Read fon Kɛ́nsísɔ́ 20 Bible Online

Kɛ́nsísɔ́ 20 - fon bible

Kɛ́nsísɔ́ 20

¹Izlayɛ́li togun ɔ́ bǐ wǎ gbětótló Síni tɔn ɔ́ mɛ ɖo sun nukɔn tɔn ɔ́ mɛ, bó ɖó gɔnu ɖó Kadɛ́ci. Kadɛ́ci fínɛ́ wɛ Miliamu kú ɖe, bɔ è ɖi i ɖó fínɛ́.

²Togun ɔ́ mɔ sin ǎ, bɔ mɛ lɛ́ɛ fɔ́n gǔ dó Mɔyízi kpó Aalɔ́ɔn kpó jí.

³Togun Izlayɛ́li tɔn ba xó Mɔyízi nu, bó ɖɔ n'i ɖɔ: “Hwenu e Mawu Mavɔmavɔ ɖo nǔ wa xá nɔví mǐtɔn lɛ́ɛ wɛ bɔ yě ɖo kúkú wɛ ɔ́, mǐ lɔ gbɔ bo kú yě ɖɔhun ɔ́, é ná kó nyɔ́ hú!

⁴Aniwú wɛ mi kplá togun Mawu Mavɔmavɔ tɔn ɔ́ wá gbětótló mɛ fí, bɔ mǐ ná kú jɛ fí, mǐ kpó kanlin mǐtɔn lɛ́ɛ kpó?

⁵Nɛ̌ gbɔn bɔ mi kplá mǐ sín Ejípu wá tɛn nyanya élɔ́ mɛ fí? È sixú dó nǔ ɖěbǔ ɖó fí ǎ; fígitín ɖě ɖo fí ǎ, vǐwungbo ɖě ɖo fí ǎ, glenáditín ɖě ɖo fí ǎ, sin nunu ka lɛ́ ɖo fí ǎ.”

⁶Ée Izlayɛ́li ví lɛ́ɛ ɖɔ mɔ̌ ɔ́, Mɔyízi kpó Aalɔ́ɔn kpó sɛ yi zɔ nú yě, bó yi Goxɔ ɔ́ nukɔn, bó xwe agbɔ̌nnusú do; éé yě bló mɔ̌ ɔ́, susu Mawu Mavɔmavɔ tɔn tɔ́n dó yě jí.

⁷Bɔ Mawu Mavɔmavɔ ɖɔ nú Mɔyízi ɖɔ:

⁸“Zě kpo towe. Hwi kpó nɔví towe Aalɔ́ɔn kpó ní kplé Izlayɛ́li ví lɛ́ɛ. Mi ná ɖɔ xó nú só élɔ́ ɖo nukún yětɔn mɛ, bɔ é ná ná sin mi. A nǎ ɖe sin tɔ́n sín só ɔ́ mɛ nú yě, bó ná ná sin yě kpó kanlin yětɔn lɛ́ɛ kpó.”

⁹Ée Mawu Mavɔmavɔ ɖɔ mɔ̌ ɔ́, Mɔyízi yi Goxɔ ɔ́ mɛ, bó zé kpo tɔn lě e Mawu Mavɔmavɔ ɖɔ gbɔn n'i é.

¹⁰Énɛ́ ɔ́, Mɔyízi kpó Aalɔ́ɔn kpó ylɔ́ Izlayɛ́li ví lɛ́ɛ kplé ɖó só ɔ́ nukɔn, bɔ Mɔyízi ɖɔ nú yě ɖɔ: “Gǔfɔ́ntɔ́ e mi, mi ɖótó! Mǐ nǎ sixú kpé wú bó ɖe sin tɔ́n sín só élɔ́ mɛ nú mi a?”

¹¹Ée Mɔyízi kan mɔ̌ byɔ́ yě ɔ́, é zé alɔ yi jǐ, bó zin kpo tɔn dó só ɔ́ wú azɔn we, bɔ sin jɛ tíntɔ́n sín só ɔ́ mɛ jí, bó sukpɔ́ ɖésú. Énɛ́ ɔ́, Izlayɛ́li ví lɛ́ɛ nu, bɔ kanlin yětɔn lɛ́ɛ lɔmɔ̌ nu.

¹²Bɔ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi ɖeji dó wǔ ce ǎ, mi ɖe mǐmɛ́ e un nyí ɔ́ xlɛ́ ɖo Izlayɛ́li ví lɛ́ɛ nukún mɛ ǎ; énɛ́ ɔ́ wú ɔ́, midɛɛ lɛ́ɛ sɔ́ ná kplá togun élɔ́ yi to e un ná yě ɔ́ mɛ ǎ.”

¹³Nǔ énɛ́ e jɛ ɔ́ wú wɛ è nɔ ylɔ́ sin énɛ́ ɔ́ ɖɔ Mɛliba[1] sin. Đó Izlayɛ́li ví lɛ́ɛ ba xó Mawu Mavɔmavɔ nu, bɔ Mawu Mavɔmavɔ ka sɔ́ nǔ énɛ́ dó ɖe mǐmɛ́ e é nyí ɔ́ xlɛ́.

¹⁴Mɔyízi nɔ Kadɛ́ci bo sɛ́ mɛ dó axɔ́sú Edɔ́mu tɔn ɔ́. É ɖɔ sɛ́ dó e ɖɔ: “Đǒtó xó e ɖɔ wɛ mǐ nɔví towe Izlayɛ́li ví lɛ́ɛ ɖe é; a tunwun wǔvɛ́ e mǐ mɔ lɛ́ɛ bǐ.

¹⁵Tɔ́gbó mǐtɔn lɛ́ɛ yi Ejípu ɖ'ayǐ, bɔ mǐ nɔ fínɛ́ ɖésú. Ejípunu lɛ́ɛ dó ya nú mǐ, yě dǒ ya nú tɔ́gbó mǐtɔn lɛ́ɛ kpó mǐ kpó.

¹⁶Mǐ ká sú xó ylɔ́ Mawu Mavɔmavɔ ɖɔ é ní wá dó alɔ mǐ, bɔ é sɔ nú mǐ, bó sɛ́ wɛnsagun ɖokpó dó, bó ɖe mǐ tɔ́n sín Ejípu. Toxo Kadɛ́ci e ɖo to towe sín dogbó jí ɔ́ mɛ wɛ mǐ ɖe din.

¹⁷Kɛnklɛ́n ná gbe mǐ, bónú mǐ ná gbɔn to towe mɛ dín; mǐ ná gbɔn gle lɛ́ɛ mɛ ǎ; mǐ nǎ gbɔn vǐwungbo lɛ́ɛ mɛ ǎ, mǐ nǎ nu dotɔ lɛ́ɛ sín sin ǎ. Axɔ́sú li ɔ́ wɛ mǐ ná wlí; mǐ ná zɛ dó ɖisí abǐ amyɔ káká có bó gbɔn to towe mɛ dín ǎ.”

¹⁸Axɔ́sú Edɔ́mu tɔn ɔ́ ká ɖɔ sɛ́ dó Mɔyízi ɖɔ: “Mi ná gbɔn to ce mɛ dín ǎ; ényí mi ka tɛ́nkpɔ́n ɔ́, un ná fun ahwan xá mi.”

¹⁹Izlayɛ́li ví lɛ́ɛ ká ɖɔ n'i ɖɔ: “Axɔ́sú li ɔ́ kɛ́ɖɛ́ jí wɛ mǐ ná gbɔn. Ényí mǐ kpó kanlin mǐtɔn lɛ́ɛ kpó nu sin ɖo to towe mɛ ɔ́, mǐ nǎ sú axɔ́ tɔn we. Nǔ e byɔ́ we wɛ mǐ ɖe kpowun ɔ́ wɛ nyí ɖɔ a nǐ ná gbe mǐ, bónú mǐ nǎ gbɔn to towe mɛ dín.”

²⁰Axɔ́sú ɔ́ lɛ́ gbɛ́, bó ɖɔ: “Mi ná gbɔn to ce mɛ dín ǎ.” Ée axɔ́sú ɔ́ ɖɔ mɔ̌ ɔ́, Edɔ́munu lɛ́ɛ sɔ́ ahwannú, bó nyi ahwan hooo, bó wá kpé Izlayɛ́li ví lɛ́ɛ,

²¹bó gbo ali nú yě ɖɔ yě kún ná gbɔn to émítɔn mɛ dín ó. Énɛ́ ɔ́, Izlayɛ́li ví lɛ́ɛ wlí ali ɖěvo.

²²Izlayɛ́li ví lɛ́ɛ bǐ gosín Kadɛ́ci toxo ɔ́ mɛ, bó yi Hɔ́ɔ só ɔ́ kɔn,

²³ɖo Edɔ́mu to ɔ́ sín dogbó jí. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖo fínɛ́ ɖɔ:

²⁴“Aalɔ́ɔn ná kú ɖo malín málín mɛ, é sɔ́ ná byɔ́ to e un ná Izlayɛ́li ví lɛ́ɛ ɔ́ mɛ ǎ, ɖó mi se tónú nú mì ɖo Mɛliba sin ɔ́ kɔn ǎ.

²⁵Hǔn Mɔyízi, kplá Aalɔ́ɔn kpó vǐ tɔn súnnu Eleazáa ɔ́ kpó yi Hɔ́ɔ só ɔ́ jí.

²⁶Đe vɔ̌sánú-xwlémawutɔ́ wu lɛ́ɛ sín kɔ tɔn bo dó nú vǐ tɔn Eleazáa. Fínɛ́ wɛ sɛ́ ná ɖó zan nú Aalɔ́ɔn ɖe.”

²⁷Mɔyízi bló nǔ e Mawu Mavɔmavɔ ɖɔ n'i é; yě yi Hɔ́ɔ só ɔ́ jí ɖo togun ɔ́ bǐ nukún mɛ.

²⁸ Bɔ Mɔyízi ɖe awu lɛ́ɛ sín kɔ nú Aalɔ́ɔn bo dó nú vǐ tɔn Eleazáa. Aalɔ́ɔn kú ɖo só ɔ́ jí fínɛ́, bɔ Mɔyízi kpó Eleazáa kpó jɛ te sín só ɔ́ jí.

²⁹Izlayɛ́li ví lɛ́ɛ mɔ ɖɔ Aalɔ́ɔn kú, bɔ yě bǐ ví i káká nú azǎn gban (30).