Read fon Kɛ́nsísɔ́ 3 Bible Online

Kɛ́nsísɔ́ 3 - fon bible

Kɛ́nsísɔ́ 3

¹Aalɔ́ɔn kpó Mɔyízi kpó sín vǐ lɛ́ɛ ɖíe: Hwenu e Mawu Mavɔmavɔ ɖɔ xó nú Mɔyízi ɖo Sinayíi só jí ɔ́, vǐ e yě ɖǒ hwenɛ́nu lɛ́ɛ ɖíe:

² Aalɔ́ɔn ví lɛ́ɛ sín nyǐkɔ lɛ́ɛ ɖíe: Nadavu nukɔngbéví ɔ́ kpódó Avihu kpó, kpódó Eleazáa kpó, kpódó Itamáa kpó.

³È kɔn ami dó ta nú yě, bó sɔ́ yě vɔ̌sánú-xwlémawutɔ́, bɔ yě bɛ̌ azɔ̌.

⁴ Lo ɔ́, Nadavu kpó Avihu kpó kú ɖo Mawu Mavɔmavɔ nukɔn, ɖó yě hɛn myɔ e ma ɖó ná yi Mawu Mavɔmavɔ nukɔn ǎ yi nukɔn tɔn, hwenu e yě ɖo gbětótló Sinayíi tɔn mɛ é. Yě ká ɖó vǐ có bó kú ǎ. Hǔn Eleazáa kpó Itamáa kpó kɛ́ɖɛ́ jɛ́n kpo, bó ɖo vɔ̌sánú-xwlémawutɔ́zɔ́ ɔ́ wa xá tɔ́ yětɔn Aalɔ́ɔn wɛ.

⁵Mawu Mavɔmavɔ ɖɔ nú Mɔyízi ɖɔ:

⁶“Kplá Levíi ví lɛ́ɛ dó así nú vɔ̌sánú-xwlémawutɔ́ Aalɔ́ɔn, bónú yě ná nɔ́ gɔ́ alɔ n'i.

⁷Yě ná nɔ́ wa sinsɛnzɔ́ yětɔn ɖó Aalɔ́ɔn kpódó Izlayɛ́li togun ɔ́ bǐ kpó tɛnmɛ, ɖo Goxɔ ɔ́ nukɔn. Yě ná nɔ́ wa azɔ̌ e ɖo Goxɔ ɔ́ mɛ lɛ́ɛ.

⁸Yě ná nɔ́ kpé nukún dó nǔ e è nɔ zán ɖo Goxɔ ɔ́ mɛ lɛ́ɛ wú bó ná nɔ wa azɔ̌ e ɖo Goxɔ ɔ́ mɛ lɛ́ɛ ɖó Izlayɛ́li ví lɛ́ɛ do mɛ.

⁹Énɛ́ ɔ́, a nǎ sɔ́ Levíi ví lɛ́ɛ jó nú Aalɔ́ɔn kpódó vǐ tɔn súnnu lɛ́ɛ kpó bónú yě ná dó alɔ yě. Izlayɛ́li ví ɖě lɛ́ɛ ná sɔ́ yě jó bǐ gbídígbídí.

¹⁰A nǎ sɔ́ Aalɔ́ɔn kpódó vǐ tɔn súnnu lɛ́ɛ kpó, bɔ yědɛɛ lɛ́ɛ kɛ́ɖɛ́ wɛ ná nɔ wa vɔ̌sánú-xwlémawutɔ́ zɔ́ ɔ́. Nú mɛ ɖěvo e ma nyí vɔ̌sánú-xwlémawutɔ́ ǎ ɖě sɛkpɔ́ azɔ̌ énɛ́ ɔ́, è ɖǒ ná hu i.”

¹¹Mawu Mavɔmavɔ ɖɔ nú Mɔyízi ɖɔ:

¹² “Nyɛ Mawu Mavɔmavɔ ɖésú wɛ sɔ́ Levíi ví súnnu lɛ́ɛ ɖo Izlayɛ́li ví ɖě lɛ́ɛ bǐ mɛ, bó sɔ́ yě ɖó togun Izlayɛ́li tɔn ɔ́ sín nukɔngbéví lɛ́ɛ bǐ do mɛ; ce wɛ yě nyí.

¹³Nǔgbó ɔ́, gbe e gbe un hu Ejípunu lɛ́ɛ sín nukɔngbéví súnnu lɛ́ɛ bǐ ɔ́, un ɖe Izlayɛ́li ví lɛ́ɛ sín nukɔngbéví súnnu lɛ́ɛ kpódó kanlin yětɔn lɛ́ɛ sín nukɔngbéví asú lɛ́ɛ kpó ɖó vo nú nyɛɖée; ce wɛ yě nyǐ. Nyɛ wɛ nyí Mawu Mavɔmavɔ.”

¹⁴Mawu Mavɔmavɔ ɖɔ xó nú Mɔyízi ɖo gbětótló Sinayíi tɔn mɛ; é ɖɔ n'i ɖɔ:

¹⁵“Sɔ́ Levíi ví súnnu lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n. A nǎ sɔ́ súnnu e ɖó sun ɖokpó lɛ́ɛ, kpódó éé ɖó hú mɔ̌ lɛ́ɛ bǐ kpó sín kɛ́n.”

¹⁶Énɛ́ ɔ́, Mɔyízi bló lě e Mawu Mavɔmavɔ ɖɔ é ní bló gbɔn ɔ́, bó sɔ́ kɛ́n yětɔn.

¹⁷Levíi ví lɛ́ɛ sín nyǐkɔ ɖíe: Gɛɛcɔ́ni, Kexáti kpódó Mɛlali kpó;

¹⁸Gɛɛcɔ́ni ɔ́, vǐ tɔn lɛ́ɛ sín nyǐkɔ ɖíe: Livuni, Cimɛ́yi kpó hɛ̌nnu yětɔn lɛ́ɛ kpó.

¹⁹Kexáti ɔ́, vǐ tɔn lɛ́ɛ sín nyǐkɔ ɖíe: Amulámu, Yisexáa, Eblɔ́n, Wuziyɛ́li kpó hɛ̌nnu yětɔn lɛ́ɛ kpó.

²⁰Mɛlali ɔ́, vǐ tɔn lɛ́ɛ sín nyǐkɔ ɖíe: Maxli, Muci kpó hɛ̌nnu yětɔn lɛ́ɛ kpó. Levíi sín hɛ̌nnu lɛ́ɛ nɛ́.

²¹Hǔn Gɛɛcɔ́ni ví wɛ Livuni, Cimɛ́yi kpó hɛ̌nnu yětɔn lɛ́ɛ kpó nyí.

²²Hwenu e è sɔ́ kɛ́n yětɔn ɔ́, súnnu e ɖó sun ɖokpó lɛ́ɛ, kpódó ée ɖó hú mɔ̌ lɛ́ɛ kpó bló děgba ɖě afɔwó-afɔtɛ́nwe kanwe ko (7.500).

²³Gɛɛcɔ́ni sín vǐ lɛ́ɛ ɖó gɔnu ɖó Goxɔ ɔ́ gúdo, ɖo gbadahwe jí.

²⁴Eliyasáfu, Laɛ́li sín vǐ ɔ́ wɛ nyí Gɛɛcɔ́ni ví lɛ́ɛ sín hɛ̌nnugán.

²⁵Gɛɛcɔ́ni ví lɛ́ɛ nɔ́ kpé nukún dó Goxɔ ɔ́ wú; yě nɔ́ kpé nukún dó nǔ e ɖo Goxɔ ɔ́ mɛ lɛ́ɛ, nǔ e ɖo Mawu xwé lɛ́ɛ, nǔ e è nɔ cyɔ́n dó Goxɔ ɔ́ kpódó avɔ e ɖo Goxɔ ɔ́ sín ali nu ɔ́ kpó wú.

²⁶Yě ná nɔ́ kpé nukún dó avɔ e è dǒ xá kɔ́xo ta ɔ́ ná lɛ́ɛ, kpódó avɔ e ɖo Mawu xwé ɔ́ sín ali nu ɔ́ kpó wú. Hǔn avɔ énɛ́ lɛ́ɛ wɛ è dǒ xá Goxɔ ɔ́ kpódó vɔ̌sákpe ɔ́ kpó; yě ná nɔ́ kpé nukún dó kan e è sin dó Goxɔ ɔ́ wú lɛ́ɛ wú. Nǔ e wú yě nɔ́ kpé nukún dó lɛ́ɛ nɛ́.

²⁷Kexáti ví wɛ Amulámu ví lɛ́ɛ, Yisexáa ví lɛ́ɛ, Eblɔ́n ví lɛ́ɛ, Wuziyɛ́li ví lɛ́ɛ kpódó hɛ̌nnu yětɔn lɛ́ɛ kpó nyí.

²⁸Súnnu e ɖó sun ɖokpó kpódó éé ɖó hú mɔ̌ ɔ́, bɔ è sɔ́ kɛ́n yětɔn lɛ́ɛ bǐ bló súnnu děgba we nǔwɔntɔn (8.600). Yědɛɛ lɛ́ɛ wɛ nɔ kpé nukún dó Goxɔ ɔ́ mɛ sín azɔ̌ lɛ́ɛ wú.

²⁹Kexáti sín hɛ̌nnu lɛ́ɛ ɖó gɔnu ɖó Mawu xwé ɔ́ sín afɔligbé.

³⁰Elisafáni, Wuziyɛ́li sín vǐ ɔ́ wɛ nyí Kexáti ví lɛ́ɛ sín hɛ̌nnugán.

³¹Hǔn yědɛɛ lɛ́ɛ wɛ nɔ kpé nukún dó akɔjijɛgbá ɔ́ kpódó távo ɔ́ kpó, kpódó zogbɛ́nhɛnnú ɔ́ kpó, kpódó vɔ̌sákpe lɛ́ɛ kpó, kpódó nǔzínzán e è nɔ dó wa sinsɛnzɔ́ ná, ɖo tɛn mímɛ́ ɔ́ mɛ lɛ́ɛ kpó, kpódó xɔmɛgbovɔ ɔ́ kpó, kpódó nǔ e ɖ'é wú lɛ́ɛ bǐ kpó wú.

³²Eleazáa, vɔ̌sánú-xwlémawutɔ́ Aalɔ́ɔn sín vǐ ɔ́ wɛ nyí gǎn ɖaxó nú Levíi ví lɛ́ɛ sín gǎn lɛ́ɛ. É wɛ nɔ́ nɔ mɛ e nɔ wa azɔ̌ ɖo Goxɔ ɔ́ mɛ lɛ́ɛ nu.

³³Mɛlali ví wɛ Maxli, Muci kpó hɛ̌nnu yětɔn lɛ́ɛ kpó nyí.

³⁴Súnnu e ɖó sun ɖokpó, kpódó ée ɖó hú mɔ̌, bɔ è xa lɛ́ɛ bǐ kpó bló děgba ɖě afɔwó-afɔɖé (6.200).

³⁵Sulyɛ́li Avihayilu sín vǐ ɔ́ wɛ nyí Mɛlali sín vǐ lɛ́ɛ sín hɛ̌nnugán. Yě ɖó gɔnu ɖó Goxɔ ɔ́ sín taligbé.

³⁶Yě wɛ nɔ́ kpé nukún dó Goxɔ ɔ́ sín xwlɛ lɛ́ɛ kpódó atín e è nɔ dó blá wɛ̌n lɛ́ɛ kpó, kpódó dotín lɛ́ɛ kpó, kpódó nǔ e jí dotín lɛ́ɛ jínjɔ́n lɛ́ɛ kpó, kpódó nǔzínzán Mawu xwé ɔ́ gbe tɔn lɛ́ɛ bǐ kpó wú.

³⁷Mɔ̌ ɖokpó ɔ́, yě ná nɔ́ cɔ́ dotín e è tun dó xá xwé ɔ́ lɛ́ɛ, bó ná nɔ́ cɔ́ nǔ e jí dotín lɛ́ɛ jínjɔ́n lɛ́ɛ, kpódó só yětɔn lɛ́ɛ kpó, kpódó kan yětɔn lɛ́ɛ bǐ kpó.

³⁸Mɔyízi kpódó Aalɔ́ɔn kpó, kpódó Aalɔ́ɔn sín vǐ lɛ́ɛ kpó ɔ́, yědɛɛ lɛ́ɛ ɖó gɔnu ɖó Mawu xwé ɔ́ nukɔn, ɖo zǎnzǎnhwe jí. Azɔ̌ yětɔn wɛ nyí ɖɔ yě ná nɔ́ sɛkpɔ́ Mawu Mavɔmavɔ ɖó Izlayɛ́li ví lɛ́ɛ tɛnmɛ, bɔ nú mɛ ɖěvo sɛkpɔ́ ɔ́, è ɖǒ ná hu i.

³⁹Énɛ́ ɔ́, Mɔyízi kpódó Aalɔ́ɔn kpó sɔ́ Levíi ví súnnu éé ɖó sun ɖokpó, kpódó éé ɖó hú mɔ̌ lɛ́ɛ kpó sín kɛ́n lě e Mawu Mavɔmavɔ ko ɖɔ gbɔn nú Mɔyízi é, bɔ yě bǐ bló súnnu adɔ̌kpo ɖě afɔwó (22.000).

⁴⁰Mawu Mavɔmavɔ ɖɔ nú Mɔyízi ɖɔ: “Izlayɛ́li ví lɛ́ɛ sín nukɔngbéví súnnu e ɖó sun ɖokpó lɛ́ɛ, kpódó éé ɖó hú mɔ̌ lɛ́ɛ kpó ɔ́, a nǎ sɔ́ kɛ́n yětɔn, bó ná wlán nyǐkɔ yětɔn.

⁴¹Énɛ́ ɔ́ gúdo ɔ́, a nǎ ɖe Levíi lɛ́ɛ ɖó vo, bɔ yě ná nyí nyɛ Mawu Mavɔmavɔ ɔ́ tɔn, ɖó Izlayɛ́li ví ɖě lɛ́ɛ sín nukɔngbéví súnnu lɛ́ɛ bǐ tɛn mɛ. Mɔ̌ ɖokpó ɔ́, a nǎ jó Levíi ví lɛ́ɛ sín kanlin lɛ́ɛ nú mì, ɖó Izlayɛ́li ví ɖě lɛ́ɛ sín nukɔngbéví lɛ́ɛ bǐ tɛnmɛ. Nyɛ wɛ nyí Mawu Mavɔmavɔ.”

⁴²Énɛ́ ɔ́, Mɔyízi sɔ́ kɛ́n Izlayɛ́li ví lɛ́ɛ sín nukɔngbéví súnnu lɛ́ɛ bǐ tɔn, lě e Mawu Mavɔmavɔ ɖɔ gbɔn n'i é.

⁴³É sɔ́ yě mɛ e ɖó sun ɖokpó lɛ́ɛ, kpódó yě mɛ e ɖó hú mɔ̌ lɛ́ɛ kpó sín kɛ́n, bɔ yě bǐ bló adɔ̌kpo ɖě afɔwó-afɔɖé kanɖé gban-nukún-atɔn (22.273).

⁴⁴Mawu Mavɔmavɔ ɖɔ nú Mɔyízi ɖɔ:

⁴⁵“Đe Levíi ví lɛ́ɛ ɖó vo nú yě ná nyí nyɛ Mawu Mavɔmavɔ ɔ́ tɔn, ɖó Izlayɛ́li ví ɖě lɛ́ɛ sín nukɔngbéví lɛ́ɛ sín tɛnmɛ, bónú yě ná nyí ce. Mɔ̌ ɖokpó ɔ́, jǒ Levíi ví lɛ́ɛ sín kanlin lɛ́ɛ nú mì, ɖó Izlayɛ́li ví ɖě lɛ́ɛ sín kanlin lɛ́ɛ sín nukɔngbéví lɛ́ɛ tɛnmɛ, bónú yě ná nyí ce.

⁴⁶Amɔ̌, nú è sɔ́ kɛ́n yětɔn ɔ́, è nǎ mɔ ɖɔ nukɔngbéví Izlayɛ́li ví lɛ́ɛ tɔn afɔɖé kanɖé gban-nukún-atɔn (273) lán ɖ'é jí. Yě mɛ e lán ɖ'é jí lɛ́ɛ ɔ́, è nǎ vɔ́ yě xɔ.

⁴⁷Hǔn a nǎ yǐ gankwɛ́ atɔ́ɔ́n atɔ́ɔ́n ɖó yě mɛ ɖokpó ɖokpó ta. Gankwɛ́ ɔ́ ná nyí ée è nɔ zán ɖo Mawu xwé, bɔ é nɔ́ da glǎmu wǒ ɔ́.

⁴⁸Bɔ a nǎ bɛ́ gankwɛ́ énɛ́ lɛ́ɛ nú Aalɔ́ɔn kpódó vǐ tɔn súnnu lɛ́ɛ kpó; lě e è nǎ vɔ́ nukɔngbéví e ná lán ɖ'é jí lɛ́ɛ xɔ gbɔn ɔ́ nɛ́.”

⁴⁹Énɛ́ ɔ́, Mɔyízi yí gankwɛ́ e è nǎ dó vɔ́ Izlayɛ́li ví lɛ́ɛ sín nukɔngbéví e lán ɖ'é jí lɛ́ɛ dó xɔ é.

⁵⁰É yí gankwɛ́ énɛ́ ɔ́ afayizɛ́n kɛnnɛ atɔ́ɔ́n (1.365) ɖo nukɔngbéví Izlayɛ́li ví lɛ́ɛ tɔn e è vɔ̌ xɔ lɛ́ɛ bǐ sí. Akwɛ́ e é yí ɔ́ nyí gankwɛ́ e è nɔ zán ɖo Mawu xwé gbe é.

⁵¹Gankwɛ́ e é yí ɔ́, é bɛ́ nú Aalɔ́ɔn kpódó vǐ tɔn súnnu lɛ́ɛ kpó, lě e Mawu Mavɔmavɔ ɖɔ gbɔn n'i é.