Read fon Kɛ́nsísɔ́ 16 Bible Online

Kɛ́nsísɔ́ 16 - fon bible

Kɛ́nsísɔ́ 16

¹ Levíi ví ɖé tíin, bó nyí Kolée. Yisexáa ví wɛ é nyí ɖo Kexáti hɛ̌nnu ɔ́ mɛ. É kplɔ́n nǔ mɛ atɔn ɖo akɔta Hwlibɛ́ni tɔn mɛ. Mɛ atɔn lɛ́ɛ wɛ nyí Datáni kpó Abilámu, Eliavu sín vǐ ɔ́ kpó, kpódó Onu Pɛlɛ́ti ví ɔ́ kpó.

²Yě fɔ́n gǔ dó Mɔyízi jí. Izlayɛ́li sín gǎn lɛ́ɛ kpódó tomɛxó lɛ́ɛ kpó wɛ nɔ́ ná tasyɛ́n yě. Yě mɛ afɔɖé kanɖé wǒ wɛ (250).

³Yě kplé lɛ́ lɛ̌ dó Mɔyízi kpó Aalɔ́ɔn kpó, bó ɖɔ nú yě ɖɔ: “É kpé mɔ̌ lo! Đó mǐ mɛ e ɖo Izlayɛ́li sín togun ɔ́ mɛ lɛ́ɛ bǐ wɛ nyí Mawu Mavɔmavɔ tɔn, bɔ Mawu Mavɔmavɔ ɖo mǐ bǐ tɛ́ntin. Aniwú wɛ mi nɔ mɔ ɖɔ émí hú gǎn mɛ e ɖo togun Mawu Mavɔmavɔ tɔn mɛ lɛ́ɛ bǐ?”

⁴Ée Mɔyízi se mɔ̌ ɔ́, é xwe agbɔ̌nnusú do,

⁵bó ɖɔ nú Kolée kpó ahwan tɔn lɛ́ɛ kpó ɖɔ: “É jɛ sɔ zǎnzǎn ɔ́, Mawu Mavɔmavɔ ná ɖe mɛ e nyí étɔn bɔ é sɔ́ ɖó vo bɔ é ná nɔ́ sɛkpɔ́ ɛ ɔ́ xlɛ́. É ná jó mɛ e é sɔ́ ɔ́ dó bɔ é ná wá gɔ̌n tɔn.

⁶Kolée, hwi kpódó ahwan towe lɛ́ɛ kpó ɔ́, nǔ e mi ná bló ɔ́ ɖíe: mi zé zǎlínkpɔ́nfyɔ́nú.

⁷É jɛ sɔ ɔ́, mi ná bɛ́ myɔkán d'é mɛ, bó ná kɔn zǎlínkpɔ́n d'é jí ɖo Mawu Mavɔmavɔ nukɔn. Énɛ́ ɔ́, è nǎ mɔ mɛ e Mawu Mavɔmavɔ sɔ́ é; è nǎ tunwun mɛ e nyí étɔn é. Mi mɛ Levíi ví lɛ́ɛ wɛ un ná ɖɔ ná ɖɔ é kpé mɔ̌ lo.”

⁸Mɔyízi lɛ́ ɖɔ nú Kolée ɖɔ: “Levíi ví lɛ́ɛ mi, mi ɖótó mì.

⁹Ée Mawu Mavɔmavɔ, Mawu Izlayɛ́li tɔn ɔ́ ɖe mi ɖó vo ɖo Izlayɛ́li ví ɖě lɛ́ɛ mɛ, bónú mi ná nɔ́ sɛkpɔ́ ɛ, bó ná nɔ́ kpé nukún dó Goxɔ tɔn wú, bó ná nɔ́ sɛn Mawu Mavɔmavɔ ɖó Izlayɛ́li togun ɔ́ ta mɛ ɔ́, nǔ énɛ́ ɔ́ kpé mi ǎ wɛ a?

¹⁰Mawu Mavɔmavɔ yí gbe ɖɔ hwi kpó nɔví towe súnnu Levíi ví lɛ́ɛ bǐ kpó ní sɛkpɔ́ émí, bɔ énɛ́ ɔ́ kpé mi ǎ, bɔ mi lɛ́ ɖo vɔ̌sánú-xwlémawutɔ́ sín azɔ̌ ba ná wa gɔ́ nú énɛ́ ɔ́ wɛ dandan.

¹¹Nǔ énɛ́ ɔ́ wú wɛ hwi kpó ahwan towe lɛ́ɛ bǐ kpó fɔ́n gǔ dó Mawu Mavɔmavɔ jí, ɖó nú è nǎ ɖɔ xó nǔgbó ɔ́, Aalɔ́ɔn wú ɖɔ xó dó wɛ mi ɖe ǎ.”

¹²Ée Mɔyízi ɖɔ mɔ̌ ɔ́, é sɛ́ mɛ dó bɔ è yi ylɔ́ Eliavu ví Datáni kpó Abilámu kpó wá. Lo ɔ́, yě ɖɔ sɛ́ dó Mɔyízi ɖɔ: “Mǐ jǎwe ǎ!

¹³A kplá mǐ sín to e mɛ nyibúnɔ́sin kpó wǐin kpó ɖo sisa ɖe wɛ ɔ́ mɛ, bó ná hu mǐ ɖo gbětótló mɛ. É ɖo mɔ̌ có énɛ́ ɔ́ kó kpé we ǎ, bɔ a jlǒ ná kpa acɛ nú mǐ gǎn mǐtɔn wɛ a nyǐ ɖɔhun.

¹⁴Gbeɖé, a kplá mǐ yi to e mɛ nyibúnɔ́sin kpó wǐin kpó ɖo sisa wɛ ɖe ɔ́ mɛ ǎ. A nǎ gle mǐ ǎ, a ka ná vǐwungbo mǐ ǎ. Nukúntíntɔ́nnɔ lɛ́ɛ wɛ a ka kpé nǔ xá wɛ a vɛdó a? Mǐ jǎwe ǎ, mǐ gbɛ́!”

¹⁵Ée Mɔyízi se mɔ̌ ɔ́, xomɛ sin i ɖésú. É ɖɔ nú Mawu Mavɔmavɔ ɖɔ: “Ma yí nǔníná yětɔn ó; un yí nǔ ɖěbǔ ɖo yě sí kpɔ́n gbeɖé ǎ; un tlɛ yí tócí vɔ́vɔ́ ɖo yě sí ǎ, un ka wa nǔ nyi do nú mɛɖé ɖo yě mɛ gbeɖé kpɔ́n ǎ.”

¹⁶Mɔyízi ɖɔ nú Kolée ɖɔ: “É jɛ sɔ ɔ́, hwi kpó ahwan towe lɛ́ɛ kpó ní wá Mawu Mavɔmavɔ nukɔn; Aalɔ́ɔn lɔmɔ̌ ná ɖo fínɛ́.

¹⁷Mɛ towe afɔɖé kanɖé wǒ (250) lɛ́ɛ ɖokpó ɖokpó ná zé zǎlínkpɔ́nfyɔ́nú tɔn bó ná kɔn zǎlínkpɔ́n d'é mɛ, lobo ná zé wá Mawu Mavɔmavɔ nukɔn. Hwi kpó Aalɔ́ɔn kpó ná bló nǔ ɖokpó ɔ́.”

¹⁸Kolée kpó ahwan tɔn lɛ́ɛ kpó bló nǔ e Mɔyízi ɖɔ é. Mɛ ɖokpó ɖokpó zé zǎlínkpɔ́nfyɔ́nú tɔn, bó kɔn myɔkán d'é mɛ, bó kɔn zǎlínkpɔ́n d'é jí, bó wá nɔ Goxɔ ɔ́ sín ali nu. Mɔyízi kpó Aalɔ́ɔn kpó lɔmɔ̌ wǎ,

¹⁹bɔ Kolée kplé togun Izlayɛ́li tɔn ɔ́ bǐ ɖó nukɔn yětɔn, ɖo Goxɔ ɔ́ sín ali nu. Ée yě wá kplé ɔ́, susu Mawu Mavɔmavɔ tɔn tɔ́n dó togun ɔ́ bǐ jí,

²⁰bɔ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ:

²¹“Mi tɔ́n sín mɛ énɛ́ lɛ́ɛ mɛ, ɖó un ná sú kún yětɔn dó din, ɖo nukúnxwixwe ɖokpó mɛ.”

²²Ée Mawu Mavɔmavɔ ɖɔ mɔ̌ ɔ́, Mɔyízi kpó Aalɔ́ɔn kpó xwe agbɔ̌nnusú do, bó sú xó ɖɔ: “Yéége Mawu! Hwi mɛ e ná gbɛ nǔɖíɖó lɛ́ɛ bǐ ɔ́, a nǎ kpɔ́n dó hwɛ e mɛ ɖokpó géé hu ɔ́ wú, bó ná sin xomɛ dó togun ɔ́ bǐ sésé wɛ a?”

²³Mawu Mavɔmavɔ ka yí gbe nú Mɔyízi ɖɔ:

²⁴“Đɔ nú togun ɔ́ ɖɔ yě ní sɛ yi zɔ nú fí e Kolée kpó Datáni kpó, kpódó Abilámu kpó ɖe ɔ́.”

²⁵Mɔyízi ka sí te bo ɖidó Datáni kpó Abilámu kpó gɔ́n, bɔ tomɛxó Izlayɛ́li tɔn lɛ́ɛ xwedó e.

²⁶É ɖɔ nú togun ɔ́ ɖɔ: “Mi sɛ yi zɔ nú mɛdídá élɔ́ lɛ́ɛ sín Goxɔ lɛ́ɛ; mi ma ɖ'alɔ nǔ yětɔn lɛ́ɛ ɖěbǔ wú ó, é má nyí mɔ̌ ǎ ɔ́, mi lɔmɔ̌ táá wá kú ɖó hwɛ e yě hu lɛ́ɛ wú.”

²⁷Ée Mɔyízi ɖɔ mɔ̌ ɔ́, togun ɔ́ sɛ yi zɔ dó fí e Kolée kpó Datáni kpó, kpódó Abilámu kpó ɖe é. Datáni kpó Abilámu kpó tɔ́n, bó wá nɔ te Goxɔ yětɔn lɛ́ɛ sín ali nu kpó asi yětɔn lɛ́ɛ kpó, kpó vǐ yětɔn lɛ́ɛ kpó, kpódó vǐvú yětɔn lɛ́ɛ kpó.

²⁸Énɛ́ ɔ́ gúdo ɔ́, Mɔyízi ɖɔ nú togun ɔ́ ɖɔ: “Mi ná mɔ din ɖɔ Mawu Mavɔmavɔ wɛ sɛ́ mì dó nǔgbó, nú má wa azɔ̌ énɛ́ lɛ́ɛ bǐ; mi ná mɔ ɖɔ é kún nyí nyɛ ɖésú wɛ kpɔ́n xo ce mɛ bo bló mɔ̌ ó.

²⁹Ényí mɛ élɔ́ lɛ́ɛ kú sɛ́ kú e mɛ bǐ nɔ́ kú ɔ́, hǔn Mawu Mavɔmavɔ wɛ sɛ́ mì dó ǎ.

³⁰Lo ɔ́, ényí Mawu Mavɔmavɔ wa azɔ̌jíwǔ ɖé ɔ́, ényí ayǐkúngban kɛ nu, bo fɔ yě kpó nǔ e yě ɖó lɛ́ɛ bǐ kpó mi ɔ́, nú yě zɔn gbɛ yi kútomɛ ɔ́, mi ná tunwun ɖɔ mɛ énɛ́ lɛ́ɛ ɔ́, Mawu Mavɔmavɔ wɛ yě zun.”

³¹Xó ɔ́ ɖɔ fó wɛ Mɔyízi ɖe kɛ́ɖɛ́, bɔ ayǐkúngban kɛ nu ɖo Datáni kpó Abilámu kpó sín afɔ glɔ́.

³²Ayǐkúngban kɛ nu bo mi yě kpó hɛ̌nnu yětɔn lɛ́ɛ kpó, kpó Kolée sín ahwan lɛ́ɛ lɔmɔ̌ kpó, kpódó dɔkun yětɔn lɛ́ɛ bǐ kpó.

³³Nya énɛ́ lɛ́ɛ zɔn gbɛ yi kútomɛ kpó nǔ e yě ɖó lɛ́ɛ bǐ kpó; ayǐkúngban ɔ́ mi yě, bɔ kún yětɔn sú dó sín togun Izlayɛ́li tɔn ɔ́ mɛ.

³⁴Ée Izlayɛ́li ví e sɛkpɔ́ yě lɛ́ɛ se xósúsú yětɔn ɔ́, Izlayɛ́li ví lɛ́ɛ bǐ hɔn bó ɖɔ: “Ayǐkúngban ní vɛ́ má mi mǐ ó mɛ!”

³⁵Énɛ́ ɔ́ gúdo ɔ́, Mawu Mavɔmavɔ sɛ́ myɔ dó, bɔ é fyɔ́ yě mɛ afɔɖé kanɖé wǒ (250) e ɖo zǎlínkpɔ́n xwlé e wɛ lɛ́ɛ gbɛɖe gbɛɖe.