Read fon Kɛ́nsísɔ́ 17 Bible Online

Kɛ́nsísɔ́ 17 - fon bible

Kɛ́nsísɔ́ 17

¹Mawu Mavɔmavɔ ɖɔ nú Mɔyízi ɖɔ:

²“Đɔ nú vɔ̌sánú-xwlémawutɔ́ Eleazáa, Aalɔ́ɔn ví ɔ́ ɖɔ é ní cyán zǎlínkpɔ́nfyɔ́nú lɛ́ɛ sín myɔ mɛ, bó kɔn myɔkán lɛ́ɛ nyi gbě; nǔ mímɛ́ wɛ zǎlínkpɔ́nfyɔ́nú énɛ́ lɛ́ɛ nyí.

³Đó zǎlínkpɔ́nfyɔ́nú énɛ́ lɛ́ɛ na bo nyí mɛ e hu hwɛ bó kú lɛ́ɛ tɔn ɔ́, nyɛ Mawu Mavɔmavɔ ɔ́ wɛ è sɔ́ xwlé. È nǎ fɔ yě dó tun gan gbajagbaja ɖé ná, bó ná fɔ cyɔ́n vɔ̌sákpe ɔ́, bɔ yě ná nyí flǐn ɖé nú Izlayɛ́li ví lɛ́ɛ.”

⁴Énɛ́ ɔ́, vɔ̌sánú-xwlémawutɔ́ Eleazáa bɛ́ zǎlínkpɔ́nfyɔ́nú mɛ e fyɔ́ lɛ́ɛ tɔn, bó fɔ yě dó tun gan gbajagbaja ɖé lɛ́ɛ ná, bó ná cyɔ́n vɔ̌sákpe ɔ́. Zǎlínkpɔ́nfyɔ́nú énɛ́ lɛ́ɛ ɔ́, ganvɔ wɛ è zě dó tun yě.

⁵Nǔ énɛ́ e è cyɔ́n dó vɔ̌sákpe ɔ́ nɔ́ flín Izlayɛ́li ví lɛ́ɛ ɖɔ mɛ ɖěbǔ kún ɖó acɛ e ná dó zǎlínkpɔ́n zo nú nyɛ Mawu Mavɔmavɔ ɔ́ zɛ kúnkan Aalɔ́ɔn tɔn lɛ́ɛ wú ó. Mɛ ɖěbǔ bló mɔ̌ ɔ́, awě e xo Kolée kpó ahwan tɔn lɛ́ɛ kpó ɔ́ wɛ ná xo mɛ ɔ́, lě e nyɛ Mawu Mavɔmavɔ ko ɖɔ gbɔn Mɔyízi jí é.

⁶Ée Mawu Mavɔmavɔ ɖɔ xó énɛ́ ɔ́ nú Mɔyízi bɔ ayǐ hɔ́n ɔ́, togun Izlayɛ́li tɔn ɔ́ bǐ jɛ nǔ hlún ɖɔ dó Mɔyízi kpó Aalɔ́ɔn kpó wú jí. Yě ɖɔ nú yě ɖɔ: “Mi hu togun Mawu Mavɔmavɔ tɔn ɔ́.”

⁷Izlayɛ́li ví lɛ́ɛ xísí dó Mɔyízi kpó Aalɔ́ɔn kpó. Lo ɔ́, hwenu e yě kpɔ́n Goxɔ ɔ́ sɛ́ dó ɔ́, yě mɔ ɖɔ akpɔ́kpɔ́ cyɔ́n ɛ, bɔ Mawu Mavɔmavɔ ɖo susu tɔn ɖe xlɛ́ wɛ ɖo fínɛ́.

⁸Mɔyízi kpó Aalɔ́ɔn kpó yi Goxɔ ɔ́ nukɔn,

⁹bɔ Mawu Mavɔmavɔ ɖɔ nú Mɔyízi ɖɔ:

¹⁰“Mi gosín togun ɔ́ tɛ́ntin; un ná sú mɛ énɛ́ lɛ́ɛ sín kún dó ɖo nukúnxwixwe ɖokpó mɛ.” Ée Mawu Mavɔmavɔ ɖɔ mɔ̌ ɔ́, Mɔyízi kpó Aalɔ́ɔn kpó xwe agbɔ̌nnusú do,

¹¹bɔ Mɔyízi ɖe gbe nú Aalɔ́ɔn ɖɔ: “Zě zǎlínkpɔ́nfyɔ́nú towe, bó bɛ́ myɔkán e ɖo vɔ̌sákpe ɔ́ jí lɛ́ɛ d'é mɛ, bó kɔn zǎlínkpɔ́n d'é jí. Yǎ wǔ yi togun ɔ́ nukɔn, bó bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, bó sá hwɛxɔ́súsú vɔ́ dó ta yětɔn mɛ, ɖó Mawu Mavɔmavɔ ko sin xomɛ, bɔ awě jɛ mɛ xo jí.”

¹²Aalɔ́ɔn bló nǔ e Mɔyízi ɖɔ n'i é. É kán wezun yi togun ɔ́ tɛ́ntin fí e awě jɛ mɛ xo jí ɖe é. É dó zǎlínkpɔ́n zo bo sá hwɛxɔ́súsú vɔ́ ɔ́ dó togun ɔ́ tamɛ.

¹³É cí mɛ e kú lɛ́ɛ kpó mɛ e kpo ɖo gbɛ lɛ́ɛ kpó tɛ́ntin; énɛ́ ɔ́, awě e ɖo mɛ xo wɛ ɔ́ nɔ te.

¹⁴Gbɛtɔ́ děgba atɔn afɔwó nǔwɔntɔn kanwe ko (14.700) wɛ kú ɖo nǔ énɛ́ ɔ́ mɛ; è ka xa ahwan Kolée tɔn e kú ɖ'ayǐ lɛ́ɛ d'é mɛ ǎ.

¹⁵Ée awě e ɖo mɛ xo wɛ ɔ́ nɔ te lě tlóló ɔ́, Aalɔ́ɔn lɛ́ kɔ yi Mɔyízi gɔ́n ɖo Goxɔ ɔ́ nukɔn.

¹⁶Mawu Mavɔmavɔ ɖɔ nú Mɔyízi ɖɔ:

¹⁷“Đɔ nú Izlayɛ́li ví lɛ́ɛ ɖɔ akɔta lɛ́ɛ ɖokpó ɖokpó sín gǎn ní ná we kpo ɖokpó ɖokpó. Hǔn kpo wěwe wɛ a nǎ yǐ bó ná wlán akɔta ɖokpó ɖokpó sín nyǐkɔ dó kpo tɔn wú.

¹⁸Akɔta Levíi tɔn ɔ́ kɛ́ɖɛ́ sín kpo wú wɛ a ma ná wlán nyǐkɔ tɔn dó ǎ; Aalɔ́ɔn sín nyǐkɔ wɛ a nǎ wlán d'é wú. Énɛ́ ɔ́, akɔtagán ɖokpó ná ɖó kpo ɖokpó.

¹⁹A nǎ bɛ̌ kpo énɛ́ lɛ́ɛ yi ɖó Goxɔ ɔ́ mɛ, ɖo akɔjijɛgbá ɔ́ nukɔn fí e un nɔ wá kpé mi ɖe é.

²⁰Lě e nǔ lɛ́ɛ ná yi gbɔn ɔ́ ɖíe: mɛ e un sɔ́ ɔ́ sín kpo ná tɔ́n kun. Énɛ́ ɔ́, un ná ɖó nǔ e hlún ɖɔ dó mi wú wɛ Izlayɛ́li ví lɛ́ɛ ɖe ɔ́ te. Yě sɔ́ ná hlún nǔ ɖɔ ɖě dó mi wú ǎ.”

²¹Mɔyízi ɖɔ xó e Mawu Mavɔmavɔ ɖɔ n'i ɔ́ nú Izlayɛ́li ví lɛ́ɛ bɔ akɔtagán yětɔn lɛ́ɛ bǐ zé kpo ɖokpó ɖokpó n'i: akɔta ɖokpó kpo ɖokpó, bɔ kpo lɛ́ɛ bǐ bló wěwe. Aalɔ́ɔn sín kpo ɔ́ lɔmɔ̌ ɖo kpo wěwe lɛ́ɛ mɛ.

²²Mɔyízi bɛ́ kpo lɛ́ɛ ɖó akɔjijɛgbá Mawu Mavɔmavɔ tɔn ɔ́ nukɔn, ɖo Goxɔ ɔ́ mɛ.

²³ Ayǐhɔ́ngbe tɔn ɔ́, Mɔyízi byɔ́ Goxɔ ɔ́ mɛ, bó mɔ ɖɔ Aalɔ́ɔn sín kpo e nyí akɔta Levíi tɔn ɔ́ tɔ́n kun, é ká nyí kun kɛ́ɖɛ́ wɛ é tɔ́n ǎ; lo ɔ́, é lɛ́ gba sɛ́, bó sɛ́n, bɔ sínsɛ́n tɔn lɛ́ɛ myá.

²⁴Mɔyízi ka bɛ́ kpo lɛ́ɛ bǐ tɔ́n sín Goxɔ ɔ́ mɛ, bó yi xlɛ́ Izlayɛ́li ví lɛ́ɛ. Mɛ bǐ mɔ kpo lɛ́ɛ, bɔ gǎn lɛ́ɛ ɖokpó ɖokpó yí kpo yětɔn yětɔn.

²⁵Mawu Mavɔmavɔ lɛ́ ɖɔ nú Mɔyízi ɖɔ: “Lɛ̌ kɔ nú Aalɔ́ɔn sín kpo ɔ́ yi akɔjijɛgbá ɔ́ nukɔn, ɖo Goxɔ ɔ́ mɛ; è nǎ jó kpo ɔ́ dó nyi fínɛ́, bó ná nɔ́ dó flín Izlayɛ́li ví lɛ́ɛ ɖɔ yě kún se tónú ó; nú a blǒ gbɔn mɔ̌ ɔ́, yě ná ɖó nǔ e hlún ɖɔ wɛ yě ɖe ɖo nukɔn ce lɛ́ɛ te bó sɔ́ ná kú ǎ.”

²⁶Mɔyízi bló nǔ e Mawu Mavɔmavɔ ɖɔ n'i lɛ́ɛ bǐ.

²⁷Izlayɛ́li ví lɛ́ɛ ɖɔ nú Mɔyízi ɖɔ: “A mɔ ɖɔ mǐ ɖo kúkú wɛ a cé? A mɔ ɖɔ mǐ mɛ bǐ ɖo dindɔn wɛ a cé?

²⁸Mɛ ɖěbǔ sɛkpɔ́ nɔtɛn Mawu Mavɔmavɔ tɔn ɔ́, mɛ ɔ́ nɔ́ kú. Mɔ̌ wɛ mǐ mɛ bǐ ná kú gbɔn a?”