn sín ahwangɔnu ɔ́ nu.

²⁷Axila, Eyináni sín vǐ súnnu ɔ́ nɔ akɔta Nɛfutali tɔn sín ahwangɔnu ɔ́ nu.

²⁸Lě e ahwangɔnu Izlayɛ́li ví lɛ́ɛ tɔn to yěɖée gbɔn bó jɛ ali ɔ́ nɛ́.

²⁹Mɔyízi ɖɔ xó nú Hobabu; Hobabu ɔ́, Hlewuyɛ́li e nyí Madiáani ví, bó nyí Mɔyízi sín asi tɔ́ ɔ́ sín vǐ wɛ; é ɖɔ n'i ɖɔ: “Mǐ xwe to e Mawu Mavɔmavɔ ɖɔ émí ná ná mǐ ɔ́ mɛ; wǎ xwedó mǐ hɛn yi; mǐ ná wa ɖagbe nú we, ɖó Mawu Mavɔmavɔ dó akpá nú mǐ Izlayɛ́li ví lɛ́ɛ ɖɔ émí ná wa ɖagbe nú mǐ.”

³⁰Hobabu yí gbe n'i ɖɔ: “Un ná yi ǎ, lo ɔ́, un ná yi to ce mɛ fí e un jɔ ɖe é.”

³¹Mɔyízi ɖɔ n'i ɖɔ: “Kɛnklɛ́n, ma jó mǐ dó ó. A tunwun fí e mǐ nɔ́ ɖó gɔnu ɖó ɖo gbětótló mɛ lɛ́ɛ; a nǎ xlɛ́ ali mǐ.

³²Nú a xwedó mǐ ɔ́, ɖagbe e Mawu Mavɔmavɔ ná wa nú mǐ ɔ́, a nǎ ɖu le tɔn.”

³³Izlayɛ́li ví lɛ́ɛ gosín Mawu Mavɔmavɔ sín só ɔ́ kɔn ɖidó, bó ɖi zɔnlin xɔ azǎn atɔn; akɔjijɛgbá Mawu Mavɔmavɔ tɔn ɔ́ jɛ nukɔn nú yě. Mɛ e hɛn akɔjijɛgbá ɔ́ lɛ́ɛ ɖi zɔnlin xɔ azǎn atɔn, bó ba fí e yě ná gbɔjɛ́ ɖe ɔ́ ɖ'ayǐ.

³⁴Yě jɛ ali kéze ɔ́, akpɔ́kpɔ́ Mawu Mavɔmavɔ tɔn nɔ́ ɖo ta yětɔn nu.

³⁵ Akɔjijɛgbá ɔ́ ɖidó ɔ́, Mɔyízi nɔ sú xó ɖɔ: “Mawu Mavɔmavɔ, sí te! Sí te, bónú kɛntɔ́ towe lɛ́ɛ ná gbadó. Sí te, bónú mɛ e gbɛ́ wǎn nú we lɛ́ɛ ná hɔn ɖo nukɔn towe!”

³⁶È ka zé akɔjijɛgbá ɔ́ ɖ'ayǐ ɔ́, Mɔyízi nɔ sú xó ɖɔ: “Mawu Mavɔmavɔ, lɛ̌ kɔ wá nɔ hɛ̌nnu maxamaxa Izlayɛ́li ví lɛ́ɛ tɔn lɛ́ɛ tɛ́ntin.”