Read fon Kɛ́nsísɔ́ 12 Bible Online

Kɛ́nsísɔ́ 12 - fon bible

Kɛ́nsísɔ́ 12

¹Mɔyízi ɔ́, Etiopíinu wɛ é da bɔ Miliamu kpó Aalɔ́ɔn kpó jɛ xó ɖɔ dó Mɔyízi wú jí, ɖó Etiopíinu e é da ɔ́ wútu.

²Yě ɖɔ: “Mɔyízi kɛ́ɖɛ́ jí jɛ́n Mawu Mavɔmavɔ nɔ ɖɔ xó gbɔn a? Mawu Mavɔmavɔ ɖɔ xó gbɔn mǐ lɔmɔ̌ jí ɖě ǎ cé?” Mawu Mavɔmavɔ se xó e yě ɖɔ ɔ́.

³Mɔyízi ka nyí mɛɖé, bó nɔ́ sɔ́ éɖée hwe ɖésú; é nɔ́ sɔ́ éɖée hwe hú gbɛtɔ́ e ɖo ayǐkúngban jí lɛ́ɛ bǐ.

⁴Tlóló kpowun ɔ́, Mawu Mavɔmavɔ ɖɔ nú Mɔyízi kpó Aalɔ́ɔn kpó, kpódó Miliamu kpó ɖɔ: “Mi mɛ atɔn lɛ́ɛ ní yi Goxɔ ɔ́ kɔn.” Bɔ yě mɛ atɔn lɛ́ɛ bǐ ɖidó.

⁵Mawu Mavɔmavɔ jɛ te ɖo akpɔ́kpɔ́ mɛ, bó cí Goxɔ ɔ́ sín alihɛ́nnu, bó ylɔ́ Aalɔ́ɔn kpó Miliamu kpó, bɔ yě mɛ we lɛ́ɛ sɛkpɔ́ ɛ,

⁶bɔ é ɖɔ nú yě ɖɔ: “Mi ɖótó xó e ná ɖɔ nú mi wɛ un ɖe ɔ́ ganjí. Ényí gbeyíɖɔ ɖé ɖo mi mɛ ɔ́, nyɛ Mawu Mavɔmavɔ wɛ nɔ ɖe nyɛɖée xlɛ́ ɛ, bó nɔ́ ɖɔ xó n'i gbɔn nǔmimɔ kpódó dlɔ̌ kpó mɛ.

⁷ Mɔ̌ wɛ é ká nyí gbɔn nú mɛsɛntɔ́ ce Mɔyízi ǎ. Éyɛ́ ɖo gbejí ɖo xwédo ce bǐ mɛ.

⁸Un nɔ ɖɔ xó n'i tlɔlɔ, bɔ é nɔ́ se gbe ce céɖécéɖé. Un nɔ zé nyɛɖée xlɛ́ ɛ; un nɔ tɔ́n ɖo nukɔn tɔn, bɔ é nɔ́ mɔ mì. Aniwú wɛ xó ɖɔ dó mɛsɛntɔ́ ce Mɔyízi wú má dó xɛsi nú mi ǎ?”

⁹Xomɛ yětɔn sin Mawu Mavɔmavɔ, bɔ é ɖidó.

¹⁰Akpɔ́kpɔ́ ɔ́ hɔ́n sín Goxɔ ɔ́ ta nu, bɔ è nǎ mɔ nǔɖé kpowun ɔ́, wǔtuzɔn baɖabaɖa ɖé jɛ́n kɔn nyi Miliamu wú, bó wé kɛ́njí ɖɔhun. Aalɔ́ɔn lílɛ́, bó kpɔ́n Miliamu, bó mɔ ɖɔ wǔtuzɔn baɖabaɖa ɖé ko kɔn nyi wǔ tɔn.

¹¹Ée Aalɔ́ɔn mɔ mɔ̌ ɔ́, é ɖɔ nú Mɔyízi ɖɔ: “Mǐ wa nǔ nyi do, kɛnklɛ́n, ma zé nǔ e mǐ wa taɖunɔ ɖɔhun ɔ́ sín bǎ dó xo mǐ ó.

¹²Yéége! Ma lɔn bónú Miliamu ní cí vǐ kúkú e vlɔ̌ɖówe ko gblé cóbɔ è ji i ɔ́ ɖɔhun ó.”

¹³Ée Mɔyízi se mɔ̌ ɔ́, é sú xó sɛ́ dó Mawu Mavɔmavɔ bo ɖɔ: “Mawu ce, kɛnklɛ́n gbɔ azɔn n'i!”

¹⁴ Mawu Mavɔmavɔ ka ɖɔ nú Mɔyízi ɖɔ: “Nú atán wɛ tɔ́ tɔn kó tún dó nukún mɛ n'i ɔ́, é má ná nɔ winnyá mɛ xɔ azǎn tɛ́nwe ǎ cé? Mi bo ɖe e tɔ́n sín fí e mi ɖó gɔnu ɖó ɔ́ nú azǎn tɛ́nwe. Énɛ́ ɔ́ gúdo ɔ́, è nǎ lɛ́ yí i dó fí e mi ɖó gɔnu ɖó ɔ́.”

¹⁵Énɛ́ ɔ́, è ɖe Miliamu tɔ́n sín fí e Izlayɛ́li ví lɛ́ɛ ɖó gɔnu ɖó ɔ́ xɔ azǎn tɛ́nwe. Ée è ɖe tɔ́n mɔ̌ ɔ́, togun ɔ́ sɛ tɛn cóbónú Miliamu lɛ́ kɔ wá fí e yě ɖó gɔnu ɖó ɔ́ ǎ.

¹⁶Ée Miliamu lɛ́ kɔ wá ɔ́, togun ɔ́ gosín Haselɔ́ti ɖidó, bó yi ɖó gɔnu ɖó gbětótló Paláni tɔn mɛ.