Read fon Kɛ́nsísɔ́ 22 Bible Online

Kɛ́nsísɔ́ 22 - fon bible

Kɛ́nsísɔ́ 22

¹Izlayɛ́li ví lɛ́ɛ jɛ ali, bó yi ɖó gɔnu ɖó ayǐkúngban wɛnjɛ e ɖo Mɔwabu lɛ́ɛ jí, ɖo Judɛ́ɛn tɔ ɔ́ gúdo ɖo Jeliko toxo ɔ́ nukɔn.

²Balaki Sipɔ́ɔ ví ɔ́ mɔ nǔ e Izlayɛ́li ví lɛ́ɛ wa xá Amɔliti lɛ́ɛ é bǐ.

³Énɛ́ ɔ́, ado ɖaxó ɖé jɛ Mɔwabunu lɛ́ɛ hu jí ɖó lě e togun Izlayɛ́li tɔn ɔ́ sukpɔ́ sɔ é wú, bɔ xɛsi ɖaxó ɖé jɛ yě jǐ ɖo Izlayɛ́li ví lɛ́ɛ nukɔn.

⁴Énɛ́ ɔ́, Mɔwabunu lɛ́ɛ ɖɔ nú tomɛxó Madiáani tɔn lɛ́ɛ ɖɔ: “Ahwan wɔ̌buwɔ́bú élɔ́ ná vɔ nǔ e lɛ́ dó mǐ lɛ́ɛ bǐ, lě e nyibú nɔ́ jɛ fí ɖé bó nɔ́ ɖu ama e gbɔn fínɛ́ ɔ́ bǐ é ɖɔhun.” Hwenɛ́nu ɔ́, Balaki, Sipɔ́ɔ ví ɔ́, wɛ nyí Mɔwabu sín axɔ́sú.

⁵ Balaki sɛ́ mɛ dó Baláamu, Beɔ́ɔ ví ɔ́, ɖo Petɔ́ɔ toxo mɛ. Balaki ɔ́, Efláti tɔ ɔ́ tó wɛ é nɔ́ nɔ, é kpódó mɛ tɔn lɛ́ɛ kpó. É sɛ́ mɛ dó ɖɔ è nǐ yi ɖɔ nú Baláamu ɖɔ: “Togun ɖé ɖíe gosín Ejípu bo wá fí, bó gba kpé to ɔ́ bǐ mɛ e; fí e yě ɖǒ gɔnu ɖó ɔ́ lín dó mǐ ɖěbǔ ǎ.

⁶Kɛnklɛ́n bó wá dó alɔ mì; wǎ dó nu togun ɔ́, ɖó é syɛ́n hú mì; nú a yǐ gbe bo dó nu yě ɔ́, afɔ nyɔ́ ɔ́, un sixú ɖu ɖo yě jí, bó ná nya yě sín to ɔ́ mɛ. Đó un tunwun ɖɔ a xo ɖɛ dó mɛɖé jí ɔ́, mɛ ɔ́ nɔ́ mɔ nyɔ̌ná, a dǒ nu mɛɖé ɔ́, é nɔ́ ɖi mɛ ɔ́ wú.”

⁷Tomɛxó Mɔwabu tɔn lɛ́ɛ kpó Madiáani tɔn lɛ́ɛ kpó hɛn nǔ e yě ná yi ná nǔkantɔ́ Baláamu é. Yě yi Baláamu gɔ́n bó ɖɔ xó e Balaki ɖɔ lɛ́ɛ n'i.

⁸Bɔ Baláamu ɖɔ nú yě ɖɔ: “Mi dɔ́ fí, bónú é kó jɛ sɔ ɔ́, un ná ɖɔ xósin e Mawu Mavɔmavɔ ná ná mì ɔ́ nú mi.” Énɛ́ ɔ́, Mɔwabu sín gǎn lɛ́ɛ nɔ Baláamu gɔ́n.

⁹Mawu wǎ Baláamu gɔ́n, bó kanbyɔ́ ɛ ɖɔ: “Mɛ̌ ká nyí mɛ élɔ́ lɛ́ɛ e a yǐ dó xwé towe gbe ɔ́?”

¹⁰Bɔ Baláamu yí gbe nú Mawu ɖɔ: “Balaki Sipɔ́ɔ ví e nyí axɔ́sú Mɔwabu tɔn ɔ́ wɛ sɛ́ yě dó, bó ɖɔ sɛ́ dó mì ɖɔ:

¹¹‘Togun ɖé gosín Ejípu bo gba kpé to ɔ́ bǐ mɛ. Kɛnklɛ́n bó wá dó nu i. Nú a yǐ gbe bo dó nu i ɔ́, afɔ nyɔ́ ɔ́, un ná sixú ɖu ɖo jǐ tɔn, bó nya ɛ.’ ”

¹²Mawu ká ɖɔ nú Baláamu ɖɔ: “A nǎ xwedó yě yi ǎ; a nǎ dó nu togun ɔ́ ǎ, ɖó un ko xo ɖɛ dó jǐ tɔn.”

¹³Ée ayǐ hɔ́n ɔ́, Baláamu ɖɔ nú gǎn e Balaki sɛ́ dó e lɛ́ɛ ɖɔ: “Mi lɛ́ kɔ yi to mitɔn mɛ; Mawu Mavɔmavɔ gbɛ́ nú mì ɖɔ nyɛ ní má xwedó mi yi ó.”

¹⁴Bɔ Mɔwabu sín gǎn lɛ́ɛ lɛ́ kɔ yi Balaki gɔ́n, bó ɖɔ n'i ɖɔ: “Baláamu gbɛ́ ɖɔ émí kún ná xwedó mǐ wá ó.”

¹⁵Balaki ka lɛ́ sɛ́ gǎn ɖěvo lɛ́ɛ dó bɔ yě sukpɔ́ hú mɛ nukɔntɔn lɛ́ɛ, bó lɛ́ nyí gbɛtɔ́ nukúnɖéjí hú yě.

¹⁶Bɔ yě yi Baláamu gɔ́n, bó ɖɔ n'i ɖɔ: “Balaki Sipɔ́ɔ ví ɔ́ sɛ́ mǐ dó ɖɔ mǐ ní ɖɔ nú we ɖɔ mɛɖé ní má gbɛ́ nú we ɖɔ hwi ní má wá émí gɔ́n, bónú a ɖǒtó mɛ ɔ́ ó.

¹⁷É ɖɔ hwi wá ɔ́, émí ná wlí yɛ̌yi nú hwi ɖésú. Émí ná bló nǔ e hwi ná byɔ́ émí lɛ́ɛ bǐ. Hwi ní kɛnklɛ́n wá dó nu togun ɔ́ nú émí.”

¹⁸Baláamu ka ɖɔ nú mɛ e Balaki sɛ́ dó e lɛ́ɛ ɖɔ: “Kpatágan kpó siká kpó ná bo gɔ́ Balaki sín xwé, bónú é ná xwé ɔ́ mì ɔ́, un sixú wa nǔ ɖěbǔ bɔ é ná gbɔn vo nú xó e Mawu Mavɔmavɔ, Mawu ce ɖɔ nú mì ɔ́ ǎ; é sixú nyí nǔ kpɛví, é sixú nyí nǔ ɖaxó, un sixú bló ǎ.

¹⁹Amɔ̌, mi kɛnklɛ́n bó nɔ fí zǎn élɔ́ mɛ; énɛ́ ɔ́, un ná se xó e Mawu Mavɔmavɔ ná lɛ́ ɖɔ nú mì é.”

²⁰Mawu wǎ Baláamu gɔ́n zǎn mɛ, bó ɖɔ n'i ɖɔ: “Ée é nyí ɖɔ mɛ élɔ́ lɛ́ɛ ɔ́, ylɔ̌ wɛ yě wǎ ylɔ́ we ɔ́, sɔ́ nǔ bó xwedó yě. Amɔ̌, nǔ e un ná ɖɔ nú we ɔ́ wɛ a nǎ bló.”

²¹Ée ayǐ hɔ́n ɔ́, Baláamu blá akpa nú tócí tɔn, bó xwedó Mɔwabu sín gǎn lɛ́ɛ ɖidó. Tócí ɔ́, tócí asi wɛ.

²²Mawu sin xomɛ dó Baláamu, ɖó yi e é yi ɔ́ wú, bɔ wɛnsagun Mawu Mavɔmavɔ tɔn ɖokpó cí ali ɔ́ jí, bó ná gbo ali n'i. Baláamu xá tócí tɔn jí, bɔ mɛsɛntɔ́ tɔn we lɛ́ɛ xwedó e.

²³Tócí ɔ́ mɔ wɛnsagun Mawu Mavɔmavɔ tɔn ɔ́ ɖo te ɖo ali jí, bó hɛn hwǐ tɔn alɔ mɛ. Hwǐ ɔ́ sɔ́ ɖo akún mɛ ǎ, bɔ tócí ɔ́ zɛ, bó byɔ́ gběhan mɛ; lo ɔ́, Baláamu xo e bó lɛ́ kɔ n'i wá ali ɔ́ jí.

²⁴Énɛ́ ɔ́, wɛnsagun Mawu Mavɔmavɔ tɔn yi cí yɛhwín ɖokpó jí ɖo vǐwungbo mɛ, bɔ dǒ ɖo ɖisí amyɔ.

²⁵Tócí ɔ́ mɔ wɛnsagun Mawu Mavɔmavɔ tɔn ɔ́, bó sɛ dó dǒ ɔ́ wú, bɔ Baláamu sín afɔ glín dó dǒ wú, bɔ Baláamu ka lɛ́ xo e.

²⁶Wɛnsagun ɔ́ ká lɛ́ jɛ nukɔn nú yě, bó yi cí fí e ján bɔ è ma sixú zɛ dó ɖisíxwé abǐ amyɔxwé ǎ é.

²⁷Tócí ɔ́ lɛ́ mɔ wɛnsagun ɔ́, bó mlɔ́ ayǐ ɖo gǎn tɔn glɔ́. Ée tócí ɔ́ mlɔ́ ayǐ mɔ̌ ɔ́, Baláamu sin xomɛ ɖésú, bó ɖó kpo n'i.

²⁸Mawu Mavɔmavɔ bló bɔ tócí ɔ́ jɛ xó ɖɔ jí, bó kanbyɔ́ Baláamu ɖɔ: “Étɛ́ un ka wa nú we bɔ a xo mì azɔn atɔn?”

²⁹Baláamu ka yí gbe nú tócí ɔ́ ɖɔ: “Nǔ e a wa xá mì ɔ́ wú wɛ un xo we. Nú hwǐ wɛ ɖo alɔ ce mɛ ɔ́, un ná kó hu we xóxó!”

³⁰Tócí ɔ́ ká ɖɔ nú Baláamu ɖɔ: “Tócí towe wɛ un nyí bɔ a nɔ xá káká wá jɛ égbé a cé? Un nɔ ko bló mɔ̌ ɖě ɖ'ayǐ wɛ a?” Bɔ Baláamu yí gbe n'i ɖɔ: “Éeǒ!”

³¹Hwenɛ́nu ɔ́, Mawu Mavɔmavɔ hun nukún nú Baláamu bɔ é mɔ wɛnsagun ɔ́ ɖo te ɖo ali ɔ́ jí, bó hɛn hwǐ tɔn alɔ mɛ. Ée é mɔ mɔ̌ tlóló ɔ́, é xwe agbɔ̌nnusú do.

³²Bɔ Mawu Mavɔmavɔ kanbyɔ́ ɛ ɖɔ: “Nɛ̌ ka gbɔn bɔ a xo tócí towe azɔn atɔn? Ali wɛ un wá gbo nú we, ɖó un mɔ ɖɔ to élɔ́ e mɛ a xwe ɔ́, dindɔn gbé wɛ a xwe.

³³Azɔn atɔn wɛ tócí ɔ́ mɔ mì bó lɛ́ kɔ sín nukɔn ce. Nú é má nɔ́ lɛ́ kɔ sín nukɔn ce ǎ ɔ́, un ná ko hu we, bó ná jó éyɛ́ dó nyi gbɛ.”

³⁴Baláamu ɖɔ nú wɛnsagun Mawu Mavɔmavɔ tɔn ɔ́ ɖɔ: “Un hu hwɛ, ɖó un tunwun ɖ'ayǐ ɖɔ a ɖo nukɔn ce ɖo ali ɔ́ jí ǎ; din ɔ́, nú a ma jló ɖɔ má yi to ɔ́ mɛ ǎ ɔ́, un ná lɛ́ kɔ yi xwé.”

³⁵Wɛnsagun ɔ́ ɖɔ nú Baláamu ɖɔ: “Ma lɛ́ kɔ yi xwé ó; xwedó nya lɛ́ɛ yi, amɔ̌, xó e un ná ɖɔ nú we lɛ́ɛ kɛ́ɖɛ́ wɛ a nǎ vɔ́ ɖɔ.” Énɛ́ ɔ́, Baláamu lɛ́ jɛ ali xwedó gǎn e Balaki sɛ́ dó lɛ́ɛ.

³⁶Balaki se ɖɔ Baláamu jǎwe, bó tɔ́n yi kpé e ɖo káká Mɔwabu sín toxo e ɖo Aanɔ́ni tɔ ɔ́ tó, ɖo to ɔ́ sín dogbó jí e mɛ.

³⁷Ée Balaki mɔ Baláamu ɔ́, é kanbyɔ́ ɛ ɖɔ: “Un sɛ́ wɛn dó we ɖ'ayǐ ɖɔ hwi ní wá gɔ̌n ce a cé? Nɛ̌ ka gbɔn bɔ a ma wá ǎ? Hǔn a tunwun ɖɔ un kpé wú bó ná wlí yɛ̌yi nú we a cé?”

³⁸Baláamu ká ɖɔ n'i ɖɔ: “Nyɛ ɖíe wá e. Un ka ɖó acɛ e ɖɔ xó e jló mì ɔ́ ǎ. Xó e Mawu ná sɔ́ dó nu nú mì ɔ́ wɛ un ná ɖɔ.”

³⁹Baláamu xwedó Balaki, bɔ yě yi Kiliyati-Usɔ́ti toxo mɛ.

⁴⁰Balaki zé nyibú kpó gbɔ̌ kpó dó sá vɔ̌ ná, bó sɛ́ ɖě dó Baláamu kpó gǎn e xwedó e lɛ́ɛ kpó.

⁴¹Ayǐhɔ́ngbe zǎnzǎn ɔ́, Balaki kplá Baláamu, bɔ yě fán kpó yi Bamɔ́ti-Baalu toxo mɛ, bɔ Baláamu mɔ togun ɔ́ hǎbǔ ɖo fínɛ́.