Read fon Kɛ́nsísɔ́ 28 Bible Online

Kɛ́nsísɔ́ 28 - fon bible

Kɛ́nsísɔ́ 28

¹Mawu Mavɔmavɔ ɖɔ nú Mɔyízi ɖɔ

²é ní ɖɔ nú Izlayɛ́li ví lɛ́ɛ ɖɔ: “Mi ná nɔ́ kpé nukún dó nǔníná e nyí nyɛ Mawu Mavɔmavɔ tɔn lɛ́ɛ wú, bó nɔ́ xwlé mì dó hwetɔnnu; nǔɖuɖu ɖé wɛ é nyí, bɔ è nɔ dó zo bɔ wǎn tɔn nɔ́ nyɔ́ se nú mì.

³“Mi ná nɔ́ zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ ɔ́ we dó sá vɔ̌ e è nɔ dó zo ɔ́ ná ayǐhɔ́ngbe ayǐhɔ́ngbe nú nyɛ Mawu Mavɔmavɔ. Vɔ̌ ɖé wɛ é nyí, bɔ è nǎ nɔ́ gɔn xwléxwlé mì gbeɖé ǎ.

⁴Mi ná xwlé lɛ̌ngbɔ́ví lɛ́ɛ ɖokpó mì zǎnzǎn, bó ná xwlé ɖokpó mì gbadanu.

⁵Mi ná zé olívu sín ami akú lǐtli ɖokpó adaɖé dó nya linfín kilóo atɔn ná, bó ná zé gɔ́ nú kanlin lɛ́ɛ ɖokpó ɖokpó.

⁶Vɔ̌ e è nǎ nɔ dó zo ayǐhɔ́ngbe ayǐhɔ́ngbe tɛgbɛ ɔ́ wɛ nyí vɔ̌ énɛ́ ɔ́, bɔ é ná cí ée è xwlé mì ɖo Sinayíi só jí é ɖɔhun. Vɔ̌ ɖé wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ.

⁷Lɛ̌ngbɔ́ví zǎnzǎn tɔn ɔ́, vɛ̌ɛn lǐtli ɖokpó adaɖé wɛ ná nyí nǔníná e ná jɛ jí é, bɔ è nǎ xwlé mì ɖo Goxɔ ɔ́ mɛ.

⁸Mi ná xwlé lɛ̌ngbɔ́ví wegɔ́ ɔ́ mì gbadanu, bɔ nǔníná e jɛ zǎnzǎn tɔn ɔ́ jí lɛ́ɛ ɖokpó ɔ́ ná jɛ jí. Vɔ̌ e è nɔ dó zo ɔ́ wɛ nyí vɔ̌ énɛ́ ɔ́, bɔ wǎn tɔn nɔ́ nyɔ́ se nú nyɛ Mawu Mavɔmavɔ.”

⁹Mawu Mavɔmavɔ ɖɔ nú Mɔyízi ɖɔ: “Gbɔjɛzán gbe tɛgbɛ ɔ́, mi ná nɔ́ zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ ɔ́ we dó sá vɔ̌ ná nú nyɛ Mawu Mavɔmavɔ. Mi ná zé ami dó nya linfín kilóo ayizɛ́n, bó ná zé gɔ́ ná, bɔ vɛ̌ɛn ná jɛ jí.

¹⁰Vɔ̌ e è nɔ dó zo gbɔjɛzán gbe ɔ́ wɛ, bɔ è nǎ nɔ́ bló gɔ́ nú vɔ̌ e è nɔ dó zo ayǐhɔ́ngbe ayǐhɔ́ngbe lɛ́ɛ, kpó vɛ̌ɛn e è nɔ ná d'é jí é kpó.”

¹¹Mawu Mavɔmavɔ ɖɔ nú Mɔyízi ɖɔ: “Azǎn nukɔntɔn e ɖo sun ɖokpó ɖokpó mɛ ɔ́ gbe ɔ́, mi ná nɔ́ zé nyibúsú we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ; blɔ̌ ɖěbǔ ná ɖo kanlin énɛ́ lɛ́ɛ wú ǎ.

¹²Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín ɔ́ kilóo tɛ́nwe dó nyibúsú ɖokpó ɖokpó jí, bó ná kilóo ayizɛ́n dó agbo ɔ́ jí.

¹³Bó ná ná linfín ɔ́ kilóo atɔn dó lɛ̌ngbɔ́ví lɛ́ɛ ɖokpó ɖokpó jí; vɔ̌ e è nɔ dó zo ɔ́ wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ.

¹⁴Mi ná ná vɛ̌ɛn lǐtli atɔn dó nyibúsú ɖokpó ɖokpó jí, lǐtli we dó agbo ɔ́ jí, bó ná ná lǐtli ɖokpó adaɖé dó lɛ̌ngbɔ́ví ɖokpó ɖokpó jí. Vɔ̌ e è nǎ nɔ́ sá ɖo azǎn nukɔntɔn e ɖo sun ɖokpó ɖokpó mɛ ɔ́ gbe, ɖo xwe ɔ́ mɛ é nɛ́.

¹⁵Mi ná lɛ́ zé gbǎgbá ɖokpó dó sá hwɛsɔ́kɛmɛvɔ́ ná nú nyɛ Mawu Mavɔmavɔ gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ kpó vɛ̌ɛn e mi nɔ ná d'é jí ɔ́ kpó.”

¹⁶ Mawu Mavɔmavɔ ɖɔ nú Mɔyízi ɖɔ: “Sun nukɔntɔn ɔ́ e ɖo xwe ɔ́ mɛ ɔ́ sín azǎn wǒ-ɛnɛgɔ́ ɔ́ gbe ɔ́, mi ná nɔ́ ɖu Dǐndínwáyixwe ɔ́ dó nyɛ Mawu Mavɔmavɔ tamɛ.

¹⁷ Sun énɛ́ ɔ́ sín azǎn afɔtɔngɔ́ ɔ́ gbe wɛ xwe ɔ́ ná bɛ́, bɔ mi ná ɖu xɔ azǎn tɛ́nwe, bó ná nɔ́ ɖu wɔ̌xúxú e mɛ tɔ́n má ɖe ǎ é.

¹⁸Mi ná kplé bó ná sɛn nyɛ Mawu Mavɔmavɔ ɖo gbe e gbe xwe ɔ́ ná bɛ́ é. Mi ná wa azɔ̌ kpaa e mi nɔ wa lɛ́ɛ ɖě gbe énɛ́ ɔ́ gbe ǎ.

¹⁹Mi ná zé nyibúsú wínnyáwínnyá we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ; blɔ̌ ɖěbǔ ná ɖo kanlin énɛ́ lɛ́ɛ ɖě wú ǎ.

²⁰Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín ɔ́ kilóo tɛ́nnɛ dó nyibúsú ɖokpó ɖokpó jí, bó ná ná kilóo ayizɛ́n dó agbo ɔ́ jí,

²¹bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí.

²²Mi ná lɛ́ ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná; hwenɛ́nu ɔ́, è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ dó ta mitɔn mɛ.

²³Vɔ̌ énɛ́ lɛ́ɛ bǐ wɛ mi ná nɔ́ sá gɔ́ nú vɔ̌ e mi ná nɔ dó zo zǎnzǎn tɛgbɛ é.

²⁴Mi ná nɔ́ sá vɔ̌ énɛ́ lɛ́ɛ ayǐhɔ́ngbe ayǐhɔ́ngbe, xɔ azǎn tɛ́nwe; nǔɖuɖu ɖé wɛ é nyí bɔ è nɔ dó zo, bɔ wǎn tɔn nɔ́ nyɔ́ se nú nyɛ Mawu Mavɔmavɔ. Mi ná nɔ́ xwlé vɔ̌ énɛ́ lɛ́ɛ mì gɔ́ nú vɔ̌ e mi nɔ sá ayǐhɔ́ngbe ayǐhɔ́ngbe lɛ́ɛ kpó vɛ̌ɛn e mi nɔ ná d'é jí é kpó.

²⁵Azǎn tɛ́nwegɔ́ ɔ́ gbe ɔ́, mi ná lɛ́ kplé bó ná sɛn nyɛ Mawu Mavɔmavɔ; mi ná wa azɔ̌ kpaa e mi nɔ wa lɛ́ɛ ɖě gbe énɛ́ gbe ǎ.”

²⁶ Mawu Mavɔmavɔ ɖɔ nú Mɔyízi ɖɔ: “Pantekótu gbe, gbe e gbe mi ná hɛn jinukún nukɔntɔn e mi ya lɛ́ɛ wá xwlé nyɛ Mawu Mavɔmavɔ ɔ́, mi ná kplé, bó ná sɛn mì; mi ná wa azɔ̌ kpaa e mi nɔ wa lɛ́ɛ ɖě gbe énɛ́ gbe ǎ.

²⁷Mi ná zé nyibúsú we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ ná.

²⁸Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín ɔ́ kilóo tɛ́nwe dó nyibúsú lɛ́ɛ ɖokpó ɖokpó jí; bó ná ná kilóo ayizɛ́n dó agbo ɔ́ jí,

²⁹bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí.

³⁰Mi ná lɛ́ ná gbǎgbá ɖokpó, bɔ è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ ná dó ta mitɔn mɛ.

³¹Vɔ̌ énɛ́ lɛ́ɛ bǐ wɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ kpódó nǔníná jinukún tɔn e mi nɔ ná lɛ́ɛ kpó. Kanlin e ma ɖó blɔ̌ ɖěbǔ ǎ lɛ́ɛ wɛ mi ná nɔ́ xwlé nyɛ Mawu Mavɔmavɔ, bó ná nɔ́ ná vɛ̌ɛn e xó è ɖɔ ɔ́ d'é jí.”