Read fon Kɛ́nsísɔ́ 27 Bible Online

Kɛ́nsísɔ́ 27 - fon bible

Kɛ́nsísɔ́ 27

¹Maxla, Nɔwa, Hogla, Miluka kpódó Tíisa kpó ɔ́, vǐ nyɔ̌nu Selofɛxádi tɔn lɛ́ɛ wɛ yě nyǐ. Selofɛxádi ka nyí Hefɛ́ɛ ví, Hefɛ́ɛ nyí Galadi ví, Galadi nyí Makíi ví, bɔ Makíi nyí Manasée ví. Hɛ̌nnu Manasée tɔn ɔ́ mɛ wɛ yě jɔ ɖe. Manasée ka nyí Jozɛ́fu ví.

²Selofɛxádi sín vǐ nyɔ̌nu énɛ́ lɛ́ɛ wá mɔ Mɔyízi kpó vɔ̌sánú-xwlémawutɔ́ Eleazáa kpó, kpó tomɛxó Izlayɛ́li tɔn lɛ́ɛ kpó, kpódó togun Izlayɛ́li tɔn ɔ́ bǐ kpó, ɖo Goxɔ ɔ́ sín ali nu, bo ɖɔ:

³“Tɔ́ mǐtɔn kó kú ɖo gbětótló mɛ. É ka ɖo yě mɛ é kpó Kolée kpó fɔ́n gǔ dó Mawu Mavɔmavɔ jí lɛ́ɛ mɛ ǎ. Lo ɔ́, hwɛ e é ɖésúnɔ hu lɛ́ɛ wú wɛ é kú; é ká ɖó vǐ súnnu ɖé có bó kú ǎ.

⁴Aniwú wɛ mi ná ɖe tɔ́ mǐtɔn sín nyǐkɔ sín hɛ̌nnu tɔn mɛ ɖó vǐ súnnu e é má ji ǎ wú? Mi ná ayǐkúngban ɔ́ ɖě mǐ lɔmɔ̌, lě e mi ná tɔ́ mǐtɔn nɔví súnnu lɛ́ɛ gbɔn é.”

⁵Ée yě ɖɔ mɔ̌ ɔ́, Mɔyízi ɖɔ nǔ e byɔ́ wɛ yě ɖe ɔ́ nú Mawu Mavɔmavɔ.

⁶Bɔ Mawu Mavɔmavɔ ɖɔ nú Mɔyízi ɖɔ:

⁷ “Selofɛxádi sín vǐ nyɔ̌nu lɛ́ɛ sín hwɛ jɔ. A nǎ ná ayǐkúngban ɔ́ ɖě yě, bɔ yě lɔmɔ̌ ná ɖu gǔ tɔn, tɔ́ yětɔn nɔví súnnu lɛ́ɛ ɖɔhun. Yě wɛ a nǎ sɔ́ ayǐkúngban e ná nyí tɔ́ yětɔn tɔn ɔ́ jó ná,

⁸bó ná ɖɔ nú Izlayɛ́li ví lɛ́ɛ ɖɔ ényí súnnu ɖé má ji vǐ súnnu cóbó kú ǎ ɔ́, yě ná zé nǔ e nyí étɔn lɛ́ɛ jó nú vǐ tɔn nyɔ̌nu lɛ́ɛ.

⁹Ényí é má ká ɖó vǐ nyɔ̌nu ǎ ɔ́, yě ná zé nǔ e ná nyí étɔn lɛ́ɛ jó nú nɔví tɔn súnnu lɛ́ɛ.

¹⁰Ényí é má ká ɖó nɔví súnnu ǎ ɔ́, yě ná zé jó nú tɔ́ tɔn nɔví súnnu lɛ́ɛ.

¹¹Ényí é má ká ɖó tɔ́ nɔví súnnu ǎ ɔ́, yě ná zé jó nú hɛ̌nnumɔ tɔn e sɛkpɔ́ ɛ hú hɛ̌nnumɔ tɔn ɖě lɛ́ɛ bǐ ɖo xwédo tɔn mɛ é; sɛ́n ɖé wɛ sɛ́n énɛ́ ɔ́ ná nyí, bó ná ɖo te káká sɔ́yi nú Izlayɛ́li ví lɛ́ɛ, lě e nyɛ Mawu Mavɔmavɔ ɖɔ nú Mɔyízi gbɔn é.”

¹² Mawu Mavɔmavɔ ɖɔ nú Mɔyízi ɖɔ: “Xá Avalímu só élɔ́ jí, bó kpɔ́n to e un ná ná Izlayɛ́li ví lɛ́ɛ ɔ́ sɛ́ dó.

¹³A nǎ kpɔ́n to ɔ́ sɛ́ dó; énɛ́ ɔ́ gúdo ɔ́, hwi lɔmɔ̌ ná kú nɔví towe Aalɔ́ɔn ɖɔhun.

¹⁴Đó hwenu e togun Izlayɛ́li tɔn ɔ́ ɖo xó ba mì wɛ ɖo gbětótló Síni tɔn mɛ ɔ́, mi gbɛ́ nǔ e un ɖɔ mi ní wa ɔ́ bló. Hwenu e yě ɖo sin byɔ́ wɛ ɔ́, mi ɖe mǐmɛ́ e un nyí ɔ́ xlɛ́ ɖo nukún yětɔn mɛ ǎ.” Mɛliba sín sin e ɖo Kadɛ́ci, ɖo gbětótló Síni tɔn mɛ ɔ́ sín xó ɖɔ wɛ é ɖe.

¹⁵Mɔyízi ɖɔ nú Mawu Mavɔmavɔ ɖɔ:

¹⁶“Mawu Mavɔmavɔ, hwi mɛ e ná gbɛ nǔɖíɖó lɛ́ɛ bǐ ɔ́, sɔ́ mɛ ɖokpó ɖó togun ɔ́ nu.

¹⁷ Sɔ́ mɛ e ná sixú nɔ yě nu, ɖo ali bǐ nu é, bónú togun towe ní má cí lɛ̌ngbɔ́ e má ɖó nyinyitɔ́ ǎ lɛ́ɛ ɖɔhun ó.”

¹⁸ Ée Mɔyízi ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Zě Jozuwée Nuni ví ɔ́. Nya ɖé wɛ é nyí bɔ Yɛ ce ɖo jǐ tɔn. A nǎ sɔ́ alɔ towe ɖó jǐ tɔn.

¹⁹A nǎ kplá ɛ wá vɔ̌sánú-xwlémawutɔ́ Eleazáa gɔ́n, ɖo togun ɔ́ bǐ nukɔn, bó ná sɔ́ ɛ ɖó tɛn towe mɛ, ɖo nukún yětɔn mɛ.

²⁰A nǎ ná acɛ e a ɖǒ ɔ́ ɖe e, bónú Izlayɛ́li ví lɛ́ɛ bǐ ná se tónú n'i.

²¹ Amɔ̌, é ɖésúnɔ ná yi vɔ̌sánú-xwlémawutɔ́ Eleazáa gɔ́n, bɔ éyɛ́ ná zé Wulímu dó kan lě e é ná wa nǔ gbɔn ɔ́ byɔ́ nyɛ Mawu Mavɔmavɔ. Bɔ Jozuwée kpó togun Izlayɛ́li tɔn ɔ́ bǐ kpó ná wa nǔ e é ná ɖɔ nú yě lɛ́ɛ bǐ, ɖo ali bǐ nu.”

²²Mɔyízi bló nǔ e Mawu Mavɔmavɔ ɖɔ n'i é. É kplá Jozuwée wá vɔ̌sánú-xwlémawutɔ́ Eleazáa nukɔn, ɖo togun ɔ́ bǐ nukún mɛ.

²³ É sɔ́ alɔ ɖó jǐ tɔn, bó sɔ́ ɛ ɖó tɛn tɔn mɛ, lě e Mawu Mavɔmavɔ ɖɔ gbɔn n'i é.