Read fon Kɛ́nsísɔ́ 29 Bible Online

Kɛ́nsísɔ́ 29 - fon bible

Kɛ́nsísɔ́ 29

¹Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ e ɖo xwe ɔ́ mɛ ɔ́ sín azǎn nukɔntɔn ɔ́ gbe ɔ́, mi ná kplé bó ná sɛn nyɛ Mawu Mavɔmavɔ. Mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ ɔ́ gbe ǎ, ɖó lanzo kúnkún sín azǎn wɛ.

²Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ná ɖo kanlin énɛ́ lɛ́ɛ wú ǎ.

³Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín ɔ́ kilóo tɛ́nnɛ dó nyibúsú ɔ́ jí, bó ná ná kilóo ayizɛ́n dó agbo ɔ́ jí,

⁴bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí.

⁵Mi ka ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná; hwenɛ́nu ɔ́, è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́, dó sá hwɛxɔ́súsú vɔ́ ná, dó ta mitɔn mɛ.

⁶Vɔ̌ énɛ́ lɛ́ɛ bǐ wɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ, kpó éé mi nɔ do zo ɖo azǎn nukɔntɔn e ɖo sun ɖokpó ɖokpó mɛ ɔ́ gbe é, bɔ linfín kpó vɛ̌ɛn kpó nɔ́ jɛ jí lě e sɛ́n ɔ́ zɔ́n gbɔn é. Vɔ̌ énɛ́ lɛ́ɛ e mi ná dó zo ɔ́ sín wǎn ná nyɔ́ se nú nyɛ Mawu Mavɔmavɔ.”

⁷ Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ énɛ́ ɔ́ sín azǎn wǒgɔ́ ɔ́ gbe ɔ́, mi ná kplé, bó ná sɛn nyɛ Mawu Mavɔmavɔ; mi ná blá nu; mi ɖó ná wa azɔ̌ ɖěbǔ ǎ.

⁸Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

⁹Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín kilóo tɛ́nnɛ dó nyibúsú ɔ́ jí, bó ná ná kilóo ayizɛ́n dó agbo ɔ́ jí,

¹⁰bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí.

¹¹Mi ná ná gbǎgbá ɖokpó, bɔ è nǎ dó sá hwɛ súnsún sín kɔ nú mɛ vɔ́ ná, dó ta mitɔn mɛ. Vɔ̌ énɛ́ lɛ́ɛ bǐ ná gɔ́ nú hwɛ súnsún sín kɔ nú mɛ vɔ́ e è blǒ lě e è nɔ bló gbɔn, bó nɔ́ xwlé vɔ̌sánú mì gbe énɛ́ gbe é; ɖó gbe énɛ́ gbe ɔ́, hwɛ súnsún sín kɔ nú mɛ zán ɖaxó gbe wɛ; mi ná sá vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é gɔ́ ná.”

¹²Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ ɔ́ sín azǎn afɔtɔngɔ́ ɔ́ gbe ɔ́, mi ná kplé bó ná sɛn nyɛ Mawu Mavɔmavɔ. Mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ gbe ǎ. Xwe wɛ mi ná ɖu dó nyɛ Mawu Mavɔmavɔ ɔ́ tamɛ; azǎn tɛ́nwe wɛ mi ná ɖu xwe ɔ́ xɔ.

¹³Azǎn nukɔntɔn ɔ́ gbe ɔ́, mi ná ná nyibúsú wǒ-atɔn, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ná ɖo kanlin énɛ́ lɛ́ɛ wú ǎ.

¹⁴Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín kilóo tɛ́nnɛ dó nyibúsú wǒ-atɔn lɛ́ɛ ɖokpó ɖokpó jí, bó ná ná kilóo ayizɛ́n dó agbo we lɛ́ɛ ɖokpó ɖokpó jí,

¹⁵bó ná ná kilóo atɔn dó lɛ̌ngbɔ́ví wǒ-ɛnɛ lɛ́ɛ ɖokpó ɖokpó jí.

¹⁶Mi ná ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná dó ta mitɔn mɛ. Vɔ̌ énɛ́ lɛ́ɛ bǐ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

¹⁷“Azǎn wegɔ́ ɔ́ gbe ɔ́, mi ná ná nyibúsú wěwe, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ bɔ è nǎ dó sá vɔ̌ ná. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

¹⁸Mi ná ná nǔníná linfín tɔn kpó vɛ̌ɛn tɔn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

¹⁹Mi ná ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

²⁰Azǎn atɔngɔ́ ɔ́ gbe ɔ́, mi ná ná nyibúsú wǒ-ɖokpó, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

²¹Mi ná ná nǔníná linfín tɔn kpó vɛ̌ɛn tɔn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

²²Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

²³Azǎn ɛnɛgɔ́ ɔ́ gbe ɔ́, mi ná ná nyibúsú wǒ, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ná ɖo kanlin énɛ́ lɛ́ɛ wú ǎ.

²⁴Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

²⁵Mi ná ná gbǎgbá ɖokpó dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

²⁶Azǎn atɔ́ɔ́ngɔ́ ɔ́ gbe ɔ́, mi ná ná nyibúsú tɛ́nnɛ, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

²⁷Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

²⁸Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

²⁹Azǎn ayizɛ́ngɔ́ ɔ́ gbe ɔ́, mi ná ná nyibúsú tántɔn, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

³⁰Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí lě e sɛ́n ɔ́ zɔ́n gbɔn é.

³¹Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

³²Azǎn tɛ́nwegɔ́ ɔ́ gbe ɔ́, mi ná ná nyibúsú tɛ́nwe, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

³³Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

³⁴Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

³⁵“Azǎn tántɔngɔ́ ɔ́ gbe ɔ́, mi ná bló kplé ɖaxó ɖokpó dó sú ta nú xwe ɔ́; mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ gbe ǎ.

³⁶Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ é nɔ́ fyɔ́ bǐ, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ.

³⁷Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é.

³⁸Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é.

³⁹“Vɔ̌ e mi ɖó ná nɔ́ xwlé nyɛ Mawu Mavɔmavɔ ɖo xwe mitɔn lɛ́ɛ gbe lɛ́ɛ nɛ́; mi ná nɔ́ sá vɔ̌ énɛ́ lɛ́ɛ gɔ́ nú vɔ̌ e mi nɔ dó zo lɛ́ɛ, linfín kpó vɛ̌ɛn kpó e mi nɔ ná lɛ́ɛ, kɔnɖókpɔ́ vɔ́ e mi nɔ sá dó ɖe akpá e mi nɔ dó lɛ́ɛ, abǐ ée mi nɔ zé jlǒ mi ɖésúnɔ tɔn dó sá lɛ́ɛ.”