Read fon Kɛ́nsísɔ́ 14 Bible Online

Kɛ́nsísɔ́ 14 - fon bible

Kɛ́nsísɔ́ 14

¹Gbe énɛ́ gbe zǎn mɛ ɔ́, Izlayɛ́li ví lɛ́ɛ ɖo xó sú wɛ, bó ɖo avǐ ya wɛ.

²Yě bǐ ɖó gbe kpɔ́, bó jɛ nǔ hlún ɖɔ dó Mɔyízi kpó Aalɔ́ɔn kpó wú jí, bó nɔ́ ɖɔ nú yě ɖɔ: “Ényí mǐ kó kú ɖo Ejípu ɔ́, é nyɔ́ hú; abǐ ényí mǐ gbɔ bó kú ɖo gbětótló ɔ́ mɛ fí ɔ́, é nyɔ́ hú!

³Aniwú Mawu Mavɔmavɔ ka kplá mǐ xwe to énɛ́ ɔ́ mɛ, bɔ mǐ ná kú ɖo ahwangbénu, bɔ asi mǐtɔn lɛ́ɛ kpó vǐ mǐtɔn lɛ́ɛ kpó ná nyí mɛ e ɖu ɖo jǐ mǐtɔn lɛ́ɛ sín ahwankannumɔ? Mǐ lɛ́ kɔ yi Ejípu ɔ́, é nyɔ́ nú mǐ hú ǎ cé?”

⁴Énɛ́ ɔ́, yě jɛ ɖiɖɔ nú yěɖée jí ɖɔ: “Mǐ ní sɔ́ gǎn ɖokpó ɖó mǐ nu, bó lɛ́ kɔ yi Ejípu.”

⁵Ée Mɔyízi kpódó Aalɔ́ɔn kpó se mɔ̌ ɔ́, yě xwe agbɔ̌nnusú do ɖo Izlayɛ́li ví lɛ́ɛ bǐ nukɔn.

⁶Nya we ɖé lɛ́ɛ ká ɖo mɛ e yi ba do nú to ɔ́ lɛ́ɛ mɛ: Jozuwée, Nuni ví ɔ́, kpódó Kalɛ́bu, Yefunnɛ́ɛ ví ɔ́ kpó. Yědɛɛ lɛ́ɛ sin xomɛ, bó vún awu dó kɔ nú yěɖée,

⁷bó ɖɔ nú Izlayɛ́li ví lɛ́ɛ ɖɔ: “To e mǐ yi ba do ná ɔ́, to ɖagbe wɛ.

⁸Nú Mawu Mavɔmavɔ nyɔ́ xomɛ dó mǐ wú ɔ́, é ná kplá mǐ yi to ɔ́ mɛ, bó ná ná to ɔ́ mǐ. Anɔ̌sin kpó wǐin kpó wɛ nɔ́ sa ɖo fínɛ́.

⁹ Nǔ e wɛ kpowun ɔ́ ɖíe: mi ma fɔ́n gǔ dó Mawu Mavɔmavɔ jí ó, mi ma ka ɖi xɛsi nú to ɔ́ mɛ nu lɛ́ɛ ó, ɖó mǐ nǎ ɖu ɖo jǐ yětɔn; vodún e nɔ́ cyɔ́n alɔ yě jí lɛ́ɛ ɖě sɔ́ ɖo jǐ yětɔn ǎ. Mawu Mavɔmavɔ ka ɖo kpɔ́ xá mǐdɛɛ lɛ́ɛ; mǐ ní bó má ɖi xɛsi nú yě ó.”

¹⁰Togun ɔ́ bǐ ká ɖó gbe kpɔ́, bó jɛ ɖiɖɔ jí ɖɔ è nǐ nyi hwǎn dó hu yě; tlóló kpowun ɔ́, susu Mawu Mavɔmavɔ tɔn tɔ́n ɖo Goxɔ ɔ́ jí, ɖo Izlayɛ́li ví lɛ́ɛ bǐ nukɔn.

¹¹Bɔ Mawu Mavɔmavɔ ɖɔ nú Mɔyízi ɖɔ: “Káká hwetɛ́nu wɛ togun élɔ́ ká ná gbɛ́ wǎn nú mì yi jɛ? Nǔjíwǔ tobutóbú e un bló ɖo tɛ́ntin yětɔn ɔ́ nɛ́ có, yě ɖǒ jiɖiɖe dó wǔ ce ǎ. Káká hwetɛ́nu wɛ yě ká ná nɔ mɔ̌ yi jɛ?

¹²Un ná bló bɔ jɛmɛjí ná byɔ́ yě mɛ, bó ná sú kún yětɔn dó; un ka ná zé we dó bló akɔta ɖé bɔ é ná sukpɔ́, bó ná syɛ́n hú yě.”

¹³ Ée Mawu Mavɔmavɔ ɖɔ mɔ̌ ɔ́, Mɔyízi ɖɔ n'i ɖɔ: “Nú a blǒ mɔ̌ ɔ́, Ejípunu e tɛ́ntin a zě hlɔ̌nhlɔ́n towe dó ɖe yě sín ɔ́ ná wá se,

¹⁴bó ná ɖɔ nú to énɛ́ ɔ́ mɛ nu lɛ́ɛ. Yě tunwun ɖɔ hwi Mawu Mavɔmavɔ ɔ́, a ɖo togun élɔ́ tɛ́ntin; yě tunwun ɖɔ a nɔ tɔ́n dó yě jí gannaganna, bɔ akpɔ́kpɔ́ towe ɖo jǐ yětɔn. Yě tunwun ɖɔ kéze ɔ́, a nɔ ɖo nukɔn yětɔn, ɖo akpɔ́kpɔ́ ɖaxó mɛ, bɔ zǎn mɛ ɔ́, a nɔ ɖo nukɔn yětɔn ɖo myɔ ɖé mɛ.

¹⁵Din ɔ́, nú a sú togun towe sín kún dó vawun mɔ̌ ɔ́, akɔta e ko se nǔ e a wa nɛ́ lɛ́ɛ ná ɖɔ:

¹⁶‘Mawu Mavɔmavɔ sixú kplá togun ɔ́ yi to e sín akpá é dó n'i ɔ́ mɛ ǎ, énɛ́ wú wɛ é sú kún tɔn dó ɖo gbětótló mɛ.’

¹⁷Énɛ́ ɔ́ wú ɔ́, Aklúnɔ, un ɖo vo sa nú we wɛ. Zǎn hlɔ̌nhlɔ́n towe; wa nǔ lě e a ɖɔ nú mǐ gbɔn é. A ɖɔ:

¹⁸ ‘Mawu Mavɔmavɔ wɛ un nyí; un nɔ yá wǔ sin xomɛ ǎ; un nyí Mawu xomɛnyɔ́tɔ́; un nɔ sɔ́ nǔ nyanya e è wa lɛ́ɛ kpódó tónú e è ma se ǎ lɛ́ɛ kpó kɛ mɛ. Un ká nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐtɔ́ lɛ́ɛ hu ɔ́, vǐ yětɔn lɛ́ɛ ná sún sin tɔn; vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.’

¹⁹Mawu Mavɔmavɔ, kɛnklɛ́n kpɔ́n dó xomɛnyínyɔ́ towe wú, bó zé hwɛ e togun élɔ́ hu ɔ́ kɛ ɛ, lě e a ko nɔ bló gbɔn n'i sín Ejípu káká wá jɛ fí é.”

²⁰Mawu Mavɔmavɔ ka yí gbe nú Mɔyízi ɖɔ: “Un sɔ́ hwɛ kɛ togun ɔ́ lě e a byɔ́ mì gbɔn é.

²¹ Amɔ̌, nyɛ Mawu Mavɔmavɔ ɔ́, un ɖo gbɛ, bɔ susu ce kpé ayǐkúngban ɔ́ bǐ jǐ.

²²Yě mɛ e mɔ susu ce, bó mɔ nǔjíwǔ e un bló ɖo Ejípu, bó bló ɖo gbětótló mɛ lɛ́ɛ, yě mɛ énɛ́ lɛ́ɛ e tɛ́n mì kpɔ́n azɔn mɔ̌kpán, lobo ma ɖótó mì ǎ lɛ́ɛ ɔ́,

²³ɖokpó ná mɔ to e un dó akpá tɔn nú tɔ́gbó yětɔn lɛ́ɛ ɖɔ un ná ná yě ɔ́ ǎ. Yě mɛ e gbɛ́ wǎn nú mì lɛ́ɛ ɖě ná mɔ to ɔ́ ǎ.

²⁴ Amɔ̌, mɛsɛntɔ́ ce Kalɛ́bu ɔ́, ayi ɖo xomɛ nú éyɛ́, bɔ é nɔ gbejí nú mì. Énɛ́ ɔ́ wú ɔ́, un ná kplá ɛ yi to e é yi ba do ná ɔ́ mɛ, bó ná ná to ɔ́ vǐ tɔn lɛ́ɛ.

²⁵Amalɛ́ki ví lɛ́ɛ kpódó Kanáanu lɛ́ɛ kpó ɔ́, tɔdo e ɖo gbě énɛ́ ɔ́ jí ɔ́ mɛ wɛ yě ɖe din. Sɔ su hǔn, mi lɛ́ kɔ gbɔn gbětótló mɛ, ɖo Xu Vɔvɔ ɔ́ sín awa jí.”

²⁶Mawu Mavɔmavɔ lɛ́ ɖɔ nú Mɔyízi kpódó Aalɔ́ɔn kpó ɖɔ:

²⁷“Un se Izlayɛ́li ví lɛ́ɛ ɖo nǔ hlún ɖɔ dó wǔ ce wɛ; káká hwetɛ́nu wɛ un ka ná jó togun baɖabaɖa énɛ́ ɔ́ dó, bɔ é ná hlún nǔ ɖɔ dó wǔ ce yi jɛ?

²⁸Mi yi ɖɔ nú yě ɖɔ: ‘Nyɛ Mawu Mavɔmavɔ ɔ́, un ɖo gbɛ; xó e mi ɖɔ bɔ un se lɛ́ɛ wɛ un ná dó wa nǔ xá mi.

²⁹ Mi bǐ wɛ ná kú ɖo gbětótló mɛ fí. Mi mɛ e è ko yí nyǐkɔ mitɔn, bó kó sɔ́ kɛ́n mitɔn, bɛ́ sín mɛ e ɖó xwe ko lɛ́ɛ jí, sɔ́ yi mɛ e ɖó hú mɔ̌ lɛ́ɛ jí ɔ́, mi bǐ wɛ ná kú, ɖó mi hlún nǔ ɖɔ dó wǔ ce.

³⁰Mi sɔ́ ná yi to e sín akpá un dó nú mi ɖɔ mi ná nɔ mɛ ɔ́ mɛ ǎ. Kalɛ́bu Yefunnɛ́ɛ ví ɔ́, kpódó Jozuwée Nuni ví ɔ́ kpó ná yi to ɔ́ mɛ.

³¹Vǐvú mitɔn e mi ɖɔ ná ɖɔ mɛ e ná ɖu ɖo jǐ mitɔn lɛ́ɛ sín ahwankannumɔ wɛ yě ná nyí lɛ́ɛ ɔ́, un ná kplá yědɛɛ lɛ́ɛ yi to e mi gbɛ́ wǎn ná ɔ́ mɛ, bɔ yě ná tunwun to ɔ́.

³²Midɛɛ lɛ́ɛ ɔ́, mi ná kú ɖo gbětótló mɛ.

³³ Vǐ mitɔn lɛ́ɛ ná ɖo flúflú wɛ gbɔn gbětótló mɛ xɔ xwe kanɖé (40); lě e yě ná sú gbejí e mi ma nɔ ǎ ɔ́ sín axɔ́ gbɔn káká bɔ mi bǐ ná kú vɔ ɖo gbětótló mɛ ɔ́ nɛ́.

³⁴Azǎn kanɖé (40) wɛ mi sɔ́ ɖó te bo dó ba do nú to ɔ́; mɔ̌ ɖokpó ɔ́, mi ná hɛn hwɛgban mitɔn lɛ́ɛ xɔ xwe kanɖé (40); xwe ɖokpó ɖo azǎn ɖokpó tɛnmɛ. Énɛ́ ɔ́, nú un húzú kpan nukɔn mɛ ɔ́ nǔ e ɖ'é mɛ ɔ́ mi ná tunwun.

³⁵Nyɛ Mawu Mavɔmavɔ wɛ ɖɔ mɔ̌! Lě e un ná wa togun baɖabaɖa élɔ́ e fɔ́n gǔ dó jǐ ce ɔ́ sín nǔ gbɔn ɔ́ nɛ́. Yě bǐ wɛ ná kú ɖo gbětótló mɛ fí. Mɛ ɖé ná kpo ǎ.’ ”

³⁶Mɛ e Mɔyízi sɛ́ dó bɔ yě yi ba do nú to ɔ́, bó lɛ́ kɔ wá ɖɔ to ɔ́ sín xó nyanya, bɔ togun ɔ́ jɛ nǔ hlún ɖɔ dó Mɔyízi wú jí lɛ́ɛ ɔ́,

³⁷yě kú; Mawu Mavɔmavɔ sín alɔ jɛ yě wǔ, ɖó yě ɖɔ xó nyanya dó to ɔ́ wú.

³⁸Jozuwée kpó Kalɛ́bu kpó kɛ́ɖɛ́ wɛ nyí mɛ e gán ɖo mɛ e Mɔyízi sɛ́ dó lɛ́ɛ mɛ é.

³⁹Mɔyízi ɖɔ nǔ e Mawu Mavɔmavɔ ɖɔ lɛ́ɛ bǐ nú Izlayɛ́li ví lɛ́ɛ, bɔ wǔ kú yě ɖésú.

⁴⁰Énɛ́ ɔ́ wú wɛ togun ɔ́ fɔ́n zǎn jɛ ali, bó wlí sókan mɛ sín ali ɔ́ bó ɖɔ: “Mǐ wa nǔ nyi do! Amɔ̌, din ɔ́, mǐ ɖo gbesisɔ mɛ bo ná yi fí e Mawu Mavɔmavɔ ɖɔ mǐ ní yi ɔ́.”

⁴¹Mɔyízi ka ɖɔ nú yě ɖɔ: “Étɛ́ mi ná yi wa ɖo dɔ̌n? Mi gba Mawu Mavɔmavɔ sín sɛ́n; mi yi ɔ́, é ná kpa mi ǎ,

⁴²ɖó Mawu Mavɔmavɔ sɔ́ ɖo kpɔ́ xá mi ǎ; mi ma sɔ́ miɖée yi jó nú kɛntɔ́ ó.

⁴³Đó Amalɛ́ki ví lɛ́ɛ kpódó Kanáanu lɛ́ɛ kpó ɖo fínɛ́, ɖo nukɔn mitɔn; mi ná cí ahwan, ɖó mi ko lɛ́ kɔ sín Mawu Mavɔmavɔ gúdo. Mawu Mavɔmavɔ sɔ́ ná nɔ kpɔ́ xá mi ǎ.”

⁴⁴Mɔyízi ɖɔ mɔ̌ nú Izlayɛ́li ví lɛ́ɛ có yě xwe nǔ, bó ɖidó sókan ɔ́ mɛ; Mɔyízi kpó akɔjijɛgbá ɔ́ kpó ká sɛ tɛn sín fí e yě ɖó gɔnu ɖó ɔ́ ǎ.

⁴⁵Énɛ́ ɔ́, Amalɛ́ki ví lɛ́ɛ kpódó Kanáanu lɛ́ɛ kpó ɖo sókan ɔ́ mɛ; yě jɛ te sín só ɔ́ jí, bó wá fun ahwan xá Izlayɛ́li ví lɛ́ɛ, bó ɖu ɖo yě jí, bó jɛ gǔdo yětɔn káká wá Hɔ́ɔma.