Read fon Kɛ́nsísɔ́ 24 Bible Online

Kɛ́nsísɔ́ 24 - fon bible

Kɛ́nsísɔ́ 24

¹Baláamu mɔ ɖɔ Mawu Mavɔmavɔ ba ɖɔ émí ní xo ɖɛ dó Izlayɛ́li ví lɛ́ɛ jí. Énɛ́ ɔ́, é sɔ́ xaji yi Mawu Mavɔmavɔ nukɔn ɖ'ayǐ tɔn lɛ́ɛ ɖɔhun, bó ná se xó e é ná ɖɔ n'i é ǎ. Lo ɔ́, é lílɛ́ kpan nukɔn gbětótló mɛ,

²é zé ta d'aga bo mɔ akɔta Izlayɛ́li tɔn lɛ́ɛ ɖó gɔnu ɖó ahwankpá yětɔn yětɔn lɛ́ɛ mɛ. Énɛ́ ɔ́, Yɛ Mawu tɔn wá ta n'i,

³bɔ é ɖɔ: “Nyɛ Baláamu, Beɔ́ɔ ví ɔ́, xó e un ɖɔ ɔ́ ɖíe. Nyɛ mɛ e nɔ́ mɔ nǔ e ná jɛ sɔ ɔ́, xó e un ɖɔ ɔ́ ɖíe.

⁴Nyɛ mɛ e nɔ se xó e Mawu nɔ́ ɖɔ ɔ́, xó e un ɖɔ ɔ́ ɖíe. Nyɛ mɛ e nɔ mɔ nǔɖexlɛ́mɛ Nǔbǐwúkpétɔ́ ɔ́ tɔn lɛ́ɛ ɔ́, xó e un ɖɔ ɔ́ ɖíe, nyɛ mɛ e ɖo sinsɛn ɛ wɛ ɔ́, é nɔ́ ɖe éɖée xlɛ́ mì ɔ́, xó e un ɖɔ ɔ́ ɖíe:

⁵Jakɔ́bu ví lɛ́ɛ mi, Goxɔ mitɔn lɛ́ɛ nyɔ́ ɖɛkpɛ mɛ nya! Izlayɛ́li ví lɛ́ɛ e mi, nɔtɛn mitɔn lɛ́ɛ nyɔ́ ɖɛkpɛ mɛ nya!

⁶Yě cí tɔdo ɖɔhun Yě cí jikpá e ɖo tɔsisa tó é ɖɔhun. Yě cí alowɛ́sitín e Mawu Mavɔmavɔ tun ɔ́ ɖɔhun. Yě cí sɛ́dlutín e ɖo tɔ tó ɔ́ ɖɔhun.

⁷Yě cí tɔ e gbawu, bó nɔ́ sa gbɔn atínkan lɛ́ɛ mɛ é ɖɔhun. Axɔ́sú Izlayɛ́li tɔn ɔ́ ná ɖu ɖo Agagi jí, bɔ axɔ́súɖuto tɔn ná syɛ́n ɖésú.

⁸Mawu ɖe Izlayɛ́li ví lɛ́ɛ tɔ́n sín Ejípu. Hlɔ̌nhlɔ́n agbo tɔn wɛ é dó ɖe yě tɔ́n. Yě nɔ́ vúnvún akɔta e nɔ tɔ́n ahwan yě lɛ́ɛ. Yě nɔ́ wɛ́n xú yě, yě nɔ́ da gǎ yě.

⁹ Izlayɛ́li ví lɛ́ɛ ɖo gbigbɔjɛ́ wɛ, yě mlɔ́ ayǐ kinnikínní ɖɔhun, kinnikínní asi ɖɔhun. Mɛ̌ ká ná sixú fɔ́n yě sí te? Izlayɛ́li togun e, Mawu ní xo ɖɛ dó mɛ e ná xo ɖɛ dó jǐ towe ɔ́ jí. Mawu ní dó nu mɛ e ná dó nu we é.”

¹⁰Ée Baláamu ɖɔ mɔ̌ ɔ́, Balaki sin xomɛ dó e ɖésú bó xo así bó ɖɔ nú Baláamu ɖɔ: “A nǎ dó nu kɛntɔ́ ce lɛ́ɛ wú wɛ un kplá we wá fí; azɔn atɔngɔ́ ɔ́ nɛ́ a ka xo ɖɛ dó yě jí nɛ́.

¹¹Din ɔ́, bǔ dó mì, lɛ̌ kɔ yi xwé towe gbe! Un ko ɖɔ nú we ɖ'ayǐ ɖɔ un ná wlí yɛ̌yi nú we, amɔ̌, Mawu Mavɔmavɔ sú ali tɔn dó we.”

¹²Baláamu ɖɔ nú Balaki ɖɔ: “Un ka ko ɖɔ nú mɛ e a sɛ́ dó mì lɛ́ɛ ɖɔ:

¹³‘Kpatágan kpó siká kpó na bo gɔ́ Balaki sín xwé, bónú é ná xwé ɔ́ mì ɔ́, un sixú wa nǔ ɖěbǔ bɔ é ná gbɔn vo nú xó e Mawu Mavɔmavɔ ɖɔ nú mì ɔ́ ǎ; é sixú nyí nǔ ɖagbe, é sixú nyí nǔ nyanya; xó e Mawu Mavɔmavɔ ɖɔ ɔ́ wɛ un ná ɖɔ.’

¹⁴Din ɔ́, un ná lɛ́ kɔ yi togun ce mɛ. Wǎ má ɖɔ nǔ e togun élɔ́ ná wa xá togun towe ɖo sɔ gúdo ɔ́ nú we.”

¹⁵Énɛ́ ɔ́, Baláamu ɖɔ nú Balaki ɖɔ: “Nyɛ Baláamu, Beɔ́ɔ ví ɔ́, xó e un ɖɔ ɔ́ ɖíe. Nyɛ mɛ e nɔ́ mɔ nǔ e ná jɛ sɔ ɔ́, xó e un ɖɔ ɔ́ ɖíe.

¹⁶Nyɛ mɛ e nɔ se xó e Mawu nɔ́ ɖɔ lɛ́ɛ ɔ́, xó e un ɖɔ ɔ́ ɖíe. Nyɛ mɛ e nɔ mɔ do nú tito Ajalɔ̌nlɔn ɔ́ tɔn lɛ́ɛ ɔ́, xó e un ɖɔ ɔ́ ɖíe. Nyɛ mɛ e nɔ mɔ nǔɖexlɛ́mɛ Nǔbǐwúkpétɔ́ ɔ́ tɔn lɛ́ɛ ɔ́, xó e un ɖɔ ɔ́ ɖíe. Nyɛ mɛ e ɖo sinsɛn ɛ wɛ ɔ́, é nɔ́ ɖe éɖée xlɛ́ mì ɔ́, xó e un ɖɔ ɔ́ ɖíe.

¹⁷Un mɔ nǔ e ɖo nǎ jɛ wɛ ɔ́, amɔ̌, égbé wɛ nǔ ɔ́ ná jɛ ǎ. Ayi ce ɖo nǔ e ná jɛ ɔ́ mɔ wɛ. É kó wá yá ɔ́, nǔ ɔ́ ná jɛ. Sunví ɖokpó tɔ́n ɖo Jakɔ́bu kúnkan lɛ́ɛ mɛ. Axɔ́sú ɖaxó ɖokpó tɔ́n ɖo Izlayɛ́li togun ɔ́ tɛ́ntin. É zin gǎnkpogɛ tɔn dó tókpá nú Mɔwabunu lɛ́ɛ. É dó gǎnkpogɛ tɔn dó ta nú Sɛ́ti ví lɛ́ɛ.

¹⁸É kpa acɛ nú Edɔ́mu. É kpa acɛ nú kɛntɔ́ tɔn Seyíinu lɛ́ɛ. Izlayɛ́li togun ɔ́ ɖe hlɔ̌nhlɔ́n tɔn xlɛ́.

¹⁹Mɛ e tɔ́n ɖo Jakɔ́bu kúnkan mɛ ɔ́ kpa acɛ nú kɛntɔ́ tɔn lɛ́ɛ. É sú mɛ e kpo ɖo toxo yětɔn mɛ lɛ́ɛ sín kún dó.”

²⁰Un lɛ́ kpɔ́n, bó mɔ Amalɛ́ki ví lɛ́ɛ bó ɖɔ: “Amalɛ́ki ví lɛ́ɛ wɛ nyí akɔta e syɛ́n hú akɔta ɖě lɛ́ɛ é. Amɔ̌, yě bǐ wɛ ná vɔ gbe ɖokpó.”

²¹Baláamu mɔ Keni ví lɛ́ɛ lɔmɔ̌ bó ɖɔ: “Keni ví lɛ́ɛ e mi, ayi mitɔn j'ayǐ ɖo to mitɔn mɛ, lě e xɛ e xo adɔ̌ ɖó sókan mɛ ɔ́ nɔ́ vo gbɔn é.

²²É ɖo mɔ̌ có, myɔ wɛ ná fyɔ́ nɔtɛn mitɔn lɛ́ɛ, bɔ Asilíinu lɛ́ɛ ná kplá mi yi kannumɔgbénu.”

²³Un sú xó bó ɖɔ: “Ké! Mɛ̌ ka ná nɔ gbɛ hwenu e Mawu ná wa nǔ gbɔn mɔ̌ é?

²⁴Tɔjíhún ɖé lɛ́ɛ ná gosín Cíplu wá. Kɛntɔ́ ná dó winnyá Asilíinu lɛ́ɛ. Kɛntɔ́ ná dó winnyá Ebɛ́ɛ sín vǐ lɛ́ɛ. Amɔ̌, yě lɔmɔ̌ ná dɔn.”

²⁵Ée Baláamu ɖɔ xó énɛ́ lɛ́ɛ fó ɔ́, é sí te bó ɖidó to tɔn mɛ, bɔ Balaki lɔmɔ̌ wlí ali tɔn bo ɖidó.